¹ Aku Yeso ram təlam tuku, dayin gəri na pakuraucin gəri i baka dudapiya ki kidrin, ri wara na gadina da təfingəri na pakuraucin gəri. ² Yahuda, wara aya bar gəri, zəgana riwu, gaɗa Yeso dlamən aye riwu na pakuraucin gəri. ³ Se Yahuda cam danai i jimpi askarabaucin na nda aɗa garvaucin jəgab dari dəgəm pərrisaucin na parrisaucin, dayi ri tunu na aci-balbal, na pətəla, na barimi zha. ⁴ Se Yeso, wara zəgana bi tuku mak wara aye wakata na a ci deu kəma da jayakshi, "Kwa maka gaye?" ⁵ Akshi dan ngumi ci ma, "Yeso ki Nazariya" Yeso da ramikshi, "Iyu ne" Yahuda ba ci bari gəri ye dardi aɗa gayi na askarabaucin gu. ⁶ A ci ramikshi ma, "Iyu ne" da 'yuwi təkakshi da kau da dagaminakshi i ɗa. ⁷ Zam a ci da jayakshi wam, "Kwa maka gaye" zam akshi da ramma ya, "Yeso ki Nazariya." Yeso dan ngumi ma, "Na rami kun iɗa Iyu ne; in kwa maka ga nin, aivina dan gu da yinakshi." ⁹ Su tuku gaɗa nda jəbki tilam mi a ci ramu ma, "Da kunu ndawa wara ka bara gətak na nən mi wara dayu bai." ¹⁰ Se Siman Bitrus, wara na kasakar da 'yiwi, dayi na karam i mayin wənduwa marim pərrist gu ndak jina aguɗ gəri ki mata. Dləgun mayim wənduwau ma Malchus. ¹¹ Yeso da rami Bitrus ma, "A kalaktina kasakar cu i kunu saka gara. Na sau da kunu bik sa wara Afək ga bara gu bai?" ¹² Se jimbi askarabaucin gu na marmamin shi na nda aɗa garva Yahudaucin, da jəbi Yeso da takwsina a ci. ¹³ Dayi na a ci səkur i Annas gaɗa a ci saurak Kayafas wara marim pərrist ki aman tunu. ¹⁴ Kayafas a ci ne baci bar shawar i yahudaucin i ɗa a dlaman gara bəlan nən gayi damti i sirən ndawa gawa. ¹⁵ Siman Bitrus da dəgi Yeso, se pakura gayi cam, kane marim pərrist gu zəgana pakurau. Da təfin gəri iɗa gayi na Yeso i kunu səsau wuda rama ki marim pərrist gu. ¹⁶ Amman Bitrus darɗi a miyak səsau da vəda, se pakura wara dasgaya da dari marim pərrist dayi vəda da dlam rama na ama mi tsirita miyak səsau gu nda dawi na Bitrus i kwa kunu. ¹⁷ Se wunya mi wənduwa mi tsirita miyak səsau gu da ra mi Bitrus ma, "Ci gayi da kunu pakuraucin na nangu bai?" A ci da rami ma, "Iyu bai." ¹⁸ Mamu wənduwa na nda aɗa garvau darɗi i ri tunu, akshi fətina aka a yau gaɗa lakwtu mama, Bitrus ye darɗi a rikshi a ɗəmu təka gəri ¹⁹ Se marim pərrist da jayi Yeso i aɗak pakuraucin gəri na gugza gəri. ²⁰ Yeso dan ngumi ci ma, "Na dlam rama da dəɓsa bai i kunu duniya na dlam gugza i kunu səsau cacpa na ri magita yahudaucin a cacpa go be na ramu da dəɓsa. ²¹ Kwa jaya ga gaɗa gəmo? A jayina ndawa wara kəma be na ramu. Ndan gu zəgana be na ramu." ²² Lakwtu Yeso ram kasən tunu, gayi da kunu nda aɗa garva dayina kəma I yeso da rami ma, "Kautau da miya marim pərrist gu ka sunu?" ²³ Yeso dan ngumi ci ma, "In na ram kalkal binin a tatəka ri wara na ram begu amman in kalkal nin, dawuntam ka kəma Iyu?" ²⁴ Se Annas da jimbili na a ci da takwsa i ri Kayafas marim pərristaucin. ²⁵ Siman Bitrus darɗi a ɗəmu təka gəri, se ndawa da rami ci ma, "Ci gayi da kunu pakuraucin gəri bai?" A ci da dlam dikshi gamɗaya da ramma, "Iyu bai." ²⁶ Gayi da kunu mamu wənduwa marim pərrist gu yagana nən mi wara Bitrus karmu aguəɗ gu da ramma, "Ne ka ci bai i kunu gadəra na a ci?" ²⁷ Bitrus da dlam na gamɗayau ma kwan, se gaskam da kwaryi. ²⁸ Se akshi da jina Yeso dari Kayafas i nye halkwata gwamnati. Lakwtu ke da tlanu bai, se akshi da kurna təfa gaɗa kar akshi da dlama aipu gaɗa ngumuri. ²⁹ Se Pulatus da yi rikshi i vəɗa da ramikshi ma, "Kwa dena aipabin tawan i aɗak nən tuku?" ³⁰ Akshi dan ngumi ci ma, "In nən təku ba ci wana gabshu bin, da jabara ci i ci bai." ³¹ Bulatus da ramikshi ma, "Ami na ci kun na aɗa kun kwayi kwa dlami ci kagala da dəvo dumaya kun." Yahudaucin da rami ci ma, "A ri ja kalkal bai ja dawo nən i mutu." ³² Akshi ram kasau gada təlam Yeso da təbki, i aɗa be wara a ci ramu da tatəki dəvo wara a ci aya mutu. ³³ Se Bulatus da tifi i helkwata gwamnatu wam da dauri Yeso da rami ci ma, "Ci dəgəm yahudaucin?" ³⁴ Yeso da rami ci ma, "Ka ramau i aɗa ci ko ndawa ɗagai ne rami ci be iɗa ga?" ³⁵ Bulatus da rami ci ma, "Iyu ba yahude bai, i bi? Nda ci na marim pərristaucin bari cin akshi I iyu; ka dlam tam?" ³⁶ Yeso dan ngumikshi ma, "Garva ga ki duniya tuku bai in da garva ga da kunu duniya tukun da mamu wənduwa ga a dlama tliri gaɗa da bara Iyu i yahudaucin bai. ³⁷ Bulatus da rami ci ma, "Cu ci dəgəm bi?" Yeso da rami ci ma, "Ka ramdu ma Iyu dəgəm. Gaɗa sune nda yuwa Iyu, kuru gadak su ne na deu i kunu duniya gaɗa bar saida i jirewa, Tike wara ki kunu jirewa a kəmu na wura ga." ³⁸ Bulatus da rami ci ma, "Jirewau nin tam?" lakwtu a ci ram su tunu dayin gəri i vəda yahudancin gu da ramikshiu ma, "Na ba aipu bai na nangu. ³⁹ Amman kun na kiladu kun i aɗak na tadi kun nən gayi gafa ngumuri gaɗa ka sunu kwan cu na tadi kun dəgəm yahudaucin bi?" ⁴⁰ Se akshi nda sukci wurakshi na awayau da rama, "Nangu bai amman Barabas, Barabas kuwa baci kabat ndawa.