¹ ओ छ़ोहरुओ, प्रभु दी आपणै माँ-बाबा रै आज्ञाकारी बौणौ, कैलैकि एउ ठीक आ। ² “आपणै माँ-बाबा रौ आदर कौर (इऐ पैहली आज्ञा आ ज़ास आइलै वायदौ भी आ) ³ ताकि तैरौ भौलौ हुआलौ, और तु धौतरी माथै भौरी दीना दी ज़िउंदौ रौआ।” ⁴ ओ लोल़डेऊ वाल़ेउओ, आपणै छ़ोहरु लै रोश ना दिलाऔ, पर प्रभु री शिक्षा और चेतावनी देईऔ तिऊं धाचौ। ⁵ ओ नुकरूओ, ज़ुण आदमी एज़ै संसारा ई तुमुरै मालिक ई, आपणै मौना री सीधाई कौरी डौरिऔ और काम्बिऔ, ज़िणी मसीह री तिणी ई तिउंरी भी आज्ञा शुणौ। ⁶ आदमी खुश कौरणै वाल़ैउ बाशीऐ देखाउणा लै सेवा ना कौरौ, पर मसीह रै नुकरू बाशीऐ मौना कौरी सौरगा रौ बाब री ईच़्छा माथै च़ालौ, ⁷ और तिऐं सेवा आदमीउ री नाईँ बल्कि प्रभु री मानिऔ सौच़्चै मौना कौरी कौरौ। ⁸ कैलैकि तुमै ज़ाणाई कि ज़ुण भी ज़िणौ आच्छ़ौ काम कौरालौ, च़ाउ नुकुर हौणौ च़ाउ आज़ाद, प्रभु दी तिणी पाआ लौ। ⁹ ओ सेठुओ, मालिकुओ, तुमै भी धौमकी दैणी छ़ाड़िऔ तिऊं आइलै तिणौ ई बर्ताव कौरौ; कैलैकि तुमै ज़ाणाई कि तिऊंरौ और तुमारौ मालिक (बाब) सौरगा दी आ, और सेऊ कासी रौ पक्ष नाईं कौरदौ। ¹⁰ एथीलै प्रभु दी और तेसरी शक्ति रै प्रभाव दी मज़बूत बौणौ। ¹¹ परमेश्वर रै सारै हथियार बानौ ताकि तुमै शैताना री युक्ति रौ सामनौ कौरी सौका। ¹² कैलैकि आमारी एज़ी लौड़ाई लोऊ और मासा री नाईं पर परधाना कु, और हकी कु, और एज़ै संसारा रै न्यारै रै आफसरा कु, और सेज़ी बुरी आत्मा री फौज़ा कु आ और ज़ुण सौरगा दी आ। ¹³ एथीलै परमेश्वर रै सारै हथियार बानी छ़ाड़ौ ताकि तुमै बुरै दिनाई सामनौ कौरी बौल़ा, और सारौ कुछ पुरौ कौरिऔ टेकी बौल़ा। ¹⁴ एथीलै सौच्च़ाई कौरी आपणी कौमर कौशिऔ, और धार्मिकता रौ च़ोगौ भिड़िऔ, ¹⁵ और बांगणै दी मेल-मिलापा रै खुश-खुशी री खौबरी री तैयारी रै बूट भीड़िऔ, ¹⁶ और ईउं सारेउ आइलै विश्वासा री ढाल़ नीईंऔ तैयार थाकौ ज़ेथ कौरी तुमै तेस दुष्टा रै सारै ज़ौल़दै बाण इशाई बौल़ा। ¹⁷ और छ़ुटकारै री टोपी, और आत्मा री तलवार, ज़ो परमेश्वर रौ वचन आ, नीईं छ़ाड़ौ। ¹⁸ हर बौग्ता दी और हर रौंगा कौरी आत्मा दी प्राथना, और औरज़ थाकौ कौरदै लागी, और एथीलै उज़ी थाकौ ताकि सारै पवित्र लोगु लै सौदा प्राथना थाका कौरदै लागी, ¹⁹ और मुलै भी कि मुकै बोलदी बारै इणौ मज़बूत वचन चाईँ देउऔ कि हाऊं हिम्मता कौरी खुश-खुशी री खौबरी रौ भेद बोली सौकु, ²⁰ ज़ेथलै हाऊं शांगल़ी कौरी बानौ औन्दौ राज़दूत ऊ; और इणौ भी कि हाऊं तेसरै बारै दी ज़िणौ मुकै च़ाईं हिम्मता कौरी बोलु। ²¹ तुखिकुस, ज़ुण प्यारौ भाई और प्रभु दी विश्वासा रै लायक सेवादार आ, तुमुकै सारी बुशै बोला ताकि तुमै भी मेरी हालत ज़ाणा लै कि हाऊं किणौ रौआऊ। ²² सेउ मूइंऐ तुमू काऐ एथीलै भेज़ौ ताकि तुमै मेरी हालत ज़ाणा, और तुमुरै मौना लै आराम दिआ। ²³ सौरगा रौ बाब बाब और प्रभु यीशु री तौरफा कु भाईऊ लै शान्ति और विश्वास वाल़ौ प्यार मिला। ²⁴ ज़ुण आमारै प्रभु यीशु आइलै सौच्च़ौ प्यार कौरा ई, तिऊं माथै बौड़ी दया औन्दै थाका ली लागी।