1 ತೆದೆ ಂಒಟೊ ಯಾಜಕನೆ – ಆ ವಾತೆ ಕ್ಹಾಚೀನಾಕರಿ ಪೂಸ್ಛಾಮಾ ಇನೆ ಭಂಯೋ, ಬಾನಿತರ ಸ್ಛಾತೆ ತುಮೆ ಖ್ಹಂಸ್ಝೋ – 2 ಅಪ್ಣೋ ಪೈಲ್ಹೊ ಪಿತಾಂಬರ್ ಹುಯ್ಯಿರೋತೆ ಅಬ್ರಹಾಮ್ ಖಾರಾನ್ಮಾ ಜಿವಾಣ ಅಗಾಡಿ ಮೆಸೊಪೊತಾಮ್ಯಮ ರಹೈತೆ ಉಸ್ಝಾಖ್ಹ್ ಹುಯಿಇರೋತೆ ದೇವ್ ಇನಾ ನಸ್ಝ್‍ರಾವಿನ್. 3 ತಾರ ದೇಖ್ಹ್‍ನಾ ತಾರು ಪರಿವಾರ್ನಾ ಮ್ಹೆಲೀನ್ ಮೆ ವೊತಾಳುತೆ ದೇಖ್ಹ್‍ಮಾ ನಿಕ್ಳೀಸ್ಝಾಕರಿ ಬೋಲ್ಯೊ. 4 ತೆದೆ ಇನೆ ಕಸ್ದೀಯರ್ನೊ ದೇಖ್ಹ್‍ಮಥೊ ನಿಕ್ಳೀಸ್ಝಯ್ಯಿನ್ ಖಾರಾನ್ಮಾ ಜಿವಂಕರ್ತೋ ಥೊ, ಇನೊ ಬಾ ಮಾರ್ಮಾಯ್ಯಿಸ್ಝವಾದೀನ್ ದೇವ್ ಇನಾ ಇಸ್ಝ್‍ಗಾಥೊ ತುಮೆ ಹಂಕೆ ಜಿವಂಕರಾತೆ ಆ ದೇಖ್ಹ್‍ಮಾ ಬುಲಾಯ್ಯಿಲೀನ್ ಆಯೋ. 5 ಆ ದೇಖ್ಹ್‍ಮಾ ಇಒನಾ ಗೋಡೊ ಮ್ಹೆಲನಬಿ ಸ್ಜಮೀನ್‍ನಾ ಇನಾ ಕಆಜೆ ನಾ ದೇನೂತೆ ಇನಾ ಲಡ್ಕಾ ಅಸ್ಝೂಬಿ ಕೊ ಪೈದಾ ಕೋ ಹುಯ್ಯಿರಾಯ್ನೀ ತೆದೆ - ಆ ದೇಖ್ಹ್‍ನಾ ತುನಾಬಿ ತಾರಪಾಸ್ಛಾಳ್ ಆವ್ಷೇತೆ ತಾರಿ ಖಾನ್ದಾನ್‍ನಾ ದೀಷ್ ಕರಿ ಇನಾ ಹುಕುದಿಧೋ. 6 ಯೋ ಕಾಹೇತೆ ದೇವ್ನೆ ಷಾತ್ಬೋಲ್ಯೋಕತೊ – ತಾರಿ ಖಾನ್ದಾನ್‍ವಾಳ ಪರೆಂಡಾನ ಮುಲಕ್ಮಾ ಪರ್‍ದೇಶಿ ಹುಯ್ಯಿರಾಃಷೆ ಯೊ ಪರೆಂಡಾನ ಮುಲಕ್‍ವಾಳ ಇವ್ಣಾ ಗುಲಾಂಕರ್ಲಿನ್ ಚಾಖ್ರ್ಹೋ ವೊರಖ್ಹ್‍ಲಗೂ ಲತಾಢೇಥಿ ಸ್ಛಲಾವ್ಷೇ. 7 ಅಸ್ಝು ತಾರಿ ಖಾನ್ದಾವಾಳಾ ಗುಲಾಂ ಹಇಯ್ಯಿನ್ ಸ್ಳಾವಂಕರಾತೆ ಅನ್ನಾಡಿಲೋಕ್ನಾ ಮೇಸ್ ನ್ಯಾವ್‍ಕರೀಷ್. ಇನಾಪರ್ ಇವ್ಣೆಖ್ಹರಾ ನಿಕ್ಳೀ ಆವೀನ್ ಆ ಸಝಗೋಪರ್ ಮನಾ ಪೂಸ್ಝಾ ಕರ್ಷೇ ಕರಿ . 