¹ Haivi Hesu hẽnovejy (70) jokue verã, hãrã momokueĩ mondo hai hỹnonderã, opaite hai oho verãipi, tẽnta hareka ikoava retaipi. ² Hesu heishu reta: Ãẽte heta ẽ tĩmitykue tãrõmava, tẽvã mba'apo iare mbovyi jyre. Hãrã pirureshu koo Ija, tymbou mba'apo verãre mynõõ verã koo hupi õ. ³ Pekua, pikuaa kavipo she apyrỹ mondo avisha rãĩmi, avara vasure mbytepe. ⁴ Avy pyraha kyrypoti hyru, hareka vosa mãĩnunga ẽpya, hãndi pepy ryheva; hareka avy pimbou pehupi mbavape pymarãndu verã . ⁵ Pyvãhẽma pẽnte tijupa perã, pere rãni: “Pya kavipe tõĩ reta ko oope õre." ⁶ Ĩmẽ'ẽ haipe kuareta pya kavivarã, voka ñymarãndu pya kavi ryheva hai retapo ña ãporã; katy kyrããrã voka ñymãrãndu pya kavi ryheva oujypo pee. ⁷ Pypyta voka oope, peu hareka pimbyupy mẽ ẽã peva; mba'apo ia rãnga hipity jyve japova hepykue. Avy pekua ỹnga oo retaipi. ⁸ Opaite tẽnta pichevaipi hareka pymy vãhẽã kavirã, pypyta hareka peu mẽ ẽã peva. ⁹ Pymynguera ĩmẽ'ẽ haipe ñymbairasyarã, hãrã pereshu reta: “Ñanderu Tumpa irreino kõõma ẽ pyndyhevi." ¹⁰ Tẽvã ĩmẽ'ẽ tẽnta pymyvãhẽ mbavarã, pẽhẽ katuape hãrã pere: ¹¹ “Yvy timbo pyny rẽntape õ yrepyre oja vekua, mytỹmohãjy pyndyrehe. Hãrã, pikuapo kova, Ñanderu Tumpa irreino ñymy kõõĩma ẽ pyndy hevi." ¹² Hãmã hai pee: Ñimbivache arape, ko ñunupa voka tẽnta pevarã pohyvepo kuaretare Sodomape ivekua retaivi. ¹³ Tenga nde, tẽnta Corazin! Tenga nde, tẽnta Betsaida!. Tiro hareka Sidonpe ijijapo mbaikavi heshaha verã pyny pãũpi japoha vekuarã, kuriãpo haire oujy ñymbeu Ñanderu Tumpape, hareka monde tẽvẽrã mondeava hũva, hãndi vapy tẽvẽrã tanimbupy. ¹⁴ Hãrã ñimbivache arape, pohyvepo punũpaha kuaretare Tiro hareka Sidonpe õ retaivi. ¹⁵ Nde tẽnta Capernaum, rĩmõãra, vate arapy ndurupiiha? Manovare ẽvã pevepo nymby vejyhakui. ¹⁶ Hãmã pee pyny rẽnduva, shee shy rẽndu; hãrã pini mbijicheva, shee shimbijiche; hareka shimbijicheva, mbijiche jyve shymbouva. s (70) iare oujyrã vẽkua ¹⁷ Hãmã (70) kuaretare mondoava vy ape vãhẽjy jyverurã hei reta: Yreja, mbai poshy retaave rãnga japo ore ĩrĩ ñẽẽ ndyreepe e'iashua. ¹⁸ Hesu heishu reta: She ahesha mãrãra Ãña oa vate araivi, vera vekua rãĩmi. ¹⁹ She amẽẽ pee mbaikatu pypyrõ he verã mboi hareka vãkyrãpe vãsure, hareka pijepy he verã mbai poshyre, mbaimba japo pyndyrehe vape. ²⁰ Tẽvã avy py vya mbai poshyre japo pee pini ñẽẽrã, pyvy apo jyve pyndyree ñonohãma vate arapy Ñanderu Tumpa ẽvãpe. ²¹ Haivi Hesu vy a i Espiritu Santo rupiirã, hei: Arẽmombai vasu, Sheru, ara hareka yvy Ija, shara rĩñomi kova mbai ĩñarãndu hareka mbai kuaava retaivi, hãrã rikuaakashu mbaimba kuavare. Shara