1 ಸೌಲ ಇನಿ ಖೂನಿ ಕರಾವಳ ತಾಖತ್ ದೆವಾಳೊ ಹುಯ್ಯಿರೋಃಥೊ. ಯೊ ದನ್ಮಾ ಯೆರೂಸಲೇಮ್ಮಾ ಥೀತೆ ಸಭೆನ ಮೋಟಿ ಖ್ಹತಾಪ್ಣಿ ಹುಯ್ಯಿ. ಅಪೋಸ್ತಲವ್ನಾ ಮದಹೆಲಿದೀನ್ ಅಖ್ಖೂಸ್ಝಣು ಯೂದಾಯ ಸಮಾರ್ಯ ಇಲಾಖಾಮ ಎಕ್ಕಾಸ್ಸಯೆಕ್ ಹುಯ್ಯಿಗಾ. 2 ಭಕ್ತಿದಾರ್ ಅದ್ಮಿವ್ನೇ ಸ್ತೆಫನನ ಗಾಡ್ಡೀನ್ ಇನಾಕಾಜೆ ಘಣೂರೊಯಾ. 3 ತೆದೆ ಸೌಲ ಘರ್‍ಘರ್‍ಮಾ ಪೇಶಿನ್ ಪಖ್ರ್ಹಾವ್ನಾ ತ್ರಿಯಾವ್ನಾ ಖೇಚಿಲೀ ಆಯ್ಯಿನ್ ಬಂದಿಖಾನಮ ಘಲಾವಿನ್ ಸಭೆನಾ ಹಾಳ್‍ಕರೊಕರ್ತೋಥೊ ಫಿಲಪ್ಪನೆ ಸಮಾರ್ಯಮ ಅಚ್ಛಿಖಬರ್ ಬೋಲಿವೊತಾಳ್ಯೊತೆ. 4 ಎಕ್ಕಾಸ್ಸೇಕ್ ಹಯ್ಯಿಗಯಾಹುಯಾ ಹೋಸ್ಝ್‍ಗಾ ಹೊಸ್ಝ್‍ಗಾ ಸ್ಝಯ್ಯೀನ್ ಅಚ್ಛಿಖಬರ್ನಾ ಬೋಲಿವೊತಾಳು ಕರ್ತಾಥಾ. 5 ಫಿಲಿಪ್ಪ ಸಮಾರ್ಯಕರಿ ಖ್ಹಯೇರ್ಮಾ ಸ್ಝಯ್ಯಿನ್ ಕ್ರಿಸ್ತುನ ಇಸ್ಝ್‍ಗಾಲಗೂ ಬೋಲಿವೊತಾಳ್ಯೊ. 6 ಗಲ್ಲೇಖ್ಹು ಭರಾಯ್ಯಿರಃಯೂತೆ ಅದ್ಮಿಖ್ಹರೂ ಫಿಲಿಪ್ಪನಿ ವಾತೇವ್ನಾ ಖ್ಹಂಜೀನ್ ಇನೆ ಕರ್ಯೊತೆ ಕ್ಹಣಾದ್ನೂ ಕಾಂನಾ ದೇಖಿನ್ ಇನೆ ಬೋಲಿವೊತಾಳ್ಯೊತೆ ಖಬರ್ನಾ ಏಕ್ ಮನ್‍ಥಿ ಧ್ಯಾನ್‍ದಿಧಾ. 7 ಷೇಕತೊ ಕೆತ್ರಾಕಿಸ್ಝಣಾ ರೋಗ್ವಾಳಮಥೂ ಭೂತ್‍ಖ್ಹರೂ ಮೋಟಿ ಅವಾಸ್ಝ್‍ಥಿ ಚಿಕ್ರೀನ್ ಬಹಾರ್ ನಿಕ್ಳ್ಯೂ; ಅಸ್ಝೂ ಕೆತ್ರುಕಿ ಸ್ಝಣೂ ಲಕ್ವಾಯ್ಯಿನೊ ರೋಗ್ವಾಳು ಲಂಗ್ಡೂ ಪಾಂಗ್‍ಳ್ಯಾಖ್ಹರಾ ಅಶೇಲ್ ಹುಯ್ಯಿಗೂ. 8 ಯೊ ಖ್ಹಯೇರ್ಮಾ ಘಣೂ ಆನಂದ್ ಹುಯಾ. 