तीतुस 2
1
पर तू ईन्ही गप्पा करू करदा, जैड़ी कि खरै उपदेसा जोगी हिन्न।
2
मतलब हा कि बजुर्ग मणु चौकन्नै, गम्भीर अतै संयमी भून अतै तिआंरा विस्वास अतै प्यार अतै धीरज पक्का भोआ।
3
इन्ही साहबै बजुर्ग जनानी रा चाल-चलन पवित्र मणु सांईं भोआ, दोष लाणै बाळी अतै पियक्कड़ ना भून पर खरी गप्पा सिखाणै बाळी भून।
4
तांजे सो जवान जनानी जो चेताबनी दिन्दी रैहन कि अपणै लाड़ै अतै बच्चैं सोगी प्यार रखा।
5
अतै अपणै आपा पुर काबू रखन, पवित्र बणी रैहन, घरा रा कारोबार करनै बाळी, भली अतै अपणै-अपणै लाड़ै रै आधीन रैहणै बाळी भून तांजे प्रमात्मैं रै कम्मां री निदया ना भोआ।
6
इन्नी साहबै जवान मर्दा जो भी समझऊ कर कि सो भी अपनै आपा पुर काबू रखन।
7
सबी गप्पा मन्ज अपणै आपा जो भलै कमां जो करनै बाळा आर्दश बनांण।
8
अतै तैस मन्ज इन्ही खराई भोआ कि कोई तैस जो बुरा ना बल्ली सका जैत थऊं वरोधी असु पुर दोष लगाणै रा मौका ना पाई करी लज्जित भून।
9
दासा जो समझा कि सो अपणै मालका रै अधीन रैहन अतै सबी कमां मन्ज तिआं जो खुश रख अतै फैरी करी जवाब मत दे।
10
चोरी चलाकी मत करदा, पर सबी गप्पा मन्ज विस्वासी भून कि सो सबी गप्पा मन्ज इन्दैै उद्वारकर्ता प्रमात्मैं रै उपदेसा री शोभा रेय्आ।
11
क्जोकि प्रमात्मैं रा अनुग्रह सबी पुर प्रकट हा जैडा कि सबी मणु रै उद्वरा री बजहा हा।
12
अतै असु जो दसदा कि असै अविस्वासा थऊं अतै संसारिक अभीलाषा थऊं मनां जो फेरी करी ऐस जुगा मन्ज अप्पु पुर काबू रखी करी भक्ति री जिन्दगी बितान।
13
अतै तैसा धन्य आशा री मतलब अपणै महान प्रमात्मैं अतै उद्वारकर्ता यीशु मसीह री महीमा रै प्रकट भूणै री भाळ करदै रैहन।
14
जिनी अपणै आपा जो असु तांईं दी दिता, कि असु जो हर किस्मां रै अर्धमां थऊं छुड़ाई लेय्आ अतै शुद्व करी के अपणै तांईं अक्क इन्हीं जाती बणांईं लेय्आ जैड़ी कि भले कमां तांईं हमेशा तयार भोआ।
15
पूरी ताकता सितै ईआं गप्पा जो बल्ल अतै समझा अतै सिखान्दा रहै कोई तिजो घटिआ ना समझा।