¹ Aku na be tuku mak, Yeso da palcin gǝri i baka anku Galili mi wara nda dauro ma anku Tiberiyas. ² Se marim algu a ɗiga gǝri gaɗa akshi i ka na bi ajap wara a ci dlamu i nɗak nda dagas. ³ Yeso da yen gǝri fak i dǝsku gugyak i ri tunu dam mbashin gǝri na pakuraucin gǝri. ⁴ (Gusku ngumuri paska, lakwtu ngumuri Yahudaucin a dantau.) ⁵ Lakwtu Yeso ike dǝsku da kǝ cacpa ndawa gawa a ni, da rami Filibus ma, "Wa masayi borodi da rawan gaɗa ndawa tuku da bi da ci ta?" ⁶ (Amman Yeso ram sau gaɗa ancu kaktla Filibus, gaɗa a ci na aɗa gǝri zǝga na be a ci aya dlamau.) ⁷ Filibus nda gumi ma, "Borodi kǝ dinary danamak shirin a baci be wam bai ko da ti ke abi rab rab." ⁸ Gayi da kunu Pakuraucin gu, Andrawus yagana Saminu Bitrus da rami Yeso ma, ⁹ "Na mayim a ri tuku na borodi vaɗ na vǝnakau shirin, amman su a dlam gǝmu i kunu ndawa gawa tuku?" ¹⁰ Yeso da ramma, "A ɗawina ndawa ndan mbasi ɗa. (A riwu na azǝm gawa). Se ndau ndan mbasi dantau na ndawa dubu vaɗ. ¹¹ Se Yeso da mi dugul vaɗ gu da sambarkaci Sǝku, da bari ndawa ndan mbasu. Da dlam kasǝn wam na vunakau gu, i tike ka ki be a ci an cu. ¹² A ku tike wayin gǝri tunu, da rami pakuraucin gǝri ma, "A cacpa aɗa be mi gazau, gaɗa be da dlimata bai." ¹³ Da kun be nda cacpu gazau, da kun borudi na vanakau shirin gu akshi da cacpi da niyi na daɓǝrr guma ayawu shirin. ¹⁴ Se lakwtu ndawa i ka bi ajab tuku, akshi da ramma, "Jirewa na nangu a ci ne nabi wara aya ni i kun duniya." ¹⁵ Lakwtu wara Yeso sanutudu akshi a ya jǝba na a ci na awayau da dlam na a ci dǝgǝm, da virin gǝri kǝɗak da yi da ga yin gǝri dǝsku gugyak na aɗa gǝri. ¹⁶ Lakwtu aduwau dlamǝn gara tunu, pakuraucin gǝri dayi nakshi miya anku. ¹⁷ Dayi da tufi nakshi i kun marǝm daragai am, da jǝb rakan i dǝsku ankuk aye kaparnahum, sartu ɗa gu ɗa ayiwa, Yeso zade bai i rikshi. ¹⁸ Se zuwak mi awayau da tlai, anku da jǝb tambalta. ¹⁹ Lakwtu akshi dlam ndokta zǝger gumo shirin i nye i nye gomu kwan tunu, se akshi da ki Yeso a rakina yi iɗa anku a ni bǝram daragai gu, Se kalau da jǝɓ na akshi. ²⁰ Amman a ci da ramikshi ma, "Iyu kwa kalwa bai." ²¹ Se akshi da maki gǝni gǝri i kun daragai gu, go tasina daragai gu da zaden gara iɗa gagai ri akshi a ya. ²² Da tlanu tunu, na algi gawa darɗi a baka anku da ki na daragai dama wambai se getak, mi Yeso tifi kunu bai na pakuraucin gǝri, gaɗa pakuraucin gu ji nakshi go Yeso. ²³ (Se Yeso darakini ri wara deu da Tiberiyus dantau na ri mi wara nda ta