9 ಕತೊ ಥೋಡ ಹಗಾಂಥೊ ಯೊ ಖ್ಹಯೇಮಾ ಥೋತೆ ಸೀಮೋನಕರಿ ಏಕ್ ಮನ್‍ಖ್ಯೂ ಮೆ ಸಾತ್ಕಿ ಏಕ್ ಮಹಾತ್ಮಕರಿ ಬೋಲಿಲೀನ್ ಮಂತ್ರ ತಂತ್ರಖ್ಹರೂ ಸ್ಛಲಾ ವ್ತೋಹುಯಿನ್ ಸಮಾರ್ಯನು ಅದ್ಮೀವ್ಮಾ ಚಮಾತ್ಕಾರ್ ಕರೊಕರ್ತೋಥೊ. 10 ನ್ಹನಾವ್ನಾಥಿ ಧರ್ಲಿನ್ ಷಾಣಾವ್ಲಾಗೂ ಖ್ಹೊರಾಸ್ – ಆ ಮೋಟಿತಬತ್‍ಕರಿಬೋಲಾಯ್ಯಿಲಿಧೋತೆ ದೇವ್ನೀ ತಾಖತಸ್ ಕರಿ ಬೋಲ್ತಾಹುಯಿನ್ ಇನಿ ವಾತೇನ ಮಾನುಕರ್ತಾಥಾ. 11 ಘಣಾದನ್‍ಥೂಬಿ ಯೊ ಮಂತ್ರತಂತ್ರ ಕರೀನ್ ಅದ್ಮೀವ್ಮಾ ಚಮತ್ಕಾರ್ ಕರೂಕರ್ತಾಲೀನ್ ಇವ್ಣೆಖ್ಹರಾ ಇನಾ ಮಾನುಕರ್ತಾಥಾ. 12 ಕತೊ ಫಿಲಿಪ್ಪ ದೇವ್ನಿ ರಾಜ್ಯನಿ ಖಬರ್ಮಾ ಯೇಸು ಕ್ರಿಸ್ತುನು ನಾಂನಾ ಖಬರ್ಮಾಬಿ ಅಚ್ಛಿಖಬರ್ನಾ ಬೋಲಾನ ತಂಯಾಡಾಪಖ್ರ್ಹಾ ಮಾನೀನ್ ಬಾಪ್ತಿಸಂ ಕರಾವಿಲಿಧಾ. 13 ತೆದೆ ಸೀಮೋನಬಿ ರಹೈನ್ ಖ್ಹಣಾದ್ನೂ ಕಾಮ್ ಮೋಟುಕಾಮ್ ಸ್ಛಾಲಾತೆದೇಖಿನ್ ಮಸ್ತಾಪ್‍ಹುಯೊ. 14 ಸಮಾರ್ಯವಾಳ ದೇವ್ನೀ ವಾಖ್ಯನ ಮಾನ್ಯತೆ ಖಬರ್ನಾ ಯೆರಸೂಸಲೇಮ್‍ಥಾತೆ ಅಪೋಸ್ತಲವ್ನೆ ಖ್ಹಂಜೀನ್ ಪೇತ್ರ ಯೋಹಾನ್‍ನ ಇನಾಕನ ಮೋಕ್ಲ್ಯಾ. 15 ಇವ್ಣೆ ಇಸ್ಝ್‍ಗಾ ಆವೀನ್ ಯೊ ಅದ್ಮೀವ್ನಾ ಪವಿತ್ರಾತ್ಮನಿವರ ಮಳ್ನೂಕರಿ ಇವ್ಣಾಕಾಜೆ ಪ್ರಾರ್ಥನೆ ಕರ್ಯಾ. 16 ಷೇಕತೊ ಯೊ ವರ ಇವ್ಣಾಮ ಏಕ್‍ಸ್ಝಣಾಪರ್ಬಿ ಅಸ್ಝೂಬಿ ಕೊ ಆಯ್ಯಿರೂಥೂನಿ. ಇವ್ಣೆ ಖ್ಹೊದಾ ಯೇಸುನ ನಾಮ್‍ಪರ್ ಬಾಪ್ತಿಸಂ ಖಲಿ ಕರಾಯ್ಯಿ ಮಿಸ್ಛಾಳ್ಯಾಥಾ. 17 ಅಪೋಸ್ತಲವ್ನೆ ಇವ್ಣಾಪರ್ ಹಾತ್‍ಮ್ಹೆಲಾದೀನ್ ಇವ್ಣೆಖ್ಹರಾ ಪವಿತ್ರಾತ್ಮನಿವರನ ಲಿಧಾ. 