1 ಅಪೋಸ್ತಲಖ್ಹರಾ ಅದ್ಮೀವ್ನಾ ಬೋಲಿವೊತಾಳುಕರ್ತಾ ಹುಯ್ಯಿನ ಮರ್ಯಾಹುಯಾ ಜಿವ್ತಾಹುಯ್ಯಿನ ಉಟ್ಷೇಖ್ಹರಾ. 2 ಇಮ್‍ಕರಿ ಯೇಸುನಿ ಉಧಾರಣ್‍ಥಿ ಬೋಲಿವೊತಾಳುಕರಾತೆ ಯಾಜಕಖ್ಹರಾ ಅದ್ಮಿನಿ ಸಜೋಡೆ ವಾತಬೋಲೂಕರ ತೆದೆಸ್ ಆಯ್ಯಿನ. 3 ಇವ್ಣಾ ಧರೀನ್ ತೆದೆ ಖ್ಹಂಸ್ಝ್‍ಹುಯ್ಯಿಸ್ಝಾತಾಲಿ ಕಾಲ್‍ಲಗೂ ಕಾವಲ್ಮಾರಾಖ್ಯಾ. 4 ಕತೊ ಯೊ ವಾಖ್ಯನ ಖ್ಹಂಜ್ಯಾಹುಯಾ ಕೆತ್ರಾಕಿಸ್ಝಣ ಮಾನೀಲಿಧಾ; ಪಖ್ರ್ಹಾವ್ನೀ ಇಷಾಬ್ ಪಾಂಸ್ಛ್‍ಹಾಸ್ಝಾರ್‍ಲಗೂ ಹುಯೂ. 5 ತಿಖ್ರಾದನ್ನೆ ಯೊಹೂದ್ಯರ್ನಾ ಹಕ್‍ದಾರ್‍ಖ್ಹರಾ ಷಾಣಾ ಶಾಸ್ತ್ರೀಖ್ಹರಾ ಯೆರೂಸಲೇಮ್ಮಾ ಎಕ್ಟಾಹುಯ್ಯಿನ್. 6 ಅನ್ನಕರಿ ಮೊಟೊಯಾಜಕ ಕಾಯಫ ಯೋಹಾನ ಅಲೆಕ್ಷಾಂದ್ರ ಅಸ್ಝು ಮೊಟೊಯಾಜಕನ ರಿಸ್ತಾವಾಳಬಿ ಥಾ. 7 ಅವ್ಣೆಖ್ಹರಾ ಪೇತ್ರ ಯೋಹಾನ್‍ನಾ ಅಧಾಕ್ಮಾ ಉಭಿರಾಖಿನ್ – ತುಮೆ ಕೆಲ್‍ಭಣ್ಣಿ ತಾಖತ್‍ಥಿ ಕೊಯ್ನೀಕತೊ ಕೆಲ್‍ಖಣ್ಣಾ ನಾಂಥಿ ಅನಾ ಕರ್ಯಾಕರಿ ಪೂಸ್ಛಾಮಾ. 8 ಪೇತ್ರಜೆ ಪವಿತ್ರಾತ್ಮಥಿ ಭರಾಯ್ಯಿಜೀನ್ ಇವ್ಣಾ –ಅದ್ಮೀವ್ನಾ ಹಕ್‍ದಾರ್ ಷಾಣಾ, 9 ಏಕ್‍ಸ್ಝಣೊ ಲಂಗಡಾನ ಹುಯೂ ಉಪಕಾರ್ನಿಕಾಜೆ ಇನಾ ಕಿನೇಥಿ ಅಶೆಲ್‍ಹುಯೂಕರಿ ಹಮ್ನಾ ಆಸ್ಝ್ ಪೂಛ್ಯಾತೊ. 