¹ Hesu mbeushu reta pẽnte ñẽẽ ñymyhã'ãnga mboishu verãre, ñymboi ñõi verã, hareka kangymbape. ² Heishu reta: Ĩmemba'ẽjy pẽnte tẽntape mburuvisha pirimbivachese'ia Ñanderu Tumpaivi kyjembava, hareka hapishare mbaimbashuva. ³ Ĩmemba'ẽjyve vokava tẽntape pẽnte taupe ĩmẽ manoshi vekua, ohoñoĩva hai ẽvãpe heishu verã: “Hekope kavi ñonojyshe aivavy hãndia shymymorãmba'iare hãndi". ⁴ Heta ara ko mburuvisha pirimbivache'ia ñatẽy japo jurureashua, tẽvã hei pyape: “Ñanderu Tumpaivi akyjeã hareka mba'eãjyshe shapisha heiva, ⁵ tẽvã ko taupe ĩmẽ manoshi vekua shymãgãtu'ãĩte, hãrã ahepyposhu, mãhe hykũãi oujykui shymynguerepeve”. ⁶ Ñanderu Kristo heivejy: Kỹrã hei ko mburuvisha pirimbivachese'ia poshyva. ⁷ Hãmẽra Ñanderu Tumpa hepyãpojyve jyrojaheare, jurureñoĩ'ishuare ara hareka pyharekue? Kỹỹrapo hãrõshu mbory verã? ⁸ She hai pee; areãpo ou mbivachekashu reta. Tẽvã ko Kuareta tay rãĩmi ou vekua yvy ĩãrẽ, vãhẽma ara oujy verãperã, heshara teripokui ko yvy ĩãrẽ kuareta jyrojava? ⁹ Hesu mbeujy ko ñẽẽ ñymyhã'ãnga: Jyroja'i ijeheva pevarã moãtẽ heko kavirã mymorã'i hapishare: ¹⁰ Mõkue kuimbai oho tupaope jurureshu verã Ñanderu Tumpa: Pẽnte hai Fariseo, ĩrũ kyrypoti okora'ia. ¹¹ Fariseo ñymboy'õpe kỹrã jurure: “Sheru Tumpa, ãmẽẽnde shyrorykue shara ha'ẽãshe kuareta ỹngavare rãĩmiva: Manarõ, heko porã'ã, õmendava mypõrãã'i, hareka ha'ẽãshe kõõ kyrypoti okora'ia rãĩmiva. ¹² She akaruãkuei mõkue ara pẽnte semanape, hareka ãmẽẽ diez'õvaivi pẽnte opaite apityvaivi. ¹³ Tẽvã kyrypoti okora'ia mbyryĩ ñymboy'i, õĩmbashua vate arare mãĩ verã, koñeĩ pitiape nũpa'irã hei: “Sheru Tumpa, shyparekomĩtẽ, shara she hai heko porãmba”. ¹⁴ Hãrã she hai pee ko kyrypoti okora'ia Ñanderu Tumpa hejareiishi mbai porãmba vekua, hãrã ohojy hẽntape. Tẽvã Fariseo kỹrãã hai. Shara ĩmẽ'ẽ ha'eii vateve iñiñono'iarã, mbaimbava rãĩmipo japoha, tẽvã jyrojamba ijeheva, vatevepo ñonõha. ¹⁵ Haivi veruhashu Hesu sanjaymire ipo ñonohe verã. Hãrã mboireare hesha vokavarã ñỹgãta jyreshu veru'õre. ¹⁶ Tẽvã Hesu hẽno sanjay retarã hei: “Pyma'ẽĩhe sanjaymire tou shykoty, avy pijocha, shara haire rãĩmiva ña'ãpova hai Ñanderu Tumpa ẽvãpe. ¹⁷ Ãñẽteva hai pee, Ñanderu Tumpa ẽvãpe ko sanjay rãĩmi jyrojambava, iche ãĩteeipo haipe. ¹⁸ Pẽnte huvishava pyrãndushu: Pyrỹmboi'ia heko kaviva, mbaivarapo ajapo apity verã tykove opambava? ¹⁹ Hesu heishu: Mãrã'ĩrãra rereshe heko kaviva? Mba'ety rãnga heko kaviva, koñẽĩ'ẽ Tumpa. ²⁰ Nde rikuaama Moise mbypara vekua: “Avy myporãã'i õmendavare, avy puruka, avy mãnãrõ; avy ĩnjeta porãhe ndapishare; japoshu nderu hareka ndesy heiva”. ²¹ Vokava kunumi hei: Opaite rãnga kovare ajapo shyndei airãvãĩ. ²² Hesu hẽndu vokavarã heishu: Pẽnte mbai, mba'etyteri nde; opa evende ĩmẽryreare haivi hepykue memẽẽshu pavete'iare, hãmerãpo ripitykui rikokatu verãpe vate arapy, haivi ei shimĩ'ĩrũ. ²³ Tẽvã ko kunumi kỹrã hẽndurã mbyvy'ãã, shara ikokatuvarã. ²⁴ Hesu heshama mãrãra mbyvya ãĩtẽrã hei: Javaiveeposhu hai ikokatuvare iche verã Ñanderu Tumpa ẽvãpe. ²⁵ Javaĩã hasa verã kamello pẽnte juu sakuaipi, vokava ikokatuva iche verã Ñanderu Tumpa ẽvãpe. ²⁶ Vokava hẽndushu vekuare, heijyre: Mbavarapo akuarã ohojepekui? ²⁷ Hesu heishu reta: Kuaretare javaishuva Ñanderu Tumpa pevarã javaĩãshu hai. ²⁸ Hãrã Pedro hei: Iri ija, ore rãnga opava mãĩnũnga hejaha, nimĩ'ĩrũhã verã. ²⁹ Hesu heishu: Ãñẽtevape hai pee, ĩmẽ'ẽ hejava hoo, ti tuu, tyvyre, hỹreko, hareka tayyre Ñanderu Tumpa ẽvãpe'õ reherã; ³⁰ opapo hykojajyshu ĩãrãvee ko yvy ĩãrẽ ĩmẽre vekuaivi, hareka tykove opamba verã. ³¹ Hesu hẽno hã'ẽĩ 12 mboirea retaperã heishu: Ã'ẽ ñamãĩpo Jerusalen kyty, haipe opapo mbapy kova kuimbai rãĩmĩ ou vekua yvy ĩãrẽ, Tumpa ĩñẽẽ mbeu'iare mbypara vekuape, ³² ñonoapo voka tẽnta mbyryvare ipope; haivi ñymbyhorypohe reta, heta mbaipo heihe reta hareka myndyvypohe; ³³ ñupapo hãrã jukapo reta; tẽvã mbahapy arapepo kuerajy. ³⁴ Hai reta kuamba mbaivara he'ise kova mbai, shara ñemĩshi reta kova ñẽẽ, hãrã kuãã hei'iashuvare. ³⁵ Hesu vãhẽserima oho Jericóperã, pẽnte heshamba kũvãĩpia vapy'i pe hỹmbeype jurure'ẽ kyrypoti. ³⁶ Hãmã hẽndu kuareta hetava hasa haipirã, pyrãndu baivara iko. ³⁷ Mbeushu reta Hesu Nasareno hasa ohova haipi. ³⁸ Haipe sapukerã hei: “Hesu, David tay; shyparekomitẽvẽ! ³⁹ Hãmã tynonde ohovare ñygãta jyreshu pota jasaka'ẽrã; tẽvã hai hỹnãtũĩteve sapuke: “David tay, shyparekomitẽvẽ! ⁴⁰ Haipe Hesu ñymboyrã, hei veruashu verã hai ẽvãpe. Hãrã pyrãndushu: ⁴¹ Mbaivara ripota ajapo ndyrehe? Haipe heshamba kũvãĩpia hei: Sheja, pota rãnga aheshajy. ⁴² Hesu heishu: Hesha, rirojarã rykuerama. ⁴³ Haipevãĩ heshajy, hãrã oho hipii Hesu hareka omombai vasushu Ñanderu Tumpa. Hãrã opaite kova heshavare, omombai vasu jyve Ñanderu Tumpa.