1 ಕೈಸರೈಮಿ ಇತಾಲ್ಯಾನೊ ಪಟಾಲಕರಿ ಬೋಲಾವತೆ ಏಕ್ ಪಟಾಲಮ್ನೋ ಫೋಜಿ ಹುಯ್ಯಿರೋತೆ ಕೊರ್ನೇಲ್ಯಕರಿ ಏಕ್ ಮನ್‍ಖ್ಹೈಥೂ. 2 ಯೊ ಭಕ್ತಿದಾರ್ ಇನಾ ್ರ್ವಾಳನ ಖ್ಹಾಮೇಸ್ ದೇವ್ನಾ ಮಹೈಡರ್ ರಾಖ್ಯೋಹುಯೊ ಹುಯ್ಯಿರೀನ್ ಅದ್ಮೀನಾ ಘಣೂ ದಾನ ಧರಮ್ ಕರ್ತೊ ಹುಯ್ಯಿನ್ ದೇವ್ನಾ ಹಮೇಶ ಪ್ರಾರ್ಥನೆ ಕರ್ತೊ ಹುಯ್ಯಿನ್ ಥೊ. 3 ಧೊಪಾರ್ ಹುಯ್ಯಿಸ್ಝವಾದೀನ್ ತೀನ್‍ಬಜೇನ ಇನಾ ಆಕ್ ದರ್ಶನ್ ಹುಯ್ಯಿನ್ ಏಕ್ ಸ್ವಗ್ರ್ನೊ ಮಲಾಕ್ ಇನಾಕನ ಆವೀನ್ ಕೊರ್ನೆಲ್ಯ ಕರಿ ಚಿಕ್ರೂಕರಾತೆ ಇನೆ ಅಬ್‍ಖ್ಹೂಬ್ ದೇಖ್ಯೋ. 4 ಇನೆ ಯೊ ಮಲಾಕ್‍ಭಣಿ ದೇಖಿನ್ ಡರ್ತೋಹುಯ್ಯಿನ್ - ಷಾತ್ಲಾವಾಲಿ ಕರಿ ಬೋಲಾಮ ಮಲಾಕ್ನೇ ಇನಾ ತಾರಿ ಪ್ರಾರ್ಥನೆಬಿ ದಾನಧರಮ್‍ಖ್ಹರೂ ದೇವ್ನಾ ಖ್ಹಾಮ್ಣೆ ಖ್ಹಯಾಲ್‍ನಾ ವಾಖ್ಹ್‍ತೆ ಸ್ಛಡೀ ಆಯ್ಯಿ. 5 ಹಂಕೆ ತೂ ಯೊಪ್ಪನ ಅದ್ಮೀವ್ನಾ ಮೊಕ್ಲೀನ್ ಪೇತ್ರಕರಿ ಬೋಲಾವತೆ ಸೀಮೋನನ ಬುಲಾಯ್ಯಿ ಮಂಗಾವ್. 6 ಯೊ ಸ್ಛಾಂಡಾನೊ ಸೀಮೋನನ ಘರ್ಮಾ ಆಯಿನ್ ಸ್ಛಾ; ಯೊ ಸೀಮೋನನು ಘರ್ ದರ್ಯಾವ್ಕನ ಸ್ಛಾ ಕರಿ ಬೋಲ್ಯೊ. 7 ಕೊರ್ನೇಲ್ಯ ಇನಿ ಸ್ಝೋಡೆ ವಾತೆ ಕರ್ಯೊತೆ ಸ್ವರ್ಗನೊ ಮಾಲಾಕ್ ನಿಕ್ಳೀಸ್ಝವಾದೀನ್ ಇನಾ ಸೇವೆ ಕರಾವಳಾಮ ಬೇ ಸ್ಝಣಾವ್ನಾ ಇನಾಕನ ಹಮೇಶ ರಃವುಂಕರಾತೆ ಸಿಪಾಯ್ಯಿಮಾ ಏಕ್‍ಸ್ಝಣೊ ಧೇವ್ನೋಭಕ್ತನ ಬುಲಾಯ್ಯಿನ್. 8 ಇವ್ಣಾ ಯೊ ಖಬರ್ನಾ ಪಶೆನ್ನಿತರ ಬೋಲಿನ್ ಇವ್ಣಾ ಯೊಪ್ಪನ ಬೋಲಿ ಮೋಕ್ಲ್ಯೊ. 