¹ Pẽnte arape, Hesu mboi'ẽshu kuaretare tupaope hareka mbeu ñẽẽ kaviva ryheva pyrỹmondo jepeva, vãhẽ jyveru pai ruvishare hareka, Moise mbypara vekua pyrỹmboi'iheare, hãndi karai kuakuamavare. ² Hãrã heishu reta: Mbeu ore mbavara ñononde kova mbai rijapo verã mbaikatu rupii? ti, mbavara mẽẽjynde vokava mbaikatu? ³ Haipe Hesu heishu reta: She apyrãndupo jyve pee pẽnte mãĩnũnga; pymbeushe, ⁴ mboushu Juan pyrỹmyngarai'i verã, Ñanderu Tumpa ti kuaretara? ⁵ Haire õñepyrõ ĩnjeta ijupi retarã hei: Mãrãrapo jaishu? Ñanderu Tumpa jairã, heipo ñande: “Mãrã'ĩrãra akuarã pyrojambashu?” ⁶ Hãrã kuaretare jaijyshurã, ko kuaretare ẽvã rãĩmi opapo pũã ñandyrehekui hãrã itapepo ñanduka retakui; shara opavare roja Juan haiva Tumpa ĩñẽẽ mbeu'iarã. ⁷ Hãrã mbe'uĩjyshu reta: kuambavare, mbavara mboushu Juan pyrỹmyngarai verã. ⁸ Hesu heishu reta: Akuarã ambe'uãpo jyvepe mãrãva ñymbaikatu rupiira ajapo kova mãĩnũngare. ⁹ Haivi õñepyrõ ĩnjetaheshu kuaretare kova ñẽẽ ñymyhã'ãnga rupii: Pẽnte kuareta ñoty uva jy'yvype, haivi hepyre porykashu jokuevare. Hãrã heta ara mbyry oho hẽntaivi. ¹⁰ Hãrã vãhẽma ara uva ia myno'õhãvaperã, mondo pẽnte jokuereva mba'aposhuvare ẽvãpe, ña'ãpõva uva ia verushu verã; tẽvã haire hetama nũpa vokava jokuehavarã, iporãĩ mõndojy reta. ¹¹ Haivi koo ijarã'õ mondojy ỹnga jokuereva; tẽvã vokavape heta heheishu reta, haivi heta nũparã iporãĩ mõndojy reta. ¹² Haivi hykuaĩ mondojy mbahapyhea; tẽvã mba'apo õre opa mbypepererã mõhẽjy reta haivi. ¹³ Kõñẽmahea koo ijarã'õ hei: “Mbaivarapo ajapo? Ãmõndopo shyray ahaihuva; katupo hesha retarã mba'ẽã japohe retakui.” ¹⁴ Tẽvã mba'apo iare heshama retarã, heijyre ijupi: “Kova hai koo ijarã; jajukashu, time ñande kova ña'ãpõrãtẽ vẽkua.” ¹⁵ Hãrã nohẽ reta uvatyivirã, juka reta.” Mbaivarapo akuarã pimõã japohe reta koo ijarã'õva? ¹⁶ Ohorapo opa juka mba'apo õretape, hareka mẽẽshu verã jy'yvy ỹngava retape. Haire hẽnduma kovarã heijyre: Avy kỹrãã tiko! ¹⁷ Tẽvã Hesu mãĩhe retarã hei: Akuarã, mbaivara he'ise Ñanderu Tumpa jykuatia mbyparavape ẽvã? Kỹrã heiva: Ita vasu, oo japose'iare mbijiche vekua ĩãrẽ rãngapo ã'ẽ jypyrã'ẽshu”. ¹⁸ Shara ĩmẽrãẽã oava vokava ita ĩãrẽ, opaĩpo jejeka; hareka ĩmẽ'ẽ oahevãrã opa kavipo mungui. ¹⁹ Hãrã pai ruvishare hareka Moise mbypara vekua pyrỹmboi'iheare haipevãĩ pota pysykajyre Hesu, shara haire kuaa mondo reta kova ñẽẽ ñymỹhã'ãnga mondo ñynõĩherã; tẽvã kuaretare kyje jyreshirãmẽĩ. ²⁰ Hãrã mondoshu reta kuimbai ñeñemipeĩ mãĩ verã heko kaviva rãĩmi, sapyarei Hesu ityshu verãre heivare, haivi mẽẽ verã mburuvishape. ²¹ Hãrã kuimbaire ñeñemipeĩ mãĩ'iare pyrãndushu Hesu: Pyrỹmboi'ia, kuaaha rãnga rereva hareka hekope kavi rỹpyrỹmboiva, rỹmãĩmbava