¹ Vãhẽserima arete pãhã jylevaduramba, “pascua” he'iashua, ² hãmã pai ruvisha hareka Moise mbypara vekua pyrỹmboi'iheare, heka mãrãrapo juka reta Hesu, shara kyjeshi reta kuaretare. ³ Haivi Ãña iche Judas Iscariote pyape, hai jyve pẽnteva 12 Hesu mboireare, ⁴ hãrã oho ĩnjeta hãndi pai juhuvisha hareka tupao ñyngareko'ẽheare, haivi mãrãrapo mẽẽ Hesu haire ipope. ⁵ Hãrã haire vy'a jyre, hareka pẽnte ñẽẽpẽĩ ñynõĩ, mẽẽshu verãre kyrypoti; ⁶ haipe Judas ĩñẽẽ mẽẽshu reta, hãrã heka mãrãrapo mẽẽ Hesu haire ipope, kuaretare mba'ety ẽrã. ⁷ Hãmã vãhẽ pãhã jylevaduramba ara mby'areteavaperã, juka verãre pẽnte avisharay Pascua pevarã. ⁸ Hesu mondo Pedro hareka Juan, hãrã heishu: Pekua, pymyhẽvã ñande Pascuape avisharay jau verã. ⁹ Haire pyrãndushu: Mãperapo ripota myhẽvãhã Pascuape jau verã? ¹⁰ Hesu heishu reta: Pichema tẽntaperã, pĩvãĩtipo hãndi pẽnte kuimbai yy rahava kambushipy. Pekua hipikui, hẽntape ichejy ohopeve. ¹¹ Hãrã pereshukui oo ija: “Pyrỹmboi'ia rãnga pyrãnduka nde: Mapera'ẽ oo pytaha'õpe Pascua hou hãndi verã mboireare?” ¹² Hãrã oo ija pynymbyheshakapo pẽnte oo vate'õ tivishava opama ẽvã, haipe jau verã Pascua pymyhẽva ñande. ¹³ Haire ohorã, hesha Hesu heiva rãĩmi katĩ. Hãrã haipe mỹhẽvã reta Pascuape mby arete verã. ¹⁴ Hãmã vãhẽma horarã, Hesu vapy mesape mboireare hãndi; ¹⁵ Hesu heishu reta: Kurĩã potatẽ hau penendie kova cena pascua ryheva, ndeiteri ãmanorã. ¹⁶ Shara ambeu kavipe hauvẽãmapo penendiekui kova cena, opa iko peve mburuvisha vasurã vate araivi ouva ẽẽ verãpe. ¹⁷ Haipe heky vaso vino ẽpyarã, jurureshu Ñanderu Tumparã heishu mboireare: Kõ'ẽ, peupãvẽĩ; ¹⁸ hãrã haijy pee, hauveamapo ko uva tyy oujypeve mburuvisha vasurã vate araivi ouva. ¹⁹ Haivi hekyjy pãhã; jururejyshu Ñanderu Tumpa, pyseã mẽẽshu retarã hei: Kova hai shyrete, mẽ'ẽã pyndyrehe verã. Pynymandua shyrehe verã, pijapo kova. ²⁰ Kỹrã japo jyve opa karurã, heky vaso vino ẽpyarã hei: Ko vino hai shuruvy, ijakuava pyndyrehe verã. ²¹ Hãrã shymẽẽ verã, kope vapy'ẽjyve shendie mesape. ²² She Kuareta tay rãĩmi ai vekua yvy ĩãrẽ, amanoñõĩpo ñoñoãsheva rãĩmi. Tẽvã shymẽẽ vekua mbai porãmba'aitevevapo jehushukui! ²³ Haipe õñepyrõ pyrãndujyre ijupe, mbavarapokui Hes pysyka verã. ²⁴ Hesu mboireare heheimii jyre ijupe, mbavarapo haire mbytepe mbaivasu vekui. ²⁵ Hesu heishu reta: Opaite tẽntape'õre juhuvisha haire ipope ĩmẽre, hareka mĩñaka'ẽshuare pota he'iahe mbai haikaviva japo'ia. ²⁶ Tẽvã pee ha'ẽã kỹrãpi verã; hãrã