¹ Hãrã ĩmẽmba ẽ ou mbeuva Hesupe mãrãra pilato jukaka jyre kuaretare Galileape iare, hãrã mbihia huvykuere hũmbare huvykue hãndi, haire juka vekua Ñanderu Tumpa pevarã. ² Hãmã Hesu heishu reta: Pimoãra pee kova ikova rehe haire mbai porã ãĩteve hai hẽntape õ ỹngava retaivi? ³ Hai pee mba'etyvarã; hãmã pee pyhejãã mbai porãmbarã, peñehũndi ñõipo jyve. ⁴ Ti, pimõãra (18) jeky vekua voka Siloepe õ torre oa herã vekuare hareka juka, porã ãĩteveva ỹngare Jerusalenpe õvãivi? ⁵ Hai pee mba'etyvarã; hãmã pee pyhejãã mbai porãmbarã, peñehũndi ñõĩpo jyve. ⁶ Hãmã Hesu mbeu kova ñymyhã'ãnga hei: Pẽnte kuimbai ĩmẽre pẽnte jypy higo ñoty vekua jy yvype. Hãrã oho heka he iarã, mba ea heshapy. ⁷ Hãmã heishu ñyngareko iheshua: Mbahapy año hearema ai aheka he ia jypyre, hai tẽvã aheshãã py; jasyja; mba erã pi ẽ reipo ko yvype? ⁸ Voka ñyngareko ihea katy heishu: “Nde karai, mã ẽi teri he ko añope, tamungui juri hareka tamby kavevoshu yvy. ⁹ Katumapo koivi iakui, hãmã i ããjy rãma katu jajasyja.” ¹⁰ Pẽnte putu'uava jy arape Hesu pyrỹmboi Sinagogape; ¹¹ hãmã haipe ẽẽ pẽnte taupe (18) año ñymbairasy vekua, mbai poshy opa mỹvỹrãkuashu. Haereka katumba ñymboy kavi shiva. ¹² Hesu hesharã, hẽno hãrã heishu: “Taupe, poima ndyhevi nymbai rasykue.” ¹³ Hãmã ipo ñono ĩãrẽ. Haivi voka taupe ñysymyĩjyrã, õñepyrõ omombai vasushu Ñanderu Tumpa. ¹⁴ Tẽvã huvisha Sinagogape õ poshy i shara Hesu mỹnguera ñymbairasyva putu'uava jy arape. Haivi heishu kuaretare: ”(6)ara ẽẽ ñamba'apo verã; hãrã voka arapepo pei piñymy ngueraka verã. Tẽvã avypo putu'uava jy arape.” ¹⁵ Hãmã Hesu ĩñẽẽ mondoshurã hei: “Pee tykove hapisha tamba iare! Peera pijoraã kuei punurũmba buey, ti pini mbirika putu'uava jy arape pyraha pymbyu verã? ¹⁶ Hãrã ko Abraham tajy, Ãña pokua ñonoshu vekua (18) año mbairasykue ryheve. Hãmera porã jajora shi ñymbairasykue putu'uava jy arape?” ¹⁷ Hãmã Hesu hei kova mbairã mãrã reta heshatamba reare; tẽvã kuaretare vy a reta mbai haikaviva Hesu japova. ¹⁸ Hesu hei jyve: “Mbaivara ova Ñanderu Tumpa irreino, hareka mbaivara ambivache pohe? ¹⁹ Ova ko mostaza hãỹ, pẽnte kuimbai ñoty vẽkua jy yvype. Haivi syry oho irã ikoshi yvyra hãkã mãrẽrẽỹva. Haipe vyrare ñymby haity hãkãre. ²⁰ Hesu hei jyve: “Mbaivarera katu amỹ hã ãngahe Ñanderu Tumpa irreino? ²¹ Ova levadura, pẽnte taupe mbihia harina mbahapy vape, haivi opa jy ou kavi peve. ²² Hesu hasa oho tẽnta hareka tijupa ẽvã retaipi, pyrỹmboi Jerusalen kyty. ²³ Hãmã pẽnteva pyrãndushu: Karai, mbovyra ẽẽ oho jepeva? Hesu heishu: ²⁴ Piñyhãã katu piche õche mĩshĩĩ õĩpi. She hai pee hetapo ẽẽ pota icheva, tẽvã katuãpo iche. ²⁵ Haivi oo ija pũãmarã õche mboty, katuape pee pime pẽĩva, punũpapo voka õche, hãrã perepo: “Karai, pea ore." Hainy hei pope: “Apyrykuãã hareka aikuãã maivi peivara.” ²⁶ Haipe peñepỹrõpo pere: “Karuha hareka ñymby uha rãnga i nendie. Haivi ore vataha õĩpi nde rỹpy rỹmboiri.” ²⁷ Hai katy heipo pee: “Haima rãnga pee, she aikuambaa mãĩvi peivira pee. Pysyry shy hevi mbai porãmba japo iare!” ²⁸ Haipe ẽẽpo jaheova, hareka tyrãĩ mbupupuruva pyheshama Abraham, Isaac, hareka Jacob perã, hai vokaTumpa ĩñẽẽ mbeu'ia arykaivare Ñanderu Tumpa Mbaikatuva Êvãpe, pee katy pimepo katuape. ²⁹ Shara ĩmẽpo ẽẽ ouva kuaretare kuarasy õhẽaivi hareka kuarasy icheaivi, yvytu kytyivi hareka rovaivi, vapy karu verã mesape Ñanderu Tumpa Mbaikatuva Êvãpe. ³⁰ Hãmã ã'ẽ taykue õvã mỹtynondeha pokui, hareka ã'ẽ tynonde õvã haipe mby taykueha pokui. ³¹ Voka arape fariseore vãhẽ jyveru Hesu ẽvãperã heishu reta: Ekuajy koivi, shara Herodes pota nduka ẽ. ³² Hesu heishu: Pekua, hãrã pereshu voka avara: “Ã'ẽ ãmõhẽ mbai poshy hareka apyrỹ mỹnguera ko arape, hãmã kõĩ jyape, ĩrũ ara jyapepo ajapo verã opama ajapokui.” ³³ Tẽvã, avata teripo ko arape, paree jyrã, hareka ĩrũ ara jyape; katuãpoTumpa ĩñẽẽ mbeu'ia mbyryĩ mano shi Jerusalen. ³⁴ Jerusalen, Jerusalen, rijuka riva vokaTumpa ĩñẽẽ mbeu'iare, hareka jytakype rijapika reiva Tumpa ĩñẽẽ mbeu'iare mondohatẽ ndeva! Mbovy jyra shy kyrẽỹte ambaty nymembyre, uru memby mbatyva rãĩmi hỹpãpõka ipe, tẽvã ndee ripotãã! ³⁵ Kỹrã hejaha pyndero, hã'ẽĩma ẽẽ hãrã hai pee shy resha veama verã, vãhẽ peve voka ara pere verã: “Mbai kaviapy ouva Ñanderu Tumpa heepe.”