9 ತೀಖ್ರಾ ದನ್ನೆ ಇವ್ಣೆ ಪ್ರಯಾಣ್‍ಕರೀನ್ ಯೊ ಗಾಮ್ನಾ ಕ್ನಹೆ ವೊಳಾವತೆ ಪೇತ್ರ ಕಮ್‍ಷೇಕರಿ ಧೊಪಾರೆ ಪ್ರಾರ್ಥನೆ ಕರ್ವಾನಿ ವೊಖ್ಹತ್ಮಾ ಮ್ಹಾಡಿನ ಸ್ಛಡ್ಯೋ. 10 ಯೊ ಘಣೂ ಬುಕ್‍ಲಾಗ್ತಾಲೀನ್ ಖಾಣು ಖಾನುಕರಿ ಥೊ. 11 ಖಾನನ ತಯಾರ್ ಹುಂಕರಾತೆ ಎತ್ರಾಮಸ್ ಯೊ ದ್ಯಾನ್ ಬದ್ಲೀನ್ ಆಬ್ ಕಡಾಯ್ಯಿರಃಯೂತೆ ಚಾರ್ ಕೋಣಾನ ಧರಿರಾಖ್ಯೂತೆ ಮೋಟಿ ಸೂಳಿನಿತರ ರಹೈತೆ ಷಾತ್ಕಿ ಏಕ್ ರಾಸ್ಛೂ ಸ್ಝಮೀನ್ ಪರ್ ಉತ್ರೀ ವುಳ್ಯಾವತೆ ಇನಾ ದೇಖ್ಯೂ. 12 ಇನ್ಮಾ ಹರ್‍ಯೇಕ್ ಲಪಟ್ನೂ ಜಿವಾವರ್ ಸ್ಝಮೀನ್‍ಪರ್ ಸ್ಛಾಲಾತೆ ಕೀಡಾ ಆಬ್ಮಾ ಉಡೂಕರಾತೆ ಜಿನಾವರ್‍ಖ್ಹರೂ ಥೂ. 13 ತೆದೆ ಪೇತ್ರ, ಉಠೀನ್ ವ್ಹಾಡೀನ್ ಖಾ ಕರಿ ಇನಾ ಏಕ್ ಅವಾಸ್ಝ್‍ಖ್ಹಂಸ್ಝಾಯು. 14 ಇನಾ ಪೇತ್ರನೆ - ನಕೋಸ್ ನಕೋಲಾವಾಲಿ, ಮೆ ಕೆದೇಬಿ ಗಲಸ್ಝ್ ಖಾಣಾನ ರಹೈಸ್ಝವೊ ಅಶುದ್ಧ್ ಖಾಣುರಹೈಸ್ಝವೊ ಖಾದೇ ಹೋ ಕಾಹೆ. 15 ದೇವ್ನೇ ಶುದ್ದ್‍ಕರಿರಾಕ್ಯೋತೆ ಇನಾ ರೂ ಗಲೀಸ್ಝ್‍ಕರಿ ನಕೊಬೋಲ್ ಕರಿ ಫರೀನ್ ಬೇಮಹಲ್ಲಾ ಇನಾ ಅವಾಸ್ಝ್ ಹುಯೂ. 16 ಅಮ್ ತೀನ್ ಹಲ್ಲಾಬಿ ಅವಾಸ್ಝ್ ಹುಯೂ ಇನ್ ಹುಯ್ಯಿನ ಯೊ ರಾಸ್ಛೂ ಆಬ್ನಾ ಮಹೈ ಪೇಶಿಗಯೂ. 17 ಪೇತ್ರ ಇನಾ ಹುಯೂತೆ ದರ್ಶನ್ ಷಾತ್‍ಹುಯ್ಯಿರೂಹೂಷೆ ಕರಿ ಇನಾಮ ಸೋಸ್ಛೂಕರಾತೆದೆಸ್ ಕೊರ್ನೆಲ್ಯಕರಿ ಬೋಲ್ತಾಹುಯ್ಯಿನ್ ಆವೀನ್ ಯೊ ಘರ್ನಾ ದರ್ವಾಜೆ ಉಭಿರೀನ್. 18 ಪೆತ್ರಕರಿ ಬೋಲಾವತೆ ಸೀಮೋನ ಕಿಸ್ಝ್‍ಗಾ ರಃವಂಕರಾಸ್ ಕರಿ ಚಿಕ್ರೀನ್ ಪೂಸ್ಛಾಯಾ. 19 ಪೇತ್ರ ಯೊ ದರ್ಶನ್ನಿಬಾರೇಮಾ ಪಸ್ತಾವಂಕರಾತೆದೆ ದೇವ್ನೂ ಆತ್ಮಾನೆ ಇನಾ. 