¹ Hesu iche Jericóperã hasa oho voka tẽnta mbyteipi, ² haipe ĩmẽ'ẽ pẽnte kuimbai Zaqueo he'iashuva iko katuva, kyrypoti okora'iare juhuvisha, ³ Zaqueo kyrẽỹ hesha jyve Hesu, kuaa verã mbavara hai, tẽvã katuã hesha puku ãĩte hairã, shara kuareta heta. ⁴ Haipe hesha verã ñani oho hỹnonderã, jupi pẽnte yvyrare Hesu hasa verãipi. ⁵ Hesu vãhẽma haiperã, mãĩ vaterã hesha hãrã heishu: Zaqueo, narẽ'ãĩte vejy, shara ã'ẽ nyrẽtapepo ãĩmẽ ãĩkui. ⁶ Zaqueo vejyravĩrã horype myvãhẽshu Hesu. ⁷ Vokava kuaretare heshamarã opaiteva ĩnjeta porãã jyrehe Hesu shara hei oho pyta verã kuareta mbai porãmba japo'iva hẽntape. ⁸ Haivi Zaqueo ñymboyrã, heishu Hesu: Ã'ẽ kope, Shi ija, ambijaopo mbyteipi kavi ĩmẽ arevare hãrã ãmẽẽposhu pavete'iare, hareka ĩmẽ'ẽ mbava ahekyreishi vekuarã, ũrũndypo ĩãrẽve ãmẽẽjyshukui. ⁹ Hesu heishu: Ko arape vãhẽ kova oope, ohojepeva ryheva; shara ko kuimbai hai jyve Abraham ñymõña hãndia. ¹⁰ Shara ko kuareta tay rãĩmi ou vekua yvy ĩãrẽ, ou heka hareka mondojepeshu verã Ñanderu Tumpa ñymymbyry'ishiare. ¹¹ Hãrã kuaretare jasakateri ñynõĩhe kovarã, Hesu mbeushu reta pẽnte ñymyhã'ãnga, shara mbyryvẽãma'ẽshi Jerusalen, hareka haire mõãtẽ haipe vãhẽmã Ñanderu Tumpa ẽvãpe. ¹² Hãmã hei: Ĩmẽmba'ẽ pẽnte kuareta iko katuva ohova mbyry ỹnga tẽnta kyty, mbyheaa verã mburuvisha vasurã, haivi oujy. ¹³ Hãrã ohoserimarã, hẽno 10 jokuereare haivi pepẽntẽĩ mẽẽshu kyrypoti mymba'apoka verã, hãrã heishu: “Pymymba'apokakui kova kyrypoti aijypeve”. ¹⁴ Tẽvã hẽnta ĩrũre heshatãã, hãrã mondo reta hai haykue heihe verãre: “Potahãã ko kuimbai ururuvisharã". ¹⁵ Tẽvã ñonohãshu mburuvisha vasurã ẽẽ verãrã, oujy hẽnta kyty. Vãhẽjyma ourã hẽnoka jokuereare kyrypoti mẽẽshu vekuare, kuaa verã pepẽnteĩ mbovyra nõhẽjyshi reta kyrypoti. ¹⁶ Tynonde ouva heishu: “Karai, ndykyrypoti nõhẽajyshi 10 ĩãrẽve". ¹⁷ Mburuvisha vasu heishu: “Haikavi rãnga, nde hai jokueharea haikaviva, mĩshĩtẽvãre rĩngarekopohekui 10 kavi ẽvã tẽnta". ¹⁸ Hãrã ou mõkuehevarã, hei: “Karai, ndykyrypoti nohẽãjyshi 5 ĩãrẽve”. ¹⁹ Vokavape mburuvisha vasu hei: “Ndepope añonopo jyve 5 kavi tẽnta'õre". ²⁰ Yngava oujyrã hei: “Karai, kope'ẽ ndykyrypoti. Ãnãtuĩ rãnga are pẽnte mondeava pysevẽpy, ²¹ ãĩmõã ndyhevirã, kuimbai ñymbaikatuva ryhevanderã, rymbatyjyva voka riñonomba tẽvã; hãrã rỹmỹnõjy rĩñotymbatẽ vẽkua.” ²² Haipema mburuvisha vasu heishu: “Nde hai jokueharea porãmbava, niñẽ'ẽkue reiirepo arĩmbivache. Rikuamba kaviarambatẽ she hai kuareta ajopyvarã, ambatyjyva añonomba vekua, hareka ãmỹnõjyva añotymba vekuape; ²³ mãrã'ĩrãra akuarã