pota mbai vasuve ikoshia pynymbytepe, mãĩnungamba kuaateriva rãĩmi tiko, hãrã mburuvisha vasu tiko jokuehareva rãĩmi. ²⁷ Mbavara hai mbaivasuveva, ko vapy'õ mesape karu verã, ti jokuehareara? ha'ẽãrapo mesape vapy'õ? Hãmã she aiko jyve pynymbytepe jokueharea rãĩmi. ²⁸ Pee rãnga pikoñoĩtẽ shendie mbai porãmba ahasa ãĩrã. ²⁹ Hãrã she ajapopo pyndyhevi mburuvisha vasu, Sheru japo shyheviva rãĩmi, ³⁰ she ãĩvape pykarupo hareka pimbyupojyve shymesape. Haivi pyvapypo vapyhapya himbipeva, pimbivachekashu verã 12 kavi'õ tẽnta Israelvare. ³¹ Haivi Hesu heishu Pedro: Simón, Simón, Ãña jururema pyndyrehe opa pynymomõhẽ verã, trigo mbovaharã mbyvavaha'õ rãĩmi. ³² Tẽvã airureshuje Ñanderu Tumpa, potãã nykangy rirojakueperã. Hãrã opama hasa mbai pohyvarã, mykỹrẽy jyshukui ni'ĩrũre jyroja nõĩ shyrehe verãre. ³³ Simon heishu: Sheja, ãĩ rãnga shymbyperesoha hareka ãmano nendie verã. ³⁴ Hesu heishu: Pedro, haiponde ã'ẽvãĩ ndeiteri uru ñyrãã'ẽrã, mbahapy kavipo shiñomikui, shykuamba. ³⁵ Haivi Hesu pyrãndushu reta: Apỹrỹmõndo kyrypoti hyru, ho'uava hareka pepy ryhevambaperã. Pymbeushe, mbaivajyra mba'etype? Haire hei: “Mba'ety ”. ³⁶ Hesu heishu reta: Ã'ẽ haipojy pee, vosa ĩmẽreva tyraha hareka kyrypoti hyru; kyse pukuva mba'etyrea hepyre tovende mondeva, hãrã tova ijupe pẽnte. ³⁷ Hai rãnga pee potanõĩ opa iko shyrehe hekope kavi Ñanderu Tumpa ĩñẽẽ kaviva heivape: “Rekoashu heko porãmbava rãĩmi”. Shara opaite he'ia shyrehe vekua, opapo iko. ³⁸ Haire hei: Yreja, kõ'ẽ mõkue kyse pukuva. Hai heishu reta: Haikavima, ñaĩnjeta! ³⁹ Haivi Hesu õhẽ oho yvyturusu Olivo he'iashuape hai ohoñõĩ'õpe, hãrã mboireare oho jyve hipii. ⁴⁰ Vãhẽma jyraharã Hesu heishu reta: “Pirure katu, pijepyhe verã mbai porãmba oupeva”. ⁴¹ Pẽnte ita vasu momboava rãĩmi, Hesu ohoshi mboireare. Haipe ĩñesu ñymboi verã, ⁴² haivi hei: Sheru, nde ripotarã, mbyhasa shyhevi ko vyamba ousheva. Tẽvã avy tiko she aipotava, koñeĩ tiko nde ripotava. ⁴³ Haipe ijeshakashu pẽnte Tumpa jokueva vate araivi ouva, mỹpyrãntashu verã. ⁴⁴ Hãrã Hesu vyamba japyraha'õĩvi, ñymyrõĩteve jurureshu Tuu; haivi tykyshi pirie yvype turuvykue rãĩmi. ⁴⁵ Pũãjymã jurure õĩvirã, ohojy mboireare ẽvãpe haipe hesha opa oche, vyamba japyraha retarã, ⁴⁶ hãrã heishu reta: Mãrã'ĩrãra pechepẽĩ? Pupũã hareka pirure, mahẽ peakui mbai porãmbape. ⁴⁷ Hesu ĩnjetateri'ẽ vekua, vãhẽ ou kuareta hetava. Haipe pẽnteva 12 Hesu mboireare Judas he'iashua hỹnonde oushu reta; ñymboja