1 ಪಛಲನೆ ಇಸ್ರಾಯೇಲ್ ಅದ್ಮೀನ ಬೋದಕರ್ಯೊತೆ ಅಂತಿಯೋಕ್ಯನಿ ಸಭೇಮಾ ಥೋಡಸ್ಝಣಾ ಪ್ರವಾದಿಬಿ ಬೋದಕರ್ ಥಾ; ಕೋಣ್ ಕೋಣ್ಕತೊ - ಬಾರ್ನಬ, ನೀಗಕರಿ ಬೋಲಾವತೆ ಸಿಮೆಯೋನ, ಕುರೇನ್ಯನೊಲೂಕ್ಯ, ಉಪರಾಸ್ಝ್ ಹೆರೋದನಿ ಸೋಡೆ ರಹೈತೆ ಇನೊ ನಹನೊ ಭಯ್ಯಿ ಮೆನಹೇನ, ಸೌಲ ಅವ್ಣೇಸ್. 2 ಅವ್ಣೆಖ್ಹರಾ ಖ್ಹೊದಾನಿ ಸೇವೆಕರ್ತಾಹುಯ್ಯಿನ್ ಉಪವಾಸ್ ಕರೂಕರ್ತಾಥಾ ತೆದೆ ಪವಿತ್ರಾತ್ಮನೆ - ಬಾರ್ನಬಿ ಸೌಲನ ಬುಲಾಯೋತೆ ಕಾಮ್ನಾ ಇವ್ಣಾ ಅಲಾದು ಕರೊ ಕರಿ ಬೋಲ್ಯೊ. 3 ತೆದೆ ಇವ್ಣೆ ಉಪವಾಸ್ ರಹೈನ್ ಪ್ರಾರ್ಥನೆ ಕರೀನ್ ಯೊ ಬೆಹೇಸ್ಝಣನಪ್ಪರ್ ಹಾತ್ ಮ್ಹೆಲಿ ಪ್ರಾರ್ಥನೆ ಕರೀನ್ ಇವ್ಣಾ ಮೋಕ್ಲಿದಿಧಾ. 4 ಅಮ್ ಇವ್ಣೆ ಪವಿತ್ರಾತ್ಮಥಿ ಮೊಕ್ಲಾಯ್ಯಿ ಹುಯಾಹುಯ್ಯಿನ್ ಸೆಲ್ಯೂಕ್ಯನ ಆಯಾ ಇಸ್ಝ್‍ಗಾಥ ದರ್ಯಾವ್ನೀ ಪ್ರಯಾಣ್‍ಕರೀನ್ ಕುಪ್ರದ್ವಿಪನ ಗಯಾ. 5 ಸಲಮೀಸನ ಗಯಾತೆದೆ ಯೆಹೂದ್ಯವ್ನೀ ಸಭಾಮಂದಿರ್ಮಾ ದೇವ್ನೀ ವಾಖ್ಯನ ಬೋಲಿವೊತಾಳ್ಯ. ಯೆಹೂದ್ಯವ್ನೀ ಸಭಾಮಂದಿರ್ಮಾ ದೇವ್ನೀ ವಾಖ್ಯನ ಬೋಲಿವೊತಾಳ್ಯ. ಯೋಹಾನನೆ ಸಾತ್ ದೆವಾಳೊ ಹುಯ್ಯಿನ್ . 6 ಇವ್ಣೆ ದ್ವೀಪಮಾಖ್ಹರೂ ಫರ್ತಾಹುಯ್ಯಿನ್ ಪಾಫೋಸ್ ಕರಿ ಕಾಮ್‍ಲಗೂ ಆಯಿನ್ ಇಸ್ಝ್‍ಗಾ ಸ್ಝೋಟಿ ಪ್ರವಾದಿಬಿ ಮಂತ್ರವಾದಿ ಹುಯ್ಯಿರೋತೆ ಬಾರ್‍ಯೇಸುಕರಿ ಏಕ್ ಸ್ಝಣೊ ಯೆಹೂದ್ಯ ಅದ್ಮೀನಾ ದೇಖ್ಯಾ. 