10 ತುಮ್ನಾಖ್ಹರೂ ಇಸ್ರಾಯೇಲ್ ಅದ್ಮೀವ್ನಾಖ್ಹರೂ ಷಾತ್ ಮಾಲುಂಹೋಣೂಕರಿ – ತುಮೆ ಶಿಲುಭೆನ ಮರಾಯಾತೆ ಅಸ್ಝು ದೇವ್ ಮರ್ಯಾಹುಯಾಮಥು ಉಠಾಡ್ಯೋತೆ ನಜರೇತಿನೊ ಯೇಸುಕ್ರಿಸ್ತುನ ನಾಂಥೀಸ್ ಆ ಮನ್‍ಖ್ಯೂ ತುಮಾರಖ್ಹಾಂಣೆ ಅಶೆಲ್‍ಹುಯ್ಯಿನ್ ಉಭ್ಯೋಸ್. 11 ಘರ್ ಭಂದಾವಳಹುಯ್ಯಿರೀತೆ ತುಮೆ ಟಡ್ಗಾರ್ಯಾತೆ ಬಂಡೊ ಯೋಸ್; ಯೋಸ್ ಹೋಣೂತೆ ಕೋಣಾನೊ ಬಂಡೋ ಹುಯ್ಯಿರೋಃಸ್. 12 ಆವ್ಣೂತೆ ರಕ್ಷಣೆ ಅಸ್ಝುಕಿನ್ಮಾಬಿ ಕೋ ಮಳ್ಷೇನಿ; ಯೊ ನಾಮ್‍ಥೀಸ್ ಪಣ್ಕಿ ಅಬ್ನಾ ಹೇಟ್ ಮನ್‍ಖ್ಯಾವ್ನಾ ದೆವಾಯ್ಯಿರೂಃತೆ ಅಲಾದು ಕೆಹೂ ನಾಮ್‍ಥೀಬಿ ಅಪ್ಣಾ ರಕ್ಷಣೆ ಕೋಹುಷೇನಿ ಕರಿ ಬೋಲ್ಯೋ. 13 ಪೇತ್ರ ಯೋಹಾನ್ ಹಿಮ್ಮಾತ್‍ಥಿ ವಾತೇಬೋಲಾತೆ ಯೊಸಭೆಗವಾಳ ದೇಖಿನ್ ಇವ್ಣೆಖ್ಹರಾ ಪಢ್ಯಾಹುಯಾ ಕಾಹೇಕರಿ ಮಾಲುಂ ಕರ್ಲಿನ್ ಮಸ್ತಾಪ್ ಹುಯಾ. 14 ಇವ್ಣೆಖ್ಹರಾ ಯೇಸುನಿ ಸ್ಝೋರಃಹುಯಾಕರಿ ಖ್ಹಣಾದ್ ಧರ್ಯಾ; ಅಸ್ಝು ಅಶೆಲ್ ಹುಯೂತೆ ಯೊ ಮನ್‍ಖ್ಯೂ ಇವ್ಣಿ ಸ್ಝೋಡೆ ಉಭ್ಯೋತೆ ದೇಖಿನ್ ಇವಾಖ್ಹ್ತೆ ವಾತೆ ನಾ ಕರ್ನೊತೆ ಇಮ್ ಥಾ. 15 ಇನಾಕಢ್ತೂ ಸಭೆಮಾಥ ಢೋಡು ಬಹಾರ್ ಆಯ್ಯಿನ್ ಇವ್ಣಾ ಹುಕುಂದೀನ್ . 16 ಆ ಅದ್ಮೀವ್ನಾ ಅಪ್ಣೆ ಷಾತ್ ಕರಿಂಯೇ? ಘಣೂ ಮೋಟು ಏಕ್ ಅಶೆಲ್ ಕಾಂ ಅವ್ಣಾಭಣ್ತೂ ಸ್ಛಾಲ್ಯೂಕರಿ ಯೆರಸೂಸಲೇಮ್ಮಾ ಜಿವಾವಳ ಅಖ್ಖಾವ್ನಾ ಮಾಲುಂ ಹುಯ್ಯಿರೂಸ್; ಯೊ ಕಾಮ್ ಕೊ ಹುಯೂನುಕರಿ ಬೋಲಾನ ಕೋ ಹುಯ್ಯಿನೊ. 