1 ದೇವ್ನಾ ಲಡ್ಕಾರಿ ನಾಮ್ ಅಪ್ಣಾ ದೆವಾಮ ಬಾ ಹುಯ್ಯಿರೋತೆ ದೇವ್ ಕೆಲ್‍ಬಣ್ಣೆ ಪ್ರೇಮ್ನಾ ಅಪ್ಣಾಪರ್ ರಾಖಿಮ್ಹೆಲ್ಯೋಸ್‍ಕಿ ದೇಖೊ; ಅಪ್ಣೆ ಇನಾ ಲಡ್ಕಾ ಹುಯ್ಯಿರಾಃಸ್ ಇನಾ ವಾಖ್ಹ್‍ತೆ ಜಗತ್ ಅಪ್ಣಾ ಮಾಲುಂ ಕೊ ಕರಾನಿ, ಯೋಬಿ ಇನಾ ಮಾಲುಂ ಕೊಕರ್ಯೂನೀನಿ 2 ಪ್ರೇಮ್ನಾ ಭಂಯೇ, ಹಂಕೆ ದೇವ್ನಾ ಲಡ್ಕಾಹುಯ್ಯಿರಃಯಾಸ್; ಆಗಳ್ ಅಪ್ಣೆ ಷಾತ್ ಹುಷುಕಿ ಯೊ ಅಸ್ಝುಬಿ ಕೊ ಮಾಲುಂಹುಯ್ಯುನಿ, ಕ್ರಿಸ್ತು ಸನಸ್ಝ್‍ರಾಯೋತೊ ಅಪ್ಣೆಖ್ಹರಾ ಇನಿನಿಘೋಣಿರಷೂಕರಿ ಮಾಲುಂಕರಿರಾಖ್ಯಾಸ್; 3 ಕತೊ ಯೊ ರಾಃಯ್ ಇಮ್ಮಾಸ್ ಇನಾ ದೇಕ್ಷೂ. ಇನಾಪರ್ ಆ ಭರಾಖ್ಹೊನಾ ರಾಖಿರಾಖ್ಯಾತೆ ಹರ್‍ಯೇಕ್‍ಸ್ಝಣೂಬಿ ಕ್ರಿಸ್ತು ಪಾಕ್ ಹುಯ್ಯಿರಃತೆ ಇಮ್ಮಾಸ್ ಯೋಬಿ ಪಾಕ್ ಕರಿಲೇಸ್ 4 ಪಾಪ್‍ಕರಾವಳು ಅಖ್ಖೂಸ್ಝಣೂ ಅಧರ್ಮಕರಾವಳುಹುಯ್ಯಿರಃಯೂಸ್; ಪಾಪ್ ಅಧರ್ಮಸ್ 5 ಪಾಪ್ ಫೆಡ್ವಾನವಾಖ್ಹ್‍ತೆ ಕ್ರಿಸ್ತು ಆಯೊಕರಿ ತುಮ್ನಾ ಮಾಲುಂಹುಯ್ಯಿರೂಸ್ ಇನಾಮ ಪಾಪ್ ಕೊಯ್ನೀ 6 ಇನಾಮ ರಃವಾವಳು ಪಾಪ್ ಕರಾಕೊಯ್ನೀ; ಪಾಪ್ ಕರಾವಳು ಇನಾ ದೇಖ್ಯಾ ಹುಯೂಬಿ ಕಾಹೆ, ಮಾಲುಂಕರಿಹುಯೂಬಿ ಕಾಹೇ. 7 ಪ್ರೇಮ್ನಾ ಲಡ್ಕಾ, ತುಮ್ನಾ ಅಸ್ಛಾಮಾರಗ್ಮಾಥು ಸ್ಛುಕಾವನಕಾಜೆ ಕಿನಾಬಿ ಅವಕಾಶ್ ನಕೊ ದಿಷು, ಕ್ರಿಸ್ತು ಕಿಮ್ ನಿಯ್ಯಾತ್ವಾಳೊ ಹುಯ್ಯಿರಃಯೋಸ್ಕಿ ಇಮ್ಮಾಸ್ ನಿಯ್ಯಾತ್ವಾಸ್ಛಾಲಾವಳು ನಿಯ್ಯಾತ್ವಾಳು ಹುಯ್ಯಿರಃಯೂಸ್ 8 ಪಾಪ್ ಕರಾವಳು ಸೈತಾನ್‍ಥಿ ಪೈದಾಹುವಾಳು ಹುಯ್ಯಿರೂಸ್; ಶುರುವಾತ್‍ಥಿಬಿ ಸೈತಾನ್ ಪಾಪ್‍ಕರಾವಳೊ ಹುಯ್ಯಿರೋಃಸ್ನೀ. ಸೈತಾನ್‍ನು ಕಾಮ್ನಾಖ್ಹರೂ ಅಳ್‍ಮಾಪ್ ಕರಾವನ ವಾಖ್ಹ್‍ತೇಸ್ ದೇವ್ನೋ ಛಿಯ್ಯೋ ಆಯೋತೆ 9 ದೇವ್‍ಥಿ ಪೈದಾಹುಯೂಹೂ ಪಾಪ್ ಕೊಕರಾನಿ; ದೇವ್ನೋ ಜಾನ್ ಇನಾಮರಾಃಸ್, ಯೊ ದೇವ್‍ಥಿ ಪೈದಾಹುಯೂ ಇನಾವಾಖ್ಹ್‍ತೆ ಪಾಪ್‍ಕರಾವಳು ಕೊ ಹುಯ್ಯಿರಾಯ್ನೀ 10 ಅವ್ಣೆ ದೇವ್ನಾ ಲಡ್ಕಾಕರಿ ಇವ್ಣೆ ಸೈತಾನ್‍ನಾ ಲಡ್ಕಾಕರಿ ಅನೇಥಿ ಮಾಲುಂಹುವಾಸ್ ನಿಯ್ಯಾತ್ಮಾ ಕೊಸ್ಛಾಲಾನಿತೆ ಯೊ ಇನಾ ಭಯ್ಯಿನಾ ಪ್ರೇಮ್ ಕೊಕರಾನಿತೆದೇವ್‍ಥಿ ಪೈದಾ ಹುವಾಳ ಕಾಹೇ 11 ಅಪ್ಣೆ ಏಕ್ನಾಯೇಕ್ ಪ್ರೇಮ್‍ಕರ್ನೂಸ್ಕರಿ ತುಮೆ ಆಗಳ್‍ಥಿಬಿ ಖ್ಹಂಜ್ಯಾತೆ ವ್ಯಾಕ್ಯಹುಯ್ಯಿರೀಸ್ 12 ಸೈತಾನ್ ಪೈಧಾಹುಯ್ಯಿನ್ ಇನಾ ನಹನ ಭಯ್ಯಿನಾ ಖೂನಿಕರಿನಾಖ್ಯೊತೆ ಕಾಯಿನಿತರ ಅಪ್ಣೆ ನಾರಃಣು ಕೆವ್ಹಿ ಕಾರಣ್ ಇನಾ ಖೂನಿ ಕರಿನಾಖ್ಯೂ? ಇನೂಕಾಂ ಖರಾಚ್‍ಹುಯ್ಯಿರೂಥೂ, ಇನೊ ನಹನ ಭಯ್ಯಿನೂ ಕಾಂಖ್ಹರೂ ನಿಯ್ಯಾತ್ನಾ ಬರಾಬರ್ ಹುಯ್ಯಿರೂಥೂ ಇನಾವಾಖ್ಹ್‍ತೇಸ್ ಈವ್‍ಜಾನ್‍ಮಾ ಮಾಳವಳಾವ್ನಾ ಅಲ್ಲಾಕ್‍ಪರ್ ಪ್ರೇಮ್‍ರಾಃಸ್ 13 ಪ್ರೇಮ್ನಾ ಭಂಯೇ, ಜಗತ್ ತುಮ್ನಾ ಬಳಾಪೊಕರ್ಯೂತೊ ಮಸ್ತಾಪ್‍ನಕೊ ಹುಷೂ. 14 ಅಪ್ಣೆತೋಬಿ ಕ್ರಿಸ್ತುಭಂಯೇವ್ನಾ ಪ್ರೇಮ್‍ಕರಾವಳ ಹುಯ್ಯಿರಾಸ್ ಇನಾಕಾಜೆ ಮರಣ್‍ಥಿ ಸ್ಛುಕಿಜೀನ್ ಜಾನ್‍ಮಾ ಮಳಿರಃಯಾಸ್‍ಕರಿ ಅಪ್ಣಾ ಮಾಲುಂಹುಯ್ಯಿರೂಸ್. ಪ್ರೇಮ್ ಕರಾಕೊಯ್ಯಿನೀತೆ ಯೊ ಮರಣ್‍ಮಾಸ್ ರಾಃಸ್ 15 ಇನಾ ಭಯ್ಯಿನಾ ಬಳಾಪೊಕರಾವಳು ಖೂನಿದಾರ್ ಹುಯ್ಯಿರೋಸ್, ಅಸ್ಛು ಕೆವ್ಹಾ ಖೂರ್ನಿದಾರ್ಮಾ ಬಿ ಜೀವ್‍ಜಾನ್ ಕೊರಾಃಯ್ನಿಕರಿ ತುಮ್ನಾ ಮಾಲುಂ ಹುಯ್ಯಿರೂಃಸ್ 16 ಕ್ರಿಸ್ತು ಅಪ್ಣಾವಾಖ್ಹ್‍ತೆ ಇನೊ ಜಾನ್ ದೇವಾಮಸ್ ಪ್ರೇಮ್ ಅಲ್‍ಖಣ್ಣೇಸ್‍ಕರಿ ಅಪ್ಣಾ ಮಾಲುಂ ಹುಯ್ಯಿರೂಸ್. ಅಪ್ಣೆಬಿ ಭಂಯೇವ್ನಾಟೇಕೆ ಅಪ್ಣಾ ಜಾನ್‍ನಾ ದೇವಾನಕಾಜೆ ಛಿಂಯೇ 17 ಆ ಜಗತ್ನಿ ದೌಲತ್‍ವಾಳೊ ಕೋಣ್ತೋಬಿ ಲತಾಡಮ ಪಡಿರಃಯೂನೆ ಇನಾ ಭಯ್ಯಿನಾ ದೇಖೀನ್ ಗೋರ್‍ಕರ್ನೂತೆ ಇಮ್ ಮ್ಹೆಲಿದಿಧೂತೊ ದೇವ್ನೀ ಪ್ರೇಮ್ ಇನಾಮ ರಃಷೆನಾ? 