7 ಯೊ ಅಕ್ಲೀಹುಯ್ಯಿರೋಥೋತೆ ಸೆಗ್ರ್ಯ ಪೌಲಕರಿ ಹಕ್‍ದಾರ್‍ಕನ ಥೊ. ಯೊ ಹಕ್‍ದಾರ್ ಬಾರ್ನಬಿ ಸೌಲನ ಇನಾಕನ ಬುಲಾಯ್ಯಿಮಂಗಾವಿನ್ ದೇವ್ನೀವಾಖ್ಯನಾ ಖ್ಹಂಸ್ಝಾನ ಆಖ್ಹ್ ಸ್ಛಾಕರಿ ಬೋಲ್ಯೊ. 8 ಕತೊ ಏಕ್ ಸ್ಝಣ್‍ಖ್ಯೊ ಹುಯ್ಯಿರೋತೆ ಎಲುಮ ಇವ್ಣಾ ಆಡೂ ಹುಯ್ಯಿನ್ ಹಕ್‍ವಾರ್ನಾ ಕ್ರಿಸ್ತುನ ಮಾನ್ನೂ ನಾತೆ ಕೋಷಿಷ್‍ಕರ್ಯೊ ಎಲುಮ ಕರಿ ನಾಮ್ನೀ ಮತ್ಲಾಬ್ ಸ್ಝಾಣ್‍ಖ್ಯೋಕರಿ . 9 ತೆದೆ ಪೌಲಕರಿ ಬೋಲಾವತೆ ಪೌಲನೆ ಪವಿತ್ರಾತ್ಮಥಿ ಇನಾ ನಸ್ಝ್‍ರ್‍ಥಿ ದೇಖಿನ್. 10 ಹೇ, ಅಖ್ಖು ಠಗಾವಮಾಬಿ ಅಖ್ಖೂ ಖರಾಬ್ಮಾ ಭರಾಯ್ಯಿರೋತೆ ಸೈತಾನ್‍ನಾ ಛಿಯ್ಯಾ, ಅಕ್ಖೀ ನಿಯತ್ನಾ ವೈರ್ಯಾಃ, ತೂ ಖ್ಹೊದಾನೊ ಖ್ಹಡಕ್ ಮಾರಗ್ನಾ ಬಿಂಗೂಕರಾನು ಮ್ಹೆಲಾಕೊಯ್ನೀನಾ? 11 ಹಂದೇಕ್, ಖ್ಹೊದಾ ದಾದಜೀ ತಾರಪರ್ ಹಾತ್‍ಪಡಿರಾಖ್ಯೋಸ್; ತೂ ಆದೇಖ್ಹ್‍ನ ಥೋಡದನ್ ಸೂರ್ಯನ ದೇಖ್ನೂನಾತೆ ರಹೈಷ್ ಕರಿ ಬೋಲ್ಯೊ. ಯೋಸ್‍ಘಡಿಮಾ ಇನಾ ಡೋಳ ಭುಂಬ್‍ಳ್ಯಾ ಹುಯ್ಯಿನ್ ಅಂದಾರ ಹುಯ್ಯಿಗಾ; ಯೊ ಹಾತ್‍ಧರಾವಾಳನ ಢೂಂಡ್ತೋಹುಯ್ಯಿನ್ ಫರ್ಯೊ. 12 ಯೊ ಹಕ್‍ದಾರ್ ಯೊ ಸಂಗತಿನಾ ದೇಖಿನ್ ಖ್ಹೊದಾನಿ ಬೋದನೆನಾ ಘಣು ಮಸ್ತಾಪ್ ಹುಯ್ಯಿನ್ ಮಾನ ವಾಳೊ ಹುಯೊ ಪೌಲ ಇಸ್ರಾಯೇಲ್ ಅದ್ಮೀವ್ನಾ ಬೋದನೆ ಕರ್ಯೋತೆ. 