तीतुस 1
1
पोलुस री तरफा थऊं जैडा कि प्रमात्मैं रा दास अतै यीशु मसीह रा प्रेरित हा, प्रमात्मैं रै चुणुरै मणु रै विस्वासा अतै तैसा सच्चाई री पछैणां री बजहा थऊं जैड़ी कि भक्ति रै मताबक हा।
2
तैस अन्नत जिन्दगी री आशा पुर, जेठेरी प्रतिज्ञा प्रमात्मैं जैडा कि झूठ ना बली सकदा आदी काल थऊं करूरी हा।
3
पर ठीक टैमैं अपणै वचना जो प्रचारा करी के प्रकट करूरा, जैड़ी कि इन्दै उद्वारकर्ता प्रमात्मैं री आज्ञा रै मताबक मिन्जो बल्लै दितुरी हा।
4
तीतुस नां जो जैडा कि विस्वासा रै सांझै री बजहा थऊं मेरै विचारा सितै मेरा सच्चा पुत्र हा,
प्रमात्मां पिता अतै इन्दैे उद्वारकर्ता मसीह यीशु रा अनुग्रह अतै शान्ति भुन्दी रेय्आ।
5
ऐत तांईं तिजो क्रेते मन्ज छड़डी छूरा थू कि तू बाकी बचुरी गप्पा जो सुधारा अतै मेरी आज्ञा रै मताबक जगाह-जगाह विस्वाासा मन्ज बजुर्ग मणु जो नियुक्त कर।
6
जेड़ै कि निर्दोष अतै अक्की लाड़ी रै लाड़ै भून, जयांरै बच्चै बिस्वासी भून अतै तिआं मन्ज लुचपन अतै निरकुंशता रा दोष ना भोआ।
7
क्जोकि अध्यक्षा जो प्रमात्मैं रा भण्डारी भूणैं तांई निर्दोष भूणां चहिन्दा, सो ना हठी भोआ, ना गुस्से बाळा भोआ, ना पियक्कड़ भोआ, ना लड़ाई करनै बाळा भोआ, ना नीच कमाई रा लोभी भोआ।
8
पर घरै छूरै री सेवा करनै बाळा, भलाई करनै बाळा, धीरज रखणैं बाळा, न्याय करनै बाळा, पवित्र अतै सबी रै मनां जो जितणै बाळा भोआ।
9
अतै विस्वास रखणैं बाळै वचनां पुर जेड़ै कि प्रमात्मैं रै उपदेसा रै मताबक हिन्न, टिक्की रेय्आ कि खरी शिक्षा सितै उपदेश दी सका अतै बाद-बिवाद करनैं बाळै रै मुहँ जो बन्द करी सका।
10
क्जोकि मतै सारै मणु निरंकुश बकवादी अतै धोखा दीणै बाळै हिन्न खास करी सो जियांरा खतना भछूरा।
11
ईयांरा मुँह बन्द करना चहिन्दा, इन्हैं जिन्है मणु नीच कमाई तांईं अनुचित गप्पा सिखाई करी घरा रै घरा जो विगाड़ी दिन्दै हिन्न्।
12
इआं थऊं ही अक्कीे मणुऐ जैडा कि यांरा भविष्यवक्ता हा, तिनी बल्लुरा कि क्रेती मणु सदा झूठै, दुष्ट जानवर अतै आलसी पेट भरणै बाळै भुन्दै् हिन्न।
13
एह गवाई सच्ची हा ऐत तांईं तिआं जो कड़ाई सितै चितौणी दिछु कर कि सो विस्वासा मन्ज पक्कै भुच्ची गाहन।
14
अतै सो यहूदी री दृष्टान्त-कहाणी अतै तिआं मणु री आज्ञा पुर मन ना लान जेड़ै कि सच्चाई थऊं भटकी गाहन्दै हिन्न ।
15
शुद्व मणु तांईं सब चीजा शुद्व हिन्न पर अशुद्व अतै अविस्वासी मणु तांईं कुछ भी शुद्व ना हा वल्कि तिआंरी अक्कल अतै ज्ञान दोनो अशुद्व हिन्न।
16
सो बल्दै हिन्न कि असै प्रमात्मैं जो मन्दै हिन्न पर अप्पु कम ईन्हैं करदै हिन्न कि प्रमात्मैं रा इन्कार करदै हिन्न क्जोकि सो घृणित अतै आज्ञा जो ना मनणै बाळै हिन्न अतै कसी खरै कम्मां जोगी ना हिन्न।