¹ Hesu heishu mboireare: Ĩmẽnda ẽ pẽnte karai iko katuva, hareka ĩmẽ rejy pẽnte jokuerea ñyngareko ẽhẽshua hai ña ãpoare. “Mbe uashu porã opa pory mbai hetava ñyngareko ẽhea.” ² Haipe jokue õ hẽnorã heishu: “Mbaivarajy ko ãhẽndu he ia ndy reheva? Opa ñono she kuatiape rijapo vekua, shara katu veamapo riko rĩngarekohe she shã ãpovare.” ³ . Haivi mbai ñyngareko ihea pyape hei: “Mbaivara ajapopo? Shokue ia rãnga shy mohẽ amba'apoaivi. Shy yvype amba'apo verã ãĩmburuãshu; Ñanderu Tumpa ña ãpova airure aihe verã, ãnotijy. ⁴ Aikuama mbaivara po ajapo, ĩmẽ are verã mbava retarapo shymy vãhẽ hẽntape, amba'apo veamarã.” ⁵ . Hãmã pepẽntẽĩ hẽno jokuerea jipiashuare. Hãrã tynonde õ pyrãndushu: “Mbovy rapo rỹmẽẽ jyshukui mãĩ nunga shokue ia?” ⁶ Hãrã hai heishu: ”(100) hyru ñandy rãngapo ãmẽẽ jyshukui.” Hãrã mbai ñyngareko i hea heishu: “Kõ ẽ ndy kuatia, ãrẽã vapy, (50) pevẽĩ ñono.” ⁷ Haivi pyrãndushu ĩrũ: “Ndejy veno mbovyrapo rỹmẽẽjy kui?” Hai hei: ”(100) trigo hyru ryheve.” Hãrã heishu: “Kõ ẽ ndy kuatia (80) pevẽĩ ñono.” ⁸ Pyrokue õ hesha mbai ñyngareko porãmba i hea, ha eve jyve mbai japo verã. Shara ko yvy ĩãrẽ õ japo iare ha evejyve mbai japo verã hapishare pevarã, Ñanderu Tumpa potava japo ia retaivi. ⁹ Hãmã she hai pee: Pipory mbai ko yvy ĩãrẽ õ pini ĩrũ heta verã, hareka mbai hetava opamarã, ĩmẽpyre verã pynymy vãhẽva oo opamba verãpe. ¹⁰ Ko heko kaviva mbai mishĩvãpe, heko kavi jyve mbai hetavape; hãrã mishĩvape heko porãmba, kỹrã jyve mbai hetavape. ¹¹ Hãmã mbai hetava ko yvy iãrẽ õ porãmbavapy, pyndy reko porãrã, mbavarapo jyroja pyndy rehe mbai ãẽtẽĩte vape? ¹² Hãrã pyndy reko porã haimba pã ãpoa rerã, mbavara mẽẽpo pee pã ãpovãĩte? ¹³ Pẽnte jokueharea katuã mõkuere jokue õ, shara heshatãpo pẽnte, ĩrũĩpo haihushu; pẽntẽĩpo japoshu heiva, ĩrũpo hejaĩ. Kỹrã jyve pee katuã pirojahe Ñanderu Tumpa hareka kyrypoti. ¹⁴ Hãmã fariseore kyrypoti haihu vare, hẽndu ñynõĩ kovarã, ñymby horyhe reta Hesu. ¹⁵ Hãrã Hesu heishu reta: “Pee rãnga pei pere pindi jehekuei heko kaviva kuaretare hỹnonde, tẽvã Ñanderu Tumpa kuaa ẽ pyndy pya; hareka kuimbaire mbytepe mbai vasuva rãĩmi rekohava, vokava hai mbai kyava Ñanderu Tumpa hỹnonde. ¹⁶ Moise mbypara vekua, harekaTumpa ĩñẽẽ mbeu'iare hei vekua japoa verã vãhẽ Juan ara peve; haivive mbe uhajy Ñanderu Tumpa irreino ryheva ñẽẽ kavi, opaite pota iche pya õñehã mbarete. ¹⁷ Vate õ ara hareka yvy katu opa, tẽvã Moise mbypara vekua iko ñõĩpo. ¹⁸ Ĩmẽ'ẽ pẽnte kuimbai poishia hỹreko õmenda jyhe ỹnga tauperã, opa myporã õmenda tẽvẽkua; hareka taupe poia shia reko jya, opa myporã jyve õmenda tẽvẽ kua. ¹⁹ Ikonda pẽnte kuimbai iko katuva, mondeava mãshyãva monde ia hareka opa ara japova karu vasu. ²⁰ Ikonda jyve pẽnte pavete'ia Lázaro he'iashua, opa kuruva. Ou vapy i yvype iko katuva hõchepe; ²¹ ko pavete iva pota vasĩ ñymy hỹvãta tẽpy ho uava ku ikuemi oava iko katuva ñy mesaivi; ñaumba retave ou hereshi kurukue. ²² Pẽnte arape mano ko pavete'ia, hãrã Tumpa jokuevare ou rahashu Abraham ẽvãpe. Haivi iko katuva mano jyve, hãrã ñotỹhã. ²³ Hãmã Ãñare ẽvãpe iko katuva õĩ asy mãrã, mãĩ vaterã mbyryivi; hesha Abraham. Haereka Lazaro hãndi; ²⁴ hãrã sapukerã hei: “Sheru Abraham, shy pareko mĩtẽ, mbou Lazaro tymaky ipo ĩtimi yype vỹry ỹsã verã shẽku; porã ãĩte rãnga ãĩ ko tata hẽndype.” ²⁵ Tẽvã Abraham heishu: “Shy ray, manduahe rĩmẽ teri rirã mbai heta ryrerã vekua, kỹrãite rãnga Lazaro heta hasa asy jyve. Hãrã ã'ẽ hai vy a ẽ kope, nde haitema ryhasa asy rẽĩ jyve. ²⁶ Hãmã koivi, ĩmẽ'ẽ ñanymbytepe mbai kype hãndi tivishava; hãrã ĩmẽ'ẽ koivi pota hasava pẽĩvã perã, katuãpo hasa, hãndi vokaivi katu ãĩpo hasa jyve kope.” ²⁷ Haipe iko katuva hei: “Akuarã sheru Abraham airure nde, rymõndo verã Lazaro sheru hẽntape, ²⁸ ĩmẽ are (5) shy ryvyre, tikuaaka veshu reta mahẽ haire oujy vekui ko hasaha asyiteape.” ²⁹ Tẽvã Abraham heishu: “Haire ĩmẽre Moise mbypara vekua harekaTumpa ĩñẽẽ mbeu'iare hei vekua; tyhẽndu reta.” ³⁰ Iko katu vekuany hei: “Kỹrã tẽvãra sheru Abraham; ĩmẽ'ẽ ohova haire ẽvãpe mano vekua pãũvirã, hejapo retakui mbai porãmba japo vekua.” ³¹ Abraham heishu: “Hẽnduseã Moise, harekaTumpa ĩñẽẽ mbeu'ia retarã, rojã ãĩpo jyve reta ĩmẽẽ tẽ ẽ pũã jyva mano vare pãũvi.”