18 ಪ್ರಮ್ನಾ ಲಡ್ಕಾ, ಅಪ್ಣೆ ಖಾಲಿವಾತೇಮಸ್ ಮ್ಹೊಡಾನಿ ಭಾಲ್ನಿವಾತೆಥೀಸ್ ಪ್ರೇಮ್ ಕರಾವಳ ನಾ ಹುಯ್ಯಿರಾನು; ತುಮಾರಿ ಪೇಮ್ ಕಾಂಮಾಬಿ ಸತ್ಯಮಾಬಿ ನಸ್ಝ್‍ರಾವ್ನೂ. ಯೇಸುಮಾ ಭರಾಬೋಥಿಬಿ ಪ್ರೇಮ್‍ಥಿ ಸ್ಛಾಲ್ನೂತೆ 19 ಅಪ್ಣೆ ಸತ್ಯಮಾ ಮಳಿಹುಯಾಕರಿ ಅನೇಥಿಸ್ ಮಾಲುಂ ಹುವಾಸ್ ಅಸ್ಝು ಅಪ್ಣೋದಿಲ್ ಕೆವ್ಹಿ ಖಬರ್‍ಮಾಬಿ ಅಪ್ಣಾ ದೋಷಿ ಕರಿ ಬೋಲಾಯ್ಯಿಗಯೂತೋ 20 ಬಿ ದೇವ್ ಅಪ್ಣೊ ದಿಲ್‍ಥಿಬಿ ಷಾಣೊಹುಯ್ಯಿರೀನ್ ಅಖ್ಖುಸ್ನಾ ಸ್ಝಾಣಿರಾಖ್ಯೋಸ್‍ಕರಿ ಅಪ್ಣೆ ಮಾಲುಂಕರ್ಲಿನ್ ದೇವ್ನಾ ಖ್ಹಾಮ್ಣೆ ಅಪ್ಣೊ ದಿಲ್‍ನಾ ಸಮಧಾನ್ ಕರಿಯೆಂಸ್ 21 ಅಪ್ಣೊ ದಿಲ್ ಅಪ್ಣಾ ದೋಷಿಕರಿ ನಾ ಬೋಲಾಯೂತೊ ಅಪ್ಣಾ ಏವ್ನೀ ಖಬರ್ಮಾ ಹಿಮ್ಮಾತ್ ರಃಸ್ 22 ಅಸ್ಝು ಅಪ್ಣೆ ಇನಿ ಹುಕುಂನಾ ಹಾತ್ಮಾಪಾಡಿಲೀನ್ ಇನಿ ಗಣ್ತೆಮಾ ಪಶೆನ್‍ಲಾಗಾತೆ ಕಾಮ್ನಾಖ್ಹರೂ ಕರಾವಳ ಹುಯ್ಯಿರಾಸ್ ಇನಾವಾಖ್ಹ್‍ತೆ ಷಾತ್ ಮಾಂಗ್ಯಾತೋಬಿ ಇನೇಥಿ ಲಿಲೀಂಯೆಸ್ 23 ದೇವ್ನೀ ಹುಕುಂ ಕೆವ್ಹಿಕತೊ ಅಪ್ಣೆ ಇನೊ ಛಿಯ್ಯೋ, ಯೇಸುಕ್ರಿಸ್ತುನೊ ನಾಮ್‍ನಾ ಮಾನೀನ್ ಕ್ರಿಸ್ತುನೆ ಅಪ್ಣಾ ಹುಕುಂ ದಿಧೋತೆಲಪಟ್ ಏಕ್ನಾಯೇಕ್ ಪ್ರೇಮ್ ಕರ್ನೂಕರಿ 24 ಇನಿ ಹುಕುಂನಾಖ್ಹರೂ ಹಾತ್ಮಾಪಾಡಿಲೀನ್ ಸ್ಛಾಲಾವಳು ಇನಾಮಾ ಜಿವಾಸ್, ಯೋಬಿ ಅನಾಮ ಜಿವಾಸ್. ಅಪ್ಣಾಮ ಜಿವಂಕರಾಸ್ ಕರಿ ಯೊ ಅಪ್ಣಾ ದೀರಾಖ್ಯೊತೆ ಆತ್ಮಥೀಸ್ ಮಾಲುಂಕರಿರಾಖ್ಯಾಸ್.