¹ I kunu yuwan səkur na yuwan gayi ki magi, lakwtu dagu dlibin dlibin, Marryamu Magdaliya dayi ri auɗo se atu da ki nda jəmbuluna gugyak wara da chimu miya auɗo gu. ² Se atu da rawi ri Simon Bitrus na pakura wara Yeso ntutu atu da ramikshi ma, "Nda ma na Məgəngyi da kunu auɗo gu kuru jasga ri wara nda jina a ci bai." ³ Se Bitrus na pakuraucin da vəre vəda akshi dayi ri auɗo gu. ⁴ Akshi mak rawau iɗa gayi; amman pakurau rawan gəri da wurmi na Bitrus dayin gəri i ri auɗogu da wurmina Bitrus. ⁵ A ci ɗidki kunu se da ki lakapan dabak gu dan payi a baka amman aci təfi kunu bai. ⁶ Simon Bitrus se da nai da ku gəri da təfin gəri i kunu auɗo gu a ci da kina lakapanu dampayi a baka ariwu. ⁷ Na kare wara da lalpi aɗa gəri na atu, a dagayi na kachum gu bai amman da yayɗa na atu rugara. ⁸ Se pakuraucin wara wurmin gəri i nya iri auɗo cam; da təfi daki da bar jirewa. ⁹ Se da kau da zəgi be da rami kakkadi ma a ci a ya tliyin gəri da mutu. ¹⁰ Se pakuraucin gu da ka ci nakshi wənduwa wam. ¹¹ Amman Marryamu dardi a vəda a təka aɗan a kəma auɗo gu, a kunu aɗan se da guɗki, da ɗidki kunu audo gu. ¹² Se atu da ki Malekaucin shirin a kunu kare na arawai dan mbasu gayi da palla aɗa gayi da palla zəgər i ri wara ndanpa guvu Yeso. ¹³ Akshi da rami tu ma, "Ama ka ɗanu gumo?" atu da ramikshi ma, gaɗa nda mana Məgəngyi ga, Nasga ri wara akshi impa a ci bai." ¹⁴ Lakwtu atu ram su tunu, se atu da pi mi i baka se atu da ki Yeso darɗi a riwu, amman atu yakkintu bai ma Yeso. ¹⁵ Yeso da ramitu ma, "Ama ka ɗanu gəmo? ka maka gaye? atu a tuman gu ma warau ba ci gadinau, "Maləm in kaman cin a rama ri wara ka jina a ci naya na mina a ci." ¹⁶ Yeso da ramitu ma, "Marryamu" se atu da mistai se da rami ci da miya Aramiya, "Rabboni" wato, maləm." ¹⁷ Yeso da rami tu ma, "ka linta Iyu bai gaɗa gusku ya ye na gayi bai i ri Afək ga, amman "a ji karami yaganaucin ga ma, na gayanga dəsku i ri Afək ga na Afək kun, Kakasəku ga na Kakasəku kun." ¹⁸ Marryamu Magadaliya dayi dara mi pakuraucin gu ma, "Ne kana Məgəngyi," kuru a ci ramdu dik jandau. ¹⁹ Gafau aduwau, yuwan səkur ki magi, mafgagin mi wara pakuraucin gu a kunu duk da chima gaɗa kalu yahudaucin, Yeso danai darɗi gadavakshi da ramikshi ma, "Salam i kun." ²⁰ Aku a ci ram sau se da tatikikshi ami gəri na aro, pakuraucin gu da dlam pərdai lakwtu akshi i ka Məgəngyi. ²¹ Yeso zam da ramikshi ma, "Salam i kun ka ki mi Afək waneu Iyu, Iyu na wanayakun." ²² Lakwtu Yeso ram su tuku, da ji mafiya i aɗakshi da ramma a gənina Nənuwa Səku. ²³ Nən tawanke baci aipu, a tupta di ci; Nən tawanke dlam aipu nin kwa tuptu bin, nda tupta bai." ²⁴ Toma, gayi da kunu guma ayawu shirin gu, mi nda dauri ma Didamus lakwatu mi wara Yeso deu a riwu bai. ²⁵ Pakuraucin jəgab a kugu da rami ci maya, "Ja ka na Məgəngyi" a ci daramikshi ma, se neka ami gəri na gatər usasin na ləntu miya vək usasin gu gurbakga i gatir vuk usau, zam na dawi aikwak ga i ara geri bin na bar jirewa bai." ²⁶ Aku yuwan danda fudu pakuraucin a kwakunu wam, Toma ye aɗa gayi na akshi. Yeso danai lakwtu miya mafgu da chima, danai darɗi gadavakshi da ramma, "Salam i kun." ²⁷ Se da rami Toma ma, "Adivaran gurbak ci, ka ki amiga, a zaden ri tuku na ami ci a dawi kunu ara ga; ka dlama ba ci buka bar jirewa bai, amman a bar jirewa." ²⁸ Toma dan ngumi ci ma, "Məgəngyi ga Kakasəku ganai." ²⁹ Yeso da rami ci ma, "Gaɗa ke kana Iyu ka bar jirewa. barka i ndawa wara i ka Iyu bai amman barna jirewa." ³⁰ Yeso dlamu be ajab gawa i kəma pakuraucin gəri, bi ajab wara nda tarnu wum bai i kunu kakkadu tuku; ³¹ amman jandau nda tarnu gada nda bar jirewa iɗa Yeso Masihu, wən Kakasəku, gaɗa kasau a bari jirewa, nda bi na aro i kunu dləgun gəri.