20 ಹೊದೇಕ್, ಬೇಸ್ಝಣ ಅದ್ಮಿ ತುನಾ ಪೂಸ್ಛೂಕರಾಸ್; ತೂ ಉಠೀನ್ ಹೇಟ್ ಉತ್ರೀನ್ ಷಾತ್ಬಿ ಗುಮಾನ್ ನಾ ಖಾನೂತೆ ಇವ್ಣಿ ಸ್ಝೋಡೆ ಸ್ಝಾ. 21 ಮೇಸ್ ಇವ್ಣಾ ಮೋಕ್ಲಿರಾಖ್ಯೊಸ್ ಕರಿ ಬೋಲ್ಯೊ. ಪೇತ್ರ ಹೇಟ್ ಉತ್ರಿನ್ ಯೊ ಅದ್ಮೀವ್‍ಕನ ಆವೀನ್ - ಹಂದೇಖ್ಹೊ, ತುಮೆ ಪೋಸ್ಛೂಕರಾತೆ ಅದ್ಮೀ ಮೇಸ್; ತುಮೆ ಆಯಾತೆ ಮತ್ಲಾಬ್ ಷಾತ್‍ಕರಿ ಪೂಸ್ಛಾಮಾ. 22 ಇವ್ಣೆ – ಕೊನೇಲ್ಯಕರಿ ಏಕ್ಜಾಣೊ ಫೋಜೀವ್ನೊ ಸರ್ದಾರ್, ಸ್ಛಾಯೊ ನಿಯ್ಯಾತ್ವಾಳೊ ದೇವ್ನೊಡರ್‍ರಾಖಾಳೊ ಯೆಹೈದ್ಯ ಅದ್ಮೀವ್‍ಮಾ ಅಸ್ಛೂನಾಮ್ ಲಿಧೋಹುಯೊ ಹುಯ್ಯಿರೋಸ್; ತುನಾ ಇನಾ ಘರ್ಮಾ ಬುಲಾವಿನ್ ತಾರೇಥಿ ದೇವ್ನೀವಾತೆ ಖ್ಹಮ್‍ಸ್ಝ್‍ನು ಕರಿ ದೇವ್ನೊ ಮಲಾಕ್ನಾ ಭಣ್ತೂ ಹುಕುಂ ಲೀರಾಖ್ಯೋಸ್ ಕರಿ ಬೋಲ್ಯೊ. 23 ಪೇತ್ರ ಯೊ ವಾತೇನ ಖ್ಹಂಜೀನ್ ಇವ್ಣಾ ಮಹೇ ಬುಲಾಯ್ಯಿನ್ ಸ್ಛಾಕ್ರಿ ಕರ್ಯೊ ತಿಝ್ತಾದನ್ನೆ ಯೊ ಉಠೀನ್ ಇವ್ಣಿ ಸ್ಝೋಡೆ ನಿಕ್ಳ್ಯೂ; ಯೊಪ್ಪಮಾ ಸ್ಛಾತೆ ಭಂಯೇವ್ಮಾ ಥೋಡಸ್ಝಣಾ ಇನಿಸ್ಝೋಡೆ ಗಯಾ. 24 ತೀಖ್ರಾದನ್ನೆ ಯೊ ಕೈಸರನ ಗಯೊ.; ಕೊರ್ನೆಲ್ಯನೆ ಇನಾ ಭಯ್ಯಿ ಬಂಧೂವ್ನಾ ದೋಸ್ತಿವ್ನಾಬಿ ಬುಲಾಯ್ಯಿನ್ ಪೇತ್ರ ಆವಾನ ದೇಖುಕರ್ತಾಥ. 25 ಯೊ ಆವಾದೀನ್ ಕೊರ್ನೆಲ್ಯನೆ ಇನಾ ಮಳೀನ್ ಇನಾ ಪಗ್‍ಪರ್ ಪಡೀನ್ ಖ್ಹಲಾಂ ಕರ್ಯೋ. 26 ಕತೊ ಪೇತ್ರನೆ – ಉಟ್‍ಲಾ ಮೆ ಮನ್‍ಖ್ಯೂ ಕರಿ ಬೋಳೀನ್ . 27 ಇನಾ ಉಠಾಡೀನ್ ಇನಿ ಸ್ಝೋಡೆ ವಾತೆ ಕರ್ತೋ ಹುಯ್ಯಿನ್ ಘರ್ಮಾ ಆಯೋ. 