13 ಇನಾಕಢ್ತೂ ಪೌಲಬಿ ಇನಿ ಸ್ಝೋಡ್ಮಾರಃವಾಳ ಪಾಫೋಸೂರನ ಮ್ಹೆಲಿನ್ ದರ್ಯಾನಿ ಪ್ರಯಾಣ ಕರ್ತಾಹುಯ್ಯಿನ್ ಪಂಫುಲ್ಯ ದೇಖ್ಹ್‍ನಾ ಮಳಿರೋತೆ ಪೆರ್ಗೆನ ಆಯಾ; ಯೋಹಾನ ಇವ್ಣಾ ಮ್ಹೇಲಿನ್ ಪಾಸ್ಛೋಫರೀನ್ ಯೆರೂಸಲೇಮ್ನಾ ಗಯೊ. 14 ಇನಾಕಢ್ತೂ ಇವ್ಣೆ ಪರ್ಗೆಥೂ ನಿಕ್ಳೀನ್ ಪಿಸಿದ್ಯ ದೇಖ್ಹ್‍ನಾ ಮಳಿರಹ್ಯೂತೆ ಅಂತಯೋಕ್ಯನ ಆಯಾ. ಸಬ್ಬತ್ ದನ್ಮಾ ಇವ್ಣೆ ಸಭಾ ಮಂದೀರ್ನಾ ಸ್ಝಯ್ಯಿನ್ ಬೆಠಾ. 15 ಧರ್ಮಶಾಸ್ತ್ರಬಿ ಪ್ರವಾದವ್ನೀ ಗ್ರಂಥ್ ಪಢಿನ್ ಹುಯ್ಯಿಸ್ಝವಾದಿ ದೇವಳ್ನಾ ಷಾಣಾ- ಭಂಯೋ, ಅದ್ಮೀವ್ನಾ ಬೋಲಾನಿ ಕ್ಕಾಲ್ನೀ ವಾತೆ ಹುಸತೋ ಬೋಲೊ ಕರಿ ಇವ್ಣಾ ಬೋಲಿಮೋಕ್ಲ್ಯೊ. 16 ತೆದೆ ಪೌಲ ಉಠಿನ್ ಹಾತ್ನೋ ಇಷಾರೊ ಕರೀನ್ ಷಾತ್ಬೋಲ್ಯೊಕತೊ . 17 ಇಸ್ರಾಯೇಲ್ ಅದ್ಮಿ, ಅಸ್ಝೂ ಯೆಹೂದ್ಯನಿ ಸ್ಝಾತ್‍ವಾಳ, ಖ್ಹಂಸ್ಝೋ. ಅಪ್ಣೊ ಇಸ್ರಾಯೇಲ್ನೂ ದೇವ್ ಅಪ್ಣಾ ಪಿತಾಂಬರ್ನಾ ಸ್ಛೂಣೀಲೀನ್ ಅಪ್ಣಾ ಅದ್ಮೀಕ್ಹರಾ ಊಗುಪ್ತ ದೇಖ್ಹ್‍ಮಾ ಪರ್‍ದೇಶಿ ಹುಯ್ಯಿರಾ ತೆದೆ ಇವ್ಣಾ ಬಢಾವಿನ್ ಇನಿ ತಾಖತ್‍ಥಿ ಯೊ ದೇಖ್ಹ್‍ಮಾಥೊ ಭಾರ್ ಕಾಡ್ಯೊ. 18 ಯೊ ಕಂಷೇಕಂ ಸ್ಛಾಳೀಖ್ಹ್‍ವೊರಖ್ಹ್‍ಲಗೂ ಸ್ಝಾಡೀಮಾ ಇವ್ಣಿ ಸ್ಛಾಲ್ ಸ್ಛಲಾಣ್ಣಾ ಖ್ಹಮಾಳಿಲೀನ್ . 