¹ Hesu tynyhẽ Espiritu Santoivirã oho jy ysyryva Jordanvi, hãmã Espiritu Santo rahashu pẽnte yvy ikoambaipi. ² Haipe pyta ara pukukue, haivi Ãña pya hãshu. Mba'ẽã hou voka arape, haivi ñymbahy. ³ Hãmã Ãña heishu: Nde ãñete hai Ñanderu Tumpa tayrã, ereshu ko ita tiko shi pãhã. ⁴ Hesu katy heishu: Ñanderu Tumpa kuatia ñẽẽ kavivapy hei: “Ha'ẽã rãnga pãhã reĩ kuareta iko verã, ikotẽvẽ ñõĩpo jyvehe Ñanderu Tumpa ĩñẽẽ.” ⁵ Haivi Ãña raha jyshu pẽnte yvyturusu ĩãrẽ, hãrã mby heshaka sapy aite opaite tẽnta yvy ĩãrẽ õre. ⁶ Hãrã ãña heishu Hesu: She ãmẽẽpo ndekui ko mbaikatu hareka ko tẽntare. Opa mẽ ẽã she kova, hãrã pota ãmẽẽva pepo ãmẽẽ. ⁷ Nỹnỹpỹã rijatyka shy nonde, hareka she mombairã, opapo na ãporãkui. ⁸ Hesu hei jyshu: Syry shy hevi, ãña, shara Ñanderu Tumpa kuatia ñẽẽ kavivape hei: “Ndi Ija Tumpa pepo nỹnỹpỹã rijatyka, hareka haire ñõĩpo rẽĩ." ⁹ Haivi Ãña raha jyshu Jerusalenpe, haipe hupishu tupao ĩãrẽ, hãrã heishu: Nde hai Ñanderu Tumpa Tayrã epo yvype; ¹⁰ Ñanderu Tumpa jykuatia ñẽẽ kavivapy rãnga hei: Ñanderu Tumpa heiposhu jokuevare ñyngareko ndy rehe verã. ¹¹ Hãmã heijy: Ipopepo ndurupii reta potãã ndepy ryrokuahe jytakyrã. ¹² Hesu katy heishu: Ñanderu Tumpa kuatia ñẽẽ kavivapy hei jyve: “Avy pya hããshu Ndi Ija Ñanderu Tumpa". ¹³ Haivi Ãña vãhẽ veãma mãrãrapo pya hã ãveshu Hesu, hãrã sapy ãĩ oho poshy shi. ¹⁴ Hãmã Hesu oujy Galileape tynyhẽ Espiritu Santo, hãrã opa rupii kuaretare kua voka Galilea juri. ¹⁵ Hãrã Hesu Ñanderu Tumpa ĩñẽẽ pyrỹmboihe Sinagogape õre, haipe opavare omombai vasushu. ¹⁶ Haivi Hesu oho Nazaretpe, voka tẽnta hai kuakua vape, hareka jypykuava rãĩmi jyvẽrã, iche Sinagogape putu'uava jy arape, hãrã ñymboy mbĩjeta verã Ñanderu Tumpa kuatia ñẽẽ kaviva. ¹⁷ Hãrã mẽẽshu ñimiñẽẽ iaTumpa ĩñẽẽ mbeu'ia Isaias kuatia ĩñẽẽ, haivi pearã vãhẽshu voka heiva: ¹⁸ Ñanderu Tumpa Espiritu ẽ shendie, hai shy pyhỹrõ ambeu verã mbai haikaviva pavete'ia retape; shymbou amynguera verã pya vyamba õ retape, ambeu mõhẽã jyvẽrã peresoivi, hareka heshamba reta heshajy verã; añono hejaha rei verã voka jyvareha iheare; ¹⁹ ambeu verã Ñanderu Tumpa pya kavi ryheva ara. ²⁰ Hãmã Hesu mbotyjy voka kuatia ñẽẽ, haivi mẽẽjy Sinagogape ñyngareko õrã Hesu vapyjy; hãrã opaite Sinagogape ẽvã mãĩ jyrehe. ²¹ Hãmã Hesu õñepyrõ ĩnjetarã heishu reta: Ko arape iko kova kuatia ñẽẽ kaviva heiva rãĩmi pynynonde. ²² Haivi opavare ĩnjeta kavihe Hesu, hãrã mbyry mãĩhe reta voka ñẽẽ haikaviva heiva. Hãmã pyrãndu ijupe reta: Ha'ẽãra kova Jose tay? ²³ Hesu heishu reta: Ĩmẽrã perepo shee kova ñẽẽ: “Pyrynguera ia, ñymynguera