28 ಇಸ್ಝ್‍ಗಾ ಘಣಾ ಅದ್ಮೀಖ್ಹರಾ ಮಳಿಆಯ್ಯಿರಾಃತೆ ದೇಖಿನ್ ಇವ್ಣಾ ಯೆಹೂದ್ಯರ್ಬಿ ಅನ್ನಾಡಿಲೋಕ್‍ನಾ ಸ್ಜೊಡೆ ಮಳೀನ್ ಭರಾವನು ಯೆಹೂದ್ಯರ್ನಿ ಅನ್ನಾಡಿಲೋಕ್‍ನಾ ಸ್ಝೊಡೆ ಮಳೀನ್ ಭರಾವನು ಯೆಹೂದ್ಯರ್ನಿ ಸಂಪ್ರದಾಯನ ಆಡೂ ಹುಯ್ಯಿರೂಸ್ ಕರಿ ತುಮ್ನಾ ಮಾಲುಂ. ಮನಾತೋಬಿ ಕೆಹೂ ಮನ್‍ಖ್ಯೂರಹೈಸ್ಝವೊ ಗಲೀಸ್ಝ್ ಕೊಯ್ನೀಕತೊ ಅಶುದ್ಧ್ ಕರಿ ನಾ ಬೋಲನುಕರಿ ದೇವ್ ವೊತಾಳಿರಾಖ್ಯೊಸ್. 29 ಇನಾವಾಖ್ಹ್‍ತೆ ತುಮೆ ಮನಾಬುಲಾಯ್ಯಿಮಾಂಗಾಯತೆದೆ ಮೆ ಕೆವ್ಹಿ ಆಡಿ ವಾತೇ ನಾ ಬೋಲ್ನೂ ಇಮ್ ಆಯೋ, ಹಂಕೆ ತುಮೆ ಮನಾ ಬುಲಾಯತೆ ಕಾಮ್‍ಶಾನು ಕರಿ ಮನಾ ಬೋಲ್ನೂಕರಿ ಬೋಲ್ಯೊ. 30 ಇನಾ ಕೊನೇಲ್ಯನೆ – ಮೆ ಚಾರ್ ದನ್ ಪಾಸ್ಛಳ್ ಧೋಪಾರ್‍ನಿ ವೊಖ್ಹತ್ ತೀನ್ ಬಜೇನ ಸ್ಛಾಲಾನಿ ದೇವ್ನಿ ಪ್ರಾರ್ಥನೆನಾ ಹಂಕೆಲಗೂ ಮಾರ ಘರ್ಮಾ ಕರೂಕರೂತೆ ಧೋಳೊ ಸ್ಛಂಕಾನೊ ಪೇರ್ವಾಕ್ಹೋ ಪೇರಿರಾಕ್ಯೋತೆ ಏಕ್ ಅದ್ಮೀ ಮಾರಖ್ಹಾಮ್ಣೆ ಉಭೀರೀಃನ್. 31 ಕೊರ್ನೇಲ್ಯ, ತಾರಿ ಪ್ರಾರ್ಥನೆ ಖಂಸ್ಝಾಯ್ಯಿ, ತಾರಿ ದಾನ್‍ಧರಮ್ ದೇವ್ನೀ ಸನ್ನಿಧಾನ್ಮಾ ಖ್ಹಯಾಲ್‍ಮಾ ಆಯೂ. 32 ತೂ ಯೊಪ್ಪನ ಮೋಕ್ಲೀನ್ ಪೇತ್ರಕರಿ ಬೋಲಾವತೆ ಸೀಮೋನನ ಬುಲಾಯ್ಯಿಮಂಗಾವ್ನೂ; ಯೊ ಸ್ಛಾಂಬಡಾವಾಳೊ ಸೀಮೋನನ ಘರ್ಮಾ ಆವಿನ್ ಸ್ಛಾ; ಯೊ ಘರ್ ದರ್ಯಾವ್ಕನ ಸ್ಛಾಕರಿ ಬೋಲ್ಯೊ. 33 ಮೆ ಢೇರಿ ನಾ ಕರ್ನೂತೆ ತಾರಕನ ಮೋಕ್ಲ್ಯೊ. ತೂ ಆಯೋತೆ ಅಶೆಲ್ ಹುಯೂ. ಅಮ್ ರಃಯ್ಯಿನ್ ಖ್ಹೊದಾ ದಾದಾಜೀನೆ ಹುಕುಂ ದೀರಾಖ್ಯೋತೆ ಅಖ್ಖಿ ವಾತೇವ್ನಾ ಖಂಸ್ಝಾನ ಹಮೆಖ್ಹರಾ ಹಂಕೆ ದೇವ್ನಾ ಖ್ಹಾಮ್ಣೆ ಮಳಿರಃಯಾಸ್ ಕರಿ ಬೋಲ್ಯೋ. 