¹ Se Bilatus nda jəbna Yeso nda dlamau ngurutu. ² Askarabaucin gu nda yayəɗi ci kwabshi jijəm. Akshi da dawi i aɗa gəri nda tadi ci marim zannai. ³ Akshi da nai i kəma gəri da ramma, "Alanguburo dəgəm yahudaucin!" se akshi nda za ji ci na amik shi. ⁴ Se Bilatus dayi vəda i rikshi wam da ramikshi ma, "Aikina, na ni na a ci i kun i vəda gaɗa kwazigi i aɗak Iyu na ba aipu gəri bai." ⁵ Yeso da vəre vəda na aryapuk jijəm a aɗa gəri a kunu marim zanai, Bilatus da ramikshi ma, "Iakina, so tai warau!" ⁶ Lakwtu wara marim pərristaucin na nda garva ika Yeso tunu, akshi da sukti wuraskshi dəsku da ramma, "Nda dliga na a ci" nda dliga na a ci" Bilatus da ramikshi ma, "Ami na ci kun na aɗa kun kwayi kwa dli ga ci i kaya na ba aipu wambai dari gəri." ⁷ Yahudaucin gu ndan ngumi ci ma, "Ja na dumaya, dumaya rama ma ndak təki na a ci gaɗa a ci ma aɗa gəri matkam Səku." ⁸ Lakwtu Bilatus kəma rama tuku tunu se kalau da jəb na a ci, ⁹ da tufin gəri wənduwa gwamnati wam da rami Yeso ma, "Ci ka vəreu da rawan?" Amman Yeso ka ta di ci bai. ¹⁰ Se Bilatus dan ngumi ci ma, "Ka dlama ni rama bai? kasgabai Iyu na awayai taɗaci na awayu dliga ci?" ¹¹ Yeso dan ngumi ci ma, "Ci na awayau be wam bai i aɗa ga, se dai ko be wara nda bare ci da dəsku, gaɗa kasənu ba ci bar ga nai i ci na marim aipu." ¹² Lakwtu kima kasənu, Bilatus da maki taɗi na a ci, amman yahudaucin da ndokta na wura marim da ramma, "In ka tadi na nangun, kwa manga wambai na Kaisar: Nən tawanke dlamna aɗa gəri dəgəm nin a gubta na Kaisar." ¹³ Lakwtu Bilatus kəma tilam tuku tunu da jina Yeso i vəda ndan mbasən gəri i aɗa gwajere kagalata i kunu səsau dagai mi da daurau da miya Ibraniyawa ma "Gabbatha" ¹⁴ Gusku lakwtu dlama sapare ngumuri sa aɗa dan tuna awa zidu, Bilatus da rami yahudaucin ma, "Aikina sotai dəgəm kun!" ¹⁵ Akshi da dlam kurwa maya, "Nda da na a ci nda da na a ci; nda dliga na a ci!" Bilatus da ramikshi ma, "Na dligina dəgəm kun gu?" Marim pərristaucin dan ngumi ma ja na dəgəm bai se Kaisar." ¹⁶ Se Bilatus da barikshi Yeso gaɗa dayi da dligidu. ¹⁷ Se akshi da mina Yeso, daiyi nakshi vəda, a kakəra ɗəm dligau iɗa gəri i ri ɗagai wara da daurau ma, "Ri kwankwayak" wara da miya Ibraniyawa ma Golgota. ¹⁸ Akshi da dligina Yeso i ri tunu na ndawa shirin tawanke da palla gəri na Yeso a gadava. ¹⁹ Bilatus nda dlam taran tatəka gənawa ndan puɗu aɗa ɗəm dligau i ri tunu nda tarna ma, YESO KI NAZARET, DƏGƏM YAHUDAUCIN. ²⁰ Nda wa gawa da kunu yahudaucin karam tu taran tunu gaɗa ri da dligi Yeso gu a dantau na marim ɗa. Nda dlan tarangu da miya Ibraniyawa, na Latin na miya Grika. ²¹ Se marim pərristaucin ki yahudaucin da rami Bilatus ma, ka tarna bai ma "Dəgəm yahudaucin" Amman a tarni ma, "Na nangu ma, "Iyu ne dəgəm