1 ಕತೊ ಅನನೀಯಕರಿ ಏಕ್ ಅದ್ಮಿ ಸಫೈರಕರಿ ಇನಿ ಬಾವಣ್ಣೆ ಸ್ಝೋಡ್‍ಖ್ಹಾಮೆಸ್ ಇನಿ ಏಕ್‍ಸ್ಝಂಈನ್ನಾ ವೇಚಿನ್. 2 ಇನಿ ಬಾವಣ್ಣೇ ಷೀಕ್‍ಥಿ ಯೊ ಪೈಶಾಮಾ ಏಕ್ ಭಾಗ್ನಾ ಲಪಾಡಿಲೀನ್ ಏಕ್ ಭಾಗ್ನಾ ಲೀಆಯ್ಯಿನ್ ಅಪೋಸ್ತಲರ್ನಾ ಪಗ್‍ಕನಾ ಮ್ಹೆಲ್ಯೋ. 3 ತೆದೆ ಪೇತ್ರ – ಅನನೀಯಾ, ಸೈತಾನ್‍ನೆ ತಾರ ದಿಲ್ಮಾ ಭರಾಯ್ಯಿಗಯೊತೆ ಷೇ? ತೂ ಷಾನ ಯೊ ಖೇತರ್ನಾ ಪೈಷಾಮ ಥೋಡು ಲಪಾಡಿಲೀನ್ ಪವಿತ್ರಾತ್ಮನ ಗಾವ್ನೂಕರಿ ಸ್ಛಾ? ಯೊ ಆಸ್ತಿ ರಹೈತೆದೆ ತಾರೀಸ್‍ಥೀನಿ. 4 ವೇಚಿನಾಖಿನ್‍ಬಿ ಆಯಾತೆ ಪೈಷಾ ತಾರಕಬ್ಜಾಮಸ್ ಥಾನಿ ತೂ ಆ ಕಾಮ್ ತಾರ ದಿಲ್ಮಾ ಖ್ಹಯಾಲ್ ಕರ್ಯೊಷಾನ? ತೂ ಸ್ಝೋಟಿ ಬೋಲ್ಯೋತೆ ಮನ್‍ಖ್ಯಾನ ಕಾಹೇ. ದೇವ್ನಾಸ್ ಬೋಲ್ಯೊ ಕರಿ ಬೋಲ್ಯೊ. 5 ಆ ವಾತೇವ್ನಾ ಅನನೀಯ ಖ್ಹಂಸ್ಝ್‍ತಾಸ್ ಪಡೀನ್ ಜಾಣ್ ಮ್ಹೆಲ್ಯೊ; ಖ್ಹಂಸ್ಝಾವಾಳ ಅಖ್ಕಾವ್ನಾ ಮೋಟೊ ದರ್ ಲಗ್ಯೋ. 6 ತೆದೆ ಕಂವಾರ ಸ್ಛಗ್ರಾಖ್ಹರಾ ಉಠೀನ್ ಇನಾ ಲುಂಘಡಾಮಾ ಲಪೇಟೀನ್ ಪಾಡಿಲಿ ಸ್ಝಯ್ಯಿನ್ ಗಾಡ್ಯಾ. 7 ಕಂಷೇಕರಿ ತಿನ್ ಬಜೇನ ಇನಿ ಬಾವಣ್‍ಬಿ ಸ್ಛಾಲೀತೆ ಖಬರ್‍ನಾ ಮಾಲುಂಕೊಯ್ಯಿನೀತೇಸ್ ಮಹೈ ಆಯಿ . 8 ಪೇತ್ರ ಯೊ ತ್ರಿಯಾನ ದೇಖಿನ್ – ತುಮೆ ಖೇತರ್ ವೇಚ್ಯಾತೆ ಅತ್ರಾಸ್ ಪೈಷಾನನಾ? ಮನಾ ಬೋಲ್ ಕರಿ ಪೂಸ್ಛಾಮ ಯೊ ತ್ರಿಯಾನೆ ಬಹೂ ಅತ್ರಾಸ್ನಾ ಕರಿ ಬೋಲಿ. 