mãrãvara hai, koñeĩ rỹpyrỹmboihe Ñanderu Tumpa hape ãñẽteva. ²² Mbeu ore: Haikavira mẽ'ẽhã kyrypoti mburuvisha vasu Romape õvã, ti mba'ety?” ²³ Hesu kuaaĩ'ẽ potai kỹrã hei ñynoishurã. Hãrã heishu reta: Mãrã'ĩrãra pota shiñonovaipi? ²⁴ Shymbyheshakapi nikere. Mbava rã'ãnga hareka mbava heera ẽhẽ? Haire heishu: Mburuvisha vasu Cesar. ²⁵ Hesu heishu reta: Pymẽẽshu mburuvisha vasu Cesar ña'ãpova; hareka Ñanderu Tumpa pymẽẽshu Tumpa ña'ãpova. ²⁶ Hãrã vãhẽãshu reta ñẽẽ ityshu verã kuaretare hỹnonde; koñeĩ mbyhaikavi reta Hesu heivarã, jasakaĩ reta. ²⁷ Haivi Saduseore jyraha Hesu hesha verã (Saduseore hei: Mba'ety mano vekua mbyteivi kuerajy verã”). Hãrã heishu reta Hesu: ²⁸ Pyrỹmboi'ia, Moise rãnga mbypara heja ore kuatiape: Ĩmẽ'ẽ pẽnte kuimbai manorã, hỹreko mymembyã hejarã, tyvỹĩpo õmendajyhe, mimoñashu verã tichey mano vekua. ²⁹ “Shara ĩmẽmba'ẽ 7 kuimbai pẽnte'iare; tynõndeva õmendarã, tẽvã manomba hĩjapo mbateriva. ³⁰ Haivi tyryvy mõkuehea õmenda jyhe taupe'ĩme manoshia, hãrã vokava mano jyve hĩjapomba ryheve. ³¹ Haivi mbahapyhea tyryvy kyrãmĩjy; harã 7 õva kuimbaire opa mano hĩjapomba vekuare. ³² Hãrã kõñemahea vokava taupe mano jyve." ³³ Hãmã manovare kuerajyva arape, mbava hỹrekorãrapokui ko taupe, shara 7 ia kuimbaire opaĩmba rekotẽ? ³⁴ Hãrã Hesu heishu reta: Yvy ĩãrẽ kuimbaire hareka taupere õmenda. ³⁵ Tẽvã Ñanderu Tumpa kuaapo mbava retarapo mbyhykojykui; kova jehurã mbaveãmapo kuimbai hareka taupe omenda ijehekui ³⁶ shara hykove japyvẽãmapo, Tumpa jokuevare rãĩmimapo; hareka Ñanderu Tumpa tay hareka tajy rãĩmimapo, shara opama pũãjy reta. ³⁷ Moise teiva rãnga kuatia ñẽẽpe ohohe heiva rãĩmi vycheri hãkã hẽndy õĩvi, kuaaka ñande manovare kuerajy verã. Haipe rãnga hei, Ñanderu Tumpa; Abraham, Jacob hareka Isaac ñu Tumpa. ³⁸ Ñanderu Tumpa ha'ẽã manova ñu Tumpa, koñeĩ hykove iare ñu Tumpa; hai pevarã opavare hykoveshu verã. ³⁹ Haipe Moise mbypara vekua pyrỹmboi'iheare heishu: Pyrỹmboi'ia, haikavi rereva rãĩmi. ⁴⁰ Haipe mãĩnungaveama kyrẽy pyrãndushu reta. ⁴¹ Hãrã Hesu heishu reta: Mbaiva rupiira he'iahe Kristo, David tayva? ⁴² Ko David tei heiva Salmo kuatia ñẽẽpe: Hei Ñanderu Tumpa, Shejape: “Vapy shakata kyty, ⁴³ añonopeve ndyreshatamba'iare ndepy ẽvãpe.” ⁴⁴ Marãrapo Kristo David tay, ko David teiva heishu Sheja? ⁴⁵ Hãmã opava kuaretare hẽndu ñynõĩrã, Hesu heishu mboireare: ⁴⁶ Pĩngareko pijeheshi Moise mbypara vekua pyrỹmboi'ihea retaivi, haire pya'ohe mondeva puku ryheve, pota vataha õĩpi marãnduhashu karai vasure rãĩmi; haire heka vapyhapya tynonde'õ sinagogape, hareka karuvasu õĩpi. ⁴⁷ Hãmã ĩme manoshi vekua hoore heky jyreshi, hãrã ñemipy verãre puku rã'ãnga ñymboi reta. Kovare hetaveepo nupãhãkui.