1 ಯೊ ವೊಖ್ಹತ್ಮಾ ರಾಸ್ಝ್‍ಹುಯ್ಯಿರೋತೆ ಹೆರೋದ ಸಭೆವಾಳ್ಮಾ ಥೊಡ ಸ್ಝಣಾವ್ಮಾ ಖ್ಹತಾವನಕಾಜೆ ಹಾತ್ ಘಾಲೀನ್ . 2 ಯೋಹಾನನೊ ಮೋಟೊ ಭಯ್ಯಿ ಯಾಕೋಬನ ತುರ್ವಾವಾರ್ಥಿ ಕತ್ರಾಯ್ಯಿನ್ ಮರಾಯ್ಯಿನಾಖ್ಯೋ. 3 ಆಯೊ ಯೆಹೂದ್ಯವಾಳನ ಅಶೆಲ್‍ಹುಯ್ಯಿರೂಸ್ಕರಿ ದೇಖಿನ್ ಎತ್ರಾಪರ್ ಉಭಾರ್ನೂತೆ ರೋಟಾನಿ ಪೋಸ್ಝಾ ಸ್ಛಾಲೂಕರ್ತೂ ಥೂ. 4 ಇನಾ ಪಸ್ಕನಿ ಪೋಸ್ಝಾಹುಯ್ಯಿಸ್ಝವಾದೀನ್ ಇನಾ ಕಾವಲ್ನಾ ಚಾರ್ ಚಾರ್ ಫೋಜಿಥಾತೆ ಚಾರ್ ಗುಂಪ್ನಾ ಕಾವಲ್ಮಾಥೊತೆದೆ ಸಭೆವಾಳ ಇನಾವಾಖ್ಹ್‍ತೆ ದೇವ್ನಾ ಘಟ್ ಪ್ರಾರ್ಥನೆ ಕರೂಕರ್ತಾಥಾ. 5 ಪೇತ್ರ ಕೊಠ್ಡಾಮಾ ಕಾವಲ್ಮಾಥೋತೆದೆ ಸಭೆವಾಳ ಇನಾವಾಖ್ಹ್‍ತೆ ದೇವ್ನಾ ಘಟ್ ಪ್ರಾರ್ಥನೆ ಕರೂಕರ್ತಾಥಾ. 6 ಹೆರೋದ ಇನಾ ಅದ್ಮೀವ್ನಾ ಖ್ಹಾಮೆ ಬುಲಾಯ್ಯಿಮಂಗಾವ್ನೂಕರಿಥೊತೆ ದನ್ನಿ ಪಾಸ್ಛ್‍ಲಿ ರಾತೆ ಪೇತರ ಬೆ ಖ್ಹಂಕಳ್ಥೀ ಭಂದಾಯ್ಯಿರಹೈನ್ ಬೇಸ್ಝಣ ಸಿಪಾಯ್ಯಿನಾ ಅಧಾಕ್ಮಾ ನಿಂದರ್ ಲೆವ್‍ಂಕರ್ತೊಥೊ ಕಾವಲ್ವಾಲ ದರ್ವಾಸ್ಝನ ಖ್ಹಾಮ್ಣೆ ಉಭೀರೀನ್ ಕೊಠ್ಡಾನಾ ಕಾಮ್‍ಕರೂ ಕರ್ತಾಥಾ. 7 ಪಟ್‍ಕರಿ ಖ್ಹೊದಾನೊ ಮಾಲಾಕ್ ಪೇತ್ರನಾಖ್ಹಾಮ್ಣೆ ಉಭಿರಃಯೊ ಯೊ ಥೊತೆ ಕೋಣಾಮ ಉಸ್ಝಾಳು ಸ್ಝಮ್‍ಕ್ಯೂ. ಇನೆ ಪೇತ್ರನ ಪಾಕ್ತಿನ ಠೋಕಿನ್ ಉಠಾಡೀನ್ - ಫಟ್‍ಕರಿ ಉಟ್‍ಕಿರಿ ಬೋಲ್ಯೊ. ತೆದೆಸ್ ಇನಾ ಹಾತ್ನಾ ಘಲಾಯ್ಯಿರಃಯೀತೆ ಖ್ಹಂಕಳ್ ನಿಖ್ಳೀಪಡಿಗಯ್ಯಿ. 