¹ Hesu heishu mboireare: Ĩmẽ'ñõĩpo'ẽ mbai porãmba japokashua kuaretare; tẽvã, pavetepokui mbai porãmba japoka'ishua yngavare! ² Haikavivembatẽpo jajure ita ñapĩtiharã momboha seve yyvasupe, mahẽ pẽnteva jyrojatẽ'i shyrevare ityjyk ui mbai porãmbape. ³ Pingareko pindijehe. Ndyryvy mbai porãmba japo ndyreherã, ĩnjetaĩshu; tẽvã heko porãmba vekua hejarã, ryhejareipo jyveshu; ⁴ timeĩãrapo pẽnte aravape 7 kavi mbai porãmba japo ndyrehe, hareka 7 kavi ou heinde: “Ajapo veamapo” ryhejareiposhu.” ⁵ Apostolre heishu Hesu: Mẽẽvejyve ore jyrojakue. ⁶ Hesu heishu reta: Ajemaĩpo mostaza hãỹ rãĩmi mishĩĩtẽ jyve pirojakue, katupo pere jyveshu ko yvyra: “Syry koivi, yyvasupe ekua iñotyjy”; hãmã ko yvyra pereshuva japoĩpo jyve. ⁷ Pynymbytepe mbava ĩmẽre jokuerea mby arao'ia ti humba ñyngareko'iheshua, oujy ñũũvirã, heirashukueĩ: “Ei, vapy karu”. ⁸ Mba'ety, koñeĩ heiposhu: “Myhẽvãshe hau verã, hareka ẽĩ kavi rĩngareko shy rehe verã opa akarupeve, Haivi opama kovarã katu nde rykaruve hareka rimbyu jyvekui.” ⁹ .” Hãmã jokueharea opa japoshu he'ihavarã heirashu, ajetema teño. Mba'ety. ¹⁰ Kỹrãpo jyve pee, opa pijapo Ñanderu Tumpa japoka pee varã, perepo: “Jokueharea mba'erã mba'ia rãnga ore; shara japoa verãĩ japoha.” ¹¹ Hãmã Hesu oho Jerusalen kytyrã hasa Samaria hareka Galileaipi; ¹² harã ijemã oho pẽnte tẽnta'õmĩ perã ou hỹvãitishu 10 kuimbai kuru põrãmbare, hãrã mbyrykatuĩvĩ ñymboy shi reta; ¹³ haivi sapuke jyrerã hei: Hesu, Pyrỹmboi'ia, yrypareko mitẽvei! ¹⁴ Hesu heshamãrã heishu reta: Pekua pijeshakashu paire. Hivi jyraha retarã opa kuera. ¹⁵ Hãrã pẽnte hai retava hesha kueramãrã, oujy sapukekue ryheve omombai Ñanderu Tumpa. ¹⁶ Haipe ĩñẽẽsu hova yvyre mbojapeve Hesu hỹnonde, mẽshuvẽrã jyvy'akue harã ko kuimbai hai Samariape õ. ¹⁷ Haipe Hesu hei: “Ha'ẽã raje 10 iare opa kueravare? 9 ia retara maty ĩmẽ'ẽ? ¹⁸ Koñeĩra tẽnta ỹngaivi ouvaĩ oujy omombaishu Ñanderu Tumpa?” ¹⁹ Haivi Hesu heishu kuimbai: “Pũ'ã, ekuajy; shara rirojarã rykuera.” ²⁰ Fariseore pyrãndushu Hesu: Mbaipe rapo vãhẽkui Ñanderu Tumpa vate ẽvape rãĩmi? Hãra heishu reta: Ñanderu Tumpa vate ẽvape rãĩmi vãhemãrã ha'ẽã opavare heshavẽrã. ²¹ He ihãpojy: “Kõõ ẽ." Ti “Kuuty ẽ”; shara Ñanderu Tumpa vate ẽvape rãĩmi ĩmẽma'ẽ pyny mbytepe. ²² Haivi heishu mboireare: Vãhẽpokui ara pota pẽntejy pyhesha verã Kuareta Tay rãĩmi ou vekua yvy ĩãrẽ, tẽvã pyheshãpo. ²³ ĩmẽpo'ẽ heipeva: “Kõõ ẽẽ, ti voka'ẽ” tẽvã, avy pekua hipii reta. ²⁴ Shara kueipi verã ouva saperã, opa mykoĩ arare, kỹrã katĩĩpo jyve Kuareta tay rãĩmi ou vekua yvy ĩãrẽ, vãhẽma ara oujy verãperã. ²⁵ Tẽvã, tynondepo heta ahasa asy, hareka ã'ẽva kuaretare shymymorããpo. ²⁶ Noé jehushuva arape rãĩmi katĩĩpo, jehujykui Kuareta tay rãĩmi ou vekua yvy ĩãrẽ oujymarã. ²⁷ Kuaretare karu, ñymbyu reta hareka õmendajyre, ara vãhẽpeve Noé iche verã barco vasupe; ama vasu ourã, opavare juka. ²⁸ Kỹrãmi jehujy Lot arape; karu jyre, ñymbyu reta, mba'ova jyre, mavẽnde, ñimĩty hareka hoorã japo jyre; ²⁹ tẽvã Lot õhẽma Sodomaivirã, vate araivi ou ãma tata rãĩmi hareka “azufre” he'iashuva ryheverã, opavare juka. ³⁰ Kỹrã katĩĩpo jehujykui Kuareta tay rãĩmi ou vekua yvy ĩãrẽ, oujymarã. ³¹ Vokava arape, ĩmẽ'ẽ oo iarẽ iarã, ĩmẽre ña'ãpovare oo iperã, avy tyvejy raha verã. Kỹrã jyve ñũũhupi mba'apo ia, avy toujy hẽntape. ³² Pynymanduahe Lot hỹrekokue. ³³ Ĩmẽ'ẽ hykove haihuvarã, mondojepeãpo; tẽvã shyreepe manova, hipitypo tykove opambava. ³⁴ She hai pee voka pyhare aijymarã ĩmẽpo'ẽ mõkue oche'õre turupape: Pẽntevapo rahahashi, ĩrũpo hejahakui. ³⁵ Mõkue taupe pẽntevapeĩ mbai japo'õre; pẽntepo rahaha, ĩrũpo hejaha. ³⁶ Mõkue kuimbai ĩmẽpo mba'apo'ẽ ñũũpe; pẽntepo rahahashi, ĩrũpo hejaha. ³⁷ Mboireare hẽndu kovarã pyrãndushu reta: Yreja, maperapo ikokui vokava? Hesu heishu reta: Mãipi tyretekue, haipepo jatypo vyrare hou verã.