1 Vokava arape, õhẽ kuatia ñẽẽ mburuvisha Augusto Cesarvi, iko verã opaite kuaretare oho mbyparaka verã hee kuatiape hareka oa vekuape. 2 Vokava tyree mbyparaha verã kuatiape tynondeite japoha Cirenio mburuvisharã teri'ẽ Siriaperã. 3 Haivi opavare ohojy hẽnta retaipi hee ñonoka verãre kuatiape . 4 Hãrã Jose õhẽ oho Galileaivi, tẽnta Nazaret, Judea kyty, David hẽntape Belen he'iashua, David hai Jose ñymoña hãndiare aryka'e. 5 Hãrã oho Belenpe ñonoka verãre hee kuatiape hãndi hỹreko Maria, purua'iva. 6 Hãrã Belenpema ĩmẽ ñynoĩrã, vãhẽmashu Maria memby verãpe. 7 Haipe oashu memby kuimbai tynondeva, hareka tarapopy ñoma sanjay, haivi miñenopy pẽnte mymbare karusepya shara mba'etyshu pyta verã retape. 8 Belen jykoty ĩmẽ ñynoĩ avisha ñyngareko'iheare, ñũũpe humbare maĩ ñynoĩhe pỹntu peve. 9 Mundii ijeshakashu pẽnte Tumpa jokueva, haivi Ñanderu Tumpa himbipekue juri sapeshu reta vate araivi, hãrã opa kyje reta. 10 Tẽvã Tumpa jokueva heishu: Avy pykyje; aru pee mãrãndu haikaviva, mbyvya verã kuaretare: 11 Kuri oaje David hẽntape pẽnte pyrymondo jepe'i verã, vokava hai Kristo, Ñandeja. 12 Kovapo hai pee heshaha verã: pyheshaposhu sanjay ñomahava tarapopy, hareka miñenoha pẽnte mymba karuseapy. 13 Haipe mundii ijeshaka Tumpa jokueva hareka ĩrũre hetava hãndi vate araivi, Ñanderu Tumpa pyrahe ñynoĩshurã hei: 14 Toñemombai vasu Ñanderu Tumpa, ẽvã ara vateve'õpe, hareka kuaretare tiko kavi ijupive, Ñanderu Tumpa pya kavi rupii! 15 Hãrã Tumpa jokuevare jyrahajyma vate arapyrã, avisha ñyngareko'iheare hei ijupe: Jaha Belenpe ñamaĩhe ko jehuva, hareka Ñanderu Tumpa ñanymbykuaakava. 16 Hãrã avisha ñyngareko'iheare narẽ'ãĩte jyraharã hesha reta Maria, Jose hareka sanjaymi ñeno'ẽ mymba karusepyapy. 17 Heshamarã, mbeu reta Tumpa jokuevare mbeushuvare ko sanjay, 18 hãmã opaite hẽnduvare mbyvya avisha ñyngareko'iheare heiva. 19 Tẽvã Maria nãtuĩre pyape opaite kova mbai hẽndu vekua hãrã pya mbijeta'ihe. 20 Avisha ñyngareko'iheare jyrahajy retarã, pehupi vy'akue ryheve pyraheshu Ñanderu Tumpa, shara he'iashuva rãĩmi opaite hesha hareka hẽnduva ikohe reta. 21 Hãrã 8 aravape hapia piremi chinchiashi sanjay, haivi mbyheeha Hesu, Tumpa jokueva heishuva rãĩmi Maria, ndeiteri puruarã. 22 Hãrã vãhẽma ara haire ñymbyhaikavi verãpe, Moise mbypara vekuape heiva rãĩmi, raha reta vokava sanjay Jerusalenpe ñono hỹnonde verã Ñanderu Tumpa. 23 Kyrã japohe reta shara Moise mbypara vekuape kyrã heirã: "Opaite sanjay kuimbai tynondeheva, myngaraiha ñoĩpo Ñanderu Tumpa pevarã". 24 Hãrã jyraha mẽẽ jyve mãĩnũnga haikaviva mbijicheava Ñanderupe, Moise mbypara vekuape heiva rãĩmi: Mõkue pukui, ti mõkue pykasu. 