8 ಯೊ ಮಲಾಕ್ ಇನಾ – ಕಂಬರ್ನಾ ಭಾಂದಿಲೀನ್ ತಾರಿ ಚೇಪ್ಲೇನ ಪೇರಿಲಾ ಕರಿ ಬೋಲಾಮೆ ಯೊ ಇಮ್ಮಾಸ್ ಕರ್ಯೊ. ತಾರ ಉಪ್ಪಾರ್ಲೂ ಕುಡ್ತಾನ ಪೇರಿಲೀನ್ ಮಾರ ಪೀಠೆ ಆವ್‍ಕರಿ ಬೋಲ್ಯೊ. 9 ಯೊ ಬಹಾರ್ ಆವಿನ್ ಯೊ ಮಲಾಕ್ನಾ ಪಿಠೆ ಸ್ಝಾತೊ ಹುಯ್ಯಿನ್ ಮಲಾಕ್ನಾಭಣ್ತೂ ಸ್ಛಾಲ್ಯೂತೆ ಸಂಗತಿ ಖ್ಹಾಚಿಕರಿ ಮಾಲುಂನಾಕರ್ನೂತೆ ಮೆ ದೇಖ್ಹೂಕರೂತೆ ಖ್ಹೊಣ್ಯೂಕರಿ ಖ್ಹಯಾಲ್ ಕರ್ಲಿಧೊ. 10 ಇವ್ಣೆ ಏಕ್ಮಾನಿ ಬೇಮನಿ ಕಿಆವ್ಲಲ್ ಡಾಟಿನ್ ಖ್ಹಂಯೇರ್ನಾ ಸ್ಝವಾನು ಲ್ಹೋಡಾನ ದರ್ವಾಸ್ಝಕನ ಆಯಾತೆದೆ ದರ್ವಾಸ್ಝು ಇನುಯೋಸ್‍ಇವ್ಣಾಕಾಜೆ ನಿಕ್ಳೀಗಯೂ. ಇವ್ಣೆ ಬಹಾರ್ ಆವೀನ್ ಏಕ್ ಗಲ್ಲೀನಾ ಡಾಟ್ಯಾ; ತೆದೆ ಯೊ ಮಲಾಕ್ ಇನಾ ಮ್ಹೇಲಿನ್ ಸ್ಛಲಿಗಯೊ. 11 ತೆದೆ ಪೇತ್ರ ಹೊಷಾರ್‍ಹುಯ್ಯಿನ್ – ಖ್ಹೊದಾನೆ ಇನಾ ಮಾಲಾಕ್ನಾ ಮೊಕ್ಲೀನ್ ಹೆರೋದನ ಹಾತ್ಮಾಥೊಬಿ ಯೆಹೂದ್ಯನು ಅ ದ್ಮೀಕ್ರೂ ಮನಾ ಕರ್ನೂಕರಿ ಥುತೆ ಖರಾಬ್ಮಾಥುಬಿ ಮನಾ ಸ್ಛೋಡಾಯೊಕರಿ ಮನ ಹಂಕೆ ಖ್ಹಚಾಸ್ ಕರಿ ಮಾಲುಂ ಹುಯೂ ಕರಿ ಸ್ಝಾಣಿಲಿದೂ. 12 ಇನಾಕಢ್ತೂ ಯೊ ಖ್ಹೂಸ್ಝ್‍ಕರೀನ್ ಮಾರ್ಕಕರಿ ಬೋಲಾವತೆ ಯೋಹಾನನಿ ಆಯಾ ಹುಯ್ಯಿರೀತೆ ಮರಿಯನ ಘರೆ ಆಯೊ. ಇಸ್ಝ್‍ಗಾ ಕೆತ್ರೂಕಿ ಸ್ಝಣೂ ಮಳೀನ್ ಆವೀನ್ ಪ್ರಾರ್ಥನೆ ಕರೂಕರ್ತಾಥಾ. 