17 ಕತೊ ಆವಾತೆ ಅದ್ಮೀವ್ಮಾ ನಾ ಫೈಲಾವ್ನೂನಾತೆ ಅನಾಪಾರ್ ಯೊ ನಾಂನಾ ಪಾಡೀನ್ ಕಿನಿ ಸ್ಝೋಡೆಬಿ ವಾತೆ ನಾಬೋಲ್ನೂಕರಿ ಇವ್ಣಾ ಡರಾಂಯೆ ಇಮ್‍ಕರೀನ್ ಏಕ್ನಾಯೇಕ್ ಖ್ಹೂಸ್ಝ್‍ಕರ್ಲಿನ್ ಇವ್ಣಾ ಬುಲಾಯ್ಯಿನ್. 18 ಯೊ ಯೇಸುನು ನಾಂ ಪಾಡಿನ್ ವಾತೆನಾಬೋಲ್ನೂ ಬೋದನೆ ನಾಕರ್ನೂ ಕರಿ ಇವ್ಣಾ ಕಡಕ್‍ಥಿ ಹುಕುಂದಿಧಾ. 19 ಇನಾ ಪೇತ್ರ ಯೋಹಾನ್ ಇವ್ಣಾ – ದೇವ್ನೀ ವಾತೇನ ಖ್ಹಂಸ್ಝಾನೂಥೀಬಿ ತುಮಾರಿ ವಾತೇನ ಖ್ಹಂಸ್ಝಾನು ದೇವ್ನಾ ಖ್ಹಾಮ್ಣೆ ಅಶೇಲ್ ನಾ ಕಿಮ್? ತುಮೇಸ್ ನ್ಯಾವ್ ಕರೊ: 20 ಹಮೆ ತೋಬಿ ದೇಖೀನ್ ಖಂಜ್ಯಾತೆ ಇನಾ ನಾ ಬೂಲ್ನೂತೆ ಕೊ ರಃಷೂನಿಕರಿ ಸ್ಝಬಾಬ್ ದಿಧಾ. 21 ಸ್ಛಾಲ್ಯೂತೆ ಕಾಮ್ನಾಕಾಜೆ ಅದ್ಮಿಖ್ಹರೂ ದೇವ್ನಾ ಜೈಕಾರ್ ಹುಯ್ಯಿನ್‍ರಃತಾಲಿ ಇವ್ಣಾಟೇಕೆ ಸಭೆವಾಳ ಅಪೋಸ್ತಲರ್ನಾ ದಂಡ್‍ದೆವಾನ ಖ್ಹೂಸ್ಝ್ ನಾ ಮಳ್ತಾಲಿ ಇವ್ಣಾ ಡರಾಯಿನ್ ಮ್ಹೇಲಿದಿಧಾ. 22 ಆ ಖ್ಹಣಾದ್ನೂ ಕಾಂಥಿ ಅಶೇಲ್‍ಹುಯೋತೆ ಯೊ ಅದ್ಮೀನಾ ಸ್ಛಾಳೀಖ್ಹ್ ವರಖ್ಹ್‍ಥಿ ಸ್ಝಾಖ್ಹತ್ ಉಮರ್ ಹುಯ್ಯಿರೀಥಿ. 23 ಇವ್ಣೆ ಸ್ಛುಟಿ ಹುಯ್ಯಿನ್ ಇವ್ಣಾ ಅದ್ಮೀಕನ ಸ್ಝಯ್ಯಿನ್ ಮೋಟವಾಜಖ್ಹರಾ ಷಾಣಾವ್ನೆ ಇವ್ಣಾ ಬೋಲ್ಯಾತೆ ವಾತೇವ್ನಾ ಬೋಲಿವೋತಾಳ್ಯಾ. 24 ಇವ್ಣೆಖ್ಹರಾ ಖ್ಹಂಜೀನ್ ಏಕ್ ಮನ್‍ಥಿ ದೇವ್ನಾ ಘಟ್ ಅವಾಸ್ಝ್‍ಥಾ ಅಮ್ ಪ್ರಾರ್ಥನೆ ಕರ್ಯಾ – ಮಾಲೀಕ್, ಸ್ಝಮೀಣ್ ಆಬ್ನಾ ದರ್ಯಾವ್ನಾಬಿ ಇನಾಮಸ್ಛಾತೆ ಹರ್ ಚಿಸ್ಝ್‍ನಾ ಉಬ್‍ಸ್ಝಾಯೊತೆ ದೇವ್. 