19 ಕಾನಾನ್ ದೇಖ್ಹ್‍ಮಾ ಅನ್ಯಲೋಕ್ನೊ ಖ್ಹಾತ್ ದೇಖ್ಹ್‍ನಾ ಅಳ್ಮಾಪ್‍ಕರೀನ್ ಯೊ ಅದ್ಮವ್ನೊ ದೇಖ್ಹ್‍ನಾ ಇವ್ಣಾ ಸ್ಝೂಮ್ಮೊಥಿ ಭಾಗ್‍ಪಾಡೀನ್ ದಿಧೋ. 20 ಎತ್ರಾಮಸ್ ಕಂಷೇಕಂ ಡೋಡ್‍ಖ್ಹೋ ವರಖ್ಹ್ ಖತಂಹುಯ್ಯಗಾ. ಇನಾಕಢ್ತೂ ಪ್ರವಾದಿ ಹುಯ್ಯಿರೋತೆ ಸಮುವೇಲನ್ನಾ ಹಗಾಂಲಗೂ ನೇಯ್ಯಾವ್ನಾ ದಿಧೊ. 21 ಇನಾಕಢ್ತೂ ಇವ್ಣೆ ಹಮ್ನಾ ರಾಸ್ಝ್ ಹೋಣುಕರಿ ಬೋಲಿಲೆವಾಮ ದೇವ್ ಇವ್ಣಾ ಬೆನ್ಯಾಮೀನ್ನೊ ಸ್ಝಾತ್ವಾಳೊ ಕೀಷನೊ ಛಿಯ್ಯೋಸೌಲನದಿಧೊ. ಇನೆ ಸ್ಛಾಳಿಖ್ಹ್ ವರಖ್ಹ್ ದೇಖ್ಹ್ ಸ್ಛಲಾಯೊ . 22 ಇನಾಪರ್ ದೇವ್ ಇನಾ ಕಾಡಿನಾಖಿನ ದಾವೀದನ ಇವ್ಣಾಪರ್ ರಾಸ್ಝ್‍ಕರಿ ಮನಾ ಪಸಂದ್ ಹುವಾತೆ ಮನ್‍ಖ್ಯೂ, ಯೊ ಮಾರಿ ಇಚ್ಛೆನಾ ಪೂರ ಕರಾವಳೊ ಕರಿ ಇನಿ ಖಬರ್ಮಾ ಸಾಬೂತ್ ಬೋಲ್ಯೊ. 23 ಇನಿ ಖಾನ್ದಾನ್‍ಥೀ ದೇವ್ ಇನಿ ವಾಗ್ದಾನ್ ಲಪಟ್ ಇಸ್ರಾಯೇಲ್ಯನಾ ಏಕ್ ರಕ್ಷಕ್ ಪೈಧಾಕರಿರಾಖ್ಯೋಸ್. 24 ಯೊ ರಕ್ಷಕರ ಯೇಸು, ಇನೂ ಆವನ ಪೈಲ್ಹೆ ಯೋಹಾನ ಇಸ್ರಾಯೇಲ್ ಅದ್ಮೀವ್ನಾ – ತುಮೆ ದೇವ್‍ಭಣಿ ಫರೀಜೀನ್ ನ್ಹೊಯ್ಯಿಲೇನುಕರಿ ಬೋಲಿವೊತಾಳ್ಯೊ. 25 ಯೋಹಾನನೆ ಇನಿ ಸೇವೆನ ಪೂರಕರೂಕರತೆ ಅದ್ಮೀವ್ನಾ – ಮನಾ ಕೋಣ್‍ಕರಿ ಖ್ಹೂಸ್ಝ್‍ಕರಾಸ್? ಮೆ ಯೋಕಾಹೆ, ಕತೊ ಮಾರ ಪೀಠೆ ಏಕ್‍ಸ್ಝಣೊ ಆವ್ಷೇ, ಇನಾ ಗೋಡಾನಿ ಚೇಪ್ಲೇನಾ ಸ್ಛೋಡಾನ ಮೇ ಲಾಯೇಕ್ ಕಾಹೆಕರಿ ಬೊಲ್ಯೊ. 