¹ opa pũã ñymbaty õ retarã, raha Hesu Pilato hỹnonde. ² Haipe õñepyrõ ĩnjeta porãhe retarã hei: Ko kuimbai rãnga heshaha myporã'ẽ ñanyrẽta. Hei ñamẽmbashu verã kyrypoti mburuvisha vasu Romape'õ, hareka hei ijehe Kristo, mburuvisha vasu. ³ Hãrã Pilato pyrãndushu: Ndera hai Judiore juhuvisha vasu? Hesu heishu: Hai rãnga, nde rereva rãĩmi. ⁴ Hãrã Pilato heishu pai ruvishare hareka kuaretare: She aheshã ko kuimbai mbai porãmba japova. ⁵ Tẽvã haire hei jyvyĩ: Pyrỹmboiva rãĩmi kuaretare opa pũã ijehe, õñepyrõ Galileape hãrã ã'ẽ ko Judeapema jyve. ⁶ Pilato hẽndu Galilea heerã pyrãndu, ko kuimbaira hai Galileape'õ. ⁷ He'iamashu haivarã, mondo Hesu Herodes ẽvãpe, shara hai mburuvisha Galileape'õ, ĩmẽ'õvã jyve Jerusalenpe. ⁸ Herode vya'i Hesu heshamarã ; shara kuriã pota hesha, hareka heta mbai hẽndu he'iaherã, hãrõ'ẽ hesha verã Hesu japo mbai hesha verãra. ⁹ Heta mbai Herodes pyrãndushu, tẽvã Hesu mba'ẽã heishu. ¹⁰ Ĩmẽ'ẽ jyve haipe pai ruvisha hareka Moises mbypara vekua yrỹmboi'iheare, ĩnjeta jyvỹĩ heare Hesu. ¹¹ Herode hareka ñysyndarore jahe jyreherã, ñymby hory heape mymondeka reta pẽnte mondeava mashỹã hareka vevera vekua. Haivi Herode hykuãĩ mondojy Hesu, Pilato ẽvãpe. ¹² Voka arape vãĩ Pilato ikojy kavi hãndi Herode; kova ndei teri ikorã ñymy mõrãmba reta. ¹³ Haivi Pilato mbatyka pai ruvisha hãndi mburuvishare, hareka kuaretare voka tẽntape õre, ¹⁴ haipe heishu reta: Pee rãnga perusheje ko kuimbai, perehe hẽnta õre myporãmba ia; she apyrãndumashuje pỹnynonde, tẽvã porãmba aheshã heje, pee pereheva rãĩmi. ¹⁵ Kỹrãi jyve Herode; hãrã hykuãĩ mboujy ñandy koty. Pyheshama rãnga japoã mbai porãmba, jukaha verã. ¹⁶ Hãrã ãnupãkarã, ãma ẽĩpohe oho jykui. ¹⁷ Pilato mohẽjy ñõĩposhu reta, pẽnte mbyperesoarea voka aretepe. ¹⁸ Tẽvã opaĩ ñymbaty õre õñepyrõ sapuke jyrerã hei: Juka vokava. Mohẽjy ore Barrabas! ¹⁹ Barrabas rãnga mbyperesoa mbai porãmba japo i voka tẽntaperã, hareka purukarã. ²⁰ Pilato potatẽ Hesu ma ẽĩ jyherã, hykuãĩ ĩnjeta jyshu reta. ²¹ Tẽvã haire hỹnatuve sapukerã hei: Mbysavava kurusure! Mbysavava kurusure! ²² Haipe Pilato mbahapy heape pyrãndujy: Mãrã'ĩrãra? Mbaiva porãmbara japo kova? She aheshã japo mbai porãmbava jukaha verã. Ãnupãkaĩpo, haivipo ãma ẽĩhe oho jykui. ²³ Haire sapuke jyrevape jurure jyvyĩ mbysavava verã kurusure; hỹnatu jyvyĩ sapuke jyre hãndi pai ruvishare, japoashu peve haire potava. ²⁴ Haipe Pilato hei japoa verã haire jurureva. ²⁵ Hãrã mõhẽã jyshu reta Barrabas, mbai porãmba japo i hareka purukarã mby peresoa vekua, shara haire jurure; haivi mẽẽshu reta Hesu pota japohea, japohe verã. ²⁶ Hãrã rahama reta Hesu jukaha verã kusurerã, ñyvãĩti hãndi reta pẽnte kuimbai tẽnta Cirenepe õ Simón he'iashua, ñuuvi ou jyva. Hãrã hupishu reta ñyvã penkare kurusu, raha verã Hesu haykue. ²⁷ Heta kuareta hareka taupere tẽntape õre oho haykue, sapuke, hãpĩrõ reta. ²⁸ Hesu jere mãĩherã heishu: Pee taupe Jerusalenpe pẽĩva, avy shãpĩrõpi; peii piñapĩrõ hareka pyny membyre. ²⁹ Ou pokui ara kuaretare