9 ತೆದೆ ಪೇತ್ರನೆ ಯೊತ್ರಿಯಾನ – ತುಮೆ ಜೀಸ್ಝಣ ಖ್ಹೊದಾನ ಆತ್ಮನ ಪರ್ಖಾನಕಾಜೆ ಷಾನ ಖ್ಹಯಾಲ್ ಕರ್ಯೋ? ಹಂದೇಕ್, ತಾರ ಬಾವ್ರೀನಾ ಗಾಡ್ಯಾಹುಯಾ ಆಯ್ಯಿನ್ ದರ್ವಾಸಪರ್ ಗೋಡೊ ಮಿಸ್ಛಾಳ್ಯಾಸ್, ತುನಾಬಿ ಝೇಲೀಲೀನ್ ಸ್ಝಾಷೆ ಕರಿ ಬೋಲ್ಯೊ. 10 ತೆದೇಸ್ ಯಾತ್ರಿಯಾ ಇನಾ ಪಗ್ನಾ ಖ್ಹಾಮ್ಣೆ ಪಡೀನ್ ಜಾನ್ ಮ್ಹೇಲಿ. ಯೊ ಕಂವಾರ ಸ್ಛೊಗ್ರಾಖ್ಹರಾ ಮಹೈ ಆವೀನ್ ಯೊ ತ್ರಿಯಾ ಮರಿರಹೈತೆ ದೇಖೀನ್ ಇನಾ ಝೇಲಿಲೀನ್ ಸ್ಝಯ್ಯಿನ್ ಬಾವ್ರೀನೀ ಪಾಕ್ತಿಮಾ ಗಾಡ್ಯಾ. 11 ಅಸ್ಜೂ ಅಖ್ಖಿ ಸಭೆನಾಬಿ ಆ ಖಬರ್ ಖ್ಹಂಜ್ಯಾ ಹುಯಾನಬಿ ಮೊಟೊ ಡರ್ ಹುಯೊ. ಅಪೋಸ್ತಲವ್ನಾ ಬಂಧಿಖಾನಮಾ ಘಾಲ್ಯಾತೆ. 12 ಯೊ ಕಾಹೇತೆ ಅಪೋಸ್ತಲವ್ನಾ ಹಾತೆಖ್ಹೂ ಕೆತ್ರಿಕಿ ಖ್ಹಣಾದ್ನೂ ಕಾಮ್ ಅದ್ಬುತ ಕಾಮ್ ಅದ್ಮೀವ್ಮಾ ಸ್ಛಾಲುಕರ್ತೂ ಥೂ. ಅಸ್ಝು ಅಖ್ಖೂ ಸ್ಝಣೂಎಕ್ಟಾಹುಯ್ಯಿನ್ ಸೊಲೊಮನನು ಮಂಟಾಪ್ಮಾ ರಃವುಂಕರ್ತಾಥಾ. 13 ಇವ್ಣಿ ಸ್ಝೋಡ್ಮಾ ರಃವಾನಕಾಜೆ ಬಚಾಹುಯಾಮ ಏಕ್‍ಸ್ಝಣಾನಬಿ ಹಿಮ್ಮಾತ್ ಕೋಥೀನಿ. 14 ತ್ಯೋನ್ಬಿ ಅದ್ಮಿಖ್ಹರು ಇವ್ಣಾ ಘಣೂ ಖ್ಹರಾಂವಕರ್ತಾಆ; ಅಸ್ಝು ಅಸ್ಝು ಕೆತ್ರೂಕಿ ಸ್ಝಣೂ ಪಖ್ರ್ಹಾಬಿತ್ರಿಯಾ ಖ್ಹೊದಾನಪರ್ ಭರಾಖ್ಹೊ ರಾಖಾವಾಳ ಹುಯ್ಯಿನ್ ಇವ್ಣಿ ಮಂಡಲಿಮಾ ವಾಳೂ ಕರ್ತಾಥಾ. 