25 ತೂ ಪವಿತ್ರಾತ್ಮಭಣ್ತೋ ತಾರೊ ಸೇವ್ಕ್ ಹುಯ್ಯಿರೋತೆ ಹಮಾರೊ ಪಿತಾಂಬರ್ ಹುಯ್ಯಿರೋತೆ ದಾವೀದನ ಮ್ಹೋಡೆ- ಅವ್ಯಲೋಕ್ ಷಾನಾ ರೇಗ್ಯೂ? ಅದ್ಮಿಖ್ಹರಾ ಕಾಂಕೊಯ್ಯಿನೀತೆ ಕಾಂನಾ ಷಾನ ಖ್ಹಯಾಲ್ ಕರ್ಯಾ? 26 ಪಮೇಶ್ವರ್ನಾಬಿ ಇನೊ ಅಭಿಷೇಕಕರ್ಯಾ ಹುಯಾನಾಬಿ ವೈರಿ ಹುಯಾತೆ ಧರ್ನಿನಾ ರಾಸ್ಝ್‍ಖ್ಹರಾ ಎಕ್ಟಾಹುಯ್ಯಿನ್ ಉಭಿರಃಯಾ, ಹಕ್‍ದಾರ್‍ಖ್ಹರಾ ಎಕ್ಟಾಹುಯಾಕರಿ ಬೋಲಾಯೋನಿ. 27 ಯೊ ವಾತೇನೀ ಲಪಟ್ಮಾಸ್ ಆಖ್ಹಯೇರ್ಮಾ ಹೆರೋದ ಪೋಂತ್ಯ ಪಿಲಾತನೆ ತೂ ಅಭಿಷೇಕ್ ಕರ್ಯೋತೆ ತಾರ ಪವಿತರ್ ಸೇವಕ್ ಹುಯ್ಯಿರೋತೆ ಯೇಸುನಾ ವೈರಿಹುಯೀನ್ ಅನ್ಯ ಲೋಕ್‍ಬಿ ಅಸ್ಝು ಇಸ್ರಯೇಲ್ ಅದ್ಮೀನಾ ಸಝೋಡೆ ಮಳೀನ್. 28 ತಾರೋ ಹಾತ್ ತಾರಿ ಖ್ಹೂಸ್ಝ್ ಅಗಾಡೀಸ್ ಖ್ಹಣಾದ್ ಕಯೊತೆ ಇಮ್ಮಾಸ್ ಸ್ಛಲಾಯಾ. 29 ಪಮೇಶ್ವರ್, ಹಂಕೆ ತೂ ಇವ್ಣೀ ಡರಾವ್ಣಿನಾ ದೇಖಿನ್ ತಾರ ಪವಿತರ್ ಸೇವಕ್ ಹುಯ್ಯಿರೋತೆ ಯೇಸುನೂ ನಾಮ್ ಭಣ್ತೂ ರೋಗ್ ಪರಿಹಾರ್‍ಬಿ ಖ್ಹಣಾದ್ನೂಕಾಂ ಅದ್ಬುತ ಕಾಮ್‍ಖ್ಹರೂ. 30 ಹುವಾನಿಘೋಣಿ ತಾರೋ ಹಾತ್ ಲಾಂಬೋಕರೂಕರಾಸ್‍ತೆ ತಾರೊ ದಾಸಖ್ಹರಾ ತಾರಿ ವಾಕ್ಯನಾ ಹಿಮ್ಮಾತ್‍ಥಿ ಬೋಲಾನಿಘೋಣಿ ಕರ್‍ಕರಿ ಬೋಲ್ಯಾ. 