¹ Haivi pẽnte hẽndape Hesu jurure ẽshu Ñanderu Tumpa, opama jururerã, mboirea pẽnteva heishu: “Yreja, yrỹmboivehe mãrãrapo jurureha, Juan mboiva rãĩmi mboireare." ² Hãmã Hesu heishu reta: Pirurerã pere: “Sheru vate arapy rẽĩva, toñemombai ndy ree. Tou ny rreino. Tijijapo nde ripotava, ko yvy ĩãrẽ vate arapy rãĩmi. ³ Mẽẽ ore ho ua verã opa ara. ⁴ Hejarei yryhevi mbai porãmba japoa vekua, shara ore hejarei jyve shi mbai porãmba japo yryrehe vare. Avy mãẽĩhe tyhã ãhã yrypya, yryreky shi mbai porãmbava." ⁵ Hesu heijyshu reta: Ñañonoshu peeva, pẽnte ĩmẽre ñi'ĩrũrã rearã, pyhare mbytepe oho hẽnta perã heishu: “Shi ĩrũ, poryka she mbahapy pãhã, ⁶ shara pẽnte shi ĩrũ kurite mbyryivi vãhẽ ou shy rẽntape, hãrã mba'ety are maĩ nũnga amẽẽshu verã." ⁷ Ñañonoshu ñi'ĩrũ oo ivĩĩ heishu: “Avy ei mãĩ ẽ shyrehe; ñymbotyma rãnga õche, shy rayre ãñenoma ãĩ hãndi turupape; katũãpo ãpũã ãmẽẽ nde mãĩ nunga." ⁸ Shee hai pee, ñatẽyte pũã mẽẽshu mãĩnũnga ñi'ĩrũva, tẽvã, potã hykũĩ ou magãturã, pũã ñoĩpo mẽẽshu ñĩ ĩrũ ikotẽvẽ hea. ⁹ She hai pee: Pirurerã Ñanderu Tumpa, mẽẽpo pee; pyhekarã, pyvãĩposhu; punũpa õcherã, jypeapo pee. ¹⁰ Shara jurureva, me ẽã ñoiposhu; hãrã hekava, vãhẽ poshu; õche nũpava, pe aposhu. ¹¹ Mbavara terure mbytepe, tay jurureshu pãhãrã, mẽẽ poshu ita? Ti jurureshu pirarã, piratẽ verã mẽẽ poshu mboi? ¹² Ti jurure uru hipiarãra, mẽẽ poshu vãkỹrãpe? ¹³ Pee pyny ñarõva pikatu pymẽẽ mbai haikaviva pyndy ray reta perã, pynde Ru ara vatepy õ mẽẽpo pee Espiritu Santo pirureshurã? ¹⁴ Hesu mohẽ shi pẽnte kuimbaivi mbai poshy ma ẽngureshua. Mbai poshy õhẽma shirã, kuimbai ña ẽngu vekua ĩnjetajy, hãrã kuaretare hãĩrãte hesha. ¹⁵ Tẽvã ĩmẽ'ẽ heiva: “Beelzebu, vokava Ãña, hai mbai poshy juhuvisha rupii rãnga, ko kuimbai mohẽ mbai poshy.” ¹⁶ Hãmã ĩrũre pyahããshu verã Hesu, jurureshu mbaikavi heshaha verã ara vateivi ouva. ¹⁷ Hesu katy kuaa ẽ haire pyape õrã, heishu reta: Mburuvishare ijupi pũãva, hareka ñyrãrõva opapo ñymbai; pẽnte oope õre ijupi pũãva, opãĩpo ñymbaĩ jyve. ¹⁸ Kỹrã jyve Ãña ijupĩ pũã ijeherã, mãrãrapo ñymbaikatu ijupĩ? Kỹrã hai pee shara pere shyrehe, Beelzebu mbaikatu rupĩ ãmohẽva mbai poshyre. ¹⁹ Hãmã Beelzebu rupii mbai poshyre ãmohẽrã, ¿pyndy ryhevare, mbava ñymbaikatu rupĩĩra mõhẽ mbai poshyre? Vokava rehe pymboi vare japova rupii ijyhesha, pee pijavyva. ²⁰ Ñanderu