¹ Lakwtu mi wara Yeso zigadu parrisaucin gu abin dak diga geri. ² (Yeso na ada geri da dlami ci baptisma bai amman nda dlam du i pakuraucin geri), ³ dai vina Judiya dayin geri i kunu Galili. Amman jəbəngara aci da yi da Samariya. ⁵ Se aci da tefei da ɗa ki Samariya nda dauro ma Sychar a dantau a patata mi Yakubu bari wun gəri Yusuf. ⁶ Duwa Yakubu a riwu, Yeso diwatlingəri na rakan dambashin gəri miya dawau, dan tu na lakwtu zədu. ⁷ Se amak da Samariya da nai i ma am, Yeso da jayatu ma, "A bara ni am na shi." ⁸ Sartu pakurauccin gu jinakshi kun da i masayi bikta. ⁹ Se ama Samariyau da ramici ma, "A dlama na na ci Yahudu ka ja ya ga ama Samariya na bari ci am ka shi?" go be nibki Yahudu na Samariya. ¹⁰ Yeso da daramitu ma, "Da kasigana barik Səku nen, na baci jaya kəm ma a baranai na shi da ka jaya ci da a bar dikəm am aro." ¹¹ Amau da ramici ma, "Wara ci na kurpi bai so duwau ke gazbər ka be am aro gu da rawan? ¹² Ci kadkana afaja Yakubu bi ba ci bari ja duwau, mi aci gum sau da riwu na kutlai gəri na fayin gəri?" ¹³ Yeso da kalaktitu da ramitu ma, "Tike mi sa am tukun a kəmuna giji wam, ¹⁴ amman nən tawanke wara aye sau da kun am mi na baru a kimu giji wam bai, gaɗa am mi na baru a dlamangara am i kunu gəri mi barici am aro mi go dadigiri." ¹⁵ Amau da ramici ma, "Wara, a bara nai am tuku gaɗa na kəma giji wambai na vina ni i magum tuku." ¹⁶ Yeso da ramitu ma, "A ji ka daure misakim kwanai i rituku." ¹⁷ Amau da ramici ma, "Iyu na məsek bai" Yeso da rami tu ma, "Karamna jirewa i dak kim na misek bai,' ¹⁸ Gaɗa ka dlam misaskin vaɗ kuru mi ka da gayi na aci məsakəm bai be karam gu jirewa. ¹⁹ Amau da rami ci ma, "Wara na lawangu kabe ci nabi. ²⁰ Afafkin ja dlamu nakwana iɗa guguyak tuku amman ci karam ma Urshalima a ne ri ndawa aye dlama nakwana." ²¹ Yeso da ramitu a bara jirewa Ama, lakwtu a ni mi ka dlama na kwana i afək i ɗak gugyaktu ko i kun Urshalima bai. ²² Kwa nakwana i be kwazga bai, ja ja nakwana i be jazgadu, ra ani da ri yahudauccin. ²³ Dəg na kasen lakwtu a ni, a rituku me wara ndak na kwana jirewa a dlama nakwana i afək i kun Nənwa Səku na jirewa, gaɗa afək gu a maka zada ndangu da dlapeci nakwana gəri. ²⁴ Kakasəku Nənwa kuru ndak dlameci nakwana ye a dlame ci nakwana i kun Nənwa na jirewa." ²⁵ Amau da rami ci maya, "Na zigadu masihu gu ani (Nən mi da rauru ma məgənyi). Lakwtu aci den a rama dija be tawanke." ²⁶ Yeso da rami tu ma, "I ne aci, ba ci dlame kəm rama tuku." ²⁷ A sartu ye pakurauccin gu zadenakshi. Se akshi da jibi jabtau dawun tam aci a rama na ama, amman go nən dlam rama idau, "Kancu tam?" ka rama na atu gaɗa gemo?" ²⁸ Se amau de vina dawai ma am gara, da yen