8 ಯೊ ಕಾಹೇತೆ ದೇವ್ ಇನಿ ಸ್ಝೋಡೆ ಕರಾರ್ ಬಣಾಯ್ಯಿಲೀನ್ ಇನಿ ಖ್ಹಣಾದ್ನಾಕಾಜೆ ಖ್ಹತ್‍ಣಾಣಿ ನಿಯಾಂ ಭಣಾಯೊ ಇನಾಸ್‍ವಾಖ್ಹ್‍ತೆ ಅಬ್ರಹಾಮೆನೆ ಇಸಾಕನ ಪೈಧಾಕರೀನ್ ಆಟ್ಮಾ ರೋಸ್ಝ್ ಇನಾ ಖ್ಹತ್‍ಣಾ ಕರ್ಯೋ, ಇನಾಕಡ್ತೂ ಇಸಾಕನೆ ಯಾಕೋಭನ ಪೈಧಾಕರ್ಯೋ, ಯಾಕೋಬನೆ ಬಾರಃಸ್ಝಣಾ ನಾನಾ ದಾದಾವ್ನಾ ಪೈಧಾಕರ್ಯೊ. 9 ಕುಳೀನಾ ನಾನಾ ದಾದಾವ್ನೇ ಯೋಸೇಫನ್ ಐಗುಪ್ತದೇಖ್ಹ್‍ನಾ ವೇಚಿನಾಖ್ಯಾ. 10 ಇಸ್ಝ್‍ಗಾ ದೇವ್ನೇ ಇನಿಸ್ಝೋಡೆ ರಹೈನ್ ಇನಾ ಅಯೂತೆ ಅಖ್ಖೀ ಲತಾಡಾವ್ಮಾಥೋ ಇನಾ ಸೋಡಾಯ್ಯಿನ್ ಐಗುಪ್ತ ದೇಖ್ಹ್‍ನೊ ಫರೋಹನ ಖ್ಹಾಮ್ಣೆ ದಯಾಬಿ ಧ್ಯಾನ್‍ವಾಳನಿತೆ ಕರ್ಯೊ. ಫರೋಹನೆ ಇನಾ ಐಗುಪ್ತ ದೇಖ್ಹ್‍ನಾ ಉಪ್ಫಾರ್‍ಭಿ ಇನಾ ಘರ್ನಾ ಉಪ್ಪಾರ್ ಹಕ್‍ದಿಧೊ. 11 ತೆದೆ ಊಗುಪ್ತ ಕಾನನ್ ಮುಲಕ್ಮಾ ಕಿಸ್ಝ್‍ಗಾ ಕಿಸ್ಝ್‍ಗಾಬಿ ಖ್ಹಗಾಳ್ ಆವಿನ್ ಮೋಟಿ ಲತಾಡ ಹುಯ್ಯಿಗೀ; ಅಪ್ಣೋ ನಾನಾದಾದಾವ್ನಾ ದಾಣ ಕೋಮಳ್ಯೂನಿ, 12 ತೆದೆ ಐಗುಪ್ತ ಮುಲಕ್ಮಾ ಅನಾಸ್ಝ್ ದಾಣ ಮಳೂಕರಾಸ್ಕರಿ ಯಾಕೋಬನೆ ಖ್ಹಂಜೀನ್ ಅಪ್ಣಾ ನಾನಾ ದಾದಾವ್ನಾ ಪೈಲೆ ಏಕ್‍ಹಲ್ಲಾ ಇಸ್ಝ್‍ಗಾ ಬೋಲಿಮೋಕ್ಲ್ಯೊ. 13 ಇವ್ಣೆ ಬೆಮಹಲ್ಲಾ ಆಯಾ ತೆದೆ ಯೋಸೆಫ್ನೆ ನ್ಹನೊಭಯ್ಯಿನಾಬಿ ಮೋಟೊ ಭಂಯ್ಯೇವ್ನಾ ಇನಿ ಖ್ಹಣಾದ್ ಆವಾನಿತರ ಕರ್ಯೊ. 