¹ Haipe kuareta hetava ñymbatyjy, hãrã o oa vasĩ ijehe. Hãmã Hesu õñepyrõ ĩnjetashu mboireare: Pĩngareko pijehe shi fariseore jy levadura, vokava hai hapisha tambavare. ² Mba'ety javai õ heshamba verã; ti mba'ety ñemiape õ kuaamba verã. ³ Vokavare, opaite pỹntuape pereva, ĩñyhẽndupo arakuepe; opaite pere vekua papysape o ipe, oo ĩãrẽ vivepo sapukeape mbe uha. ⁴ Pee shi ĩrũre ahaihuva hai pee: Avy pykyje shi tyreteĩ jukava, hãrã katuã mbaive japo pyndyrehe. ⁵ Ambeupo pee mbavaivi rapo jakyje: Pykyjeshi katu hekyva pyndy rykove, haivi rekova mbaikatu piririty verã Ãña hẽntape; She hai pee, pykyjeshi voka. ⁶ Mẽ ẽhãra kuei (5) vyra mõkue kyrypoti sa i vekua mire?, tẽvã Ñanderu Tumpa pẽntẽã sare shi haire mbyteivi. ⁷ Hãmã pee, pãnka haave Ñanderu Tumpa pepẽntẽĩ opa papa. Hãrã avy pykyje; shara pee mbai vasuve shi vyra hetava. ⁸ She hai pee, opaite shy mbeuva kuaretare hỹnonde, ko Kuareta tay rãĩmi ouva yvy ĩãrẽ mbeupo jyvekui Ñanderu Tumpa jokue reare hỹnonde. ⁹ Tẽvã shy nõtiva kuaretare hỹnonde, nõtiãpo jyve Ñanderu Tumpa jokue reare hỹnonde. ¹⁰ Hãrã ĩmẽ'ẽ ĩnjeta porãmba hea ko Kuareta tay rãĩmi ouva yvy ĩãrẽ Ñanderu Tumpa heja reiposhu; tẽvã ĩnjeta porãmba hea Espiritu Santo, hejaha reĩã poshu porãmba hei vekua. ¹¹ Pyrahaha Sinagogai pirã, karai vasure hareka mburuvishare hỹnonderã, avy pejepy apy mãrã rapo pi hareka mbaivara perepo; ¹² Vãhẽma pĩnjeta verãrã Espiritu Santopo pyny mboihe kui pere verã. ¹³ Hetava mbyteivi pẽnte kuimbai heishu Hesu: Pyrỹmboi'ia, mbeushu shichey tymẽẽ she sha ãporã, yreru heja ore vekua. ¹⁴ Haipe Hesu heishu: Nde shi ĩrũ, mbavara shi ñono pyny mbytepe Juezrã ti hejaha vekua mbijao i verã? ¹⁵ Heijyshu reta: Pymãĩ hareka pingareko pindijehe shi mbai potakue; shara kuareta hykove ẽẽãhe mbai hetarerã. ¹⁶ Haivi Hesu mbeu jyshu reta ko ñẽẽ ñymyhã'ãnga: Iko nda aryka'e pẽnte kuimbai iko katuva, jy yvype ñotyva õhẽ kavi hareka heta mỹnõõ shi. ¹⁷ Haipe iko katuva pya mbijetarã hei: “Mbaivara ajapopo?." Mba'ety añoty vekua ãnãtu verãpe. ¹⁸ Haivi hei: Aikuama ajapo verã: Opapo ambai oo shimĩtyre anatũseape, ajapojy verã tivishave õ haipepo anatukui kova shimĩtyre hareka opaite ĩmẽ areare. ¹⁹ Haipepo hai shy rykovepe: Nde shy rykove, heta mbai ĩmẽ ryre nãtũava heta ara pevãrã; putu'u, karu, heu