1 ಸಭೆಮಾ ಕಾಮ್ ಕರ್ವಾನ ಅಪೋಸ್ತಲವ್ನೇ ಖ್ಹಾತ್ ಸ್ಣಣಾವ್ನಾ ಸ್ಛೂಣ್ಯಾತೆ ಯೊ ದನ್ಮಾ ಚೇಲಾ ಸ್ಝಾಖ್ಹತ್‍ಹೊತಾಹುಯ್ಯಿನ್ ವೊಳಾವತೆದೆ ಇವ್ಣಾಮ ಗ್ರೀಕ್ ವಾತೆವಾಳ ಇಬ್ರಿಯಾ ವಾತೆವಾಳವ್ರ್ –ದನ್‍ದನ್ನಿ ಸ್ಛಾಕ್ರೀಮಾ ಹಮಾರಿ ಮುಂಢಾಮೋಪಿ ತ್ರಿಯಾವ್ನಾ ಬರಾಬರ್ ದೇಕ್ಬಾಲ್ ಕೊ ಕರಾನಿಕರಿ ಭಣ್‍ಕ್ಯಾ. 2 ತೆದೆ ಬಾರಃಸ್ಝಣಾ ಅಪೋಸ್ತಲವ್ನೆ ಚೇಲಾವ್ನೀ ಮಂಡಲೀನ ಎಕ್ಟೋಕರೀನ್ - ಹಮೆ ದೇವ್ನೀ ವಾಖ್ಯ ಬೋಲಿದೆವಾನು ಮ್ಹೆಲಿದೀನ್ ಸ್ಛಾಕ್ರೀಕರ್ತಾರಃವಾನು ಅಶೆಲ್ ಕಾಹೇ; 3 ಇನಾವಾಖ್ಹ್‍ತೆ ಭಂಯ್ಯಿಬಂಧೋ, ಸ್ಛಾತೂರ್, ಪವಿತ್ರಾತ್ಮ ಭರಾಯ್ಯಿರಃವಾಳ, ಅಕ್ಕಾಳ್‍ಬಂದಿ ಹುಯ್ಯಿರಾತೆ ಖಾತ್‍ಸ್ಝಣಾವ್ನಾ ತುಮಾರಮಥೂ ದೇಖಿನ್ ಸ್ಛೂಣಿಲೆವೊ; 4 ಇವ್ಣಾ ಆ ಕಾಮ್‍ಪರ್ ಉಭಿರಾಖೀಂಯೇ ಅಪ್ಣೆತೋಬಿ ಪ್ರಾರ್ಥನೆನಾಬಿ ವಾಕ್ಯಬೋಲಿದೆವಾನಕಾಜೆ ರಂಹೇಸ್‍ಕರಿ ಬೋಲ್ಯಾ ಆ ವಾತೆ ಅಖ್ಖೀ ಮಂಡಲಿವ್ನಾ ಅಶೇಲ್‍ಕರಿ ದೇಖಾಯು. 5 ಇವ್ಣೆ ಪವಿತ್ರಾತ್ಮಥಿ ಭರಾಯ್ಯಿ ರಹೈತೆ ಭರಾಖ್ಹೊಥಿ ರಹೈತೆ ಸ್ತೆಫನನಾ, ಫಿಲಿಪ್ಪ, ಪ್ರೋಖೋರ , ನಿಕನೋರ, ತಿಮೋನ, ಪರ್ಮೋಣ, ಯೆಹೂಸ್ಯ ಸ್ಝಾತ್ನಾ ಅಭಿಮಾನ್ ಕರಾತೆ ಅಂತಿಯೋಕ್ಯನೊ ನಿಕೊಲಾಯ ಅವ್ಣಾಖ್ಹರೂ ಸ್ಛೂಣಿಲೀನ್ ಅಪೋಸ್ತಲವ್ನಾ ಖ್ಹಾಂಣೆ ಉಭೀರಾಖ್ಯಾ . 6 ಅಪೋಸ್ತಲವ್ನೆ ಪ್ರಾರ್ಥನೆ ಕರೀನ್ ಇವಣಾಪರ್ ಹಾತ್‍ಮ್ಹೆಲೀನ್. 7 ದಿಧಾ, ಅಸ್ಝು ದೇವ್ನೀ ವಾಖ್ಯ ಘಣೂ ಪೈಲಾವ್ತಿ ನಿಕ್ಳೀ ಚೇಲಾವ್ನೀ ಇಷಾಬ್ ಯೆರೂಸಲೇಮ್ಮಾ ಘಣೂ ಸ್ಝಾಖ್ಹತ್ ಹೋತಿಹುಯಿನ್ ಆಯ್ಯಿ ಯಾಜಕರ್ಮಾ ಘಣೂಸ್ಝಣೂ ಕ್ರಿಸ್ತುನ ಮಾನ್ತಾ ನಿಕ್‍ಳ್ಯಾ ದೇವ್ನಾ ಬಾದ್ನಾಮ್ ಕರ್ಯೋಕರಿ ಸ್ತಫನನಪರ್ ಗಲತ್ ಧರಾಯತೆ. 