14 ತೆದೆ ಯೋಸೇಫನಿ ಇನೊ ಬಾ ಹುಯ್ಯಿರೋತೆ ಯಾಕೋಬನ ಇನೂ ಅಖ್ಖಾ ಪರಿವಾರ್ನಾ ಪಾಂಸ್ಛ್‍ಪರ್ ಖ್ಹಡ್ತಿನ್‍ವೀಖ್ಹ್ ಅದ್ಮೀವ್ನಾ ಬುಲಾವ್ತಾಲಿ ಯಾಕೋಬ ಐಗುಪ್ತ ದೇಖ್ಹ್‍ಮಾ ಗಯೋ. 15 ಇಸ್ಝ್‍ಗಾ ಯೋಬಿ ಅಪ್ಣಾ ಪಿತಾಂರ್ಬಿ ಮಾರ್ಮಾಯ್ಯಿಗಾ. 16 ಇವ್ಣಾಖ್ಹರೂ ಶೇಕೆಮಿನಿ ಲೀಸ್ಝಯ್ಯಿನ್ ಇಸ್ಝ್‍ಗಾ ಹಮೋರನ ಛುಯ್ಯಾ ಕಂಥೊ ಅಬ್ರಹಾಂನೆ ರೂಪಾನೊ ರಪ್ಯಾನಿ ದೀನ್ ಮೋಲ್‍ಲಿಧೋತೆ ಮಖ್ಹಾಣ್ಯಾಮ ಘಾಲ್ಯಾ. 17 ಕತೊ ದೇವ್ ಅಬ್ರಹಾಮ್ನಾ ವಾತೆ ದಿಧೋತೆ ದನ್ ಕನ್ಹೆ ವೊಳಾವತೆದೆ ಅಪ್ಣೋ ಅದ್ಮೀಖ್ಹರು ಐಗುಪ್ತ ದೇಖ್ಹ್‍ಮಾ ಸ್ಝದಾಹುಯ್ಯಿಗಾ. 18 ಅಖ್ರೀನಾ ಯೋಸೆಫನ್ ಮಾಲುಂಕರಾಕೊಯ್ಯಿನೀತೆ ಅಲಾದೊರಾಸ್ಝ್ ದೇಖ್ಹ್ ಸ್ಛಲಾವನ ಆಯೊ. 19 ಯೊ ರಾಸ್ಝ್ ಅಪ್ಣಾ ಅದ್ಮೀಮಾ ಮಷ್ಲಾತ್ ಕರೀನ್ ಇವ್ಣಾ ಲಡ್ಕಾವ್ನಾ ಜಾನ್‍ಥಿ ನಾಬಸ್ಛಾದೇಣುಕರಿ ಬಹರ್ ನಖಾಯಿನ್ ಅಪ್ಣಾ ನಾನಾದ್‍ದಾವ್ನಾ ವೊದೇಖ್ಹಾಥಿ ಸ್ಛಲಾಯೊ. 20 ಯೊ ವೊಖ್ಹ್‍ತ್ಮಾ ಮೋಶೆ ಪೈಧಾಹುಯೊ. ಯೊ ಘಣೂ ಸುಂದರ್ ಥೊ. 21 ಅಸ್ಝು ಬಾನ ಘರ್ಮಾಸ್ ತೀನ್ ಮಹೈನಾ ಪಾಳಿನ್ ಪೇರ್ವಾಶಿಹುಯೊ. ಇನಾ ಪಾರ್ ಇನಾ ಬಹಾರ್ ನಾಖ್ಯಾತೆದೆ ಫರೋಹನ್‍ನಿ ಸ್ಛೋರಿ ಇನಾ ಪಾಡೀಲೀನ್ ಇನಾ ಛಿಯ್ಯಾನಿ ತರ ಪಾಳಿ. 22 ಮೋಶೆ ಐಗುಪ್ತ ಮುಲಕ್‍ವಾಳನಿ ಹರ್‍ಯೇಕ್ ಪಢಾನು ಷಿಕಿಲೀನ್ ವಾತ್ಮಾಬಿ ಕಾಂಮಾ ತಾಖತ್ವಾಳೊ ಹುಯ್ಯಿಗಯೊ. 23 ಇನಾ ಸ್ಛಾಳಿಖ್ಹ್ ವೊರಖ್ಹ್ ಭರಾವ್ತೋವೊಳಾವತೆದೆ ಇಸ್ರಾಯೇಲ್‍ನೊ ಖ್ಹಾನ್ದಾನ್ನಾ ಭಂಯೇವ್ನಾ ಸ್ಝಯ್ಯಿನ್ ದೇಕ್ನೂಕರಿ ಆಖ್ಹ್ ಇನಾ ಹಿರ್ದಾಮ ಪೈಧಾಹುಯು. 