gara kun da da rami nda ɗangu ma, ²⁹ "An na kwa ki nən mi ramda nai be na dlamu mak. Su a dlaman gəri Masihu da, ko na na?" ³⁰ Akshi dai vena dagu da ni ri gəri. ³¹ A sartu gu pakurauccin a tika dlame ci rama ma, "Mulum aci ta." ³² Amman aci daramekshi ma, "I na bikta wara kwa ziga bai." ³³ Se pakurauccin gu da rame gatukshi ma go nən deu dici bikta, ko na na?" ³⁴ Yeso da ramekshi ma, Abən ga nin na dlam be wara baci wanai gu ancu kuru na damuna wana gəri. ³⁵ Kwa ram bai ma, gaza tera hudu lakwtu karam da nin gara? Na ramekun, a suktina aɗa kun i dəsku kwa ki patata kam gu na bai nawangara gazen karam! ³⁶ Ba ci wana karam aye genyi tumanja na cacpu di aro me go dadegiri. Gada ba ci zəgəm na baci wana karam gu da kime karak iɗa gayi. ³⁷ I kun ramatuku jirewa, 'nən gayi a zəgəm, ma shirin a karam.' ³⁸ Na wana kun kwa dlam karam be wara wana du bai. Ndawa jəgab dlan na wanau, kun ye kwadfinakun i kun wanakshi." ³⁹ Gawa da kun Samariyauccin gu wara vire ɗa dagu bar dici jirewa gaɗa rama wara akshi kəmau da miya amau, "Aci ramda be tawanke wara na dlamu." ⁴⁰ Sartu mi wara Samariyayin gu deu ri gəri, akshi da jaya ci iɗak dambashi na akshi se aci da fuwi i ritun ki yuwan shirin. ⁴¹ Se ndawa gawa da Sekuni bar jirewa gaɗa tilam gəri. ⁴² Se akshi da rami amau ma, "Ja jirewa gaɗa be karamija bai, amman na adaja ja kəmadu, kuru jazegadu iɗak na nangu baci ra duniya. ⁴³ Aku na yiwan shirin tunu, aci da tli da ritunu da yin gəri Galili. ⁴⁴ Gada Yeso na aɗa gəri gum rama nabi na martaba bai ikun dak shi. ⁴⁵ Akshi ike na be wara mak aci dlamu ikun Urshalima a lakwtu ngumuri gaɗa akshi ye ju iri ngumuru. ⁴⁶ Zam aci da nai wam i Kana ki Galili iri wara aci mustu am i am dəninim na nən baci aɗa garva wara matikan gu gabɗai a kun Kaparrnahum. ⁴⁷ Lakwtu aci kəma ma Yeso ivena Judiya a ni i Galili da ramici ma da nai ba, ndam gaci wun gəri wara a miya mutu. ⁴⁸ Yeso da ramici ma, "Se ke kau gagənawawen na bi bari ajab ben ka bar jirewa bai." ⁴⁹ Baci aɗa garvau da ram maya baci martaba a yan damba mattkikam ga damci." ⁵⁰ Yeso da rami ci maya, "A ji mattikam ci ngatin gəri" warau bar na jirewa aɗa təlam mi Yeso rame ci, se da yin gəri. ⁵¹ Lakwtu aci a kun rakan tunu, dan nda gəmən gəri na guzabcin gəri iɗak dəvo da rameci ma mayingu ngatin gəri. ⁵² Se aci da jaya akshi sartu mi wara ngatu akshi da rami ci ma, "Garvaca dantu na sartu ma gatkasa, furau guvo dai va ci." ⁵³ Se afəku da sanutudu kalkal na sartu wara Yeso ramici ma, "Mattkam ci a gatan gəri." gaɗa ka sunu aci na aɗa gəri na ndak kun wunduwa gəri mak da barna jirewa. ⁵⁴ Su tuku bi ajab ma shirin wara Yeso dlamu lakwtu mi aci ive Judiya da ni Galili