yahudaucin." ²² Bilatus dan ngumi ci ma, be na tarnu na tarnu du." ²³ Aku askarabaucin gu ɗigəna Yeso, akshi da mina kachum gəri da ɓəridu kurakkurak fudu i gadavakshi, kuru na zani gəri. zanigəru nda chakatu na ngirazan getak har iya dəsku. ²⁴ Se akshi da rami təkakshi ma, "Wa dlimpiya su bai amman wa dlama bama i aɗau nən tadun kəri." Su tuku wakatu gaɗa be jəbki be nda tarnu i kunu rama Səku maya, "Akshi ɓərina kachum ga i gadavakshi kuru da dlam bama i aɗa kare gu" su tuku be askarabaucin gu dlamu." ²⁵ Da palla da dligi Yeso ndarɗin mi gəri na yagana mi gəri Marryamu ama Kilopas na Marryamu Magadakiya. ²⁶ Lakwtu Yeso ike mi gəri na pakuraucin gəri wara a ci ntutu darɗi a dantau tunu a ci da rami miwu ma, "Ama səna wənkəm!" ²⁷ Da rami pakuraucin gu ye ma, Səna mi kun!" Tun da lakwtu tunu pakuraucin gu da mina atu i wənduwa gəri. ²⁸ Aku sau, Yeso zigadu i aɗak be tawanke na bai damun gara, ka ki mi be da tarnu i kunu kakkadu Səku jəbkin gara Yeso da ramma, "Na kəmu giji." ²⁹ Na bi pi am dagai a riwu kunu na am mi ga zhumak, se akshi da dawi soso i aɗau da dligi miya zawa da divari ci miya gəri i dəsku. ³⁰ Lakwtu Yeso tamba am gazhumak gu tunu da ramma, "Da mingara" Nda tidi aɗa gəri i diɗa da barna aro gəri. ³¹ Se yahudaucin gaɗa sartu sapara guvu a dlapa bai da dliga i aɗak ɗəm dligau gafa ngumuri (gaɗa gafa ngumuri tungu na martapa rankata) akshi da jayi Bilatus i da akshi da daktlina ziger shi da wurtai na akshi. ³² Se askarabaucin gu da nai daktli zəger nən ki səkur na ki ma shirin da dligagshi na Yeso aɗa gayi. ³³ Lakwtu akshi deu i ri Yeso se akshi daki na bai mutun gəri saram akshi kitli zəger gəri bai. ³⁴ Duk, na kasənu gayi da kunu askarabaucin gu da zagima ci na ngas da ara gəri, se dədəm na am da pai. ³⁵ Ba ci lawan gu da ramma, jirewa, be a ci ramgu jire. A ci zigadu be a ci ramgu jire gaɗa ci ye ka bar jirewa. ³⁶ Jandau tuku gəd wakatu gaɗa da jibki na be nda tarnu i kunu kakadi Səku, "Na getak da kunu awuk gəri nda kitli bai." ³⁷ Zama, kakkadu Səku gayi rama ma, "Akshi ye a lawan gəri nən mi akshi zagamu na ngas. ³⁸ Aku jandau Yusufu Arimatiya, tən a ci pukuru Yeso. (amman da ɗəbsa gaɗa kalu yahudaucin) nda nai da jayi Bilatus ko nda bar di ci guvu Yeso. Bilatus da bar di ci i zini, se Yusufu da nai da mina guvu. ³⁹ Nikodamus cam da nai, a ci mi wara da səkur ndeu i ri Yeso dəvid. A ci dena am viya guvu da nibka na atrishan dan tu na lita danamak. ⁴⁰ Se akshi da mi na guvu Yeso da yaydiɗu i kunu lakapani da bak ka ki mi kiladu yahudaucin a dabak guvavin. ⁴¹ A dantau na ri wara nda dliga cu na gadina; i kunu gadinau na vək dabak karara wara ngalte nda dabgə nən bai i kunu. ⁴² Gaɗa gafu gu sapare yahudaucin so ye ri auɗo a dantau na akshi da dabgəna Yeso i kunu.