24 ಇವ್ಣಾಮ ಏಕ್‍ಸ್ಝಣಾನ ಅನ್ಯಾಯ್ ಹುಕುಂರಾತೆ ದೇಖಿನ್ ಇನಿ ತೋಡ್‍ಹುಯ್ಯಿನ್ ಖ್ಹತಾವಂಕರ್ತೋಥೋತೆ ಐಗುಪ್ತವಾಳನ ಮರಿನಾಖಿನ್ ಡಾವ್ನಾಡಾವ್ ಫೇಡ್ಯೋ. 25 ದೇವ್ ಮಾರಹಾತೇಥಿ ಸ್ಛುಟ್ಟೀ ಕರಾವ್ಷೇಕರಿ ಇನಾ ಭಯ್ಯಬಂದವ್ನಾ ಮಾಲುಂ ಹುಷೇಕರಿ ಖ್ಹಯಾಲ್ ಕರ್ಯೊ. 26 ಕತೊ ಇವ್ಣೆ ಇಮ್ ಮಾಲುಂ ಕೋಕರ್ಯಾಣಿ. ತೀಖ್ರಾದನ್ನೆ ಇವ್ಣೆ ಇವ್ಣೇಸ್ ಮಾರಮಾರಿ ಖಂವಕರ್ತಾಥಾ ಯೊ ಆವಿನ್ ಅದ್ಮಿಯೊ, ತುಮೆ ಭಂಯೇಕಾಹೇನ? ತುಮೆ ಷೇ ಏಕ್ನಾಯೇಕ್ ಅನ್ಯಾಯ್ ಕಲೇವೊಸ್ ಕರಿ ಬೋಲಿಸ್ ಇವ್ಣಾ ಷೊಪೋರಾಕ್ನೂಕರಿ ಥೂ. 27 ಕತೊ ಇನಾ ಕುಳಿವಳಾನಸ್ ಅನ್ಯಾಯ್‍ಕರೂಕರಾತೆ ಇನೆ – ತುನಾ ಹಮಾರ್ ಉಪ್ಪಾರ್ ಹಕ್‍ದಾರ್‍ಕರಿನ್ ನೆಯ್ಯೋಕರೀನ್ ಮ್ಹೆಲ್ಯೂಹುಯಾ ಕೋಣ್? 28 ಗಯೋದನ್ನೆ ಯೊ ಐಗುಪ್ತವಾಳನ ಖೂನಿಕರಿ ಮಾರ್ಯೋ ಇಮ್ಮಾಸ್ ಮನಾಬಿ ಮಾರ್ರಾಕ್ನೂಕರಿ ಸ್ಛಾನ ಕರಿ ಇನಾ ಧಕ್ಷಲೀ ನಾಖ್ಯೊ. 29 ಆ ವಾತೇವ್ನಾ ಖ್ಹಂಜೀನ್ ಮೋಶೆ ನಾಶಿಸ್ಝಯ್ಯಿನ್ ಮಿದ್ಯಾನ್ ಮುಲೂಕ್ಮಾ ಜಿಂವ್‍ಕರ್ತೊಥೊ ಇಸ್ಝ್‍ಘಾ ಬೇಸ್ಝಣಾ ಪರ್ಖಾಲಡ್ಕಾವ್ನಾ ಪೈಧಾಕರ್ಯೋ. 30 ಸ್ಛಾಳೀಖ್ಹ್ ವೊರಖ್ಹ್ ಭರಾಯ್ಯಿಸ್ಝವಾದೀನ್ ದೇವ್ನೋ ಮಾಲಾಕ್ನೇ ಸೀನಾಯಿ ಪಹಾಡ್ನಾಪರ್ ಸ್ಝಾಡೀಮಾ ಕಟಾನೊ ಪೋದಾವ್ಮಾ ಆಗ್ನಿಡೋಮ್ ಲಗೂಕರಾತೆ ಇನ್ಮಾ ಇನಾ ನಸ್ಝ್‍ರಾಯೊ. 31 ಮೋಶೆ ಇನಾ ದೇಖಿ ಮಸ್ತಾಪ್‍ಹುಯ್ಯಿನ್ ಪಶೇನ್ನಿತರ ದೇಕ್ನೂಕರಿ ಕನ್ಹೆ ಆವ್ತಾಲೀನ್. 