ryrahããmba shykyrypoti natũhãseape mymba'apoha verãpe, shyrẽtape aijymarã pevarã?” ²⁴ Hãrã heishu haipe'õre: “Pypyhỹrõshi vokava kyrypoti, haivi pymẽẽ 10 kavi ĩmẽrevape”. ²⁵ Hãrã haire heishu: “Karai, ĩmẽma rãngare 10 kavi”. ²⁶ Vokava mburuvisha vasu hei: “Shee hai pee, ĩmẽreva ĩãrẽvepo mẽ'ẽhajyshu; tẽvã mba'etyreva, mĩshĩĩ ĩmẽtereva hekyajyposhi. ²⁷ Hãmã shyreshatamba'iare, ñatẽỹ mburuvisharã hynonde shiñono vekuare, peru kope; pijuka shynonde.” ²⁸ Hesu opama hei kovarã, õhẽ oho Jerusalen kyty. ²⁹ Vãhẽserima Betfage hareka Betaniape, yvyturusu, olivo heta'õvã he'iashuva jykoty, mondo mõkue mboireare, ³⁰ heishu reta: Pekua voka tẽnta ñandyvache'õvãpe; pyvãhẽmarã pyheshapo pẽnte mbirika ray ñapintihava. Mbavamba teri opoheva, pijora perukui. ³¹ Ĩmẽ'ẽ pyrãndupeva mãrã'ĩrãra pijora, pereshukui: “Ñanderu Hesu rãnga pota'ẽ”. ³² Oho reta jokuehava, hãrã vãhẽshu reta Hesu heishua rãĩmi. ³³ Hãrã jorama ñynõĩ mbirika rayva, ijare pyrãndu jyreshu: Mãrã'ĩrãra pijorapeĩ mbirika ray? ³⁴ Haire hei: Ñanderu Hesu rãnga pota'ẽ. ³⁵ Haivi raha reta Hesu ẽvãpe; mombohe reta mondehava mbirika rayrã, Hesu mbijupihe reta. ³⁶ Hãrã hasama oho'ivaipi, jyvache mbipyso reta mondevare pehupi. ³⁷ Kõõma oho yvyturusu Olivoperã, opaite hai ryhevare vy'ape sapuke hareka pyraheshu Ñanderu Tumpa, opava mbaikavi heshaha japo'i vekua rehe, ³⁸ hei reta: “Tumpa tymãĩ kavihe mburuvisha vasu. Toñemombai Ñanderu Tumpa heepe! Pyavapy vate arapy hareka himbipekue arare, ³⁹ hãrã Fariseore, kuareta hetava mbytepe ẽvãre heishu: Pyrỹmboi'ia, jojashu ndyryhevare. ⁴⁰ Hesu heishu reta: Haipo pee kovare chĩrĩrĩrã, ita retaavepo sapuke jyve. ⁴¹ Haivi vãhẽma jyraha Jerusalem hyvacherã, vokava tẽnta hesharã, Hesu hãpĩrõre. ⁴² Hei: “Rikuaa, ko ndy'ararã opaite mãĩnũnga verunde verã pyavapy! Tẽvã ã'ẽ ñemi ndyhevi, hãrã katuã ryhesha. ⁴³ Vãhẽpondekui ara opaite ndyvaishorã'iare, joo verã yvykua ndijerekue, nymangora hãrã opaivi ndopy verã; ⁴⁴ haivi ndirity verã yvyre. Juka verã opaiteva iko'ipyare; hejããpondekui pẽnte ita jyvohy'õva; shara rikuããshu Ñanderu Tumpa outẽ pohy nderã”. ⁴⁵ Hesu iche tupaoperã, õñepyrõ mõhẽ haipe mavẽnde hareka mba'ova õre, ⁴⁶ hãrã heishu reta: Ñanderu Tumpa ĩñẽẽpe hei: “Shero hai oo ñymbo'eha ipe verãĩ”. Tẽvã pee pijaposhi manarõ'iare ikua! ⁴⁷ Hãmã opa arape Hesu pyrỹmboi tupaope; haivi pai juhuvishare hareka Moise mbypara vekua pyrỹmboi'iheare, hareka karaire vokava tẽnta, huvishare hekajyre mãrãrapo juka reta. ⁴⁸ Tẽvã mỹvãhẽashu reta mbaivara japopohe reta, shara kuaretare potañoĩ hẽndu reta ĩñẽẽ.