1 ಅವ್ಯದ್ಮೀವ್ನಾಟೇಕೆ ಪೇತ್ರನೆ ವಾದ ಕರ್ಯೊತೆ ಅನ್ಯ ಅದ್ಮೀವ್ನೇಬಿ ದೇವ್ನೀ ವಾತೇವ್ನಾ ಮಾನ್ಯೂಕರಿ ಖಬರ್ ಅಪೋಸ್ತಲಖ್ಹರಾ ಯಾದಾಯಮ ಸ್ಛಾತೆ ಭಂಯೇವ್ನೆ ಖಂಜ್ಯಾ. 2 ಪೇತ್ರ ಯೆರೂಸಲೇಮ್ನಾ ಆಯೋತೆದೆ ಖ್ಹತ್ಣಾವಾಳ . 3 ತೂ ಖ್ಹತ್ಣಾಕೋಹೂನ್ತೆ ಅದ್ಮೀವ್ನಿ ಸ್ಝೋಡೆ ಮಳೀನ್ ಇವ್ಣಿ ಸ್ಝೋಡ್ಮಾ ಖಾಣೂ ಖಾದೋನಿ ಕರಿ ಇನಿ ಸೋಡೆ ವಾದ ಕರ್ಯಾ. 4 ಪೇತ್ರನೆ ಸ್ಛಾಲೀತೆ ಸಂಗತಿಖ್ಹರಿ ಆಗಳ್‍ಥಿ ಇವ್ಣಾ ಬರಾಬರ್‍ಥಿ ಷಾತ್ಬೊಲ್ಯೊಕತೊ. 5 ಯೊಪ್ಪಖ್ಹಯೇರ್ಮಾ ಪ್ರಾರ್ಥನೆ ಕರೂಕರಾತೆದೆ ಧ್ಯಾನ್‍ಕರೂಕರೂ ತೆದೆ ಮನಾ ಏಕ್‍ದರ್ಶನ್ ಹುಯೈ; ಯೊ ಷಾತ್ಕತೊ ಆಭ್‍ಥಿ ಚಾರ್ ಕೋಣೊ ಧರೀರಾಖ್ಯೂತೆ ಮೋಟಿ ಸ್ಝೋಳಿನಿತರ ರಹೈತೆ ಏಕ್ ರಾಸ್ಛೂ ಉತ್ರಿನ್ ಮೆ ಸ್ಛೂಂತೆ ಸಝಗೊ ಆಯ್ಯಿ. 6 ಯೊ ಶಾತ್ಕರಿ ಜೀವ್‍ರಾಶ್, ಜಿನಾವರ್, ಕಿಡಾ ಆಭ್ನಾಪರ್ ಉಡಾತೆ ಜಿನಾವರ್‍ನಾ ದೇಖ್ಯೊ. 7 ತೆದೆ ಪೇತ್ರ, ಉಠೀನ್ ವ್ಹಾಡೀನ್ ಖಾ ಕರಿ ಮನಾ ಬೋಲಾತೆ ಅವಾಸ್ಝ್ ಖಂಜ್ಯೊ. 8 ಮೆ - ನಕೋಸ್ ನಕೊ ವಾಲಿ ಗಲೀಸ್ಝ್‍ಹುಯ್ಯಿರೂತೆ ರಾಸ್ಛೂ ಹುಯ್ಯಿಸ್ಝವೊ ಅಶುದ್ಧ್ ರಾಸ್ಛೂಹುಯ್ಯಿಸ್ಝವೊ ಕೆದೇಬಿ ಮಾರ ಮ್ಹೊಡಾಮ ಕೊ ಘಾಲ್ಯೊನಿ ಕರಿ ಬೋಲ್ಯೊ. 9 ಇನಾ – ದೇವ್ ಶುದ್ಧ್‍ಕರಿಹುಯೂನ ತೂ ಗಲೀಸ್ಝ್‍ಕರಿ ನಾಬೋಲ್ನೂ ಕರಿ ಬೇಮಹಲ್ಲಾ ಆಬ್ನೀ ಅವಾಸ್ಝ್ ಹುಯೂ ಅಮ್ ತೀನ್‍ಹಲ್ಲಾಬಿ ಹುಯೂ. 