¹ Mo Ikone ,Pawurusi indi Banabasi kunjena kowo mo Sinagoge iya Majuda ,pura kuhweta lyiyi mo, kwakutumina a bato ba benji mwinkyo lya Majuda indi Magerike. ² Kono Majuda i bahata tishira ba kususuwiza Ilyinji mi bakufilikana muni mitima awo sha barumelyi . ³ Na ngahopa ba kusikama mayiba nga menji kaba tihweta yemwa bakuywapa ba kugipira ku Redzya ikara kugisa ldii lishishemo shake shukwisi zi makazo izara kukomokisa shimanja a Pawurfusi indi Barnabasi. ⁴ Mi ilnji ilya bato iwu muzi bakurapuka ba bamwe bara kuyimina ma Juda ba bamwe bara kuyimina ba Apositora. ⁵ I nyakanyaka ya kuya Kwilinji indi ma Juda indi bayendisi bawo, Pawurusi indi Barnabasi pubara kutikya bakapange barumeli wubbi indi kubara qhekere shima rwawa. ⁶ Ba Apositora pubara kukuremuha intaba ba kuywepira muni muzi mu likaonia yoyo Listra indi Derber. ⁷ Indi mubati hwetira ldii ⁸ Mo Listra kwarana munyana yama tapakuwa nali muhwere,nanga kara kupakuwa aha yendi, ⁹ Yeye murume akuyubwa Pawurusi mati hweta, Pawurusi aku lyaya aku mwana akya ana tumero i kupwelisuwa. ¹⁰ A kumuzira shi ldii lyelyukuru ,a kutikya yima shizi kondo zwe yeye akuyima shuku kira mi akulyata. ¹¹ I linji pulyara kumwana iza rasisini ko ku Pawurusi ba kukara kushupura shumushowo iwu Silikaonia ba kutikya , Uredzya maya kuti pwetira mushipanguwa sha bato. ¹² Barnabasi ba kutikya Jupitere, Pawurusi ba kutikya i Mercuri kakuti inje kara kuhweta. ¹³ Mupirisita iywa Jupitere iyu njuwo iyu kukambira mwayo puwuso u muzi a kuya kutikya muni mumbero iwu muzi iya lyeta zipoho zezi rarukuwa zingarangara akuyanakana kwisi shitabero indi lyinji kolyo. ¹⁴ Mu Apositora iywa barnabasi indi Pawurusi ba kyara ,zidzyato zawo ba kutira mwinkyo kaba shupura. ¹⁵ Bakutikya barume shikya puna tipanga zopa akyopa,zini inditswe tabato ti chuto shixiki na nwe, tani lyetiza zintaba zeziqha ,akya nisiye kwenda shizisi zawo zeziqhu ituso ,ni zoromoshire kuredzya yamatipara yama tapanga lyiro indi lyivu ind lyiwate indi zuto kozo izina ko. ¹⁶ Muzi nako iza kare Uredzya matasiya ilinji kolyo akya ayende shizisi zawo. ¹⁷ Nanga tipakyo ya masiye kuyibahaza shukupanga a bato naqha ,indi kuni tusa shinvura iyi lyiro indi shizi nako zukuvuna,a kuni pazulyuwa shuwunji ,a kuyiza mitima awo kwidzee. ¹⁸ Shimayi ngapa Pawurusi indi Barnabasi bata kwanisa shi nxhumu ngaho, kucikisa a bato bapa a kya basiye kwidzamina matabero. ¹⁹ Popa kwakukita Majuda i bara kudzwa mo Antiyoke,indi mo Ikone,pu bara kuyereza ldiinji ba kwiqhekere Pawurusi shi marwava, ba kumukweshira kwinje lyi muzi ba kuyanakana akya mafu. ²⁰ Mi barutiwa ba kumubika popakati a kutambuka a kunjena muni muzi puliara kucako a kwenda ko Derba indi Barnabasi. ²¹ Pubara ku kutaza ldii mu muzi wopa, ba kupanga barutiwa ba benji, ba kuqhapumushira ko Listra indi Ikone indi Antiyoke. ²² Kabatigisa mitima a barutiwa indi kubakutaza akya baraqhumu nanyina mwi tumero, ba kuziruwa akya batinjena muni muwuso Uredzya shima shando nga menji. ²³ Bakubika ba bakuru mwi kereke indi kereke, pu bara kubarungira shukuliyimina baku basiya muni shishemo shu Redzya i batishiri kukye. ²⁴ Ba kuqhatura inkanda iya Pisida,bakwenda ko Pamphylia . ²⁵ Pubara kumana hweta ldiiyi mo Perga ba kudzuwushira ko Atalia. ²⁶ Pubara kayako bakushuka ko Antiyoke shuwoto mu bata bikiwa muni shishemo shu Redzya ba shutumuwa kapanga mubberiko u bati kamenisiza cware. ²⁷ Pubara kaya mo Antiyoke bakashanganisa i kereke ba kuhweta ze zikuru za matarasi Uredzya shawowo ,indi shamata bayazwira wulicaba [ ilnji] mumbero i wi tumero. ²⁸ Bakusikama indi barutiwa mayiba nga menji.