32 ಮೆ ತಾರ ನಾನೋದಾದಾವ್ನೋ ದೇವ್, ಅಬ್ರಾಹಾಮ್ ಇಸಾಕ್ ಯಾಕೋಬ್ನೋದೇವ್ ಕರಿ ಖ್ಹೊದಾನೊ ಅವಾಸ್ಝ್‍ಹುಯೂ, ತೆದೆ ಮೋಶೆ ಕಾಪ್ತೋಹುಯ್ಯಿನ್ ಬರಾಬರ್ ದೇಖಾನ ಹಿಮ್ಮಾತ್‍ಕೊಯ್ಯಿನಿ ಇಮ್ ಹುಯ್ಯಿಗಯೊ. 33 ತೆದೆ ಖ್ಹಿದಾ ದಾದಾಜೀನೆ ಇನಾ – ತಾರ ಗೋಡಾಮನಿ ಚೇಪ್ಲೇಕಾಡ್; ತೂ ಉಭೀರಃಯೋತೆ ಸ್ಝಗೊ ಪರಿಶುದ್ದ ಸ್ಜಮೀನ್. 34 ಐಗುಪ್ತಮ ದೇಖ್ಹ್‍ಮಾ ಸಛಾತೆ ಮಾರ ಅದ್ಮೀವ್ನೀ ಖರಾಬ್ ಹಾಲ್ನಾ ಮೆ ದೇಖ್ಯೊ; ಇವ್ಣಿ ಅರಸ್ಝ್‍ನಾ ಖ್ಹಂಜೀನ್ ಇವ್ಣಾ ಸ್ಛೋಡಾವನ ಆಯ್ಯಿರೋಃಸ್ ಹಂಕೆ ತುನಾ ಐಗುಪ್ತಾ ಮುಲುಕ್ನಾ ಬೋಲಿಮೋಕ್ಲೂಸ್, ಆವ್‍ಕರಿ ಬೋಲ್ಯೊ. 35 ಇವ್ಣೆ ಕೆವಾಃ ಮೋಶನಾ – ತುನಾ ಹಕ್‍ವಾಳೊಬಿ ನೆಯ್ಯೊಕರಿ ಮ್ಹೆಲ್ಯೂತೆ ಕೋಣ್ಕರಿ ಬೋಲೀನ್ ನಕೊಕರಿ ಬೋಲ್ಯಾಕಿ ಇನಾಸ್ ದೇವ್ ಪೋದಾಮ ನಸ್ಝ್‍ರಾಯೋತೆ ಮಲಾಕ್ನಾ ಹಾತೇಥಿ ಹಕ್‍ವಾಳೊಬಿ ಸ್ಛುಟ್ಟಿಕರಾವವಳೊ ಕರೀನ್ ಮ್ಹೇಲ್ಯೊ. 36 ಯೋಸ್ ಐಗುಪ್ತ ದೇಖ್ಹ್‍ಮಾಬಿ ಲಾಲ್ ದರ್ಯಾವ್ಮಾಬಿ ಹಾತೇಥಿ ಸ್ಛಾಳೀಖ್ಹ್‍ವೊರಖ್ಹ್ ಸಝಾಡೀಮಾಬಿ ಅದ್ಬುತ ಕಾಮ್‍ಖ್ಹರೂ ಖ್ಹಣಾದ್ನೂಕಾಮ್‍ಖ್ಹರೂ ಕರ್ತೋಹುಯ್ಯಿನ್ ಇವ್ಣಾಖ್ಹರೂ ಸ್ಛಲಾವ್ತೋಹುಯಿನ್ ಆಯೋಹೊ. 37 ಯೊ ಮೋಶೇಸ್- ದೇವ್ ಮನಾ ಬಣಾಯೊ ಇಮ್ಮಾಸ್ ತುಮಾರ ಭಂಯೇಮಸ್ ಬುಜೇಕ್ ಪ್ರವಾದಿನ ತುಮ್ನಾ ಸ್ಝೂಣೇನ್ ದಿಷೆ ಇಮ್ ಇಸ್ರಾಯೇಲ್ ಅದ್ಮೀವ್ನಾ ಬೋಲಿಹುಯೊ. 