10 ಇನಾಪರ್ ವೊಖ್ಹತ್ಮಾಸ್ ತೀನ್‍ಸ್ಝಣಾ ಅದ್ಮೀ ಹಮೆ ಥಾತೆ ಘರ್ನಾ ಖ್ಹಾಮೆ ಉಭ್ಯಾಥಾ. ಇವ್ಣೆ ಕೈಸರೈಥಾ ಮಾರಕನ ಮೋಕ್ಲಾಯ್ಯಿಹುಯಾ. 11 ಯೋಸ್ ವೊಖ್ಹತ್ಮಾಸ್ ತೀನ್‍ಸ್ಝಣ ಅದ್ಮೀ ಹಮೆ ಥಾತೆ ಘರ್ನಾ ಖ್ಹಾಮೆ ಉಭ್ಯಾಥಾ, ಇವ್ಣೆ ಕೈಸರೈಥಾ ಮಾರಕನ ಮೋಕ್ಲಾಯ್ಯಿಹುಯಾ. 12 ದೇವ್ನೋ ಆತ್ಮ – ತೂ ಷಾತಸ್ ಗುಮಾನ್‍ನಾಕರ್ನೂತೆ ಇವ್ಣಿ ಸ್ಝೊಡ್ಮಾ ಸ್ಝಾ ಕರಿ ಮನಾ ಬೋಲ್ಯೊ. ಆ ಸ್ಛೋಸ್ಝಣಾ ಭಂಯೇಖ್ಹರಾಬಿ ಮಾರಿ ಸೋಡೆ ಆಯಾ. 13 ಯೊ ದ್ಮೀನಾ ಘರ್ಮಾ ಹಮೆ ಸ್ಝವಾದೀನ್ ಇನೆ ಹಮ್ನಾ –ಏಕ್ ಸ್ಛಗ್ರ್ನೋ ಮಲಾಕ್ ಮಾರ ಘರ್ಮಾ ಉಭೀರಃಯೋತೆ ದೇಖ್ಯೊ. ಯಾ ಮಾಲಾಕ್ – ತೂ ಯೊಪ್ಪನ ಮೊಕ್ಲೀನ್ ಪೇತ್ರಕರಿಬೋಲಾವತೆ ಸೀಮೋನನ ಬುಲಾವ್; 14 ಯೊ ತುನಾ ಥೋಡಿ ವಾತೇವ್ನಾ ಬೋಲ್ಷೇ, ಯೋ ವಾತೇಥಿ ತುನಾಬಿ ತಾರ ಘರ್ವಾಳಾವ್ನಾಖ್ಹರೂ ರಕ್ಷಣೆ ಹುಷೆಕರಿ ಬೋಳಿರಾಖ್ಯೋಸ್ ಕರಿ ಬೋಲ್ಯೊ. 15 ಮೆ ವಾತೆಬೋಲಾನ ಶುರುಕರ್ಯೋತೆದೆ ಪವಿತ್ರಾತ್ಮನಿ ದಾನ್ ಪೈಲ್ಹೆ ಅಪ್ಣಾಪರ್ ಉತ್ರಿಆಯೊ ಇಮ್ಮಾಸ್ ಇವ್ಣಾಪರ್ ಉತ್ರ್ಯೋ. 16 ತೆದೆ – ಯೋಹಾನ್‍ನೇತೋಬಿ ಪಾಣೀನಿ ಬಾಪ್ತಿಸಂ ಕರಾಯೋ; ತುಮ್ನಾತೋಬಿ ಪವಿತ್ರಾತ್ಮಥಿ ನ್ಹೊವಾವ್ಷೇ ಕಿರ ಯೇಸು ಸ್ಚಾಮಿನೆ ಬೋಲ್ಯೊತೆ ವಾತ್ ಮಾರಿ ಖ್ಹಯಾಲ್ಮಾ ಆಯ್ಯಿ. 