¹ Semana õñepyrõãpe, kõ ẽĩ, taupere oujy reta tã õvẽ ñonõã vape, veru mbai pisheka kavikue; myhẽvã vẽkuare; mĩ'ĩrũshu reta ỹngava taupere. ² Vãhẽ jyraharã hesha reta mbysyrya mamba shi ita jo'oava juru mbotya pya; ³ iche reta ita jo'oavapy manõã ñonõã vape, tẽvã heshã reta Hesu hetekue. ⁴ Hãrã opa kyje retarã kuaã mbaivara japopo reta, haipe ñymboja he reta monkue kunumi mondea opa himbipeva; ⁵ kyjeite retarã opa yvy kyty mãĩ reta, tẽrã ko kunumire heishu: Mãrã'ĩrãra pyhekapi mano vare pãũpi ĩmeĩ ia? ⁶ Mba'ety kope hykove jyma. Pymandua he hai hei perã vẽkua, Galileape teri irã; ⁷ heirã: Ko Kuimbai rãĩmi ou vekua yvy ĩãrẽ, mẽ ẽã ñõĩpo kuimbai heko porãmba iare ipope, mbysavava verã kurusure hareka hykove jypo mbahapy arape. ⁸ Haipe haire manduahe Hesu hei vekua, ⁹ oho jyma reta tã õvere õĩ virã, mbeushu reta (11) mboire vekuare hareka opavare. ¹⁰ Maria Magdalena, Juana, Maria Jacobo ishy hareka taupere oho hãndivare mbeushu reta kova mboire vekuare. ¹¹ Tẽvã timimboire pevarã hãĩmba kuaamba iare heivarã, rojããmbashu reta. ¹² Hãmemba Pedro õhẽrã ñani oho, tã õvẽ ñonõã vape, mãĩ i hapyperã hesha sabana kuerei ẽẽ hãrã ohojy hẽntape mbypy ã ko jehuva. ¹³ Voka arape monkue mboireare oho pẽnte tẽnta Emaus he'iashuape, pytava (11) kilometro Jerusalenvi. ¹⁴ Ĩnjeta jyraha he opaite iko vekuare; ¹⁵ kỹrã ĩnjeta hareka pyrãndu jyraha ijupevape, Hesu teiva ñymbojahe retarã oho hãndi reta. ¹⁶ Hesha tẽvãre kuãã mba reta mbavara hai. ¹⁷ Hesu pyrãndushu reta: Mbai vara pĩnjeta peho piheje pehupi? Mãrã'ĩrãra py vy ãpi? ¹⁸ Pẽnte hairetava heishu: Opava rãnga kuaa Jurusalenpe iko vekua. Nehĩ ra haipe rẽivã rikuaã ko mbai jehurãva haipe? ¹⁹ Hesu heishu reta: Mbaivara iko? Haire heishu: Hesu Nazareno ryheva, hai rãnga ñimiñẽẽ i vekua, mbaikatuva japovape hareka ĩñẽẽpe Ñanderu Tumpa hãndi opaiteva hẽnta õre hỹnonde; ²⁰ mãrãra pai ruvishare hareka ururuvishare mẽẽ reta jukaha verã, hãndi mbysavava verã kurusure. ²¹ Ore rãnga hãrõã shi hai verã tẽnta Israelpe pyhỹrõ verã; ĩãrẽve ã'ẽ mbahapy aramajy kova mbai jehuva. ²² Ĩmẽ'ẽ taupere yry ryheva tẽvãre opa yryngyje, kõ ẽĩ mba jyraha reta tã õvere ẽvãperã, ²³ hãrã heshãma reta Hesu hete kuerã, heijy jyveru reta heshavare Tumpa jokueva, heishuare Hesu hykove jymava. ²⁴ Haipema ĩmẽ'ẽ ĩrĩ ĩrũva oho vekua tã õvẽre ẽvãpe, haipe hesha taupere heiva rãĩmingãtĩ; tẽvã heshã Hesu. ²⁵ Haipe Hesu heishu reta: ¡Pee tykove mbaimba kuaaseva, py pya tantaĩteimba pyroja verãTumpa ĩñẽẽ mbeu'iare hei vekua!. ²⁶ Katuarã mbapo Kristokỹrã rãni hasa haivi iche verã hĩmbipeape