¹ A bato babamwe batakadzwa mo Judeya, bali kwiyaya barumeli atika:ati kamuni ninjene mumupato,kwenda shumurawo a Mushe, nibaku kuyakuwa. ² Papa, Paurusi indi Barnabasi bakushita tota, balikuzeka nake shubuzuwo; barumeli bakurumarana atika Paurusi indi Barnabasi, indi babamwe kuwo, bali kukawushira ko Jerusalema, bali kamwana indi ma Apositora indi babakuru wi kereke shintaba yopa. ³ Bakutishira akyapo kwi kereke,balikwenda shinjira ya Fenisiya indi ya Samariya, balikuhweta shuku zoromuka shilinji lyawo: itaba yopa yali kutabisa nabbi barumeli. ⁴ Pubali kaya mo Jerusalema bali kaba tambura naqa mwi kereke indi ma apositola indi babakuru; balikutoroka zihweta kozo zamatarasi Urezya kokuwo. ⁵ Barumeli babamwe mwi tuto yimbuzi, bakuyima bakutika: ishatishakara mwi linji ishukutika ba njene mumupato, bayendye shu murawo a mushe. ⁶ Ma apositola indi babakuru bakukopana kushakisisa intaba yopa. ⁷ Pubali kumwana atika keli bayambara ahuru zitaba zopa, Pitorosi a kuyima, akubazira atika: bakwanga niyizire atika keli ndina mayiba ngamenji kudzwa pwamatandi ketira Urezya mwikyo lyenu, shumuromo anga, ilinji liyuvwe ldii lyi tishire. ⁸ Urezya ayizire mitima, kubapashira indi kubapa Mupupo bo Muncena. ⁹ Imayise zisi zetu kabiri, yetswe indi woo; mataba ncenisa mitima abo shitumero. ¹⁰ Ingahare natilika Urezya, kusunga barutiwa ujokwe ibatashitira banakuretu kukambika, indi tswe akyopani? ¹¹ Shitatitishira cini: shetipaliswe shi lisuno lya Shikati Jeso keresite, shizisi zixiki induwo. ¹² Popa ngaho ishangano yakutupo; bakwikeke koku Barnabasi indi Paurusi pubali kuhweta imakazo indi zalikuhakamalisa zamatarasi Urezya kokuwo mwikyo lyabahedeni. ¹³ Pubali kumana kuyambara, Jakobo, akutikya: nabakwanga nindi kyekye; ¹⁴ Simoni maniziri shamatakalisa Urezya kulyaya iwu zusu zezibbi, atikya mwikyo lyawo akulishashira uwunji shatikakura ldiina lyakye. ¹⁵ Zihweta zopa zakutishizana indi mayii aba nuhi, matañwera atika: ¹⁶ Kubuso, zopa puzali kumana , akushuka, nditambuse Tabernakele ya Davida iyatawa; shendiyi dxini pu limbo lya kare, ndiyiyimise; ¹⁷ Atikya abato ibakara bashake Shikati , indi rusinga kolyo ldina lyakye lyati raperwa pwi lyiro lyawo. ¹⁸ Matihweta Shikati ya matawumba izuto kozo, yamatayiwa shikwisi kudzelira kwi tadxi ulyuvu. ¹⁹ Nanga ndipakyo tatiyatura atika tudzwe nikukataza ilinji ilyati sukuruhera ku Rezya. ²⁰ Tiba ñwere akya baliyiminnee kuze zibbi izi mupupo wo mubbi indi shiswaniso, indi kubushashi, indi kuza bburuwa indi kwizi gazi. ²¹ Atikya Mushe, kudzwa kuzi nako zitanzi, kuna iwati mupaka mumizi, kali kuhwetuwa muma Sinagoge wuqa icimwe ni cimwe. ²² Kono ma apositora indi babakuru, indi kereke koyo, balikumwana atikya, ati kwatikwanahara tilyaye barume papakati lyawo,bashe batumuwa ko Antioke indi Pawurusi indi Barnabasi; bali kuketa Juda ikali kuberuwa Barsabbasi, indi Sirasi, barume iba yibahara mushurumeli. ²³ Bakuba, tumina liñoro lyatikya: yetswe ma apositora indi babakuru indi barumeli, kokutswe barumeli wi linji, banamo Antioke indi siriya indi Sirisiya: nitishire. ²⁴ Tandi shitayuvu atikya babamwe kutswe badzu, batakandi kukumeza shimayi awo, kuzukaka mitima; wutahata rayera;. Shumutima muxiki tamonu kuliyaya ²⁵ indi kuketa barume indi kubatuma, bayendye kokunwe hape balikusunuwa tota, Pawurusi indi Barnabasi. ²⁶ Abato ibalitobuha wuparo bwabo shilina lya Shikati etu Jeso Keresite. ²⁷ Nangi Ingahapa Mboti nutumine Juda indi Sirasi, induwo shibatizire shumuromo zuhweta zopa. ²⁸ Kwata monuwa akyopa shumupupo bumuncena indi kokutswe, tisiye kunikambikisa buremu bobukuru. ²⁹ Niliyimine kwi zuto zezibbi indi gazi, indi zata sunuwa, indi bushashi. Nishuywapa ngaho izuto zopa, natipanga naqha. nikare paa, ³⁰ Pubali kuxwaka kwenda Antioke; bakushanganisa barumeli shubunji wawo, bali kubapa liñoro. ³¹ Pubali kutikya ba bborome, bali kwidze tota shi kutazo abo. ³² Juda indi Sirasi kali ba porofita induwo, balikukutaza barumeli shi mayi nga menji, bakuba gisa. ³³ Pubali kwishara mayiba ngangamwe, bakushuka barumeli, shi kozo, kubatakaba tuma. ³⁴ Sirasi kalikushaka kukara yeye. ³⁵ Pawurusi indi Barnabasi balikasikama mo Antioke; bali kwiyaya indi kusumuka ldii lyu Rezya, babamwe balikabatusa. ³⁶ Pumayiba ngangamwe ngali kumana Pawurusi akuzira Barnabasi, atikya: tushuke, tikatatube barumeli muzi ni muzi mutata kahweta ldii lya shikati; tumwene mubatipera. ³⁷ Barnabasi kali kushaka kuisa Johani ikali kuberuwa Mareka. ³⁸ Pawurusi akumwana atikya kuku naqa kuyisa Mareka yamatakabasiya mo Pamfilia,amayendye nabo kumubberiko awo. ³⁹ Papa, kufapana kokukuru kwali kuya, mane bali kutsukana. Barbanasi akuyisa Mareka, balikulyubushira Sipera. ⁴⁰ Pawurusi akuyisa Sirasi akwenda nakye, bakubikiwa mumanja a Shikati shi lirato lya barumeli. ⁴¹ A kapwetira manaha nga Siria indi Silisia, kagisiza zi kereke zateni.