25 Haipe iko'i Jerusalenpe pẽnte kuimbai heko kaviva Simeón he'iashua. Kuimbai omombai vasuva Ñanderu Tumpa hareka hãrõ ia Israel mohẽã verãpe, hareka Ñanderu Tumpa Espiritu Santo ẽẽ hãndi, 26 Espiritu Santo kuaakashu manomba verã ndeiteri Kristohesharã, Ñanderu Tumpa tay. 27 Hãmã Simeón oho tupaope Espiritu Santo kỹrã heishurã; hãrã sanjay Hesu tuu hareka ishy raha sanjay tupaope japokahe verã Ñanderu Tumpa ĩñẽẽ mbyparava heiva rãĩmi. 28 Simeón hupi sanjay jyvarerã, ĩnjeta kavi Ñanderu Tumpape hei: 29 “Ã'ẽ, Sheru Tumpa, ryma'ẽĩmapo amano pya kavi ryheve, shara rijapoma rereva rãĩmi rijokuevare. 30 Aheshama shyresa rupii kuaretare mondojepe verã. 31 Hãmã riñono opaite kuaretare hỹnonde. 32 Ñanderu Tumpa hai sapeva haimba kuareta ỹngavare, hareka Israel himbipe pyrãta kavipo opaite tẽnta ỹngavaivi sanjay Hesu oa haipe." 33 Tẽvã Jose hareka Hesu ishy mbyry mãĩ Simeón heiheva rãĩmi voka sanjay rehe. 34 Haivi Simeon ĩnjeta kavihe reta, hãrã heishu Hesu ishy Maria: Hesha, ko sanjayre Iraelpe hetapo'ẽ heshatambava, kovare ohopo ãña ẽvãpe. Hetapo'ẽkui haihushu verã, kovare ohopo Ñanderu Tumpa ẽvãpe. Hetapo'ẽ Hesu hyvaisho, hareka hetapo'ẽ jyve Hesu haihuva. 35 Hãrã kỹrãpo kuaaha pepẽnteĩ pyape ẽvã; hãmã vokapo nde pẽnte kyse puku ndukutu hareka iche ndyreheva rãĩmi. 36 Ĩmẽ'ẽ jyve haipe pẽnte taupe Tumpa ĩñẽẽ mbeu'iarã, Ana he'iashua, Fanuel tajy, Aser ryhevare. Kuakuamava, ndei ryheve jyrekovare hareka siete año ĩmẽ iko hãndi. 37 Hãmã japo 84 ãño ĩmẽ manoshi, hãrã õhẽã tupaovi, ara hareka pỹntupeve ikohe Ñanderu Tumpa, karumba hareka jurure ñõĩva. 38 Hãmã haipe Ana ou jyve hãrã mẽẽshu jyvy'akue Ñanderu Tumpa, õñepyrõ ĩnjetahe vokava sanjay opaite Jerusalenvare hãrõ'õva ñymondo jepeva. 39 Hãma opama japo Ñanderu ĩñẽẽpe heivarã jyrahajy Galileape, hẽntare Nazaretpe. 40 Hãrã sanjay syry oho hareka pyrãta, mbai kuaave oho sevẽrã, Ñanderu Tumpa mypyrãtãve rahashu. 41 Hãmã japoare oho ñõĩva kada ãño Jerusalenpe pascua jy'areterã. 42 Hãmã Hesu 12 año mbotyrã, jyraha reta Jerusalenpe jypykuaa voka aretepe. 43 Tẽvã arete opamarã haire ohojy hẽntape, Hesu pyta hai Jerusalenpe tuu hareka ishy kuaambape. 44 Haipe Hesu mõãte oho ñi'ĩrũre mbytepe pytarã, vata reta pẽnte ara pukukue; haivi heka hẽntarãre hareka kuaavare mbyteipirã; 45 vãhẽãshu retarã, hykũãĩ oho hekajy reta Jerusalenpe. 46 Haivi mbahapy aravape vãĩjyshu reta Hesu, tupaope vapy'ẽ Ñanderu Tumpa ĩñẽẽre pyrỹmboi'iare mbytepe, jasaka ñynoĩhe reta hareka pyrãndu ñynoĩshu. 47 Hãmã opaite hẽndushua mbyry mãĩhe reta, Hesu ñymbai kuaakue hareka hekope kavi mbeu. 48 Hãmã japoare heshamarã myngyje reta; haivi ishy Maria hei: Shymemby, mãrã'ĩrãra kỹrã rijapo yryrehe? Nderu hãndi hetama dyrekaha yrypya kotymbaa ryheve. 49 Hesu heishu reta: Mãrã'ĩrãra shyrekapi? Pikuaarã pee Sheru ẽvape potañõĩ aĩ verã? 50 Tẽvã haire kuãã mondo mbaivara he'ise vokava hei'ẽshuvare. 51 Haivi Hesu oujy hãndi reta Nazaret kyty, hareka japoshu hai ĩnjetarã. Hãmã ishy pyapy opa nãtu kova mbai. 52 Hesu syry oho'i mbai kuaakuepy, haivi Ñanderu Tumpa hareka kuaretare pya kavi hãndi reta.