34 ತೆದೆ ಪೇತ್ರ ಬೋದನೆ ಕರಾನ ಲೀಪೋಚೀನ್ ಷಾತ್‍ಬೋಲ್ಯೊಕತೊ. 35 ದೇವ್ ತಾರೊ ಮಾರೊಸ್ ಕಾಹೆ, ಕೆವ್ಹಾ ಅದ್ಮೀಮಾರಹೈಸ್ಜವೊ ದೇವ್ನಾ ಡರೀನ್ ನಿಯ್ಯಾತ್ನಾ ಕರಾವಳು ದೇವ್ನಾ ಪಸಂದ್‍ಹುಯ್ಯಿರಾಸ್ ಕರಿ ಗುಮಾನ್ ಕೊಯ್ಯಿನೀತೇಸ್ ಮನಾ ಮಾಲುಂಹುಯೂ. 36 ಅಖ್ಖಾ ಅದ್ಮಿವ್ನಾ ಖ್ಹೊದಾ ದಾದಾಜಿ ಯೇಸು ಕ್ರಿಸ್ತುಣಣ್ತೊ ದೇವ್ನೆ ಸಮಾಧಾನ್ನಿ ಅಚ್ಛಿಖಬರ್ನಾ ಬೋಲ್ತೋಹುಯ್ಯಿನ್ ಇಸ್ರಾಯೇಲ್ ಅದ್ಮೀನಾ ದೆವಾಯ್ಯಿರಃಯ್ಯಿತೆ ವಾಖ್ಯ ತುಮ್ನಾ ಮಾಲುಂಹುಯ್ಯಿರೂಸ್. 37 ಬಾಪ್ತಿಸಂ ಕರಾಯ್ಯಿಲೇನುಕರಿ ಯೋಹಾನನೆ ಬೋಲಿ ವೊತಾಳೀನ್ ಇನಾಕಡ್ತೂ ಯೊ ವಾಖ್ಯ ಗಲಿಲಾಯಥೂ ಶುರುಹುಯ್ಯಿನ್ ಯೂದಾಮಖ್ಹರೂ ಫೈಲಾಯ್ಯಿಗಯಿ. 38 ದೇವ್ ನಸ್ಝ್‍ರೇತಿನೊ ಯೇಸುನ ಪವಿತ್ರಾತ್ಮಥೀಬಿ ತಾಖತ್‍ಥಿಬಿ ಅಭಿಷೇಕ್ ಕರ್ಯೊ; ದೇವ್ ಇನಿಸ್ಝಡೆ ಥೋಕರಿ ಬೋಲೀನ್ ಯೊ ಅಸ್ಛೂಕಾಮ್ ಕರ್ತೊಹುಯ್ಯಿನ್ ಸೈತಾನ್‍ಥಿ ಲತಾಡಖವಂಕರಾತೆ ಅಖ್ಖಾವ್ನಾ ಅಶೆಲ್‍ಕರ್ತೊ ಹುಯ್ಯಿನ್ ಫರ್ಯೋ; ಆಖ್ಹಾರೂ ತುಮ್ನಾ ಮಾಲುಂಹುಯ್ಯಿರೂಸ್ ಎತ್ರೇಸ್. 39 ಇನೆ ಯೆಹೂದ್ಯನಿ ತಬರ್ಕಾಮಾಬಿ ಯೆರೂಸಲೇಮ್ಮಾಬಿ ಕರ್ಯೋತೆ ಅಖ್ಖಾ ಕಾಂನಾ ಕಾಜೆ ಹಮೆ ಸಾಬೂತ್‍ಹುಯ್ಯಿರಾಸ್, 40 ಇನಾ ಸ್ಝಾಡಾನ ಲಕ್ಡಾನು ಕಂಭಪರ್ ಟಂಘಾವಿನ್ ಮರ್ರಾಖ್ಯಾ. 