yy, vy a. ²⁰ Tẽvã Ñanderu Tumpa heishu: Nde tykove mbaimba kuaava!. Ko pyharepo rỹmano; rỹnãtu vare, mbava pevarãra pokui? ²¹ Kỹrã rãnga jehushu hai pevarãĩ nãtu i, tẽvã mba'ẽã ĩmẽre Ñanderu Tumpa hỹnonde. ²² Haivi Hesu heishu mboireare: Hãrã hai pee: Avy pejepy apyhe pyndy rykove, peu verãre, ti pyndy rete hareka pymonde verãre; ²³ pyndy rykove mbai vasuve shi ho uava, hareka pyndy rete mbai vasuve shi pymonde verãivi. ²⁴ Pymãĩhe yryvu, haire ñotỹa hareka mỹno õã; mba'ety houva nãtu verãpe, tẽvã Ñanderu Tumpa myngarushu. Pee rãnga mbai vasuve shi vyrare!. ²⁵ Mbavara pyny mbytepe oje py apy rupii mbupukua veepo jyshu mĩshĩĩ hykove? ²⁶ Hãmã katuã pijapo mbai mishĩĩvãrã, mãrã'ĩrãra peje py apy pihe mbai ỹngavare? ²⁷ Pymãĩhe mãrãra yvotyre syry, haire mbaiva pẽã mba'apo; hãrã She hai pee Salomón ijevaka ryheva mba ñymondeva haire rãĩmi. ²⁸ Hãmã Ñanderu Tumpa kỹrã mimonde yvyra mire ñanaipi õ hãndi ñũũ hupi ã'ẽvãre, haivi kõĩ jyrã opa hapyha, mbovyra Ñanderu Tumpa mimonde, peema katy pinimonde ñõĩpo, kuareta sai jyrojava!. ²⁹ Hãrã avy piko peje py apyhe peu verã hareka pimbyu verãre. ³⁰ Shara kuaretare ã'ẽvare ikohe mbai kyrãva; tẽvã pee ĩmẽ pyre pe Ru vate arapy õ, opa kuava mbaivara piko tẽvẽhe. ³¹ Hãmã pyheka jyve Ñanderu Tumpa irreino, hãrã opaite kova mbai mẽ ẽãve pope. ³² Avy pykyje, pee shy avishare. Pyny mbovyiterã, pe Ru ara vate õ pota mẽẽ perã, mẽẽpe irreino. ³³ Pevende opaite ĩmẽ pyreva, hãrã pymẽẽ mãĩnũnga mba'ety reape; kỹrã pijapo vosa ndei tujarã, mbai hetava rreino ara vate õpe, manarõ'ia ichemba verãpe, hareka kupii houmba verãpe. ³⁴ Hãmã pyny mbaikavi heta ẽvãpe, haipepo ẽjyve pyndy rykove. ³⁵ Pyhãrõ kavi pẽĩ hareka pymy hẽndy mbai sapeka. ³⁶ Hãmã jokueharea oo ija hãrõ õ rãĩmi ñymendaivi oujy verã, pyryhenorã õche peashu verã vãhẽ oujyrã. ³⁷ Hãrã jokuearea vy apo oo ija oujy marã, hesha ocheã ẽrã. Ãẽtẽĩte hai pee, oo ija ñono kavipo ẽ hareka mbyvapypo jokuereare mesape, hãrã ñonoposhu hou verãre. ³⁸ Ajemãĩpo pyhare mbytepe vãhẽ oujy, hareka kõĩ serima ourã, hãmã hesha ocheã ñynoirã, vy apo jyre jokueha reare. ³⁹ Hãmã pikua kavi kova: Oo ija kuaa mbaipe rapo ou manarõ'iarã, ochẽãpo ẽ hãrã ma ẽĩãpohe iche ho ipe manarõshu verã. ⁴⁰ Pee jyve pyhãrõ kavipo pẽĩ; pimoãmba pẽĩvape She Ñanderu