26 ಭಯ್ಯಿ ಬಂದೊ, ಅಬ್ರಹಾಮ್ನಿ ಖಾನ್ದಾನ್‍ವಾಳ, ಅಸ್ಝು ತುಮಾರಮ ಸ್ಛಾತೆ ಯೆಹೂದ್ಯನಿ ಸ್ಝಾತ್ನಾ ಫೀಛೆಕರಾವಳ, ಅಪೊಣಾ ಆ ರಕ್ಷಣೆನಿ ವಾಕ್ಯ. 27 ಯೆರೂಸಲೇಮ್ಮಾ ಜಿವ್‍ಂಕರಾತೆಖ್ಹರಾ ಇವ್ಣಾ ಹಕ್‍ದಾರ್ ಇನಾರಹೈಸ್ಝವೊ ಹರ್ ಸಬ್ಬತ್ ದನ್ಮಾ ಪಢಾವತೆ ಪ್ರವಾದಿವ್ನೀ ವಾಖ್ಯನರಹೈಸ್ಝವೊ ಮಾಲುಂ ಕೊಕರಾನಿತೆ ಇನಾ ಅಪರಾಧಿಕರಿ ನ್ಯಾವ್‍ಕರೀನ್ ಯೊ ವಾಕ್ಯವ್ನಾ ಪೂರಕರ್ಯೊ. 28 ಮರಣ್ಣಿ ದಂಡ್ನಾ ಕಾರಣ್‍ಷಾತ್ ತುಮ್ನಾ ನಾ ಮಳ್ಯೂತೋಬಿ ಇನಾ ಮರಾಯ್ಯಿನಾಕ್ನೂಕರಿ ಪಿಲಾತನ ಬೋಲೀಲಿಧಾ. 29 ಇನಿ ಖಬರ್ಮಾ ಗ್ರಾಂಥ್‍ಮಾ ಲಿಖ್ಖಾಯ್ಯಿರಃಯೂತೆ ಇನಾಖ್ಹರೂ ಪೂರ ಕರೀನಾಖೀನ್ ಇನಾ ಸ್ಝಾಡಾನು ಲಕ್ಡಾನು ಕಂಬಥೂ ಉತಾರೀನ್ ಘೊರ್ಯಾಢಾನ ಮಹೈ ಮ್ಹೇಲ್ಯಾ. 30 ಕತೊ ದೇವ್ನೇ ಇನಾ ಮರ್ಯಾಹುಯಾಮಥೊ ಉಠಾಡ್ಯೊ. 31 ಅಸ್ಝೂ ಯೊ ಗಲಿಒಲಾಯಥೊ ಯೆರೂಸಲೇಮ್ನಾ ಇನಿ ಸ್ಝೋಡೆ ಆವಾಳವ್ನಾ ಕೆತ್ರಾ ದನ್‍ಲಗೂಬಿ, ನಸ್ಝ್‍ರಾಯೊ, ಇವ್ಣೆ ಹಂಕೆ ಅದ್ಮೀವ್ನಾ ಖ್ಹಾಮ್ಣೆ ಇನಿ ಸಾಬೂತ್ ಹುಯ್ಯಿರಾಸ್. 32 ದೇವ್ ಅಪ್ಣಾ ನಾನಾದಾದಾವ್ನಾ ಕರ್ಯೊತೆ ವಾಗದಾನ್‍ನಾ ಪಣಾ ಲಡ್ಕಾವ್ನಾಕಾಜೆ ಪೂರಕರಿರಾಖ್ಯೋಸ್ಕರಿ ಅಚ್ಛಖಬರ್ನಾ ಹಮೆ ತುಮ್ನಾ ಬೋಲಿವೊತಾಳವಳ ಹುಯ್ಯರಾಃಸ್. 33 ಇನೆ ಯೇಸುನ ಉಠಾಡ್ಯೋತೆಮಾ – ಮನಾ ತೂ ಛಿಯ್ಯೊ, ಮೇಸ್ ಆಸ್ಝ್ ತುನಾ ಪೈಧಾಕರ್ಯೋಕರಿ ಬೇಮನಿ ಸಂಗೀತ್ಮಾ ಲಿಖ್ಖಾಯ್ಯಿರೂತೆ ವಾತೆ ಪೂರ ಹುಯ್ಯಿ. 