Tumpa mbaikatu rupii rãnga she ãmohẽ mbai poshyre, hãmã vokava he'ise Ñanderu Tumpa irreino vãhẽma pẽĩvape. ²¹ Hãmã Hesu hei ko ñẽẽ ñymyhã ãnga: “Pẽnte kuimbai imbareteva, vokava hai Ãña, ñymboka ipope ñyngarekohe hoorã, opa hoo ipe õre haikavi ẽ. ²² Hãmã ỹnga kuimbai ou imbareteve shiva, (vokava hai she Hesu) hekyshi ñymboka jyroja ihearã. Hãmã pota japova japohe mbai hekyshi vekuare. ²³ Hãmã Hesu hei: “She ndie õĩmba, ñymby vaisho shy rehe; hãrã she ndie mynõõ mbava mbai rãy, opa momohẽ. ²⁴ Hãmã mbai poshy õhẽ kuimbaivirã, oho iko yvy haivi mbaipi putuu verãipi heka; hãmã heshãrã, hei: “Ahajypo shy rẽntape, ãhẽ vẽkuaivi." ²⁵ Hãrã oujymarã hesha ko kuimbai oo typeihava hareka opa ñonoa kavijyva rãĩmi. ²⁶ Hãmã oho veru hãndi (7) mbai poshy porãmba aiteve shiva, hãrã iche kuimbai hykovepyrã. Hãrã kuimbai heko porã ãĩtevejy tynonde vekuaivi. ²⁷ Kovare Hesu ĩnjeta teri ẽ vekua, pẽnte taupe hetavare pãũvi sapukerã hei: ¡Vy apo i tyrye ndyveru vekua ko yvy ĩãrẽ, hareka taupe rỹ kambu rihe vekua!. ²⁸ Hesu heishu: ¡Vy apo jyve Ñanderu Tumpa ĩñẽẽ hẽndu hareka japova!. ²⁹ Hetavema kuaretare ñymbaty herã, Hesu õñepyrõ hei: Kuaretare ã'ẽvã hai tykove ñarõva, hãrã jurure jyre mbaikavi heshaha verã. Tẽvã mẽ ẽhã poshu mbaikavi heshaha verã;Tumpa ĩñẽẽ mbeu'ia Jonas ryheva kuẽĩpo hesha hakashu. ³⁰ Jonas rãĩmi mbaikavi heshaha verã tẽnta Ninivepe i vekuare, kỹrãpo Kuareta tay rãĩmi aiva yvy ĩãrẽ, haipo jyve mbaikavi heshaha verã kuareta ã'ẽvãre pevarã. ³¹ Taupe mburuvisha rovai kyty õ pũãpo ñimbivache arape, kuaretare ã'ẽvãre hãndi hareka jahepohe. Shara ko taupe mburuvisha ou yvy japyvaivi hẽndu verã Salomón ñymbai kuaakue; ã'ẽ kope ĩmẽ'ẽ mbai vasuve shiva Salomón. ³² Ninivepe õre pũãpo jyve nimbivacheha arape, kuareta ã'ẽvãre ñono vaiposhu hareka jahepohe. Shara haire opa ñymbeurã oujy reta Ñanderu Tumpa kyty, hẽnduma Jonas mbeu Ñanderu Tumpa ĩñẽẽrã; hãrã ã'ẽ kope ĩmẽ'ẽ mbai vasuve shiva Jonas. ³³ “Mbaveã myhẽndy mbai sapeka ñono verã ñemi ẽvẽrãpe, ti ñono verã mbai hyru ipe, vate ñõĩpo ñonoha sapeshu verã iche ouvare. ³⁴ Ndyrete sapeka rãnga hai ndyresa; hãrã ndy resa haikavirã opaite ndyrete sape jyve; tẽvã ndyresa porãrã ndyrete tĩmimbiape ẽ. ³⁵ Tẽvã mãĩ kavi, avy tove sape kavi ẽvã ndy pyape. ³⁶ Ndy rete sape kavirã, mba'ety tĩmimbivarã, opa mbai ryhesha kavipo, mbai sapeka