17 ದೇವ್ ಖ್ಹೊದಾ ದಾದಾಜಿ ಹುಯ್ಯಿರೋತೆ ಯೇಸು ಕ್ರಿಸ್ತುಮಾ ಭರಾರಾಖ್ಯಾತೆ ಅಪ್ಣಾ ದಿಧೋತೆ ದಾನ್ ಬರಾಬರ್ನಿ ದಾನ್ನಾ ಇವ್ಣಾಬಿ ದೇವಾಯ್ಯಿರಃಯೂಸ್ ದೇವ್ನಾ ಥಾಮಾನ ಮೆ ತಾಖತ್ವಾಳೊನಾ?. 18 ಅಮ್ ವಾತೇವ್ನಾ ಯೊ ಖ್ಹತ್ಣಾವಾಳ್‍ಖ್ಹರಾ ಖ್ಹಂಜೀನ್ ಉಭಿರಾಖಾನು ಮ್ಹೆಲಿದೀನ್ – ಇಮಜ್‍ಕತೊ ದೇವ್ ಅನ್ಯದ್ಮೀವ್ನಾಬಿ ಜಾನ್‍ದೇನುಕರಿ ಇವ್ಣೊ ಮನ್‍ನಾ ಇನಾಭಣಿ ಫರಾಯ್ಯಿಲಿಧೊಕರಿ ದೇವ್ನಾ ಜೈಕಾರ್ ಕರ್ಯಾ. ಅಂತಿಯೋಗ್ಯಮಾ ಘಣಾಸ್ಝಣಾ ಗ್ರೀಕ್‍ವಾಳ ವಿಶ್ವಾಸ್ ಕರ್ಯಾತೆ. 19 ಸ್ತೆಫನನಿ ಖಬರ್‍ಮಾ ಹುಯೂತೆ ಖ್ಹತಾವ್ಣಿಥಿ ದಾಣೊದಾಣ್ ಹುಯ್ಯಿಗಾತೆ ಯೆಹೂದ್ಯರ್ನಾಸ್ ಪಣ್ಕಿ ಅಸ್ಝು ಕಿನಾಬಿ ದೇವ್ನೀ ವಾಖ್ಯ ನಾ ಬೋಲ್ನೂತೆ ಪೊಯಿನಿಕೆ ಕುಪ್ರ ಅಂತಿಯೋಕ್ಯ ದೇಖ್ಹ್‍ಲಗು ಫರ್ಯಾ. 20 ಇವ್ಣಾಮಾ ಕುಪ್ರ ದ್ವೀಪವಳ ಥೋಡಸ್ಝಣಾ ಕುರೇನ್ಯವಾಳ ಥೋಡ ಂತಿಯೋಕ್ಯನ ಆವೀನ್ ಗ್ರೀಕರ್ನಿ ಸ್ಝೋಡ್ಮಾಬಿ ವಾತೆ ಬೋಲಿನ್ ಖ್ಹೊದಾ ಯೇಸುನಿ ಖಬರ್ಹುಯ್ಯಿರೀತೆ ಅಚ್ಛಿಖಬರ್ನಾ ಮಾಲುಂಕರಾಯ. 21 ಖ್ಹೊದಾ ದಾದಾಜೀನೊ ಹಾತ್ ಇವ್ಣಾ ಮದತ್ ಥೊಕರೀನ್ ಘಣು ಅದ್ಮೀ ಮಾನೀನ್ ಖ್ಹೊದಾ ದಾದಾಜಿಭಣಿ ಫರಿಗಯಾ. 22 ಇವ್ಣಿ ವಿಚಾರ್‍ಹುಯ್ಯಿರೀತೆ ಖಬರ್ ಯೆರೂ*ಸಲೇಮ್ಮಾ ಥೂತೆ ಸಭೆವಾಳನ ಕಾನ್ಮಾ ಪಡಾದೀನ್ ಇವ್ಣೆ ಬಾರ್ನಬನ ಅಂತಿಯೋಕ್ಯನ ಬೋಲಿಮೋಕ್ಲ್ಯಾ. 