¹ Pawurusi akuya mo Derba indi mo Listra akuya kushangana murutiwa ikara ku beruwa Timoteya, indiye mukararana u murwakazi ikara kutishira yu mu Juda she kali Mugerike. ² Kara kuyiminwa ku ba mbiya bakye i ba Listra indi Ikone. ³ Pawurusi karakushaka kwenda nakye ,a kumuisa a kumunjenisa mu mupato shilibaka lyama Juda, ibara kupara muzi bbaka zopa kakuti baraizire akya she mugerike. ⁴ Pubara kwenda mumizi ba kuzira barumeli kumamera mirao yata bikiwa kuba Apositora indi ku ba bakuru iwu zikereke iza Jerusarema. ⁵ Zikereke za kukumarera mwi tumero inda batu bara kuyekezeha shuwunji lyiba ni lyiba. ⁶ Pawurusi indi ba mbiya bakye akwenda mu livu lya Frigia lya Galatia,indi ba bamwe kakuti Mupupo o mucena wata bakanera kuhweta ldii lyu Redzya mo Asia. ⁷ Pubara kushera ko Misia, barakutikya baka njene mo Bitinia, kono Mupupo a Jeso yemwa u batishire. ⁸ Pubara kuqhatura muzi ya Misia ba kutsurumukera ko Troasi. ⁹ Mopa Pawurusi a kumwana i pono ,masuku ,akumwana murume [munyana] iywa ko Masedonia ikara yimine a kurunjira a kutikya lyushira mo Masedonia yuti tuse. ¹⁰ Pawurusi pukara kumwana i pono yopa ta kuli bbakanya shukuli tahanera kwenda ko Masedonia ,katiti tishira akya Uredzya matiti bera mo kahweta Idii. ¹¹ Putara kudjuwa mo Traasi ta kupushira ko Samotrasi pulyara kucako takwenda mo Neapolisi. ¹² Putarakaya mo takanjena mo Filipi,muzi iwu intanzi mu muzi utokwa lyuvu lya Masedonia i koroni iywa Waroma, takwishara mayiba mu muzi wopa. ¹³ Rumukibero ta kudzwa mu muzi ta kwenda pulidzoo linda katiti yanakana akya murubba shukukambira, mi takusikama ta kuhweta ni barwakazi ba bamwe ba bashangana. ¹⁴ Muxgekwa i matiberuwa Lidia mumbulisi iyu pulipera iywa mu muzi i wa Tiatire ,yamatiywapa Uredzya a kwikeke ,mi shikati akuyazura mutima akye akya atokomere zintaba izati hwetuwa ku Pawurusi. ¹⁵ Pukara kumana ku korobezwa indi injuwo akye a kuti kambira a kutikya, puna yatura akya ndati sepahara ku Redzya, ninjene mwinjuwo anga yeni sikame mo,a kuti hambereza. ¹⁶ Mwinako iyimwe putara kwenda mushibbaka shu kukambira ta kushangana muxgekwa ikarana mupupo, u wunuhi kara kufumisa mashikati shubunuhi. ¹⁷ Muxgekwa a kwiqhama Pawurusi inditswe kati huwa katikya, banyana bapa ba vuya ba Yana Kulyiro Uredzya,batiti zira injira iyu wuparo. ¹⁸ Akupanga akyopa maiba nga menji kono Pawurusi shukukatezeha ahuru a kuxgapumuka aku zira mupupo atikya ndati kupa itayero shilina lya shikati Jeso Kiresite akya udzwe kukye, mi wa kudzwa mwinako yopa. ¹⁹ Mashikati akye pubara kumwana ba menwa i sepo i yuku fuma ba kupata Pawurusi indi Sirasi ba ku bakweshira kushikwata shiba wusisi. ²⁰ Baku balyeta kuba yatulyi bakutikya a bato bapa batilyanganisa muzi etu shi Majuda. ²¹ Batiruta zisi zitahati swanera kutambura kamba kwi xhama yetswe Waroma. ²² Ilinj lyaku kalyisa ku barwenisa Pawurusi indi Silasi ,ba yatulyi ba ku bakyera zidzato zawo,ba ku raera akya bazupuwe dshizinchupa. ²³ Pu bara kumana kuba zipa baku njenisa muni torongo ,ba ku bakanda mapolisa akya ba tokomere nanyina. ²⁴ Yopa pukara kumana kuzirwa aku banjenisa mwintorongo iya mwinkyo ,a kubika makondo awo muni miti. ²⁵ Popakati lyamasuku Pawurusi indi Sirasi barana mirapero mi bara kuyimbira Shikati awo zinjumbo,i barana nawo mwintorongo bara kwikye. ²⁶ Mwi nako inxiki kwa kuya izikinyeho yu livu ziqha izi ntorongo zakunyanganya,ndipopa ngaho mimbero koyo yaku yazuka indi mawenge ngacutuka. ²⁷ Mulindizi iyu ntorongo pukara kutambuka aku mwana akya mimbero iyi ntorongo miyazuka,akugusa isawure akye akya alyi bbure shuku yanakana akya mapantiti kongo nga shonuka. ²⁸ Kono Pawurusi a kushupura shu kugisa a kutikya siya kuli bbura mutishina kwetu. ²⁹ Mulindiri aku rungira rumweni a kutira muninkyo aka wulya puzi kondo za Pawurusi indi Sirasi akati cacalika. ³⁰ Mi baku gusizwa popenje a kutikya nwe bashikati banga ingahare ndakwisi akya ndipalisiwe. ³¹ Ba kumu tyatikya utishire ku Jeso mi mbupalisiwe yewe indi winjuwo aye. ³² Bakuhweta ldii lyu Redzya kowo mwinjuwo akye. ³³ Angahopa mwi nako yopa ya masuku ,mi aku ywesa ziremano zawo, mi shitanzi a kukorobezwa yeye indi winjuwo nakye kowo. ³⁴ Aku twara Pawurusi indi Sirasi mwinjuwo akye a kubika zulyuwa puwuso wawo mi a kwidze shilyi baka lyukutikya ma tishiri ku Redzya kowo indi winjuwo akye kowo. ³⁵ Pulyara kucako bawusisi ba kutuma mapolisa bawo kwenda kukye baka mutyeya akya asiye bato baliyendire. ³⁶ Mulindiri iywi ntorongo a kuzira Pawurusi i ntaba yopa,a kutikya bawusisi baka tumina akya nilyi yendire narukuruha nili yendire shikozo. ³⁷ Pawurusi akuhweta kokuwo katikya; bata tizipa puso wa bato yemwa bati yature, yetswe Waroma, bata tinjinisa mwi ntorongo basha kuti gvusa mo kurupati,yemwa ya kukwanahara,baye wowo i bati guse mo. ³⁸ Mapolisa bakutwara zi hweta ku bawusisi pu bara kayubwa akya waroma ba kuywapa akya Pawurusi indi silais Waroma. ³⁹ Muwusisi akuya a ku ba kambira ; pubara kubagusa mwintorongo popenje ba kurungira akya badzwe mu muzi ⁴⁰ Pawurusi indi Sirasi ba kudzwa mwi ntoorongo ba kuya mwinjuwo, aLydia.Pawurusi indi silasi pubara kumwana bakwawo ba ku baraswakawo,kudzwa apa ba kudzwa mu muzi