41 ದೇವ್ ಇನಾ ತೀನ್ಮಾದನ್ನೆ ಉಠಾಡೀನ್ ನಸ್ಝ್‍ರಾವಾನಿಘೋಣಿ ಕರ್ಯೊ; ಇನೆ ಅಖ್ಖಾವ್ನಾ ನಸ್ಝ್‍ರಾವ್ನೂನಾತೆ ದಸ್ಝ್‍ರಾಯೊ, ಯೊ ಮರ್ಯಾಹುಯಾಮಥೊ ಸಾಭುತ್ ಜಿವ್ತೋ ಹುಯ್ಯಿನ್ ಉಠಿನ್ ಆಯೋತೆದೆ ಹಮೆ ಇನಿ ಸ್ಝೋಡೆ ಖಾಣೂಪಾಣಿ ಜಾದಾ. 42 ಯೋಸ್ ಜಿವ್ತಾನಬಿ ಮರ್ಯಾಹುಯಾನ ನೈಯೊ ಹುಯ್ಯಿನ್ ದೇವ್ಥೀ ಖ್ಹಣಾದ್ ಹುಯೊಹೋ ಕರಿ ಅದ್ಮೀವ್ನಾ ಬೋಲಿವೊತಾಳಿನ್ ಸಾಭೂತ್ ಬೋಲ್ನೂಕರಿ ದೇವ್ ಹಮ್ನಾ ಹುಕುಂದಿಧೊ. 43 ಇನಾಪರ್ ಭರಾಖ್ಹೊರಾಖಾತೆ ಹರ್‍ಯೇಕ್‍ಸ್ಝಣೂ ಇನಾ ನಾಂ ಭಣ್ತೂ ಪಾಪ್ ಫಿಟಟಾಡಿ ಹುಷೇಕರೆ ಇನ ಖಬರ್ಮಾ ಪ್ರವಾದಿಖ್ಹರಾ ಸಾಬೂತ್ ಬೋಲಿರಾಖ್ಯಾಸ್ ಕರಿಬೋಲ್ಯೊ. 44 ಪೇತ್ರ ಆ ವಾತೇವ್ನಾ ಅಸ್ಝೂಬಿ ಬೋಲುಕರಾತೆದೇಸ್ ಇನಿ ವಾಖ್ಯನಾ ಖ್ಹಂಸ್ಝೂಕರಾತೆ ಅಖ್ಖಾವ್ನಾಪರ್ ಪವಿತ್ರಾತ್ಮನಿ ದಾನ್ ಉತ್ರೀ. 45 ಇವ್ಣೆಖ್ಹರಾ ತರತರಃನಿ ವಾತೆಬೋಲ್ತಾಹುಯ್ಯಿನ್ ದೇವ್ನಾ ಜೈಕಾರ್‍ಕರ್ತಾಹುಯ್ಯಿನ್ ರಹೈತೆ. 46 ಪೇತ್ರನಿ ಸ್ಝೋಡೆ ಆಯ್ಯಿರಾಃತೆ ಯೇಹೂದ್ಯಹುಯ್ಯಿರಾತೆ ವಿಶ್ವಾಸಿಖ್ಹರಾ ಪೂಸ್ಛಾದೀನ್ – ಅನ್ನಾಡಿ ಅದ್ನೀಖ್ಹರೂ ಪವಿತ್ರಾತ್ಮನಿ ದಾಣ್ ಹುಯ್ಯಿರೂಃಸ್ನೀ ಕರಿ ಘಣೂ ಮಸ್ತಾಪ್ ಹುಯ್ಯಿಗಾ. 47 ಸ್ಛಾಲೀತೆ ಸಂಗತಿನಾ ಪೇತ್ರದೇಖಿನ್ - ಹಮಾರಿನಿ ತರಸ್ ಪವಿತ್ರಾತ್ಮನಿ ದಾಣ್ ಲಿಧಾತೆ ಅವ್ಣಾ ಪಾಣೀನಿ ಬಾಪ್ತಿಸಂಹುವಾನ ಕೋಣ್ತೋಬಿ ಆಡೂ ಕರ್ಷೆಕರಿ ಬೋಳಿನ್ ಇವ್ಣಾ. 48 ತುಮೆ ಯೇಕ್ರಿಸ್ತುನ ನಾಂಪರ್ ಬಾಪ್ತಿಸಂ ಕರಾಯ್ಯಿಲೇನುಕರಿ ಹುಕುಂದಿಧೊ ಇನಾಕಡ್ತೂ ಇವ್ಣೆ ಇನಾ – ಅಸ್ಝೂ ಥೋಡ ದನ್ ರಃಣೂಕರಿ ಬಿಜ್ಜೇತೆ ಪಡೀನ್ ಬೋಲ್ಯಾ.