¹ एथीलै प्यारै छ़ोहरु बाशीऐ परमेश्वर रौ ध्यान(ज़िणौ बौणौ) कौरौ, ² और प्यारा दी च़ालौ ज़िणौ मसीहै भी तुमु आइलै प्यार कियौ आ, और आमुलै आपु सुखी मीठै बासा लै परमेश्वर काऐ भेंट हुईऔ बलिदान हुऔ आ, ³ ज़िणौ पवित्र लोगु रै लायक आ, तिणौ तुमु दी बुरै काम औऱ किणी भी रौंगा रै बुरै काम या लालच़ा री बुशै झ़ाऊं ना च़ाईं हुई; ⁴ और ना बेशर्मी, और ना मुर्खा वाल़ी बुशु री, और ना मज़ाका री; कैलैकि इऐ बुशै नाईं डौबदी, बल्कि धन्यवाद ई च़ाईं शुणुऔ। ⁵ कैलैकि तुमै इणौ ज़ाणाई कि केज़ै भी बुरै, या गान्दै आदमी, या लालच़ी आदमी लै, ज़ो मूरती पुज़ा रै बराबर ई, मसीह और परमेश्वर रै राज़ा ई कोई जगाह नाईं। ⁶ कोई तुमु लै बिण मतलबा री बुशु कौरी धोखौ ना च़ाईं दैऔ, कैलैकि इणै कामा री ताईं ऐ परमेश्वर रै रोश आज्ञा ना मानणै वाल़ै माथै भौड़का आ। ⁷ एथीलै तुमै तिंउरै साथी नाईं बौणौ। ⁸ कैलैकि तुमै ता पैहलै न्यारै थै पर आबै प्रभु दी प्याशै ई, एथीलै प्याशै रै छ़ोहरु ज़िणै च़ालौ ⁹ (कैलैकि प्याशै रौ फौल़ भौलाई, धार्मिकता और सौच्च़ाई आ), ¹⁰ इणौ पौरखौ कि प्रभु कै आच़्छ़ौ का लागा। ¹¹ न्यारै रै काम ई ज़ासरै कोई फौल़ नाईं साथी नाईं बौणौ, बल्कि तिऊं प्याशै दी पौगड़ै कौरौ। ¹² कैलैकि तिंउरै छ़ुपै औन्दै कामा री बातच़ीत भी शौरमा री बूश आ। ¹³ सै सारै काम, ज़ो प्याशै कौरी परगट हुआई, दिशाई, ज़ुण सारौ कुछ परगट कौरा आ सेऊ प्याशौ आ। ¹⁴ एज़ै कारणै सेऊ बोला आ, “ओ सुतणैवाल़ेउओ, ऊठौ मौरै औन्दै मांझ़िया कु ज़िउंदै हुऔ; ता मसीह रौ प्याशौ तुमु दी च़ौमका आ।” ¹⁵ एथीलै ध्याना कौरी देखौ, कि किणी च़ाल च़ाल़ाई: मुर्खा ज़िणै नाईं बल्कि बुध्दिमाना ज़िणै च़ालौ। ¹⁶ बौग्त कीमती सौमझौ, कैलैकि दीन बुरै ई। ¹⁷ एज़ै कारणै मुर्ख नाईं बौणौ, पर ध्याना कौरी सौमझ़ौ कि प्रभु री ईच्छ़ा का सा। ¹⁸ दाखरसा कौरी मतवालै नाईं बौणौ, कैलैकि एथ कौरी बुरी कादर हुआ आ। पर आत्मा कु भौरिन्दै थाकौ लागी, ¹⁹ और आपु माझींऐ भजन और स्तुति गाऔ और आत्मा रै गीत थाकौ गाईंदै लागी, और आपणै-आपणै मौना ई प्रभु काऐ गाईंदै और भौक्ती कौरदै थाकौ लागी। ²⁰ और सौदा हर बुशा लै आमारै प्रभु मसीह रै नावां दी सौरगा रौ बाब बाबा रौ धन्यवाद थाकौ कौरदै लागी। ²¹ मसीह यीशु रै डौरा कौरी एकी-दुज़ै रै अधीन रौऔ। ²² ओ छ़ेउड़िओ, आपणै-आपणै बोउटै रै इणै अधीन रौऔ ज़िणै प्रभु रै रौआई। ²³ कैलैकि बोउटौ छ़ेउड़ी रौ मूंड आ ज़िणौ कि मसीह कलिसिया रौ मूंड आ और आपु ई शरीरा रौ छ़ुटकारौ कौरा आ। ²⁴ पर ज़िणी कलिसिया मसीह रै अधीन आ, तिणी ई छ़ेउड़ी भी आपणै-आपणै बोउटै रै अधीन च़ाईं रौई। ²⁵ ओ बोउटेउओ, आपणी-आपणी छ़ेउड़ी आइलै प्यार कौरौ ज़िणौ मसीहै कलिसिया आइलै प्यार कौरिऔ आपणी ज़िन्दगी कलिसिया लै देई एरी आ ²⁶ ताकि तिंऐ आपणै वचना कौरी पाणी दी धोइऔ पवित्र चाणा, ²⁷ और तिंऐ एक ईणी मज़बूत कलिसिया चाणियौ आपु काऐ खौडी कौरा, ज़ासदी न कलंक, न गुड़ी, और न केज़ी ईणी च़िज़ै हुआ बल्की पवित्र और बिण आरोपा वाल़ी हुआ। ²⁸ ईणी ई कौरी ठीक आ कि बोउटै आपणी-आपणी छ़ेउड़ी कु आपणै शरीरा ज़िणौ प्यार कौरालौ। ज़ुण आपणी छ़ेउड़ी कु प्यार कौरा आ, सेऊ आपु कु प्यार कौरा आ। ²⁹ कैलैकि कोई भी केभी भी आपणै शरीरा आइलै दुश्मनी नाईं छ़ाड़ी बल्कि तेसरौ पालन-पोषण ई किऔ, ज़िणौ मसीह भी कलिसिया आइलै कौरा आ। ³⁰ एथीलै कि आमै तेसरै शरीरा रै टुकड़ै ई। ³¹ “एज़ै कारणै आदमी आपणै माँ-बाब छ़ाड़िऔ आपणी छ़ेउड़ी कु मिली थाका, और सै दुइया एक शरीर हुआई।” ³² एऊ भेद ता बौड़ौ आ, पर हाऊं इदै और कलिसिया रै बारै ई बोलाऊ। ³³ पर तुमु मांझी हर एक आपणी छ़ेउड़ी आइलै आपु ज़िणौ प्यार कौरा, और छ़ेउड़ी भी आपणै बोउटै रौ डौर माना।