¹ Pẽnte putu'uava jy arape, Hesu oho fariseore juhuvisha hẽntape karu verã, hãrã haire ñemĩ mãĩ jyrehe. ² Haipe ẽẽ jyve hỹnonde pẽnte kuimbai hete opa ruru vekua. ³ Hãrã Hesu pyrãndushu Moise mbypara vekua pyrỹmboi ihea hareka fariseore: Katura ñamỹnguera ñymbairasyva putu'uha arape ti katũãra? ⁴ Tẽvã haire jasasakãĩ jyre. Haipema Hesu mỹnguera kuimbai hete opa kuru vekuarã, mondojy. ⁵ Hãrã Hesu heishu fariseore: Mbavara peeva ñimbirika ti hymba guei yvykuape oa shirã, narẽ ã rapo pynohẽjy putu'uha jy arate õva? ⁶ Hãmã haire katuvẽã mbaiva heishu. ⁷ Hãmã Hesu hesha mãrãra jopea vekuare hekapy vapyha pya tynonde õva voka mesape, hãrã kỹrã ñimiñẽẽshu reta: ⁸ Hãmã mbava ndopejy karu vasuva õmendaha õ perã, avy vapy vapyha pya tynonde õ, shara ĩmẽpo ẽjy ỹnga mã ẽã kavivehea ndy hevi jopea vekua; ⁹ hãmã ouma ko ndope vekuarã, heipo nde: “Mẽẽshu ryvapy pya”, nymãrã ryhevẽĩpo reho ryvapy vapyha pya japype õ. ¹⁰ Hãrã ndopeharã, ekua vapy voka vapyha pya japype õ, ndope vekua ourã hei nde verã: “Shi ĩrũ, tynonde ekua vapy”; kyrãrã nymby horyitevepo hỹnonde mesape vapy õre. ¹¹ Hãmã ha ẽĩ vateve iñiñono ia, mimishĩã pokui; hãrã oñemo mishĩĩ iapo, vateve ñonoha. ¹² Hei jyve kuimbai jopea vekuape: “Rijapo karu vasurã, arape ti pỹnturã, avy jope nĩ ĩrũ retape, ti ndy ryvyre, nyrẽtãrãre, ndero hyvache õre iko katu vare; mãhẽ haire ndope jyvekui. ¹³ Kỹrãrã, rijapo karu vasurã, jope jyve pavete'iare, jyvamba ia, vatamba iare, hareka heshamba kuvãĩpiare; ¹⁴ hãrã ryvya pori, shara haire mba'etyre mbyhekoviajy py nde verãre; tẽvã, hekovia jypo ndekui heko kaviare hykove jya arape mano vekuare mbyteivi.” ¹⁵ Hẽndu vokavarã, pẽnte mesape vapy õ, heishu Hesu: Vy a rãnga pokui karuva Ñanderu Tumpa irreinope. ¹⁶ Hesu heishu: Pẽnte kuimbai japoka karu vasu, haivi mbe ukashu kuareta hetava. ¹⁷ Vãhẽma karu verã retaperã, mondo jokuerea hei verã hẽno hãkava retape, “Pei opama ẽ.” ¹⁸ Tẽvã opavare jyvache õñepyrõ mbai japo reta. Pẽnteva hei: “Ava rãngaje pẽnte yvy, hãrã ahapo ãmãĩhe; ambe uĩ nde mahẽ ajetẽã ẽ ndekui.” ¹⁹ Ĩrũ jya katy hei: “Ava rãngaje (5) ijovea guei, hãrã ahapo añapinti; ambe uĩ nde mahẽ ajetẽã ẽ ndekui.” ²⁰ Hãmã ĩrũjya hei: “Kuriite rãngate amendaje, hãrã katũãpo aha.” ²¹ .” Hãmã oujy jokueavarã, opa mbeushu oo ija. Hãrã oo ija poshy irã heishu jokuerea: “Narẽ ãĩte ekua ko tẽnta hupi vataha õĩpi hareka pemire hupi, eru kope pavete'iare, hareka jyvamba, porãmba vatava, hãndi heshamba kũvãĩpiare.” ²² “Haivi jokuearea hei: Karai, japohama nde rereva, tẽvã hẽnda teri ẽ.” ²³ Hãrã ko Karai heishu jokuerea: “Ekua peere hupi hareka vataha õĩpi, hãrã ryhesha vare mĩñerã tiche tynyhẽ ẽ verã shero. ²⁴ Hãrã hai pee mbavẽãpo tynonde mbe uhakashu vekuare, houkui she hau verã. ²⁵ Kuareta hetava Hesu oho hãndi; jere jykotyrã heishu: ²⁶ ĩmẽ'ẽ ou shy kotyva, tẽvã haihuveva tuu, ishy, hỹreko, tayre, tyvyre, hĩndyre hareka hykove, katuãpo ikoshi amboi area. ²⁷ Hãmã ju kurusu hupi mbava hareka oumba shaykueva katuãpo ikoshi amboi area. ²⁸ Mbara peeva pota mupũã pẽnte oo vate õrã, vapy rãniã rapo papa mbovy rapo hipityshu, hareka hesha verã ĩmẽrare kyrypoti opa japoka verã? ²⁹ Mãhẽ opama ñono hẽndarã perã, haivi opãã japorã, opavare heshava õñepyrõ ñymby hory herã hei: ³⁰ “Ko kuimbai rãnga õñepyrõ mũpũã hoorã, tẽvã katuã opa japo." ³¹ Ti, mbava tẽnta juhuvisha vasu oho ñyrãrõ verã ỹngava tẽntape õ huvisha hãndirã, vapy rãniã rapo pya mbijeta verã, katurapo (10) mil kuimbai ñyrãrõ hãndi (20) mil hyvaishorã oushu verã? ³² Hãmã jepyãpo herã, mbyry teri ẽshi ỹnga mburuvisharã, mondo poshu hai ẽvãpe jokuerea, jurureshu verã iko kavijy hãndi verãre. ³³ Kỹrã, ĩmẽ'ẽ peeva opa kavimba heja opava mãĩ nunga ĩmẽrevarã, katuãpo ikoshi amboi area. ³⁴ Haikavi rãnga juky; tẽvã hymboshy veamarã, mbaivapy rapo mymboshyajy? ³⁵ Põrã yvy pevarã, kỹrãijy yty pevarã; mombohama verãi rãnga. Japysava hẽndurã, tyhẽndu.