¹ Hesu tupaope'ẽrã mãĩ'ẽhe iko katuvare ñono ñynõĩ kyrypoti Ñanderu Tumpape mẽ'ẽãva hyrupe. ² Hesha jyve taupe ĩmẽ manoshia pavete'ia veru ñonojyve mõkue nikerekuemi, ³ hãrã Hesu hei: Ãñẽtẽĩteva hai pee, ko taupe ĩme manoshia pavetetẽ'ia, hetavee mẽẽshi hai opava retaivi. ⁴ Shara opaiteva hembyshuvare veru mẽẽñynoi kyrypoti, tẽvã hai pavetete'ia veru opa mẽẽ karutẽhe verã. ⁵ Hãrã ã'ãmore heihe tupaope'õ ita mashỹãva ryheva, hareka kyrypoti Ñanderu Tumpape mẽ'ẽãva hyru, hãrã Hesu hei: ⁶ “Kova mbai pymãĩ pẽĩheva hai pee, vãhẽpokui ara opa ñymbai verãpe, pẽnte ita jyvohy'õmba ñymbou'ẽ verã”. ⁷ Hãmã pyrãndushu: “Pyrỹmboi'ia, mbaiperapo ikokui kovare? Hãrã mbai heshaha verãrapo'ẽkui kova mãĩnũnga ikoma potãrã?” ⁸ Hesu heishu reta: Pymãĩ kavi. Avy piñymbytavyka. Hetapo'ẽ shyreepe ourã heiva: “She hai Kristo, kova hai ara”. Tẽvã avy pekuakui haykue. ⁹ Pyhẽnduma ñyrãrõ vasu hỹrãkũã ourã; avy pykyje. Shara kova ikoñõĩpo, vokava he'iseã vãhẽmava ara japyma verãpe. ¹⁰ Haipe heivejyshu reta: Opapo hẽnta'õre pũã jipive, hareka mburuvishare opapo ñyrãrõ ijupi; ¹¹ õĩpo yvyryry vasu, mbairasy hareka ñymbahy opa rupi. Hãrã mbai heshaha verã tivishava jykuaapo vate arare. ¹² Tẽvã ndei kova ikorã pypysyapo, hareka pynymoñahãpo, pynymbyperesoa verã hareka pinimĩjeha verã Sinagoga mburuvisha vasure hỹnonde, shyryheva peerã. ¹³ Hãrã kyrãpo ĩmẽpyre shyreepe pĩnjetaheshu verã. ¹⁴ Hãrã avy pejepy'apyhe mãrãrapo pĩnjetarã pijochashi. ¹⁵ Shara sheepo amẽẽpekui ñẽẽ hareka mbaikuaakue, katumba pyndyvaishore jepy pyndyrehe verã. ¹⁶ Hãrã peru retaavepo pũã pyndyrehe, pyndyryvyre, pynyrẽtãre hareka pini'ĩrũre: Ĩmẽpo'ẽjy ã'ãmore peeva jukahava. ¹⁷ Shimimboiperã opavare pyndyreshatããpo. ¹⁸ Tẽvã pẽnteĩmba pãkahaa oa pyhevi verã pãkaivi. ¹⁹ Tãtãkatu peĩrã, pipitypo tykove opambava. ²⁰ Pyhesha Jerusalen opa mangora ñyrãrõse'ia retarã, pikuaapo vãhẽmashu verã ara õñehũndi verãpe. ²¹ Haipe Judeape'õre tĩvãhe yvyturusu õĩpi; hãrã Jerusalenpe'õ reta, avy tõhẽ haivi, hãrã ñuuhupi õvare avy toujy vokava tẽntape. ²² Shara jaheha verã jy'arapo, iko verã hekope kavi Ñanderu Tumpa ĩñẽẽ kavivapy heiva rãĩmi. v ²³ Pavetepo purua'iva hareka sanjay mykãmbuteri'ia vokava arape! Shara ẽẽpo tivishava ñymbasy yvy ĩãrẽ, hareka ñunũpa pohyva kova kuareta retape. ²⁴ Ĩmẽ'ẽ mano verã kyse pukuva hãĩmbepe, hãrã ĩrũre rahahapo pokuahavape ỹngavare tẽntaipi, hareka heko porãmbare pỹrõpohe Jerusalen, vãhẽ peveshu jy'ara japyape. ²⁵ Hãrã ẽẽpokui heshaha verã kuarasyre, jasyre, hareka jasy tatare. Hãndi kyjekue tivishava yvy ĩãrẽ, yyvasu jyhy'apu porãmba ñupũã ouvaivi. ²⁶ Kuaretare opapo pyamano kyjekueivi, pya mbijeta ñynõĩ kova mbai yvy ĩãrẽ ou verã. Opaite ara vatepy'õ mbaikatuva opapo õmỹ. ²⁷ Haipe heshahapo Ñanderu Tumpa tay ou vekua yvy ĩãrẽ, oujyma ãvãpỹturẽrã mbaikatu tivishapy hareka himbipekue ryheve. ²⁸ Hãmã kova mbai õñepyrõma ikorã, pimykyrẽỹ, hareka pymãĩkavi, kõõma ou pehojepe verãpe. ²⁹ Haivi Hesu mbeushu reta kova ñẽẽ ñymyhã'ãnga: Pymãĩhe yvyra igo hareka opaite ỹnga yvyrare. ³⁰ Pyheshama yvyra hokyrã pikuaamapo, vãhẽserima jy'ara haku'i verãpe. ³¹ Kỹrãipo jyve pee pyhesha kova opa mbai ikorã, pikuaapo Ñanderu Tumpa mburuvisha vasurã vate araivi ouva vãhẽ serimarã. ³² Ãñẽtevape hai pee, opañõĩpo iko kova mbai ndeiteri kuareta ã'ẽvare opa manorã. ³³ Ara vate'õre hareka yvy opañoĩpo hai, tẽvã shiñẽẽ ẽvãre hasareĩããpo. ³⁴ Pĩngareko pindijehe, avy piñono pãkape mbai porãmbava hareka kau ryheva, hãndi opava ñandypya ñambijetaheva ko yvy ĩãrẽ'õ. Mahẽ sapy'ãĩ vãhẽ pearẽkui vokava ara pyhãrõmba pẽĩvape, ³⁵ shara mbai pyrymbo'apya rãĩmipo oukui vokava ara, opaite kuaretare ĩãrẽ. ³⁶ Hãrã pẽĩkavipo; pirure opa ara, peojepeshi verã ko mbai iko verã, hareka haikavipẽĩ verã Ñanderu Tumpa tay hỹnonde. ³⁷ Hesu arapeave pyrỹmboi tupaope; tẽvã pyharekue õhẽ oho yvyturusu Olivos he'iashuape. ³⁸ Haipe koko'ẽĩ kuaretare vokava tẽntape'õre jyraha tupaope, hẽndu verãre Hesu ĩñẽẽ.