dǝgul borodi mi Yeso Mǝgǝngyi barkawatu. ²⁴ Lakwtu algu sanutudu Yeso na pakuraucin gǝri a riwu bi tunu, se akshi na aɗakshi i kun daragai dayi kun Kaparrnahum a maka Yeso. ²⁵ Aku akshi ba na a ci a jampel anku tunu, akshi darmi ci ma, "Malǝm ka deu ri tuku fatawan?" ²⁶ Yeso da ngumikshi da ramma, "Jirewa, jirewa, kwa maka ga ba gaɗa be ajab wara na dlamau bai , se gaɗa ne naye kun na bik ta. ²⁷ Kwa dlama wana gaɗa masana wara a tǝraɓo bai amman a dlamina wana gaɗa masana wara a sukwakuya ki aro mi go dadigiri wara wǝn gǝ nǝn a baru, mi Suku Afǝk mpa di ci atimi i aɗa gǝri. ²⁸ Akshi da rami ci maya, "Ja dlama gǝmo gada ja dlam wana Kakasǝku?" ²⁹ Yeso da ramikshi ma, "Sutuku ne wana kaksǝku kwa bar jire i kun nǝn mi a ci waneu. ³⁰ Se akshi da rami ci ma, "Bi gǝnawa tawan ka dlamau, gaɗa ja ki ja bari ci jirewa?" ka dlama gǝmo? ³¹ Afǝfkin ja te manna i kun pata ka ki mi da tarna, "A ci barikshi borodi da ti da dǝsku." ³² Se Yeso da ramikshi ma, "Jirewa jirewa, bari kun burodi da dǝsku nin Musa bai, amman Afǝk ga wara a tǝka bari kun borodi jirewa da dǝsku. ³³ Gaɗa borodi da ri Sǝku atu ne wara vire da dǝsku mi bari aro i duniya." ³⁴ Se akshi da rami ci ma, "Baci martapa, a barija borodi tuku fatawanke." ³⁵ Yeso da ramikshi ma, "Iyu ne borodi aro, Nǝn wara dew i riga a kǝmu maya bai. Nǝn mi barda jirewa ke a kǝmu gǝji bai. ³⁶ Amman na rame kun kwǝ kwana Iyu, kwa bar jirewa bai. ³⁷ Tike mi Afǝk gu bara a ni ri ga ba ci ni ri gatanas na rai ka gǝri i vǝɗa bai. ³⁸ Na dew da dǝsku, gaɗa rama bik aɗa ga bai, amman bik ntu ba ci wanayi ga. ³⁹ Su tuku ntu gǝri ki baci wanayi ga, ma na dayana ko getak da kun ndawa wara a ci bara bai, amman tike wara i ka na wǝngun da bardi ci jirewa a bina aro mi go dadigiri, na tlatli na a ci wam i gafa damak duniya. ⁴¹ Se yahudaucin da jǝbi ngurngur iɗa gǝri gaɗa a ci ramma, "Iyu borodi mi dew da dǝsku." ⁴² Akshi da ramma, "Biwu su Yeso wǝn Yusufu wara wasagana afǝk na miwu bai? a dlama na na a ci a ramau ma, "Iyu na dew da dǝsku?" ⁴³ Yeso dan ngumi ma, "Aivi na ngurnur i gadava kun. ⁴⁴ Na nǝn a dǝmo ni ri ga bai se mi Afǝk ba ci wanayi ga zareu a cin, na tlatli na aci gafak damak duniya. ⁴⁵ Aturo da tarna i kun nabaucin, 'Tike Kakasǝku a gugza di ci.' Tike wara kǝmadu da gugzidu da ri Sǝku a ni ri ga. ⁴⁶ Tike ba ci lawan Afǝk bai, se a ci wara deu da ri Sǝku- a ci ne i ke Afǝk. ⁴⁷ Jirewa, jirewa a ci ba ci bari jirewa na aro mi go dadigiri. ⁴⁸ Iyu ne borodi kǝ aro. ⁴⁹ Afǝfkin kun ta manna i kun pata, kuru dam ti nakshi. ⁵⁰ Su tuku borodi mi dew da dǝsku, gaɗa nǝn kidi da kunu kuru damta bai. ⁵¹ Iyu ne borodi mi katu, wara vireu da dǝsku. in nǝn tawanke kidu da kunu borodi tukun a dlaɓa go dadigiri. Borodi wara na barau gu tǝka ganai aro duniya. ⁵² Yahudaucin da mi na gǝshi i gadavakshi da jǝb gamdaya i witakshi da jǝb ramau ma, "A dlama na na nanangu da bari wa tǝka gǝri wa kidi?" ⁵³ Se Yeso da ramikshi ma, "Jirewa, jirewa se ko kwa kidu tǝka wǝn gǝ nǝn, kwa shi dǝdǝm gǝri bin kwa bi aro bai i kuna kun. ⁵⁴ Duk nǝn mi kidu tǝka ga da shi dǝdǝm ga bana aro mi go dadigiri, kuru na tlatli na a ci gafa tlatli duniya. ⁵⁵ Gaɗa tǝka ga abǝn jirewa, dǝdǝm ga ye bik sa jirewa. ⁵⁶ Nǝn ba ci ta tǝka ga, da shi dǝdǝm ga, a dlaɓa i kun ga, Iyu ke i kun gǝri. ⁵⁷ Ka ki Afǝk ba ci aro waneu Iyu, kuru kǝ na mbasu gaɗa Afǝk gu, tike wara kidu Iyu, a ci ke a mbasu gaɗa ga. ⁵⁸ Su tuku ne borodi mi virau da dǝsku ka ki mi afǝfkin kidu damti nakshi bai. Ba ci kiɗa borodi tuku a dlabu har dimaro." ⁵⁹ Amman Yeso ramu jandau tuku mak lakwtu mi a ci a kun Sǝsua cacpa yahudaucin lakwtu mi a ci a kun gugza i kun kaparnahum. ⁶⁰ Se gawa da kunu pakuraucin gǝri kǝma ka sunu tunu da rami ma, "Su gugza tuku tǝta, a a gǝnu nin tai?" ⁶¹ Yeso gaɗa zǝgadu i kun gǝshi gǝri i adak pakuraucin gǝri a tǝka ngurngur i aɗak sau, se da ramikshi ma, "Su gu dlim tidi kun gǝsha kun bi? ⁶² Wate a dlam na na in kwe ka wǝn gǝnin a gaye dǝsku i ri mi a ci virau wa ci?" ⁶³ A bar aro gu nin Nǝnuwa. Tǝkau a ta paida be bai, tǝlam wara na rami kun gu Nǝnuwa Sǝku kuru atu aro. ⁶⁴ Kuru zam na wara a kuna kun bar jirewa bai. "Gaɗa Yeso zǝgadu tǝn da sǝkur gum na ndawa wara a bar jirewa bai, kuru na nǝn mi wara a ni da barna a ci. ⁶⁵ A ci daram maya, "Gaɗa su ne na rami kun ma na nǝn ba ta bai da ni ri ga se in nda bari ci yarji da ri Afǝk ga." ⁶⁶ Gaɗa sau, gawa da kunu pakuraucin gǝri da yinakshi fak dlam rakan na a ci wam bai. ⁶⁷ Se Yeso da rami guma ayawu shirin gu, "Kun ye kwan ci nya na kun bi?" ⁶⁸ Simin Bitrus dan ngumi ma, "Mǝgǝngyi ja ye rawan? ci na tǝlam aro mi go dadigiri. ⁶⁹ Ja barna jirewa kuru jasgadu ci ne nǝn mi go aipu ki Kakasǝku." ⁷⁰ Yeso da ramikshi ma, "Biwu na chik di kun nin Iyu bai, kun guma ayawu shirin, gayi da kuna kun lǝspǝr?" ⁷¹ Su tuku a ci a rama na Yahuda wǝn Siman Iskariyoti ga ɗa a ci ne gayi da kun guma ayawu shirin gu mi aye barna Yeso.