hei verãpe: “Vy a pokui taupere membymba, hãndi puruamba vare, hareka sanjay mba'etyrea mykambu verã." ³⁰ Haipe kuaretare õñepyrõpo heishu yvy turusure: “Pea yryrehe”; hareka yvy ñakãndu vape: “Opa yrasoi, ñemĩã verã” ³¹ Yvyra hoky hovy õre kỹrã japo retarãra, marãĩpo jipi vekua mba'ẽãpo japohe reta? ³² Raha jyve hãndi mõkue kuimbai puruka vekuare, Hesu juka hãndi verã kurusure. ³³ Vãhẽma jyraha “Tanka kãvẽ renda” he'iashua perã, mbysavava reta Hesu kurusure, hareka mõkue kuimbai puruka vekuare; pẽnte ñonoha jakata kyty, ĩrũ jasu kyty. ³⁴ Hesu mbysavavama kurusu rẽrã hei: Sheru, heja reíshu reta, shara kuã reta japo ñynoĩva. Hãrã syndarore ity reta dado, kuaa verãre mbava rapo raha Hesu monde vekua. ³⁵ Haipe hẽnta õre mãĩ jyrehe ikova, mburuvisha retave ñymby hory herã, hei: Hetavape mondojepe, ãẽte hai KristoÑanderu Tumpa Rayrã, kyrãĩ tijapo jyve ijehe. ³⁶ Kỹrã jyve syndarore ñymby hory jyvehe, ñymbojahe retarã mby ho uka jyre vino irova, ³⁷ hãrã heishu: Nde hai Judiore juhuvisha vasurã, ndeii ñymondo jepe. ³⁸ Hesu ñãka ĩãrẽ ñonoajy japo vekua hee mbyparava Latín hareka Hebreo ĩñẽẽpe heiva: “Kova hai Judiore juhuvisha vasu." ³⁹ Haipe puruka vekua pẽnteva kurusure mbysavava hãndiva, poshy ryheve heishu: Nde hai Kristorã, ndeii ñymondo jepe hareka ore jyve. ⁴⁰ Tẽvã ĩrũ kuimbai ñyngãtashurã hei: Rykyjeãra shi Ñanderu Tumpa, jyvacheĩ porãmbape ñaĩva? ⁴¹ Ñande rãnga hekope kavi jahasa asy ñãĩ, shara mbai porãmbava jajapo ñande; tẽvã ko kuimbai japoã hai mbai porãmbava. ⁴² Haivi heijy: Hesu, nymanduave shy rehe kui, reijyma nerreino perã. ⁴³ Hesu heishu: Ãẽtẽĩteva hai nde, ko arapepo rĩmerẽi shendiekui vate arape Sheru Tumpa ẽvãpe. ⁴⁴ Haivi voka ara mbyteipi sapy ãĩ opa pyntu yvy ĩãrẽ ka'arurã la (3) peve. ⁴⁵ Kuarasy o verã sapeveã hareka tupaope õ sabana tivishava mbyteipitei soro. ⁴⁶ Haipe Hesu hỹnatu sapukerã hei: “Sheru, ndepope ãñono shy rykove.” Kỹrãma heirã, mano. ⁴⁷ Syndarore juhuvisha hesha ikovarã, õmombaishu Ñanderu Tumpa, hãrã hei: “Ãñete ñõĩmba ko kuimbai hai heko kaviva.” ⁴⁸ Opaite kuaretare ñymbaty vekua hareka hesha vare ko ikova, mbyvya ãĩterã pitiaipi ñupajy jyraha reta. ⁴⁹ Hesu ñi'ĩrũre hareka taupere Galileaivive oho hipi vekuare, mbyryivĩ mãĩjy rehe ko ikova. ⁵⁰ Iko haipe pẽnte kuimbai heko kaviva Jose he'iashua, tẽnta Arimatea Judeape õ, hai jyve Judiore juhuvisha pẽnteva. ⁵¹ Ko Jose jyve hãrõ õ Ñanderu Tumpa irreino, hãrã ẽ ẽã paire juhuvisha jatyrã heivape hareka japovape; ⁵² hai oho Pilato ẽvãpe hãrã jurureshu Hesu hetekue. ⁵³ Mbyvejyma kurusui virã, mamapy pẽnte sabana, haivi raha ñono tã õvẽre ẽvãpe, ita jo'oavape; poryamba teri õpe. ⁵⁴ Voka ara hai Judiore õĩ kavi õ putu'uava jy ara vãhẽ serimava pevarã. ⁵⁵ Taupere mĩ'ĩrũshu vekua Hesu Galileaivive, jyraha mãĩhe tã õvẽ ẽvãpe, hesha verãre mãrãra ñonohãpy Hesu hetekue. ⁵⁶ Haire oujyma hẽntaperã myhẽvã mbai pisheka kaviva ñono he verã Hesu hetekue; haivi putu'uava jy arape putuu ñynoĩ reta, Moise mbypara vekua heiva rãĩmi.