Hesu ẽvãperã hovape pyteshu. ⁴⁸ Hesu heishu: Judas, pẽnte tyrova pyteavapeĩrã rymẽẽ, Kuareta tay rãĩmi ou vekua yvy ĩãrẽ? ⁴⁹ Hesu ẽẽ hãndiare, heshama mbaivara iko'ẽrã pỹrãndu jyreshu: Iri ija, hỹpeñahãrapo reta kyse pukuvapy? ⁵⁰ Haipe pẽnte haire retava, pai ruvisha jokuerea jasyjashi nambi hyvaisho, jakata kyty'õ. ⁵¹ Hesu hei: Pyma'ẽĩ hese. Haipe pokojyhe jokueharea nambirerã, mỹnguera. ⁵² Hesu heishu pai ruvisha hareka tupao ñyngareko'ihea juhuvisha, hãndi karaire; ou hekavare: “Mãrã'ĩrãra kyse puku hareka yvyra ryheve pei shyraha verã, mbai porãmba ajapo aiva rãĩmi? ⁵³ Opa ara rãnga tupaope aiko pynymbyteipi, mba'ẽã pijapo shyrehe. Tẽvã kova hai pyndy'ora, hareka ãña ruvisha ñymbaikatu verã jy'ara”. ⁵⁴ Haivi pysyrã rahashu reta Hesu pai ruvisha hẽntape; Pedro mbyryĩ oho'ijyve haykue. ⁵⁵ Haipe kora mbytepe tata jatapy retarã vapy juri reta; Pedro vapy'ẽjyve haire mbytepe. ⁵⁶ Haipe pẽnte taupe jokueharea hesha Pedro vapy'ẽjyve tata hyvacherã, mãĩkaviherã hei: Koo ia rãnga iko'ijyve hãndije. ⁵⁷ Tẽvã Pedro ñomirerã hei: Kuiñatãĩ, aikuãã rãngashu. ⁵⁸ Jeiima'ẽrã ỹngava heshajyrã, heishu: Nde rãnga haijyve Hesu ryheva. Pedro hei: Kuimbai, ha'ẽã rãnga. ⁵⁹ Haivi ĩmẽve'ẽjy ou heishuva: añetẽĩte rãnga voka'ia iko'ijyve hãndi, shara hai jyve Galileape'õ. ⁶⁰ Pedro katy hei: Nde kuimbai, aikuãny she rere rẽĩva. Haipe Pedro ĩnjeta teri õ, uru ñỹrãã. ⁶¹ Haipe Hesu jererã mãĩhe Pedro. Haivi Pedro manduahe Hesu heishu vekua: “Ko ara ndei teri uru ñyrããrã, mbahapy jypo rerekui shy kuaamba.” ⁶² Hãmã Pedro õhẽ katua perã, hỹnatu jaheo i. ⁶³ Haipe kuimbaire Hesu ñyngareko ẽ heare, ñymby hory jyrehe hareka nũpa jyre reta; ⁶⁴ hesa jokuashi retarã, nũpa jyre hovaipi, hãrã heishu: “Mbeuno, mbavara ndyrovaipi nũpa?” ⁶⁵ Haipe heta ñẽẽ porãmba vekua heishu reta. ⁶⁶ Kõĩma jyrã, ñymbaty reta karai kuakua vare, voka tẽntape õre, pai ruvishare hareka Moise mbypara vekua pyrỹmboi i heare. Haivi raha reta Hesu ñymbatyha õperã, haipe pyrãndushu: ⁶⁷ Mbeu oreno, ndera hai Kristo? Hesu heishu reta: Hai rãnga haiperã, she rojã popikui. ⁶⁸ Mbai apyrãndu perã, pymbe uãpo she hareka pypoi iãvãĩ pojy shyhevi. ⁶⁹ Tẽvã, ã'ẽ vãĩpo ko Kuareta tay rãĩmi ou vekua yvy ĩãrẽ vapykui Ñanderu Tumpa ñymbaikatu veva jakata kyty. ⁷⁰ Haivi opaiteva huvishare pyrãndushu: Akuarã ndera hai Ñanderu Tumpa Tay? Hesu heishu reta: Hai rãnga, pee pereva rãĩmi. ⁷¹ Haipe haire hei: Mbavara katupo mbeuvejy ñande. Ñande teiva rãnga ñahẽndu ĩñẽẽ.