sape kaviva rãĩmi." ³⁷ Hesu poima ñimiñẽẽrã, pẽnte fariseo jurureshu oho karu hãndi verã hẽntape. Hãrã Hesu vãhẽrã, vapy mesape. ³⁸ Hãmã fariseo hesha Hesu jypohea karu verãrã, haipe hãĩrã hesha vokava. ³⁹ Tẽvã Ñandeja Hesu heishu: Pee fariseore yy ho uha pya, hareka yyare ĩãrẽĩ pijohe; pyndy pya katy tynyhẽ manarõse hareka piniñarõ kue. ⁴⁰ Tykove mbaimba kuava! Pikuãra ĩãrẽ mbai japova, hapype japo jyvẽrã? ⁴¹ Hãmã pymẽẽ mbai pã ãpova mãĩnũnga mba'ety revape, hãrã opa mbai hekovia jypo pee. ⁴² Pyndy pavete pokui fariseore!, pymẽẽva Ñanderu Tumpa ña ãpova diezmo, menta, ruda, hareka opaite tĩmĩtykue; hãndi Ñanderu Tumpa ña ãpova mbai haikaviva hareka jyhaihu pimbijiche. Pyhaihupo jyve Ñanderu Tumpa, hareka avy pypoi pymẽẽ diezmo. ⁴³ Pyndy pavete pokui fariseore!, pota pyvapy sinagogape õ vapyha pya tynonde õ, hareka pota pyny marãnduha mbai vasuva rãĩmi pe vataha õĩpi. ⁴⁴ Pyndy pavete pokui Moise mbypara vekua pyrỹmboi'iheare hareka Fariseore!. Pyndy ova manova ñotyhã vekua rãĩmi heshaha mbava, hãrã kuaretare kuããrã hasa ĩãrẽ. ⁴⁵ Haipe Moise mbypara vekua pyrỹmboi ihea heishu: Pyrỹmboi'ia, ko rereva rãnga ore yrỹmymãrã jyve. ⁴⁶ Hesu katy hei: Pyndy pavetepo jyve kui Moise mbypara vekua pyrỹmboi ihea!. Pee piñonova kuimbaire ĩãrẽ mãĩnũnga pohyva katumba jepyhea, pee katy mãĩnũnga pohyva pipotã pyraha hareka puhupi. ⁴⁷ Pyndy pavete pokui! Pumu pũãvaTumpa ĩñẽẽ mbeu'ia ñotyava hẽndarã, pyndy ryhevare arykai vare juka vekua!. ⁴⁸ Kỹrã, pee pymyhẽẽ pymbeu arykai vare japo vekua; haire juka vekua, pee pumũ pũã shi manovare ñotyhã verã hẽndarã. ⁴⁹ Hãrã Ñanderu Tumpa ñymbai kuaakuepy hei: ” She amondo poshuTumpa ĩñẽẽ mbeu'iare hareka she ajokuevare; haivi pẽntevape jukapo hãrã ĩrũre heshatãpo." ⁵⁰ Ñanderu Tumpa jururepo kuaretare ã'ẽvãre, opaiteTumpa ĩñẽẽ mbeu'iare jukahava huvy ĩñohẽ vẽkua ko yvy japoha rãvãĩ. ⁵¹ Hãmã Abel huvykue vivee Zacarias huvykue peve, jukaha vekua altar hareka tupao pãũpe. ⁵² ¡Pyndy pavete pokui, pee Moise mbypara vekua pyrỹmboi ihea!, peñemombai pihe mbai kuaakue pe aha pya reherã; pee rãni pichembava pyma ẽĩãhe iche, pota ichevare. ⁵³ Hãmã Hesu hei kova mbai reherã, Moise mbypara vekua pyrỹmboi ihea hareka Fariseore poshyite jyre hãndi, hãrã õñepyrõ opava reii pyrãndushu reta, ⁵⁴ ñeñemii jyre, heshamarã ĩñẽẽre ityshu verãre hareka ñono vaishu verã.