13 ಪೇತ್ರ ದರ್ವಾಸ್ಝನ ಖಟ್ಕಾವಮ ರೋದೆಕರಿ ಏಕ್ ಸ್ಛಾಕ್ರಿವಾಳಿ ದೇಖಾನ ಆಯ್ಯಿ. 14 ಇನೆ ಪೇತ್ರನಿ ಅವಾಸ್ಝ್‍ನಾ ಖ್ಹಣಾದ್ ಧರೀನ್ ಘಣಿ ಖುಚಿಹುಯ್ಯಿನ್ - ಪೇತ್ರ ದರ್ವಾಸ್ಝನ ಖ್ಹಾಮ್ಣೆ ಉಭ್ಯೋಸ್‍ಕರಿ ಬೋಲಿ ಇವ್ಣೆ ಇನಾ – ತುನಾ ದಿವಾನು ಧರಿರಾಖ್ಯೂಸ್ ಕರಿ ಬೋಲ್ಯಾ. 15 ಕತೊ ಇನೆ ಮೇ ಬೋಲೂಕರೂ ಖ್ಹಾಚಿ ಹುಯ್ಯಿರೂಸ್‍ಕರಿ ಘಟ್ ಬೋಲ್ತಿರಃವಾಮ ಇನೊ ಮಲಾಕ್ ಹುಯ್ಯಿರಾನುಕರಿ ಬೋಲ್ಯೊ. 16 ಎತ್ರಾಮಸ್ ಪೇತ್ರ ಅಸ್ಝೂ ಖಟ್ಕಾವಂಕರಾ ತೆದೆ . 17 ಇವ್ಣೆ ದರ್ವಾಸ್ಝು ಕಾಡೀನ್ ಇನಾ ದೇಖಿನ್ ಮಸ್ತಾಪ್ ಹುಯಾ ತೆದೆ ಪೇತ್ರನೆ ಞೂಪೊ ರಃವೊಕರಿ ಇವ್ಣಾ ಹಾತ್ನಿ ಇಷಾರೊ ಕರೀನ್ ಇನಾ ಖ್ಹೊದಾನೆ ಬಂದಿಖಾನಮಥೊ ಬಹಾರ್ ಬುಲಾವಿನ್ ಲೀಆಯೋತೆ ಲಪಟ್ ಪಶೆನ್ನಿತರ ಬೋಲಿವೊತಾಳೀನ್ ಯೊ ಖಬರ್ನಾ ಯಾಕೋಬನಬಿ ಭಯ್ಯಿಬಂದ್ನಾ ಅಖ್ಖಾವ್ನಾ ಮಾಲುಂಕರಾವೊಕರಿ ಬೋಲೀನ್ ಅಲಾದಿ ಸ್ಝಗೂ ನಿಕ್ಳೀನ್ ಗಯೊ. 18 ವ್ಹಾಣು ಹುವಾದೀನ್ ಪೇತ್ರನೆ ಷಾತ್‍ಹುಯ್ಯಿಗೂ ಕರಿ ಸಿಪಾಯ್ಯಿಖ್ಹರೂ ಘಣೂ ಘಬ್ರಾವ್ಚೀ ಹಯಯೂ. 