ndi jupe”, hareka perepo she: “Opa hẽnduha rijapo vekua Capernaumpe, vokavapo ko Nazaretpe rijapo jyve." ²⁴ Hesu heijy: Ãñẽte hai pee, mba'etypoTumpa ĩñẽẽ mbeu'ia haihuhava hẽntaipi. ²⁵ Ãñẽte hai pee, heta taupe ĩmẽ mano shia ẽ arykai IsraelpeTumpa ĩñẽẽ mbeu'ia Elia jy arape, haipe mbahapy año pukumi haiviã ĩrã, ñymbahy vasu ẽẽ ko tẽntaperã; ²⁶ tẽvã, taupe ĩmẽ mano shiare Israelpe õre Ñanderu Tumpa mondoã Eliape, pẽnte taupe ĩmẽ mano shia mondoha Sareptape õ, tẽnta Sidon hyvache õvã pẽĩ. ²⁷ Heta ẽjy kuru porãmbava IsraelpeTumpa ĩñẽẽ mbeu'ia Eliseo jy arape; tẽvã mbaveã haire myngueraha, koñẽĩ Naaman Siriape õ myngueraha. ²⁸ Kova mbai hẽndu retarã, Sinagogape iare poshy jyre. ²⁹ Hãmã opa puãrã mohẽshu reta Hesu voka tẽntaivi, hãrã rahashu yvyturusu ĩãrẽ tẽtãmire mbyrymba ẽshiape ityshu verã yvype. ³⁰ Hesu katy kuaretare mbyteipi hasarã, oho shi. ³¹ Haivi Hesu oho Capernaumpe, tẽnta Galileape õ, hãrã mboishu reta kuaretare putu'uava arape. ³² Hãrã mbyry mãĩ reta hai pyrỹmboiva rãĩmi, ĩñẽẽ ĩmẽre mbaikaturã. ³³ Hãmã ĩmẽ'ẽ Sinagogape pẽnte kuimbai mbai poshy ĩmẽrea, hãrã iko haipi hỹnatu sapuke. ³⁴ Mã ẽĩ yry rehe; Mbaivara ĩmẽ ryre yryrehe Hesu Nazareno? Reira opa rivare yryrehe?, she arykua mbavara nde: Nde hai Ñanderu Tumpa mbouva heko haikaviva. ³⁵ Hesu katy ñyngãtashu mbai poshyrã hei: ¡Jasaka, hareka ẽhẽ shi ko kuimbai!. Haivi mbai poshy mombo yvype kuimbai kuaretare hỹnonde, hãrã õhẽshi mbaimba japo hea. ³⁶ Opa kyje retarã hei jyre ijupe: Mãrãva ñẽẽrajy kova? ¡Ko kuimbai rãnga mbaikatu hareka pyrãtãkue ryheve ĩnjetashu mbai poshyre, hãrã haire õhẽ!. ³⁷ Hãrã Hesu mbe uha opa rupii voka tẽnta juri õvã retaipi. ³⁸ Hãrã Hesu puã õhẽ Sinagogaivi iche Simon ho ipe. Haipe Simon hỹreko ishy ñymbairasy ẽ, hãmã hai rehe Hesu jurure jyreshu. ³⁹ Haivi Hesu jyroa ĩãrẽrã ñyngãtashu mbairasykue, hãrã opashi mbairasykue. Haipema taupe pũãrã ñyngareko hereta. ⁴⁰ Kuarasy ichemarã, opaite ĩmẽrea ñymbairasyva mãrãrã gãtuva mbairasykue rahashu reta Hesu; hãrã hai pepentẽĩ ñono ĩãrẽ reta iporã, mỹnguera. ⁴¹ Heta ñymbairasy vekuaivi õhẽ jyve mbai poshyre sapuke jyrerã heiva: Nde hai Ñanderu Tumpa Tay. Hesu katy ñygãtashu mbai poshyre hareka mã ẽĩahe ĩnjeta, shara haire kuaa Kristorã. ⁴² Kõĩma ourã Hesu õhe oho tẽntaivi pẽnte yvy ikoamba kyty. Tẽvã kuaretare heka jyrerã, vãhe jyraha hai iko iape. Pota jocha jyre, potã ohojy shi retarã, ⁴³ tẽvã Hesu heishu reta: Pota ñoĩ rãnga tẽnta ỹngare ambeu jyveshu Ñanderu Tumpa ẽvãpe õ ryheva ñẽẽ, shara ha ẽrã shymbouha. ⁴⁴ Kyrã Hesu iko ñimiñẽẽ Galileape õ Sinagoga retaipi.