34 ಯೊ ಕಾಹೇತೆ ದೇವ್ ಯೇಸುನ ಮರ್ಯಾಹುಯಾಮಥೊ ಉಠಾಡ್ತಾಲಿ ಯೊ ಅಸ್ಝೂ ಕೆದೇಬಿ ಖ್ಹಡಾನಿ ಹಾಲ್‍ಮಾ ಕೊ ಮಳ್ಷೇನಿಕರಿ ಖಬರ್ಮಾ ದೇವ್ ಷಾತ್ಬೊಲಸ್ಕತೊ – ದಾವೀದನ ಖ್ಹಚಾಸ್ಕರಿ ವಾಗ್ದಾನ್ ಕರ್ಯೊತೆ ಖ್ಹರ್ನಾಣಿ ದಾನ್ನಾ ತುಮ್ನಾ ದೆವಂಕರೂಸ್, ಯೊಖ್ಹರೂ ಭರಾಖ್ಹೊನಿ ಹುಯ್ಯಿರೀಸ್ ಇಮ್ ಕರಿ. 35 ಇನಿಲಪಟ್ ಯೊ ತೂ ತಾರ ಲಡ್‍ವಾಳನ ಖ್ಹಡಾನಿಲಪಟ್ ನಾ ಕೊದೇಖಾದೀಷ್ನೀಕರಿ ಅಲಾದಿ ಸಂಗೀತ್ಮಾ ಬೋಲಿರಾಖ್ಯೋಸ್, 36 ದಾವೀದತೋಬಿ ಇನಾ ಅದ್ಮೀವ್ನಾ ಸೇವೆಕರಿಹುಯ್ಯಿಸ್ಝವಾದೀನ್ ದೇವ್ನೀ ಮರ್ಜಿನಿತರ ಮರಿಜೀನ್ ಇನಾ ನಾನ ದಾದವ್ಕನಾ ಘಲಾಯ್ಯಿಜೀನ್ ಖ್ಹಡಿಗಯೊ. 37 ಕತೊ ದೇವ್ನೆ ಉಠಾಡ್ಯೋಹುಯೊ ಖ್ಹಡೀಸ್ಝವಾನು ಕೋದೇಖ್ಯೋನಿ . 38 ಇನಾವಾಖ್ಹ್‍ತೆ ಭಂಯೆ, ಇನಾಸ್ ಭಣ್ತೂ ಪಾಪ್‍ಫಿಟ್ಟಾಡಿ ಹುಷೆಕರಿ ತುಮ್ನಾ ಬೋಲಾವಂಕರಾಸ್‍ಕರಿ ತುಮ್ನಾ ಮಾಲುಂರಃವಾದೆವೊ. 39 ಮೋಶೆನಿ ಧರ್ಮಗ್ರಂಥ್ ಭಣ್ತೂ ತುಮೆ ಸ್ಛೂಟ್ಟಿಕೋಲೆಯ್ಯಿನೀತೆ ಅಖ್ಖಾ ಪಾಪ್ಮಾಥು ಮಾನವಾಳ ಅಖ್ಕಾಸ್ಝಣಾ ಇನಾಭಣ್ತೂಸ್ ಸ್ಛೂಟ್ಟಿಲೀನ್ ನಿಯ್ಯಾತ್ವಾಳಕರಿ ಬೋಲಾವ್ಷೇ. 40 ಅಮ್‍ರಹೈನ್ ಪ್ರವಾದಿವ್ನೀ ಗ್ರಂಥ್‍ಮಾ ಬೋಳಾರಹ್ಯೂತೆ ತುಮ್ನಾ ನಾ ಸ್ಛಾಲ್ನೂತೆ ಇಮ್ ದೇಖಿಲೆವೊ ಯೊ ಷಾತ್ಕಾತೊ. 