31 ಅಮ್ ಪ್ರಾರ್ಥನೆ ಕರೀನ್ ಇನಾಕಡ್ತೂ ಇವ್ಣೆ ಭರಾಯ್ಯಿರಾಃತೆ ಸ್ಝಗೋಕಾಪಿ, ಇವ್ಣೆಖ್ಹರಾ ಪವಿತ್ರಾತ್ಮ ಭರಾಯ್ಯಿಲೀನ್ ದೇವ್ನೀ ವಾಖ್ಯನಾ ಹಿಮ್ಮಾತ್‍ಥಿ ಬೋಲಾವಳಾ ಹುಯಾ. ಚೇಲಾವ್ಮಾ ಕೆತ್ರಾಕಿಸ್ಝಣಾ ಇವ್ಣಿ ಆಸ್ತಿವ್ನಾ ವೇಚೀನ್ ಪೈಶಾದಿಧಾತೆ. 32 ಮಾಣಿರಾಖ್ಯಾಥಾತೆ ಮಂಡಲಿವಳಾನೊ ದಿಲ್‍ಬಿ ಜಾನ್ ಏಕ್ಕಾಸ್ ಹುಯ್ಯಿರೋಥೊ, ಯೋಕಾಹೇತೆ ಏಕ್ ಸ್ಝಣೋಬಿ ಇನಾ ಥೀತೆ ಆಸ್ತಿಮಾ ಕೆಹೂಬಿ ಆ ಮಾರುಕರಿ ಕೋ ಬೋಲ್ಯಾನಿ. ಅಖ್ಖೂಬಿ ಇವ್ಣಾ ಪೂರ ಥೂ . 33 ಅಸ್ಝೂ ಖ್ಹೊದಾ ಯೇಸು ಜಿವ್ತೋಹುಯ್ಯ ಉಠೀನ್‍ಆಯೋಕರಿ ಅಪೋಸ್ತಲರ್ ಘಣೂ ತಾಖತ್‍ಥೀ ಸಆಖ್ಷಿ ಬೋಲೂಕರ್ತಾಥಾಘಣಿ ದಯಾ ಇವ್ಣಾಪರ್ ಥೂ. 34 ಇವ್ಣಾಮಾ ಕಮ್ ಸ್ಛಾಕರಿ ಬೋಲಾವಳು ಏಕ್‍ಸ್ಜಣೂ ಕೋ ಥೂನಿಷೇಕತೊ ಘರ್ ಸ್ಝಮೀನ್ ರಃಹ್ಯಾಹುಯಾ ಇನಾ ವೇಚೀನ್ ಆ ಯೂತೆ ಪೈಶಾನಾ ಲೀ ಆವೀನ್. 35 ಅಪೋಸ್ತಲರ್ನಾ ಪಗ್‍ಕನ ಮ್ಹೆಲೂಕರ್ತಾಥಾ; ಇನಾ ಹರ್‍ಯೇಕ್ನಾ ಇವ್ಣಾ ಇವ್ಣಾ ಹೋಣೂ ಇಮ್ ಭಾಗ್ ಪಾಡೀನ್ ದೆಂಕರ್ತಾಥಾ. 36 ಆ ಲಪಟ್ಮಾ ಕರ್ಯಾ ಹುಯಾಮಾ ಕುಪ್ರೆವೀಪಮಾ ಪೈಧಾ ಹುಯೋತೆ ಲೇವಿಯ ಹುಯ್ಯಿರೋತೆ ಯೋಸೆಫಕರಿ ಏಕ್‍ಸ್ಝಣೋ. ಇನಾ ಅಪೋಸ್ತಲ್ಖ್ಹರಾ ಬಾರ್ನಾಬ ಕತೊ ಹಿಮ್ಮಾತ್ವಾಳೊ ಕರಿ ನಾಂ ಮಿಸ್ಛಾಳ್ಯಾಥಾ. 37 ಇನೆ ಇನಾ ಥೂತಿ ಸ್ಝಮೀಣ್‍ನಾ ವೇಛೀನ್ ಆಯೂತೆ ಪೈಶಾನಲೀಆಯ್ ಅಪೋಸ್ತಲರ್ನಾ ಪಗ್ನಾಖ್ಹಾಮ್ಣೆ ಮ್ಹೆಲ್ಯೊ.