kỹrã, Sheru; ndee ripota. ²² Opa mba e Sheru ñono shepope. Mba'ety kuava mbavara hai Tyray, koñẽĩ Tuu, hareka mba'ety kuava mbavara hai Teru, koñẽĩ Tay, hareka pota kuaakashuare kuaakaposhu Tay. ²³ Haipe Hesu mãĩhe mboirea retarã heishu hã'ẽĩ õpe: Vy apo kuareta heshava, kova mbai pyhesha pẽĩva. ²⁴ Ãẽtẽĩte hai pee, hetaTumpa ĩñẽẽ mbeu'ia hareka mburuvisha vasure potatẽ hesha kova, pee pyhesha pẽĩva, tẽvã heshãã; potatẽ hẽnduvare ko pee pyhẽndu pẽĩva, tẽvã hẽnduã reta. ²⁵ Haivi pẽnte Moise mbypara vekua pyrỹmboi ihea ñymbou pyrãndushu Hesu, pya hããshu verã: Pyrỹmboi'ia, mbaivarapo ajapo apity verã tykove opambava? ²⁶ Hãmã Hesu heishu: Mbaivara hei Ñanderu Tumpa jykuatiape?, mbaivara akuarã ryheshapy? ²⁷ Moise mbypara vekua pyrỹmboi ihea hei: “Haihu Ñanderu Tumpa, ndypya ryheve, ndy rykove hareka opaite nypyrãtãkue ryheve, hãndi nymbai kuaakue ryheve; haihu ndapisha nde rijyhaihuva rãimi." ²⁸ Haipe Hesu heishu: Haikavite rere. Kỹrã rijaporã, ryrekopo tykove opambava. ²⁹ Moise mbypara vekua pyrỹmboi ihea katy pota mby haikavi pyrãnduvarã heishu Hesu: Mbavara shapisha? ³⁰ Hesu heishu: Pẽnte kuimbai ohojy Jerusalenvi Jerico kyty, hãmã ohojymarã oa manarõ'iare ipope, opa hekyshi reta mondeva hareka heta nupãrã juka ñono, haipe hejarã oho shi reta. ³¹ Mundi hasa jyve haipi pẽnte pai, hãmã heshatẽã jereherã hasa oho shi. ³² Haivi pẽnte kuimbai pai mboryrea hasa jyve haipi, heshatẽã hasaĩ oho jyve shi. ³³ Tẽvã pẽnte kuimbai Samariape õ oho jyve voka pehupi, hãrã heshamarã parekoshu. ³⁴ Hãmã ñymbojahe voka kuimbairã, pyhãnopyshu kutua vekuape asaite hãndi vino, hareka opa jokua kavishu. Haivi hupi hymba mbirikami rerã, raha pẽnte mbuhupare hooperã haipe ñyngarekohe. ³⁵ Hãmã ĩrũ ara jyape, kuimbai Samariape õ nohẽ kyrypoti mõkue ara repy mẽẽshu oo ijarã, hei: “Ñyngareko he she kui ko kuimbai, hãmã ĩmẽ'ẽ rymẽẽve hearã, aijyrã ambyhepy jypo ndekui." ³⁶ Mbavara kova mbahapyivi, manarõ'iare ipope oa vekua hapisha? ³⁷ Moise mbypara vekua pyrỹmboi ihea hei: Kuimbai parekoshu vekua. Haipe Hesu heishu: Ekua kỹrã japove. ³⁸ Hãmã Hesu oho mboireare hãndi pehupirã vãhẽ oho pẽnte tẽntape. Haipe taupe Marta he'iashua myvãhẽ hẽntape. ³⁹ Marta ĩmẽre pẽnte kypyy Maria he'iashua, ou vapy Hesu hỹnonde hẽndu verã ĩñẽẽ. ⁴⁰ Marta japo verãĩ ojepyapy ihe, hãrã ñymboja Hesu ẽvãperã, heishu: Sheja, ryheshãra shy kypyy sheĩ shyrejahe ko ajapo ãĩva? Mbeuveshu shy mbory verã. ⁴¹ Tẽvã Hesu heishu: Marta, Marta, rĩkangy hareka rejepy apyhe opava mbai rijapo verãre; ⁴² koñẽĩ'ẽ pẽnte mbai haikaviva. Voka Maria pyhỹrõma hãrã mba'ety hekyshi verã.