15 ಅಮ್ ರಹೈನ್ ಅದ್ಮಿಖ್ಹರೂ ರೋಗೇಲಾವ್ನಾ ಡೋಲಿವ್ಮಾಬಿ ಸ್ಛಾದ್ರೀವ್ನಾ ಉಪ್ಪಾರ್ ಬೆಖ್ಹಾಡೀನ್ ಪೇತ್ರ ಆವಾನಿವೊಖ್ಹತ್ಮಾ ಇನೊ ಸ್ಛಾಳೊ ಅವ್ಣಾಮ ಕಿನಾಪರ್‍ಬಿ ಪಡಾದೆಕರಿ ಇವ್ಣಾಖ್ಹರೂ ಗಲಗಲವ್ಮಾ ಪಾಡಿಲೀನ್ ಆವ್ತೂ ಥೂ. 16 ಯೆರೂಸಲೇಮ್ನಾ ಅಷ್‍ಪೀಷ್ ರಹೈತೆ ಗಾಮ್ನೂ ಅದ್ಮೀಬಿ ರೋಗ್ವಾಳಾನ ಶೈತಾನ್ ಧರ್ಯಾಹುಯಾನ ಪಾಡೀಲೀನ್ ಸ್ಝೂಂಡ್ ಸ್ಝೂಂಡ್‍ಥಿ ಆವಂಕರ್ತೂಥೂ; ಇವ್ಣಾಖ್ಹರೂ ಅಶೆಲ್ ಹುಯೂ. 17 ಅಮ್‍ರಹೈತೆ ಮೊಟೊ ಯಾಜಕನೆ ಸದ್ದು ಕಾಯರ್ ಕುಳಿಮಾ ಮಳಾತೆ ಇನಾ ಸ್ಝೋಡ್ಮಾ ರಹೈತೆಖ್ಹರು ಉಟೀನ್. 18 ಕುಳಿನಿ ಇಮಾನ್‍ಥಿ ಭರಾಯ್ಯಿಜೀನ್ ಅಪೋಸ್ತಲವ್ನಾ ಧರೀನ್ ಖ್ಹಯೇರ್ನಾ ಬಂಧೀಖಾನಾಮ ರಾಖ್ಯಾ. 19 ಕತೊ ಖ್ಹೊದಾನೊ ಧೂತ ರಾತ್ಮಾ ಬಂಧಿಖಾನಾಮ ದರ್ವಾಸ್ಝಕಾಡೀನ್ ಇವ್ಣಾ ಬಹಾರ್ ಬುಲಾಯ್ಯಿಲೀನ್ ಆ ಜಿವ್ಜಾನ್ನಿ ವಾತೇವ್ನಾ ಅದ್ಮೀನ ಬೋಲೊ ಕರಿ ಬೋಲ್ಯೊ. 20 ಇವ್ಣೆ ಯೊ ಹುಕುಂನಾ ಲೀನ್ ವ್ಹಾಣು ಹೂಂಸ್ಕರ ದೇವಳ್ಮಾ ಸ್ಝಯೀನ್ ದೇವಳ್ಮಾ ಉಭ್ಯಾರಹೀನ್ ಆ ಜಿವ್ಜಾನ್ನಿ ವಗಾತೇವ್ನಾ ಅದ್ಮೀನ ಬೋಲೊ ಕರಿ ಬೋಲ್ಯೊ. 21 ಇವ್ಣೆ ಯೊ ಹುಕುಂನಾ ಲೀನ್ ವ್ಹಾಣು ಹೂಂಸಕ್ರ ದೇವಳ್ಮಾ ಸ್ಝಯ್ಯಿನ್ ಬೋದನೆ ಕರ್ಯಾ, ಹಂಯ್ಯಕಾಡ್ ಮೋಟೊಯಾಜಕ್‍ಬಿ ಇನಿ ಸ್ಝೋಡೆರಃಃಯಾಹುಯಾ ಆವೀನ್ ಮೊಟಿ ಸಭೆನಬಿ ಇಸ್ರಾಯೇಲ್ನಾ ಯಜಮಾನ್ನಿ ಸಭೆನ ಎಕ್ಟೊಕರೀನ್ ಇವ್ಣಾಖ್ಹರೂ ಬುಲಾಯ್ಯಿಲೀ ಆವಾನ ಬಂಧಿಖಾನಕನ ಬೋಲಿಮೋಕ್ಲಯಾ. 22 ತಪಾಳ್‍ವಾಳ ಸ್ಝಯ್ಯಿನ್ ಇವ್ಣಾ ಬಂಧೀಖಾನಮ ನಾ ನಸ್ಝ್‍ವ್ತಾಲೀನ್ ಪಾಸ್ಛೋಫರೀನ್ ಆವೀನ್. 