18 ಅಪೋಸ್ತಲವ್ನೆ ಹಾತ್‍ಮ್ಹೆಲಾದೀನ್ ಪವಿತ್ರಾತ್ಮ ಆವಾತೆ ಸೀಮೋನನೆ ದೇಖಿನ್ ಪೈಶವ್ನಾ ಲೀಆಯ್ಯಿನ್ ಇನಾ ಖ್ಹಾಮ್ಣೆ ಮ್ಹೆಲೀನ್. 19 ಮೆಕಿನಾಪರ್ ಹಾತ್ಮೇಲ್ಹೊಸ್ಕಿ ಇವ್ಣೆ ಪವಿತ್ರಾತ್ಮನಿ ವರನ ಲೆವಾನಿ ಯೊ ಹಕ್ನಾ ಮನಾಬಿ ದೇವೂಕರಿ ಬೋಲ್ಯೊ. 20 ಕತೊ ಪೇತ್ರಾ ಇನಾ – ತಾರೂ ರೂಪು ತಾರಿಸ್ಝೋಡೆ ಹಾಳ್‍ಹುಯ್ಯಿಸ್ಝವಾದೆ. ದೇವ್ನಿ ವರನ ಪೈಶಾನ ಮೊಲ್‍ಲೆವಾಸ್ಝಾಯ್ಯಿಕರಿ ಖ್ಹೊಯಾಲ್ ಕರಾಸ್ನಾ. 21 ಆ ಕಾಮ್ಮಾ ತುನಾ ಭಾಗ್‍ಬಿ ಕೊಯ್ನೀ, ವಾಟೊಬಿ ಕೊಯ್ನೀ; ತಾರೊ ದಿಲ್ ದೇವ್ನಾ ಖ್ಹಾಮ್ಣೆ ಬರಾಬರ್‍ಕೊಯ್ನಿ. 22 ಇನಾವಾಖ್ಹ್‍ತೆ ಆ ತಾರಿ ಖರಾಬ್‍ನಾ ಮ್ಹೇಲಿನ್ ದೇವ್‍ಭಣಿ ಫರೀಜೀನ್ ಖ್ಹೊದಾ ತಾರ ಮನ್‍ನಾ ಖ್ಹೂಸ್ಝ್‍ನಾ ಮಾಪಿಕರಾಸ್‍ಕಿ ಇನಾಕನ ಬೋಲಿಲಾ. 23 ಷೇಕತೊ ತೂ ಖತ್ರಾನಿ ಖಬರ್ ಖರಾಬ್ಮಾ ಬಾಂದಾನೊ ಬಂಧಾನ್ ಹುಯ್ಯಿರೋಸ್ಕರಿ ಸಸ್ಝ್‍ರಾವಸ್ ಕರಿ ಬೋಲ್ಯೊ. 24 ಇನಾ ಸಿಮೋನನೆಎ – ತೂ ಬೋಲಿರಾಖ್ಯೋತೆ ಸಂಗತಿಖ್ಹರಿ ಕೆವ್ಹೊಬಿ ಮಾರಪರ್ ಆವ್ನೂ ನಾ ಇಮ್ ಮಾರಕಾಜೆ ತುಮೇಸ್ ಪಮೇಶ್ವರ್ನಾ ಅರಸ್ಝ್ ಮಾಂಗೊಕರಿ ಬೋಲ್ಯೊ. 25 ಅಮ್‍ರಹೈನ್ ಇವ್ಣೆ ಪಮೇಶ್ವರ್ನಿ ವಾತೇವ್ನಾ ಪೂರಮನ್‍ಥಿ ಬೋಲಿ ಹುಯ್ಯಿಸ್ಝವಾದಿನ್ ಯೆರೂಸಲೇಮ್ನಾ ಪಾಸ್ಛೋಫರಿ ಸ್ಝಯ್ಯಿನ್ ಸಮಾರ್ಯವಾಳನ ಗಮ್ಮಾ ಅಚ್ಛಿಖಬರ್ನಾ ಬೋಲಿವೊತಾಳ್ಯಾ ಫಿಲಿಪ್ಪನೆ ಐಥಿಯೋಪ್ಯವಾಳನ ಅಚ್ಛೀಖಬರ್ನಾ ಮಾಲುಂ ಕರಾಯೊತೆ. 