41 ಹೇ ಮಸ್ಕೇರಿ ಕರಾವಾಳ, ಮಸ್ತಾಪ್‍ನಕೊಹುವೊ, ನಾಶಹುಯ್ಯಿಸ್ಝವೊ ತುಂಆರ ಹಗಾಮ್ಮಾ ಮೆ ಏಕ್ ಕಾಮ್ ಕರೂಸ್, ಯೊ ಕಾಮ್ನಾ ಏಕ್‍ಸ್ಝಣೂ ತುಮಾ ಬೋಲಿವೊತಾಳ್ಯೊತೋಬಿ ತುಮೆ ಇನಾ ಕೆತ್ರೇಬಿ ಮಾನ್ಷೂ ಕೊಯ್ಯಿನಿ ಕರಿ ಬೋಲ್ಯೊ. 42 ಪೌಲ ಬಾರ್ನಬನೆ ದೇವಳ್ನಾ ಮ್ಹೆಲಿವೊಳಾಸ್ಝಾಯ್ಯಿತೆದೆ ಅದ್ಮೀಕ್ಹರಾ ಆ ವಾತೇವ್ನಾ ಆವ್ಷೇತೆ ಸಬ್ಭತ್ ದನ್ಮಾಬಿ ಹಮ್ನಾ ಬೋಲಿವೊತಾಳ್‍ಕರಿ ಬೋಲಿಲ್ಧಾ. 43 ಸಭೆ ಖತಂ ಹುಯ್ಯಿಸ್ಝವಾದೀನ್ ಯೆಹೂದರ್ಮಾಬಿ ದೇವ್ನೀ ಭಕ್ತಿದಾರ್‍ಖ್ಹರಾ ಯೆಹೂ*ದ್ಯನಿ ವಾತ್‍ಖ್ಹಂಸ್ಝಾವಾಳಾವ್ಮಾಬಿ ಕೆತ್ರಾಕಿ ಸ್ಝಣಾ ಪೌಲ ಬಾರ್ನನವ್ನಾ ಪಿಛೇಗಯಾ. ಅವ್ಣೆ ಇವ್ಣಿಸ್ಝೋಡೆ ವಾತೆಬೋಲಿನ್ ದೇವ್ನೀ ಖ್ಹರ್ನಾಮ ಉಭಾರಾಃನುಕರಿ ಇವ್ಣಾ ಅಕ್ಕಾಲ್ ಬೋಲ್ಯಾ. 44 ಅಗ್ಲೀ ಸಬ್ಬತ್ ದನ್ಮಾ ಝೂಂಡ್ ಝೂಂಡ್‍ಖ್ಹೂ ವುಳ್ಯಾವತೆ ದೇಖಿನ್ ಯೆಹೂದಯರ್‍ಖ್ಹರೂ ಘಣೂ ಪೇಟ್‍ಬಾಳಿಲೀನ್ ಪೌಲ ಬೋಲಾತೆ ವಾತೇವ್ನಾ ಆಡೂ ವಾತೆಕರ್ತಾಹುಯ್ಯಿನ್ ಬಳಾಪೊ ಕರೂಕರ್ತಾಥಾ. 45 ಕತೊ ಅದ್ಮೀಖ್ಹರೂ ಝೂಂಡ್‍ಖ್ಹೂ ವುಳ್ಯಾವತೆ3 ದೇಖಿನ್ ಯೆಹೂದ್ಯರ್‍ಖ್ಹರೂ ಘಣೂ ಪೇಟ್‍ಬಾಳಿಲೀನ್ ಪೌಲ ಬೋಲಾತೆ ವಾತೇವ್ನಾ ಆಡೂ ವಾತಕರ್ತಾಹುಯ್ಯಿನ್ ಬಳಾಪೊ ಕರೂಕರ್ತಾಥಾ. 