23 ಬಂಧಿಖಾನಾನು ಘರ್ ಪೂರ ಸ್ಝತನ್‍ಥಿ ಮುಸ್ಛಾರಹ್ಯೂತೆ ಬಿ ಕಾವಲ್‍ರಃವಾಳ ದರ್ವಾಸ್ಝಕನ ಉಭ್ಯಾರಃಯಾತೆ ಹಮೆ ದೋಖ್ಯಾ; ಕತೊ ದರ್ವಾಸ್ಝೂ ಕಾಡ್ವಾದೀನ್ ಮಹೈ ಏಕ್‍ಸ್ಝಣಾನಬಿ ಕೊ ದೇಖ್ಯಾನಿ ಕರಿ ಬೋಲ್ಯಾ. 24 ದೇವಳ್ನೋ ಹಕ್‍ದಾರ್‍ಬಿ ಮೋಟೊ ಯಾಜಕಖ್ಹರಾ ಆ ವಾತೇವ್ನಾ ಖ್ಹಂಜೀನ್ ಅನೇಥಿ ಷಾತ್ ಹುಷೇಕಿ ಕರಿ ಘಬ್ರಾಯಾ. 25 ಅಮ್‍ರಹೈತೆ ಕೋಣ್ಕಿ ಏಕ್‍ಸ್ಝಣೂ ಆವೀನ್ - ಹೊಸ್ಝ್‍ಗಾ, ತುಮೆ ಬಂಧಿಖಾನಾಮಾ ಘಾಲಿರಾಖ್ಯಾಥಾತೆ ಯೊ ಮನ್‍ಖ್ಯಾಖ್ಹರಾ ದೇವಳ್ಮಾ ಉಭಿರಹೀನ್ ಅದ್ಮೀವ್ನಾ ಬೋದನೆ ಕರೂಕರಾಸ್ಕರಿ ಇವ್ಣಾ ಮಾಲುಂ ಕರಾಯ. 26 ತೆದೆ ಹಕ್‍ದಾರ್ನೆ ತಪಾಲ್‍ವಾಳನಿ ಸ್ಝೋಡೆ ಸ್ಝಯ್ಯಿನಿ ಇವ್ಣಾಖ್ಹರು ಬುಲಾವಿಲೀನ್ ಆಯೊ; ಕತೊ ಹಕ್‍ದಾರ್ನೆ ಹಮ್ನಾ ಅದ್ಮೀಖ್ಹರೂ ಬಂಡಾಫೇಕಿನ್ ಮಾಷೇಕರಿ ಡರೀನ್ ಜಿದ್‍ಕೊ ಪಡ್ಯೋನಿ. 27 ಇವ್ಣಾ ಬುಲಾಯ್ಯಿಲಿ ಆವೀನ್ ಮೊಟಿಸಭೆನ ಖ್ಹಾಮ್ಣೆ ಉಭೀರಾಖಾಮ ಮೊಟೊ ಯಾಜಕನೆ ಇವ್ಣಾ ಪೂಸ್ಛ್‍ತೊಹುಯ್ಯಿನ್ – 28 ತುಮೆ ಆ ನಾಮ್ನಾ ಪಾಡೀನ್ ಬೋದನೆ ನಾಕರ್ನೂಕರಿ ಹಮೆ ತುಮ್ನಾ ಕಡಕ್‍ಥಿ ಹುಕುಂದಿಧಾನಿ; ತ್ಯೋನ್ಬಿ ತುಮೆ ಯೆರೂಸಲೇಮ್ನಾ ತುಮಾರಿ ಬೋಧನೆಥಿ ಭರಿನಾಖ್ಯಾ, ಅಸ್ಝೂ ಯೊ ಮನ್‍ಖ್ಯಾನ ಮರಾವ್ತಾಲೀನ್ ಹಮ್ನಾ ಸ್ಝುಮ್ಮೊ ಕರ್ನೂಕರಿ ಸಾ ಕರಿ ಪೂಸ್ಛಾಮ. 29 ಪೇತ್ರನೆ ಬಿ ಬಚ್ಯಾತೆ ಅಪೋಸ್ತಲಾವ್ನೆ – ಮನ್ ಖ್ಯಾವ್ಥೀಬೊ ದೇವ್ನಾ ಸ್ಛಾದಾ ಮಾನಿಲೇನುನೀ. 