Tumpa tay, aijypokui ko yvy ĩãrẽ. ⁴¹ Hãrã Pedro pyrãndushu Hesu: Yry Ija, ko ñẽẽ ñymyhã'ãnga ore pevarãĩra rere je, ti opavare pevãrãra? ⁴² Hesu hei: Mbavara jokuea reva jyrojahahe kua kaviva hareka hekope kavi he'iashuva japova, kyrãva oo ija heja poshu hoo ipe ñyngareko verã, hareka myngaru verãre jy arape kavi? ⁴³ Vy apo i ko jokuea reva oo ija vãĩjyma ourã, hesha he'iashuva opa kavi kyrã japorã. ⁴⁴ Ãñẽtẽite hai pee, opava mãĩnũnga oo ija ĩmẽrẽare opapo ñono ipope. ⁴⁵ Tẽvã ko jokuea reva pyape hei; oo ija nãrẽã nungapo oujy, õñepyrõ jyvavarehe ĩrũre jokuea vare, kuimbaiva hareka taupeva, hãrã ĩñono karu hareka ñymyngau, ⁴⁶ haivi oujypo oo ija pyrokue õ, hãrõhãmba õ arape hareka jy ora mõãmba õpe, mohẽpo hai ẽvãĩvi hãrã mbihiapo jyroja mbare hãndi mẽẽshu verã pohyva ñunũpa. ⁴⁷ Hãmã ko Jokuea reva kuaa kavi mbaivara oo ija pota, tẽvã õĩkavia hareka japoãshu ĩñẽẽrã, hetapo nupãhã. ⁴⁸ Jokuea reva kuambavape mbai porãmba japova nupã verã, saivepo nupãhã. Heta mẽ ẽãshuva, hetapo jururea jyshu hykoja: Hãrã heta jyrojaha heapo hetave jurureashu. ⁴⁹ Hesu hei: She ai amy hẽndy tata ko yvy ĩãrẽ, potaitia nynga ñyhendyma ẽ she!. ⁵⁰ Hãmã ñymyngaraiha vape she añymyngaikapo; ajepy apyte hãrã aipotama vãhẽ vokava ara. ⁵¹ Pimõãra she aĩrã arupo pyavapy ko yvy ĩãrẽ? Mba'ety! She aru jyve papishare piko porãmba hãndi verã ko yvy ĩãrẽ. ⁵² Hãmã ã'ẽ pẽnte oope (5) iare ijupĩĩpo ñyrãrõ, mbahapy õre pũãpo mõkue iare, hãrã mõkue õre mbahapy ia rehepo. ⁵³ Hãmã teru pũãpo tayre, tyray pũãpohe tuu, tesy pũãpo memby kuñare; tymemby kuña pũãpohe ishy; teme ishy pũãpohe memby hỹreko, tỹmemby hỹreko pũãpohe ĩme ishy. ⁵⁴ Heijyveshu Hesu kuaretare: “Pyhesha ãvã pỹntu pũã kuarasy ichea kytyrã, hãmã pere kuei: “Haivipo”, hãrã haivi. ⁵⁵ Hãmã yvytu peju ñanda kataivirã pere kuei: “Hakupo ẽ” Hãrã haku ẽ. ⁵⁶ Pee tykove hapisha tamba vare!. Pee pikua kavi arare pymaĩrã mbaivara ikopo. Mãrãĩrapo pee pikũã mbaivara iko verã ara japyape? ⁵⁷ Mãrã'ĩrãra pyheshã pindi juhuvi mbai haikaviva? ⁵⁸ Ĩmẽ'ẽ ndyresha tãmba ia reho hãndi mburuvisha ẽvãperã, ẽñehãã ẽĩkavijy hãndi pehupi vãĩ. Ndei ndyraha Juez hỹnonderã. Hãrã Juez nymẽẽ poshu syndaro, haivi syndaro ndyhapo nymby pereso. ⁵⁹ Hãmã she hai ndee rẽhẽ jymba verã haivi. Opa ĩmẽ ryreva rymẽẽ peve."