46 ತೆದೆ ಪೌಲಬಿ ಬಾರ್ನಭ ಹಿಮ್ಮಾತ್‍ಥೀ ವಾತೆ ಬೋಲಿನ್ , ಹಮೆ ದೇವ್ನೀ ವಾತೇನಿ ಖಬರ್ನಾ ಯೆಹೂದ್ಯರ್‍ಹುಯ್ಯಿರಾತೆ ತುಮ್ನಾ ಪೈಲ್ಹೆ ಬೋಲಾನು ಥೂ, ಕತೊ ತುಮೆ ತುಮ್ನಾ ಜೀವ್ಜಾನ್‍ವಾಳ ಕಾಹೇಕರಿ ಮನ್‍ಕರ್ಲೆವ್‍ಂಕರಾಸ್ ದೇಖೊ, ಹಮೆ ತುಮ್ನಾ ಮ್ಹೆಲಿದೀನ್ ಅನ್ಯಲೋಕ್ ಭಣಿ ಸ್ಝಂಯೇಸ್. 47 ಇಮ್ಮಾಸ್ ಖ್ಹೊದಾ ದಾದಜೀನೆ ಹಮ್ನಾ ಹುಕುಂದೀರಾಖ್ಯೋಸ್; ಕಿಮ್ ಕತೊ – ತೂ ಜಗತ್ನಾ ಕಡಲಾಗು ರಕ್ಷಕ್‍ಹಯ್ಯರಃವಾನಕಾಜೆ ತುನಾ ಅನ್ಯಲೋಕ್‍ನಾವ್ಬಿ ಇಸ್ಝಾಳುಕರೀನ್ ಮಿಸ್ಛಾಳ್ಯೊಸ್ ಕರಿ ದೇವ್ನೆ ಬೋಲಿರಾಖೈಓಸ್ ಕರಿ ಬೋಲ್ಯೊ. 48 ಇಸ್ಝ್‍ಗಾಥಾತೆ ಅನ್ಯಲೋಕ್ ಯೊ ವಾತೇವ್ನಾ ಖ್ಹಂಜೀನ್ ಖ್ಹುಚಿಪಡೀನ್ ದೇವ್ನೀ ವಾಖ್ಯನ ಕ್ಹರಾಯ; ಅಸ್ಜೂ ಜೀವ್ಜಾನ್ನಾ ಖಣಾದ್ ಹುಯ್ಯಿರಾತೆಖ್ಹರಾ ಮಾನಿಲಿಧಾ. 49 ಖ್ಹೊದಾ ದಾದಜೀನಿ ವಾಖ್ಯ ಯೊ ದೇಖ್ಹ್‍ಮಾ ಅಖ್ಖಿ ಬಾಸ್ಜೂನ್ ಫೈಲಾವ್ತೂ ಹುಯ್ಯಿನ್ ಆಯಿ. 50 ಕತೊ ಯೆಹೂದ್ಯರರಖ್ಹರಾ ಇವ್ಣಿ ಕುಳಿಮ ಮಳಿರಃಯೂತೆ ಕುಲೀನನಿ ತ್ರಿಯಾವ್ನಾ ಗಾಂನಾ ಷಾಣಾವ್ನಾ ಎಕ್ಟೂಕರಿಣ್ ಪೌಲ ಬಾರ್ನಾಬಪರ್ ಲತಾಡದೀನ್ ಇವ್ಣೋ ಮುಲಕ್‍ಥೂ ಬಹಾರ್ ಮೋಕ್ಲಿದಿದಾ. 51 ಇವ್ಣೆ ಇವ್ಣಾ ಗೋಡನ ಲಗೀತೆ ಧೂಳ್ನಾ ಇವ್ಣಾಪರ್ ಸ್ಝಟ್ಕಿನಾ ಖಿನ್ ಇಕೋನ್ಯನ ಸ್ಛಲ್ಯಾಗಾ. 52 ಚೇಲಾಹುಯಾವಾ ಖುಚಿಹುಯ್ಯಿನ್ ಪವಿತ್ರಾತ್ಮಥಿ ಭರಾಯ್ಯಿಗಾ.