30 ತುಮೆ ಸ್ಝಾಡ್ನೂ ಕಂಭಾನ ಟಂಘಾವಿನ್ ಮಾರ್ಯಾತೆ ಯೇಸು. 31 ನಾ ಅಪ್ಣೊ ಪಿತಾಂರ್ನೊ ದೇವ್ನೆ ಉಠಾಡ್ಯೊ. ದೇವ್ ಇನಾಸ್ ಇಸ್ರಾಯೇಲ್ ಅದ್ಮೀವ್ನಾ ಮನ್‍ಬದ್ಲಾನುಬಿ ಪಾಪ್ ಪರಿಹಾರ್ನದಯಾ ಕರಾವಳೊ ನಾಯಕ್‍ಕರಿಬಿ ರಕ್ಷಕ್‍ಕರಿ ಇನೊ ಖವಾಹೆತೇಥಿ ಊಂಚಿಸ್ಝಗೋಪರ್ ಸ್ಛಢಾಯೊ. 32 ಯೋ ಕಾಮ್ನಾ ಹಮೇಸ್ ಸಾಬೂತ್; ದೇವ್ ಇನಾ ಮನಾವಳಾನ ದಯಾಕರ್ಯೊತೆ ಪವಿತ್ರಾತ್ಮಬಿ ಸಾಬೂತ್ ಕರಿ ಬೋಲ್ಯಾ. 33 ಸಭೆವಾಳ ಆ ವಾತೆವ್ನಾ ಖ್ಹಂಜೀನ್ ಸ್ಛಂಢಾಳ್‍ಸ್ಛಢಾಯ್ಯಿಲೀನ್ ಇವ್ಣಾ ಮಾರಾಯ್ಯಿನಾಖ್ನೂಕರಿ ಖ್ಹಯಾಲ್‍ಕರ್ಯಾ; 34 ಕತೊ ಅಖ್ಖಾ ಅದ್ಮೀವ್ಥೀ ಇಸ್ಝಾತ್ ಲೀರಾಖ್ಯೋತೆ ನ್ಯಾವ್ನೋ ಮೋಟೊ ಹುಯ್ಯಿರೋತೆ ಗಮಲಿಯೇಲಕರಿ ಏಕ್ ಫರಿಸಾಯನೊ ಮೋಟಿ ಸಭೆಮಾ ಉಠೀ ಉಭಿರೀನ್ ಆ ಅದ್ಮೀವ್ನಾ ಸ್ಝರಾಃಘಡಿ ಬಹಾರ್ ಮೋಕಲ್ನೂಕರಿ ಹುಕುಂದೀನ್ ಸಭೆವಾಳನ. 35 ಇಸ್ರಯಾಏಲ್ ಅದ್ಮೀಯೊ, ತುಮೆ ಆ ಮನ್‍ಖ್ಯಾನಿ ಬಾರೇಮ ಕರ್ನೂಕರಿ9ಸ್ಛಾತೆ ಇನಾ ತುಮೆ ಹೊಷಾರ್ ರಃವೊ. 36 ಅನೇಥಿ ಆಗಳ್ ಥೈದನೆ ಉಢೀನ್ ಮೆ ಷಾಣೂಕರಿ ಬೋಲಿಲಿಧೋ. ಇನಾಭಣಿ ಕಂಷೇಕರಿ ಚಾರ್‍ಖ್ಹೊ ಅದ್ಮಿ ಎಕ್ಟಹುಯಾ ಯೊ ಕತ್ರಾವಿನ್ ಮಾರ್ಯಾಯ್ಯಿಗೊ, ಅಸ್ಝು ಇನಾ ಮಾನ್ಯಹುಯಾಖ್ಹರಾ ಎಕ್ಕಾಸೇಕ್ ಹುಯ್ಯಿಜೀನ್ ಕೊಯ್ಯಿನ್ತೇ ಇಮ್ ಹುಯ್ಯಿಗಾ. 