19 ಹೆರೋದನೆ ಇನಾ ಢೂಂಡಾವಿನ್ ಯೊ ನಾ ಮಳ್ತಾಲೀನ್ ಕಾವಾಲ್‍ವಾಳನ ಪೂಛೀನ್ ಇವ್ಣಾ ಮರಣ್ಣೀ ದಂಡ್ ದಿಧೋ. ಇನಾಕಡ್ಥೂ ಯೂದಾಯಥೊ ಕೈಸರಯನ ಸ್ಝಯ್ಯಿನಿ ಇಸ್ಝ್‍ಗಾ ಥೋಡ ದನ್ ರಃಯೊ. 20 ತೂರ್ ಸೀದೋನ್ ಖ್ಹಯರ್‍ವಾಳ ಇವ್ಣಾ ಪರ್ ಹೆರೋದ ಘಣೂ ಸಢಾಕರೀರಾಖ್ಯೋತೆ ದೇಖಿನ್ ಏಕ್ ಮನ್‍ಥಿ ಇನಾಕನ ಆವೀನ್ ರಾಸ್ಝ್‍ನು ಘರ್ನೊ ಹಕ್‍ದಾರ್ ಹುಯ್ಯಿರೋತೆ ಬ್ಲಾಸ್ತಾನ ಫೂಕ್ಲಾವಿನ್ ಕನ್ಹೆಕರ್ಲಿನ್ ಸಮಾಧಾನ್ ಃಓಣೂಕರಿ ರಾಸ್ಝ್‍ನಾ ಗಿಂಗಾವಿನ್ ಬೋಲ್ಯಾ. ಷೇಕತೊ ರಾಸ್ಝ್‍ನಾ ತಬರ್ಕಾಮಥೂಸ್ ಇವ್ಣಾ ಮುಲಕ್ನಾ ಅನಾಸ್ಝ್ ಆವ್‍ಂಕರ್ತೂ ಥೂ. 21 ಮಾಲುಂ ಕರ್ಯಾಯೊತೆ ಏಕ್‍ದನ್ನೆ ಹೆರೋದನೆ ರಾಸ್ಝ್‍ನೊ ಪೇರ್ವಾಖ್ಹೊ ಪೇರೀಲೀನ್ ರಾಸ್ಝ್‍ನಿ ಸಿಂಹಾಸನ್‍ಪರ್ ಬೇಷೀನ್ ಇವ್ಣಾ ಬೋದನೆ ಕರ್ಯೊ. 22 ಭರಾಯ್ಯಿರೂತೆ ಅದ್ಮೀಖ್ಹರೂ – ಆ ಮನ್‍ಖ್ಯಾನಿ ಬೋಲಿಕಾಹೇ, ದೇವ್ನೀ ಬೋಲಿಕರಿ ಚಿಕ್ರಾಣ್ ಮ್ಹೇಲ್ಯಾ. 23 ಯೊ ಇಸ್ಝ್‍ತ್ ಇನೆ ದೇವ್ನಾ ನಾದೇತಾಲೀನ್ ಖ್ಹೋದಾನೊ ಮಲಾಕ್ ಯೋಸ್ ವೊಖ್ಹ್‍ತ್ ಇನಾ ಮಾರ್ಯೋ; ಹೆರೋದ ಕೀಡಾಪಡೀನ್ ಮರಿಗೋ. 24 ತೆದೆ ದೇವ್ನೀ ವಾಖ್ಯ ಫೈಲಾವ್ತೀಹುಯ್ಯಿನ್ ಸ್ಝಾಖ್ಹತ್‍ಹೋತಿ ಆಯ್ಯಿ. 25 ಬಾರ್ನಬ ಸೌಲ ಕರ್ನೂಥುತೆ ಧರಮ್ನಾ ಕಾಂ ಕರ್ದಿನ್ ಮಾರ್ಕಕರಿ ಬೋಲಾವತೆ ಯೋಹಾನ್‍ನ ಬುಲಾವಿಲೀನ್ ಯೆರೂಸಲೇಮ್‍ಥೋ. ಇವ್ಣೆ ಪಾಸ್ಛಾಫರೀನ್ ಆಯಾ.