Tuu ẽvãpe? ²⁷ Ôñepyrõ Moisevi harekaTumpa ĩñẽẽ mbeu'iare hei vekuaivi, haivi kuaakashu reta opaite kova mbai Ñanderu Tumpa kuatia ñẽẽ kavivape he ia he vekua. ²⁸ Hãrã vãhẽ oho tẽnta haire jyrahava perã, Hesu japo mbyryve oho verã rãĩmi. ²⁹ Haireta jocha jyreshurã hei jyvyĩshu: Pytave kope, ka'aruitema rãnga hareka kuarasy ichema. Haipe Hesu iche o ipe pyta hãndi verãre. ³⁰ Vapyma ñynõĩ hãndi mesaperã, heky pãhã, ñymboi ĩãrẽrã pysẽã mẽẽshu reta. ³¹ Haipe kuaa jyshu hãrã mbyry mãĩ reta, tẽvã hai mãĩ ñynõĩ heapẽĩ opa kañy. ³² Hãrã hei ijupe reta: Ña ñanduãrãje ñandy pyape hendyvasĩvã ñanditiape hai ĩnjeta ou ñande pehupirã hareka kuaaka ñande Ñanderu Tumpa ĩñẽẽ? ³³ Haipe vãĩmba pũã retarã oho jy Jerusalen kyty, haipe hesha (11) timimboire ñymbaty õre, hareka ñĩ ĩrũre, ³⁴ hãrã haire hei: Ãñẽte ñoĩ rãnga hykove jymba Ñanderu Kristo, hãrã Simón hesha mba. ³⁵ Hãrã haire mbeu mbaivara jehushu reta pee hupi, hãndi mãrãra haire kuaajyshu reta Hesu pysẽã pãhãrã, ³⁶ Haire ĩnjeta ñynõĩ kova mbairerã, Hesu ñymboyshu reta mbyteperã hei: Pypya kavitẽño. ³⁷ Haire opa kyje mõã hesha reta tykove kuerã. ³⁸ Hesu heishu reta: Mãrã'ĩrãra opa pykyje? Mãrã'ĩrãra kỹrã py pyape pyroja nũngã? ³⁹ Pymãĩ she po hareka she pyre, she ñõĩ rãnga. Pypoko shy rehe hãrã shy resha piko, espiritu rãnga ho oã hareka kãvẽã py heshava rãĩmi she arekova. ⁴⁰ Voka opa heirã, mby heshaka reta ipo hareka ipy. ⁴¹ Tẽvã rojanũnga mba reta, vy aite hareka hesha rãĩte retarã; Hesu heishu reta: Ĩmẽra pyree kope jau verã? ⁴² Haipe haire mẽẽshu pira mykã ẽãvã pysevẽ hareka hẽẽvã, ⁴³ hãmã hekyrã hou hỹnonde reta. ⁴⁴ Haivi heijyshu reta: Kova rãnga haikue haipee vekua, ãĩ mẽ teri ãĩ pynypãũ perã, shara iko ñõĩpo hekope kavi Moise mbypara vekua hei shy rehevape hãndiTumpa ĩñẽẽ mbeu'iare jy kuatiape hareka Salmore. ⁴⁵ Hãmã kuaakashu reta Ñanderu Tumpa jykuatiape heiva, ⁴⁶ heishu reta: Kỹrã rãnga hei Kristomano hareka hyko verã pũã jyvẽrã mano vare pãũvi mbahapy arape; ⁴⁷ hareka tymbe uha hee opa tẽnta retaipi, oujy verãre Tumpa kyty hai hejarei shi verã mbai porãmba japo vekuare hãrã peñepỹrõ Jerusalenvi. ⁴⁸ Pee pyheshava kova pymbeupo jyve. ⁴⁹ Hãrã She amboupo pẽãrẽ kui Sheru heiva mẽẽpe verã; pee pypytãi kui ko tẽnta Jerusalenpe ou peve pẽãrẽ mbaikatu ouva ara vateivi. ⁵⁰ Haivi Hesu rahashu reta Batania hyvache, hupi iporã ohovasashu retaã. ⁵¹ Ohovasa teri ẽshuare syry shi retarã rahaha ara vatepy. ⁵² Haire omombai vasushurã, vy ape ohojy Jerusalenpe, ⁵³ hãrã haire tupaopẽĩ jyre pyrahe hareka omombai verã Ñanderu Tumpape. Amen.