8 ಸ್ತೆಫನ ದೇವ್ನಿ ಖ್ಹರ್ನೆಥಿಬಿ ತಾಖತ್‍ಥಿಬಿ ಭರಾವಿಜೀನ್ ಅದ್ಮೀಮಾ ಅದಬುತ ಕಾಮ್ನಾಬಿ ಖ್ಹಣಾದ್ನೂಕಾಮ್ನಾ ಕರೂಕರ್ತೊಥೊ. 9 ಕತೊ ಲೆಬೆರ್ತಿನನಿ ಸ್ಝಾತ್ವಾಳ್ಮಾಬಿ ಕುರೇನ್ಯ ಅಸ್ಝು ಅಲೆಕ್ಸಾಂದ್ರಿಯನಿ ಸ್ಝಾತ್ವಾಳಮಬಿ ಕಿಲಕ್ಯ ಆಸ್ಯ ದೇಖ್ಹ್‍ಮಾಥೊ ಆಯೂತೆ ಸ್ಝಾತ್ವಾಳಮೆಬಿ ಥೋಡ ಸ್ಝಣಾ ಉಠೀನ್ ಸ್ತೆಫನನಿ ಸ್ಝೋಡೆ ವಾತೆ ಕರೂಕರತೆದೆ. 10 ಇನಿ ವಾತೇಮ ನಸ್ಝ್‍ರಾಯ್ಯಿತೆ ಅಕ್ಕಾಲ್‍ಬಿ9 ಪವಿತ್ರಾತ್ಮನಿ ತಾಖತ್ನಾ ಜೀತಾನ ಕೊ ಹುಯಾನಿ. 11 ತೆದೆ ಇವ್ಣೆ ಥೋಡ ಅದ್ಮೀವ್ನಾ ಆಶತ್ಕಿ ಮೋಶೆನಬಿ ದೇವ್ನಾ ವಿರುದ್ಧ್ ಬದ್ನಾಮ್ನಿ ವಾತೆ ಕರೂಕರಾತೆ ಖ್ಹಂಜ್ಯಾಕರಿ ಬೋಲಿನ್ ಅದ್ಮೀವ್ನಾ ಷಾಣಾವ್ನಾ ಶಾಸ್ತ್ರೀವ್ನಾ ಛೇಡ್ಯಾ. 12 ಅಸ್ಝೂ ಇನಾ ಧರ್ಲಿಆವಿನ್ ಮೋಟಿಸಭೆಕನ ಲೀಸ್ಝ್‍ಯ್ಯಿನ್ ಇನಾಪರ್ ಸ್ಝೋಟಿ ಸಾಬೂತ್ ಬೋಲಾವಳಾವ್ನಾ ಬುಲಾಯ್ಯಿಲೀನ್ ಉಭೀರಾಖ್ಯಾ. 13 ಯೊ ಸಾಭುತ್ ಬೋಲಾವಳ – ಆ ಮನ್‍ಖ್ಯೂ ಆ ಪರಿಶುದ್ದ ಸ್ಝಗೋನಿ ವಿರುದ್ದ್‍ಬಿ ಧರ್ಮಗ್ರಂಥನಾ ವಿರುದ್ದ್ ವಾತಬೋಲಾನು ಕೋಮ್ಹೆಲಾನಿ. 14 ಯೊ ನಜರೇತಿನೊ ಯೇಸು ಆ ದೇವಳ್ನಾ ರಡ್ಕಾವಿನ್ ಮೋಶೆನೆ ಹಮ್ನಾ ದೀರಾಖ್ಯೊತೆ ಆಚಾರ್ನಾ ಅಲಾದು ಬಣಾಂವ್ಸ್‍ಕರಿ ಆ ಬೋಲುಕರಾತೆ ಹಮೆ ಖ್ಹಜ್ಯಾ ಕರಿ ಬೋಲ್ಯಾ. 15 ತೆದೆ ಮೋಟಿ ಸಭೆಮಾ ಬೇಠಾತೆ ಅಖ್ಕಾಸ್ಝಣಾ ಇನಾಭಣಿ ದೇಖ್ಯಾ ತೆದೆ ಇನು ಮ್ಹೋಡು ದೇವ್ನೋ ಮಲಕ್ನಾ ಮ್ಹೋಡಾನಿತರ ರಹೈತೆ ದೇಖ್ಯಾ.