23 ಯೊ ಅಸ್ಛೂ ಪವಿತ್ರಾತ್ಮಮಾಭರಾಯ್ಯಿಹೋಬಿ ಭರಾಖ್ಹೊಥಿ ಭರಾಯ್ಯಿಹೊ ಹುಯ್ಯಿರೋಃಥೊ. 24 ಇನಾ ವಾಖ್ಹ್‍ತೆ ಇಸ್ಝ್‍ಗಾ ಆವೀನ್ ದೇವ್ನೀ ಖ್ಹರ್ನಾನು ಕಾಂನಾ ದೇಖ್ಯಾತೊ ಕ್ಹುಚಿಪಡೀನ್ – ತುಮೆ ಘಟ್‍ದಿಲ್‍ಥಿ ಖ್ಹೊದಾಮ ಉಭ್ಯಾರಃವೊ ಕರಿ ಇವ್ಣಾಖ್ಹರೂ ಅಕ್ಕಾಳ್ ಬೋಲ್ಯೊ. ತೆದೆ ಘಣು ಸ್ಝಣು ಖ್ಹೊದಾಮ ಮಳ್ಯಾ. 25 ಇನಾಕಢ್ತೂ ಬಾರ್ನಬ ಸೌಲನ ಢೂಂಡಾನಕಾಜೆ ತಾರ್ಸನ ಸ್ಝಯ್ಯಿನ್ ಇನಾ ದೇಖಿನ್ ಅಂತಿಯೋಕ್ಯನ ಬುಲಾಯ್ಯಿಲೀನ್ ಆಯೊ. 26 ಇನಾಕಢ್ತೂ ಇವ್ಣೆ ಪೂರ ಏಕ್‍ವರಖ್ಹ್ ಸಭೆವಾಳನ ಸ್ಝೋಡೆ ಮಳಿರಹೈನ್ ಘಣೆ ಅದ್ಮೀವ್ನಾ ಬೋದನೆ ಕರ್ಯಾ. ಅಂತಿಯೋಕ್ಯಮಾ ಚೇಲಾವ್ನಾ ಕ್ರೈಸರ್ತ್ ಕರಿ ಪೈಲೆಸ್ ನಾಮ್ ಆಯೂ. 27 ಯೊ ಹಗಾಮ್ಮಾ ಪ್ರವಾದಿಹುಯ್ಯಿರಾಥಾತೆ ಥೋಡಸ್ಝಣ ಯೆರೂಸಲೇಮ್‍ಥಾ ಅಂತಿಯೊಕ್ಯನ ಆಯಾ ಇವ್ಣಾಮ ಅಗಬಕರಿ ಏಕ್‍ಸ್ಝಣೊ ಉಠಿನ್. 28 ಜಗತ್ನಾ ಮೋಟೊ ಖ್ಹುಗಾಳ್ ಆವ್ಷೇಕರಿ ಪವಿತ್ರಾತ್ಮ ಯೊ ಕ್ಲೌದ್ಯಚಕ್ರವಿರ್ತನ ಹಗಾಮ್ಮಾ ಹುಯೂ; 29 ತೆದೆ ಯೊ ಚೇಲಾವ್ಮಾ ಹರ್‍ಯೇಕ್‍ಸ್ಝಣೋ ಯೂದಾಯ ದೇಖ್ಹ್‍ಮಾ ಜಿವಂಕರಾತೆ ಭಂಯೇವ್ನಾ ಇವ್ಣಿ ಇವ್ಣಿ ತಬತ್ನೀಲಪಟ್ಮಾ ಪೈಶಾ ಮದಾತ್‍ಕರ್ನೂಕರಿ ಮಾಲುಂ ಕರಾಯ. 30 ಯೋಸ್‍ಲಪಟ್ ಕರಿ ಯೊ ಪೈಶಾನ ಬಾರ್ನಬ ಸೌಲನ ಹಾತ್ಮ ಸಭೆನ ಷಾಣಾವ್ನಾ ಮೋಕ್ಲ್ಯಾ.