26 ಎತ್ರಾಮಸ್ ಖ್ಹೊದಾನೊ ಮಲಾಕ್‍ನೆ ಫಿಲಪ್ಪನ – ತೂ ಉಠೀನ್ ದಕ್ಷಣಾನಿ ಬಝೂನ್ ಯೆರೂಸಲೇಮ್‍ಥೊ ಗಾಜನ ಸ್ಝವಾನೊ ವಾಟೆ ಸ್ಝಾ, ಯೊ ಸ್ಝಾಡಿಕರಿ ಬೋಲ್ಯೊ. ಯೊ ಉಠಿನ್ ನಿಕ್ಳೀಗಯೊ; ವೊಳೊಸ್ಝಾಯ್ಯಿತೆದೆ ಐಥಿಯೋಸ್ಯ ದೇಖ್ಹ್‍ನೊ ಏಕ್ ಮನ್‍ಖ್ಯಾನ ದೇಖ್ಯೋ, 27 ಯೊ ಖೋಸ್ಝೋಬಿ ಐಥಿಯೋಪ್ಯವಾಳಾವ್ನಾ ರಾಣಿಹುಯ್ಯಿರೀತೆ ಕಂದಾಕನಿ ಹಾತ್ ಹೇಟ್ ಮೋಟೊ ಹಕ್‍ದಾರ್‍ಬಿ ಇನಿ ಅಖ್ಖೀ ದೌಲತ್ನೋ ಹಕ್‍ದಾರ್‍ಬಿ ಹುಯ್ಯಿರೋಥೊ. 28 ಯೊ ದೇವ್ನಿ ಆರಾಧನೆನಾಕಾಜೆ ಯೆರೂಸಲೇಮ್ನಾ ಆಯ್ಯಿನ್ ಪಾಸ್ಛೋಫರೀನ್ ಒಳೊಸ್ಝಾಯ್ಯಿತೆದೆ ಇನಾ ರಥಪರ್ ಬೇಷಿನ್ ಯೇಶಾಯ ಪ್ರವಾದಿನಿ ಗ್ರಂಥ್ ಫಢೂಕರ್ತೊಥೊ. 29 ದೇವ್ನೋ ಆತ್ಮನೆ ಫಿಲಿಪ್ಪನ – ತೂ ಯೊ ರಥನ ಕನ್ಹೆಸ್ಝಯ್ಯಿನ್ ಇನಿ ಸ್ಝೋಡೇಸ್ ಸ್ಛಾಲ್ ಕರಿ ಬೋಲ್ಯೊ. 30 ಫಿಲಿಪ್ಪ ನಾಶಿಸ್ಝಯ್ಯಿನ್ ಯೊ ಮನ್‍ಖ್ಯೂ ಯೆಶಾಯನಿ ಪ್ರವಾದಿನಿ ಗ್ರಂಥ್‍ನಾ ಪಢೂಕರಾತೆ ಖ್ಹಂಜೀನ್ - ಲೊಯ್ಯಿ, ತೂ ಪಢೂಕರಾತೆ ಯೊ ತುನಾ ಮಾಲುಂ ಹುವಾಸ್ನಾ? ಕರಿ ಬೋಲಾಮ. 31 ಇನೆ – ಕೋಣ್ತೋಬಿ ಮನಾ ಇನಿ ಮತ್ಲಾಬ್ ಬೋಲಿನಾ ವೊತಾಳ್ಯೂತೊ ಯೊ ಮನಾ ಕಿಮ್ ಮಾಲುಂ ಹುಷೆ ಕರಿ ಬೋಲೀನ್ – ತೂ ರಥ ಸ್ಛಢೀನ್ ಮಾರಕನ ಬೇಕ್ಹ್‍ಕರಿ ಫಿಲಿಪ್ಪನ ಬೋಲೀಲ್ದೋ. 32 ಯೊ ಪಢೂ ಕರ್ತೊಥೋತೆ ಶಾಸ್ತ್ರನಿ ವಚನ್ ಕೆವ್ಹಿಕತೊ – ಕತ್ರಾನ ಲೀಸ್ಝಾಯ್ತೇ ಮೆಂಢಾನಿತರ ಯೊ ಧರಾಯ್ಯಿನ್ ಗಯೊ; ಮೆಂಢಾನು ಚೇಲೂ ಕೇಖ್ಹ್‍ಕತ್ರಾವಳನ ಖ್ಹಾಮ್ಣೇ ಗಪ್‍ಸ್ಛುಕ್ ರಹೈಇಮ್ ಯೊ ಮ್ಹೋಡೂ ಕೋ ಕಾಡ್ಯೋನಿ. 