38 ಯೋಸ್ ಸೀನಾಯಿ ಪಹಡ್‍ಪರ್ ಇನಿ ಸ್ಝೋಡೆ ವಾತೆಬೋಲ್ಯೋತೆ ಮಲಾಕ್ನಾಬಿ ಅಪ್ಣೋ ಪಿತಾಂಬರ್ನಾ ಸಝಾಡೀಮ ಥೀತೆ ಸಭೆಮಾ ಇಸ್ಛ್‍ಮಾ ರಹೈನ್ ಜಿವ್ಜಾನ್ನಿ ದೇವ್ನೀ ಬೋಲಿನ ಲೀನ್ ಅಪ್ಣಾ ದಿಧೋಹುಯೊ. 39 ಕತೊ ಅಪ್ಣಾ ವಸ್ಥಾದ್‍ಖ್ಹರಾ ಇನಿ ವಾತೇವ್ನಾ ಖ್ಹಂಸ್ಝಾನಾ ಮನ್‍ಕೊಯ್ನೀತೆ ಇನಾ ಧಕ್ಲೀದೀನ್ ಫರೀನ್ ಐಗುಪ್ತಾ ದೇಖ್ಹ್‍ಭಣಿ ಮನ್‍ಕರ್ಯಾ, 40 ಇವ್ಣೆಖ್ಹರಾ ಅರೋನನ ಐಗುಪ್ತ ದೇಖ್ಹ್‍ಥಾ ಅಪ್ಣಾ ಬುಲಾಯ್ಯಿಲೀನ್ ಆಯೋತೆ ಅಗಾಡಿ ಸ್ಝಾವಾನ ದೇವ್‍ಖ್ಹರೂ ಹಮ್ನಾ ಕರೀದಾಕರಿ ಬೋಲ್ಯಾ. 41 ಯೋ ದನ್ಮಾ ಇವ್ಣೇಖ್ಹರಾ ಏಕ್ ಬಸವನ ಕರೀನ್ ಯೊ ಮೂರ್ತಿನ ಬಳ್‍ದೀನ್ ಇವ್ಣಾ ಹಾತೇಖ್ಹೂ ಕರ್ಯಾತೆ ರಾಸ್ಛಾವ್ಮಾ ಖ್ಹುಚಿಹು ಯಾ. 42 ಕತೊ ದೇವ್ ಇವ್ಣಾಭಣಿ ಪೀಟ್ ಫರಾಯ್ಯಿಲೀನ್ ಆಬ್ನಾ ಶುಕ್ಕಾರ್ನಾ ಪೂಸ್ಛಾಕರ್ವಾನ ಇವ್ಣಾಖ್ಹರೂ ದೀನಾಖ್ಯೋ ಪ್ರವಾದಿವ್ನೀ ಗ್ರಂಥ್‍ಮಾ ಷಾತ್‍ಲಿಖ್ಯಾಯ್ಯಿರೂಃಸ್ಕತೊ ಇಸ್ರಾಯೇಲ್ ಖಾನ್ದಾನ್‍ವಾಳ, ತುಮೆ ಸ್ಝಾಡಿಮಥಾತೆ ಸ್ಛಾಳಿಖ್ಹ್ ವರಖ್ಹ್ ಮನಾ ಬಲಿದಾನ್‍ನಾ ದೆವಂಕರ್ತಾಥಾನ? ಕೊಯ್ಯಿನೀನಿ; 43 ಇನಾ ಬದಲ್ ತುಮೆ ಪೂಸ್ಝಾಕರ್ನೂಕರಿ ಕರ್ಲಿಧಾತೆ ಮೂರ್ತಿವ್ನಾ ಕತೊ ಮೊಲೋ ತಂಬೂವ್ನಾ ರೋಂಫಾ ದೇವ್ನೀ ಶುಕ್ಕಾರ್ನಿ ಅವ್ತಾರ್ನಾ ಪಾಡೀಲೀನ್ ಗಯಾ. ಇನಾಕಾಜೆ ಮೆ ತುಮ್ನ ಬಾಬೆಲ್‍ನಾ ಪಾರ್ ಬೋಲಿಮೋಕ್ಲೀದೀಷ್ ಕರಿನ್. 44 ದೇವ್‍ದರ್ಶನ್ನೂ ತಂಬೂ ಸ್ಝಾಡಿಮಾ ಅಪ್ಣಾ ಪಿತಾಂಬರ್‍ಕನಥೂ. ಮೋಶೆನಿ ಸ್ಝೋಡೆ ಸ್ಝಾಢಿಮಾ ಅಪ್ಣಾ ಪಿತಾಂಬರ್‍ಕನ ಥೂ. ಮೋಶೆನಿ ಸ್ಝೋಡೆ ವಾತೆಬೋಲ್ಯೊಹುಯೊ – ತೂ ದೇಖ್ಯೂತೆ ಲಪಟ್‍ಸ್ ಇನಾ ಕರಾವ್ನೂಕರಿ ಬೋಲಿರಾಖ್ಯೋಥೊ. 