¹ Aku na kasau, na ngumuri yahudaucin, se Yeso dayi fak i Urshalima. ² I kun Urshalima da fara mavgi timamin na ri cacpa am ɗagai nda ɗaurau da miya Ibraniyawa ma, Bethesa. Na bakakin vaɗ da peyi a miyau. ³ Ndak fira gawa, dluguyaucin gurgaucin na ndawa garanak mak a miyau. ⁴ A di ri sartu mi wara Malǝka Sǝku dew rǝbi am kun baci vigi sǝkur i kunu a gatan gǝri da zaɗa fǝra tawanke mi a jikta gǝri. ⁵ Na nǝn ɗagai a ri tuku, wara aman gumukwan ayawau ɗanda-hudu gadazak. ⁶ Lakwtu Yeso ike ci davji ari'u aku aci sanutu wara dlam na 'yuwan gawa ari'u da jayaci, "kan cu ka be na kǝlapiya ci?" ⁷ Baci dagasgu da rama ma, baci martaba, "Iyu na nǝn mi wara a taɗi ga i kun amgu bai. Lakwtu wara nda rǝbǝn kabǝn na tlan takaɗ gayi i kǝman ɗagai da wǝrimi na ma iyu." ⁸ Yeso da rami ci ma, "atlu, a mi rakici, ka dlam rakan. ⁹ Go tasǝna warau ndan ga cin gǝri da mina raki gǝri, da dlam rakan gǝri. Gafa ki putu yahudaucin. ¹⁰ Se Yahudaucin gu da rami nǝn wara dan gataci ma, Gusku gafa putu, jǝbi bai ka kakkiri bucaci." ¹¹ Aci daram ma nǝn wara ngata 'iyu rama ma, "Ami bucaci ka dlam rakan." ¹² Akshi da jayaci ma, "Waro tawan baci rame ci ma "Amudu ka dlam rakan?" ¹³ Dǝk na ka sunu nǝn wara da ngatugu zǝga tai bai, gaɗa Yeso jin gǝri da dǝpsa da riwu, gaɗa ndawa dlamnakshi gawa ari'u ¹⁴ Daku gu, Yeso da ba ci a kun wǝnduwa Sǝku, da rami ci ma, aiki kangatunaci! ka dlama aibu wambai gaɗa be gabshu da ba ci bai." ¹⁵ Warau da yin gǝri da rami Yahudaucin ma Ngatacin Yeso. ¹⁶ Gususku gaɗa jandau Yahudaucin da bar bone i Yeso, ma gaɗa dlamu wana tǝku i gafa putu yahudaucin. ¹⁷ Yeso daramikshi maya, "Afǝk ga a wana ko gususku yaye i cam na wana." ¹⁸ Gaɗak sau yahudaucin da maki tǝk na aci gaɗa aci kitli dumaya putu rugara bai har a daura Kakasǝku ma Afǝk gǝri, kuru a kaktla aɗa gǝri kalkal na Sǝku. ¹⁹ Yeso wurikshi ma, Jirewa, jirewa wǝn gu a dǝmu dlama be wambai gaɗa aɗa gǝri se dai aci ike be wara afǝkgu a dlamau be tawanke afǝku dlamau wǝngu a dlamau cam. ²⁰ Gaɗa afek gu ntutu wǝngu a tattike ci be tawanke mi aci a dlamau, kuru aye tatike ci be na gawa gaɗa nda jabci. ²¹ Ka ki mi wara Afǝk tlatlau ndawa gamtak da barikshi aro, ka sǝn ye wǝngu a bari aro nǝn mi a ci ntutu. ²² Afǝk gu a dlama kagalau bai i nǝn gaɗa a ci barna kagalau i wǝngu. ²³ Gaɗa tike da martabati Afǝk, nǝn mi wara martabatu wǝngu bin a martabata Afǝk gu wara wanne a ci bai. ²⁴ Jirewa jirewa nǝn wara kǝmana tilam ga da bar na jirewa i baci wanayi ga, bana aro mi go dadigiri, Nda hagata gǝri bai amman a sana aɗa mutu nye aro. ²⁵ Jirewa jirewa na rame kun lakwtu a ni, dengara sǝram mi ndawa gamtak a kǝmu wǝn Kakasǝku, ndak kirimtau a dlapa. ²⁶ Kaki mi Afuk na aro i kunu gǝri, aci bardu i wungu gaɗa aci ye da dlapa na aro i kunu gǝri. ²⁷ Kuru Afǝk barna kǝrmai i wǝngu da dlam wana kagala aci wǝngǝ nǝn. ²⁸ Kwa dlama ajab iɗak su bai na lakwtu mi wara a ni tike wara akun auɗo a kǝmu na wura gǝri. ²⁹ Avirayi viɗa, ndawa wara dlamna be bǝlan a tlayi i nye aro, kuru ndawa wara dlam wana gabshu a nye kagala. ³⁰ Iyu na dimu dlama be bai da aɗa ga, ka ki na kǝmu na kagala, kagala ga na adalta gaɗa na maka be aɗa ga bai se be ki baci wanayi ga. ³¹ In na dlama rama gaɗa ga ne nin, labar ga a dlapa jire bai. ³² Na nǝn dagai wara a rama i aɗa ga amman nasgadu be aci arame ǝɗa ga jirewa. ³³ Kwa wane i Yahai kuru aci barna labar jirewa. ³⁴ Labar wara na ngene da ri gi nin bai na rame kun sau gaɗa kwabi rra. ³⁵ Yahai aci petila mi ata a weɗa, kwa maka dlama pǝrdai i kun payan gǝri ki lakwtu rap. ³⁶ Amman labar mi iyu na atu rima na ki Yahai, gaɗa wana mi Afuk bara nai na damudu wana wara na dlamau tatkidu iɗa Afǝk ne wane Iyu. ³⁷ Afuk wara wana iyu aci ne aɗa gǝri ramma be i aɗa ga. Galte kwa kǝma wura gǝri i lakwtu tawanke. ³⁸ Kun na tǝlam gǝri bai dambasu a kuna kun gaɗa kwa kasaktu bai na nǝn mi da waneu. ³⁹ Kwa bidiya kun kakkadu Sǝku kwa tuman i kunakshi kwa bi na aro mi go dade giri, Zam kakkadi ne arama i ada ga. ⁴⁰ Amman kwan cu ni i riga bai gaɗa kwa be aro. ⁴¹ Na gǝni gitlib bai da ri ndawa, ⁴² amman nasgadu kun na ntu Kakasǝku bai i gǝzha kun. ⁴³ Na dew i kun dlugun Afǝk ga amman kwa gǝnayu bai, in nǝn dagai dew i kun dlugun gǝrin. ⁴⁴ Kwa bar jire na na, kun wara kwa gǝne getlib da ri kamanchuɗ kun amman kwa maka gitlib mi a ni dari Sǝku bai? ⁴⁵ Kwa tuman gu ma na burguta na kun i kǝma Afǝk ga. Ba ci mpi kun aibu nin Musa, wara kwampa tuman kun i a ci. ⁴⁶ Har kwa barna jirewa i musan kwa barda jirewa gaɗa a ci tarnu i aɗa ga. ⁴⁷ In kwa bar jirewa i be aci tarnu bin, kwa bar jirewa na na i tǝlam ga?"