37 ಇನಾಕಡ್ತು ಅದ್ಮಿವ್ನಾ ಗಣ್ತೀನಾ ವೊಖ್ಹತ್ಮಾ ಗಲಿಲಾಯನೊ ಯೂದ ಹುಠೀನ್ ಅದ್ವಿವ್ನಾ ಸ್ಝೋಡ್‍ಕರ್ಲಿನ್ ಉಪ್ಪರ್ ಪಡೀನ್ ಲಡಾಯ್ಯಿಭಿಡಾನಾಕಾಜೆ ಇನಾ ಭಣಿ ಖೇಚ್ಯೊ ಯೋಬಿ ಹಾಳ್‍ಹುಯ್ಯಿಗೂ; ಅಸ್ಝೂ ಇನಾ ಮಾಣ್ಯಾಹುಯಾ ಅಖ್ಖಾ ದಾಣೋದಾಣ್ ಹುಯ್ಯಿಗಯಾ. 38 ಅಮ್‍ರಹೈತೆ ಮೆ ತುಮ್ನಾ ಷಾತ್ಬೋಲೂಸ್ಕತೊ ತುಮೆ ಆ ಮನ್‍ಖ್ಯಾವ್ನಾ ಸ್ಛಂದ್ ನಕೊಸ್ಝಾಷೂ, ಇವ್ಣಾ ಮ್ಹೆಲೋ; ಷೇಕತೊ ಆ ಖ್ಹೂಸ್ಝ್ ನಹೈಕತೊ ಆ ಕಾಂ ಮನ್‍ಖ್ಯಾಂವ್‍ಥೀ ಹುಯ್ಯಿರೂಹೊತ್ತೊ ಯೋಸ್ ಖರಾಬ್‍ಹುಷೆ; 39 ಯೊ ಕಾಂ ದೇವ್ಥೀ ಹುಯ್ಯಿರೂಹುಸ್ತೋ ಇನಾ ಖರಾಬ್‍ಕರ್ವಾನ ತುಮಾರೇಥಿ ಕೋಹುಷೇಣಿ, ತುಮೆ ಏಕ್ ಹಲ್ಲಾ ದೇವ್ನಾಪರ್ ಝಂಗ್‍ಭೀಡಾವಳ ಹುಯ್ಯಿನ್ ನಝ್‍ರಾಯ್ಯಿಸ್ಝಾಷು ಕರಿ ಬೋಲ್ಯೊ. 40 ಇವ್ಣೆ ಇನಿ ವಾತೇನ ಮಾನಿಲೀನ್ ಅಪೋಸ್ತಲಾವ್ನಾ ಬುಲಾಯ್ಯಿನ್ ಮಾರಾಯ್ಯಿನ್ ಯೇಸುನು ನಾಂ ಬೋಲೀನ್ ವಾತೇನಾಕರ್ನೂಕರಿ ಹುಕುಂದೀನ್ ಇವ್ಣಾ ಮ್ಹೆಲಿದಿಧಾ. 41 ಅಪೋಸ್ತಲಖ್ಹರಾ ಇವ್ಣೆ ಯೊ ನಾಮ್ನಾಕಾಜೆ ಶರಮ್ ಕಡಾಯ್ಯಿಲೆವಾನ ಯೊಕ್ತಿವಾಳಕರಿ ಬೋಲಾಯ್ಯಿಲಿಧಾಕರಿ ಖುಚಿಹೋತಾಹುಯ್ಯಿನ್. 42 ಮೋಟಿ ಸಭೆನಾ ಖ್ಹಾಮೇಥಾ ನಿಕ್ಳೀಸಯ್ಯಿನ್ ಹರೋಸ್ಝ್ ಕೆದೇಬಿ ದೇವಳ್ಮಾಬಿ ಘರ್ಮಾಬಿ ಬೋದನೆ ಕರ್ತಾಹುಯ್ಯಿನ್ ಕ್ರಿಸ್ತುಹುಯ್ಯಿರೋತೆ ಯೇಸುನಿ ಬಾರೇಮ ಅಚ್ಛಿಖಬರ್ನಾ ಬೋಲುಕರ್ತಾಥಾ.