45 ಅಪ್ಣಾ ಷಾಣಾ ಇನಾ ಇವ್ಣಾ ಬಾಕಂಥೂ ಲೀರಾಖ್ಯಾಥಾ; ಇವ್ಣೆ ಯೆಹೋಶುವನ ಪೀಛೆ ಆವೀನ್ ದೇವ್ ಇನಾ ಖ್ಹಾಮ್ಣೆ ಥೊ ಅನ್ನಾಡಿ ಲೋಕ್ನೋ ದೇಖ್ಹ್‍ನಾ ಕಬ್ಜಾಕರ್ಲಿಧ ತೆದೆ ಯೊ ತಂಬೂನಬಿ ಲೀನ್ ಆಯಾ. ಯೊ ದಾವೀದನಿ ಹಗಾಂಲಗೂ ಅಸ್ಝ್‍ಗಾಸ್ ಥೂ. 46 ದಾವೀದನೆ ದೇವ್ನೀ ಸ್ಝಗೋಮಸ್ ಖ್ಹರ್ನೊಲೀನ್ ಯಾಕೋಬನಿ ಖಾನ್ದಾನ್ನಾಕಾಜೆ ದೇವಳ್ನಾ ಭಾಂದಾನ ವಾಖ್ಹ್‍ತೆ ಹುಕುಂ ಹೋಣುಕರಿ ಬೋಲಿಲಿಧೋ, 47 ಕತೊ ಇನಾಕಾಜೆ ಘರ್ ಭಾಂದ್ಯೊಹುಯಾ ಸೋಲೊಮೋನ. 48 ತ್ಯೋನ್ಬಿ ಸ್ವರ್ಗನೊ ದೇವ್ ಹಾತೆಖ್ಹೊ ಬಾಂದ್ಯಾತೆ ಘರ್ಮಾ ಜಿವಾವಳೊ ಕಾಹೇ, ಆಬ್‍ಮಾರಿ ಸಿಂಹಾಸನ್ ಸ್ಝಮೀನ್ ಮಾರ ಪಗ್ನಾಪೀಠ. 49 ತುಮೆ ಮನಾ ಕೆಲ್‍ಖಣ್ಣೂ ಘರ್ ಬಾಂಧಿದಿಷು? ಮಾರ ಅರಾಮ್ನಾ ಹೋಣೂತೆ ಸ್ಝಗೊ ಕೆಹೂ? ಅನಖ್ಹರೂ ಮಾರೊ ಹಾತಸ್ ಬಣಾಯೂನಿ. 50 ಇಮ್‍ಕರಿ ಖ್ಹೊದದಾದಜಿ ಬೋಲಸ್ನೀ ಕರಿ ಪ್ರವಾದಿ ಬೋಲಿರಾಖ್ಯೋಸ್. 51 ಹೇ ಸ್ಛಂಢಾಳಿಯೊ ಮನ್‍ಶುದ್ದೀ ಕಾನ್‍ಶುದ್ಧಿ ಕೊರಾಃಯ್ಯಿನೀತೆ ತುಮೆ ತುಮಾರ ನಾನಾದಾದ ಕಿಮ್‍ಕ ಇಮ್ಮಾಸ್ ತುಮೆ ಕೆದೇಬಿ ಪವಿತ್ರಾತ್ಮನ ಟಡ್ಗಾರವಾಳಹುಯ್ಯಿರಾಃಸ್. 52 ಪವರವಾಧಿವ್ನಾ ತುಮಾರ ಪಿತಾಂಭರ್‍ಖ್ಹರಾ ಖ್ಹತಾಪ್ಣೀ ದೇಯ್ಯೆಕೊಯ್ನೀತೆ ಕೋಣ್‍ಸ್ಛಾ? ಇವ್ಣೆ ಯೊ ನಿಯ್ಯಾತ್ನೊ ರೂಪ್‍ಹುಯ್ಯಿರೋತೆ ಇನಿ ಆವಾನಿ ಖಬರ್ಮಾ ಆಗಳ್ ಬೋಲಾವಳನ ಮಾರಿನಾಖ್ಯಾ, ತುಮೆ ಹಂಕೆ ಇನಾ ಧರಾಯ್ಯಿದೀನ್ ಮರಾಯ್ಯಿನಾಖ್ಯಾ. 