33 ಇನಾಹುಯ್ಯಿತೆ ಧೀನತೆಮಾ ನ್ಯಾವ್ ಕೊ ಮಳ್ಯೂನಿ. ಇನಿ ವೊಖ್ಹತ್ನಾ ಅದ್ಮವ್ನೀಬಾರೇಮ ಕೋಣ್ ಬೋಲಿವೊತಾಳ್ಷೇ? ಇನಾ ಜಾನ್ನಾ ದರ್ನಿಪರ್ಥಾ ಕಾಡಿನಾಖ್ಯಾನಿ ಅಮ್ ಕರೀನ್. 34 ಖೋಸ್ಜೋ ಯೊ ಖಬರ್ನಿ ಬಾರೇಮ - ಪ್ರವಾದಿನೆ ಅನಾಕಿನಿ ಬಾರೇಮ ಬೋಲಿರಾಖ್ಯೋಸ್? ಇನೀಸ್ ಬಾರೇಮಾನಾ? ಬುಜೇಕ್‍ಸ್ಝಣೀನಿ ಬಾರೇಮನಾ? ದಯಾಕರೀನ್ ಬೋಲಿವೊತಾಳ್ನೂಕರಿ ಫಿಲಿಪ್ಪನ ಪೂಸ್ಛಾಮಾ. 35 ಫಿಲಿಪ್ಪನ ಬೋಲಿವೊತಾಳನ ಲೀಪೋಚೀನ್ ಯೋಸ್ ವಚನ್‍ನಾ ಆಧಾರ್‍ಕರ್ಲಿನ್ ಇನಾ ಯೇಸುನಿ ಖಬರ್ ಹುಯ್ಯಿರೀತೆ ಅಚ್ಛಿಖಬರ್ನಾ ಬೋಲಿವೊತಾಳ್ಯೊ. 36 ಇವ್ಣೆ ವಾಟೆ ವೊಳೋಸ್ಝಾಯ್ಯಿತೆದೆ ಪಾಣಿನಿ ಸ್ಝಗೊ ಆಯಾ. 37 ಖೋಸ್ಝೋ - ಹೊದೇಕ್, ಪಾಣಿ ಮನಾ ಬಾಪ್ತಿಸಂ ಹುವಾನ ಆಡೂ ಷಾತ್‍ಕರಿ ಬೋಲೀನ್. 38 ರಥನ ಉಭಿರಾಕ್‍ಕರಿ ಹುಕುಂದಿಧೋ; ಫಿಲಿಪ್ಪಬಿ ಖ್ಹೊಸ್ಝೋ ಬೆಹೆಸ್ಝಣಾ ಪಾಣಿಮಾ ಉತ್ರ್ಯಾ. ಫಿಲಿಪ್ಪ ಇನಾ ಬಾಪ್ತಿಸಂ ದಿಧೋ. 39 ಇವ್ಣೆ ಪಾಣಿ ಮಥಾ ಬಹಾರ್ ಆಯಾತೆದೆ ಪರ್ಮೇಶ್ವರ್ನೊ ಆತ್ಮಾ ಫಿಲಿಪ್ಪನ ಪಾಡಿಲಿ ಸ್ಛಲೋಸ್ಝವಾಮ ಖ್ಹೊಸ್ಝೋ ಖ್ಹುಚಿಹುಯ್ಯಿನ್ ಇನಿ ವಾಟ್ ಧರ್ಲಿನ್ ಗಯೊ ಇನಾ ಕೋಸ್ ದೇಖ್ಯೋನಿ. 40 ಇನಾಕಡ್ತೂ ಫಿಲಿಪ್ಪನೆ ಅಜೋತಿಮ ನಸ್ಝ್‍ರಾಯ್ಯಿನ್ ಇಸ್ಝ್‍ಗಾಥೊ ಕೈಸರೈ ಲಗೂಬಿ ಅಖ್ಖಾ ಗಮ್ಮಾ ಅಚ್ಛಿಖಬರ್ನಾ ಬೋಲ್ತೋ ಹುಯ್ಯಿನ್ ಗಯೊ.