¹ Ñymboja Hesu ẽvãpe kyrypoti mbaty iare hareka heko porãmba iare hẽndushu verãre. ² Hãrã fariseo hareka Moise mbypara vekua pyrỹmboi'iheare ĩnjeta jyreherã hei: Ko kuimbai rãnga heko porãmba ia retaĩ myvãhẽ hareka karu hãndi. ³ Haipe Hesu ñonoshu reta koo ñẽẽ ñymyhã ãnga: ⁴ Mbavara pyny mbytepe ĩmẽre (100) avisharã pẽnte kañy shirã, heja (99) oho heka verã kañyva heshajy peve? ⁵ Haivi hesha jymarã vy ape hupi ñyvã penkare; ⁶ vãhẽ jyma oho hẽnta perã, mbaty ñi'ĩrũre hareka hẽnta juri õvare, hãrã heishu reta: “Py vya minte shendie, ahesha jymarã shy avisha kañy vekua.” ⁷ Kỹrã hai pee õĩvee hai vy a ara vatepy pẽnte heko porãmba ia hejamarã, (99) heko kavi ia retaivi iko tẽvẽmba ñymbeu vare. ⁸ Ti mbavara pẽnte taupe ĩmẽre (10) nikere, kañy shi pẽnterã, my hendyã mbai sapeka, typei kavi hoo ipe, hareka heka kỹrẽy ryheve vãhẽjyshu peve? ⁹ Vãhẽ jymashurã, mbaty ñi'ĩrũre hareka hoo hyvache õ retarã heishu: “Py vy a shendie, ahesha jymãrã nikere kãñy shy hevi vekua.” ¹⁰ Kỹrã haipe õĩ vy a vasu Ñanderu Tumpa jokuerevare hỹnonde pẽnte heko porãmba ia hejamarã. ¹¹ Hesu heijy: Pẽnte kuimbai ĩmẽre mõkue tayre; ¹² haipe ndei veva heishu tuu: “She ru, mẽẽ she, mbai sha ãporã”, hãrã tuu mbijaoshu reta hai rekova. ¹³ Kỹyma ẽrã tay ndei veva opa mbaty ĩmẽrearã oho mbyry, ỹnga tẽntape; haipe iko hai potava rãĩmi hareka opa jyvare reihe hai rekova. ¹⁴ Opama jyvare he rekovarã, ou pẽnte ñymbahy vasu voka tẽntape, haipe õñepyrõ hai hasa asy. ¹⁵ Haivi oho jurureshu pẽnte karai haipe õpe, vokava mondoshu ñuupe ñyngareko he verã kushire. ¹⁶ Pootatẽ ñymy hỹvankuimbai hyvope ia kushire hou õ, tẽvã mba'ety mẽẽshua mãĩnũnga. ¹⁷ Haipe vapyrã pya mbijetarã hei: “Mbovy jokuearea retara she ru hẽntape hembypashu hou verãre, she kope amano mapo ñymbahyivi! ¹⁸ Ãpũãpo aha she ru ẽvãpe haiposhukui: She ru, porãmba rãnga ajapo Ñanderu Tumpa hỹnonde hareka nynonde; ¹⁹ katu veama shy rẽnohã ndy ra yrã; shy ñonoĩ rijokueryrea rãĩmi.” ²⁰ Hãmã haipe pũã ohojy tuu ẽvãpe. Hãrã mbyry teri ouva hesha tuu rã parekoshu, hãrã ñani oho hỹnonde hỹvãitirã kũãva, marãndurã pytere. ²¹ Haipe tay heishu: “She ru porãmba rãnga ajapo Ñanderu Tumpa hỹnonde hareka nynonde; katu veama shy renohã ndy ra yrã.” ²² Tuu heishu jokuereare: “Ãrẽ ãĩte pynohe mondeava mashyava, pymy mondeka; piñonohe kuairõ ipore, hareka jypasarã ipire. ²³ Peeru jy toro ray kyrava, pijuka, jakaru hareka ja vy a. ²⁴ Ko shy ray rãnga manoma vẽkua, ã'ẽ hykove jyma; kañy tẽvẽ kua, tẽvã ñavãhẽ jymashu.” Hãrã õñepyrõ vy a reta. ²⁵ Vokava ikorã tay tynondeva ĩmẽ'ẽ ñuupe; hãrã vãhẽ jyma ou hẽnta hyvacherã, hẽndu mbi ipuha õ hareka jyroky õre; ²⁶ haivi hẽno pẽnte jokuerearã pyrãndu ishu mbai vara vokava. ²⁷ Jokuevare heishu: “Ndy ryvy oujyrã rãnga, nde ru jukaka pẽnte toro kyrava mamba ẽã oujyrã.” ²⁸ Tichey poshyite ĩrã ñatẽy iche. Haipe tuu õhẽ jurureshu ije verã. ²⁹ Hai heishu tuu: “Heta añoma ãrỹmbory ajopo ñoinde nde ripotava, tẽvã mapemba rỹme tẽshea pẽnte kavara ray i, avya verã shi ĩrũre hãndi. ³⁰ Kova ndy ray opa jyvare rei he vekua ndy kyrypoti taupe heko porãmbare hãndiva, rijukashu toro ray kyrava.” ³¹ Tuu heishu: “Shy ray”, “nde rãnga rikoñoĩ ri shendie, opaitea she sha ãmpoare hai na ãpova. ³² Ã'ẽ rãnga javyapo hareka ñandy rorypo, ko ndy ryvy rãnga manotẽ vẽkua, hykove jyma; kañytẽ vẽkua, ñavãhẽ jymashu.”