53 ಸ್ವರ್ಗನೊ ಮಲಾಕ್ ಭಣ್ತೂ ದೆವಾಯ್ಯಿರಃಯೂತೆ ಧರ್ಮಗ್ರಂಥ್‍ನ ತುಮೆ ಲೀರಾಖ್ಯಾತೋಬಿ ಇನಾ ತುಮೆ ಮಾನಕೊಯ್ಯಿಕರಿ ಬೋಲ್ಯೊ. 54 ಆ ವಾತೇವ್ನಾ ಖ್ಹಂಜೀನ್ ಇವ್ಣೆ ರೋಷಮ್‍ವಾಳಹುಯ್ಯಿನ್ ಇನಾಪರ್ ದಾತ್ ಸ್ಛಾಯಾ. 55 ತೆದೆ ಯೊ ಪವಿತ್ರಾತ್ಮಥಿ ಭರಾಯ್ಯಿನ್ ಆಭ್‍ಭಣಿ ದೇಖೀನ್ ದೇವ್ನೀ ಉಸ್ಝಾಖ್ಹ್‍ನಾಬಿ ದೇವ್ನಾ ಖವಾಹಾತ್‍ಭಣಿ. 56 ಉಭ್ಯೋತೆ ಯೇಸುನ ದೇಖೀನ್ – ದೇಖೋ, ಆಬ್ ನಿಕ್ಳೂರ ಹ್ಯೂತೆಬಿ ಮನ್‍ಖ್ಯಾನೊ ಛಿಯ್ಯೋ ದೇವ್ನಾ ಖವಾಹತ್‍ಭಣಿ ಉಭಿರಃಯೋತೆ ದೇಖೂಕರೂಸ್ ಕರಿ ಬೋಲ್ಯೊ. 57 ತೆದೆ ಇವ್ಣೆಖ್ಹರಾ ಮೋಟಿ ಅವಾಸ್ಝ್‍ಥಿ ಚಿಕ್ರಾಣ್ ಮ್ಹೆಲೀನ್ ಕಾನ್ನಾ ಮೂಚಿಲೀನ್ ಎಕ್ಕಾಸ್‍ದಮ್ ಇನಾಪರ್ ಪಡೀನ್‍ಇನಾ ಗಾಮ್ನಾ ಬಹಾರ್ ಧಕ್ಳೀಲೀನ್ ಸ್ಝಯ್ಯಿನ್ ಮರ್ರಖನಾ ಬಂಡಾಫೇಕ್ಯಾ ಸಾಬೂತ್‍ವಾಳ ಇವ್ಣಾ ಲಂಗ್ಡಾವ್ನಾ ಕಾಡೀನ್ ಸೌಲಕರಿ ಏಕ್‍ಸ್ಝಣೊ ಕಂವಾರನ ಗೋಡಾವ್‍ಕನ ಮ್ಹೇಲ್ಯಾ. 58 ಇವ್ಣೆಖ್ಹರಾ ಸ್ತೆಫನನಪರ್ ಬಂಡಾಫೆಕ್ತಾಹುಯ್ಯಿನ್ ರಃಯ್ಯಿತೆದೆ ಇನೆ ಖ್ಹೊದಾನು ನಾಂನಾ ಬೋಲೀನ್. 59 ಯೇಸು ವಾಲಿ, ಮಾರ ಆತ್ಮನಾ ಮಳಾಯ್ಯಿಲಾ ಕರಿ ಪ್ರಾರ್ಥನೆ ಕರೀನ್ ಗುಡ್‍ಗ್ಯೋ ಟೇಕೀನ್ – ಖ್ಹೊದಾ ದಾದಜಿ, ಆ ಪಾಪ್ನಾ ಇವ್ಣಾಪರ್ ನಕೊ ನಾಖೀಷ್ ಕರಿ. 60 ಮೋಟಿ ಅವಾಸ್ಝ್‍ಥಿ ಚಿಕ್ರಾಣ್ ಮ್ಹೆಲ್ಯೋ. ಇಮ್ ಬೋಲಿನ್ ನಿಂದರ್ ಲಿಧೋ.