¹ A ku jandau tuku, Yeso tatəki aɗa wam i pakuraucin gəri i miya anku tabariya, su dəvo wara a ci tatəki aɗa gəri: ² Siman Bitrus aɗa gayi na Toma wara da daurau Didimus, Natiniyal deu da Cana ki Galili kutli Zabade na pakuraucin shirin ki Yeso. ³ Siman Bitrus da ramikshi ma, "Na yanga i jəba vanakau" Akshi da rami ci ma, "Jaye cam, ja ɗiga na ci" Akshi dayi da tufinakshi kunu daragai am, amman akshi jəbi wambai i kunu dəvid tunu har tlanik ɗa. ⁴ Lakwtu wara har ɗa tlanin gara, Yeso darɗi a miya anku, amman pakuraucin zəga bai ma Yeso. ⁵ Se Yeso da ramikshi ma, "Mapəndawaɗ, kun na be dagai bi ki ta?" Akshi dan ngumi ci ma, "o o." ⁶ A ci da ramikshi ma, "A virkina ragaya jəba vənakau kun da pali mata ki daragai gu kwa be na jəgab." Se akshi da virki ragayau, dab da mu nakshi yuwan da kunu am gu i daragai gu gaɗa gawa vənakau wara akshi jəbu. ⁷ Se pakura wara Yeso ntutu da rami Bitrus maya, "Su guro Məgəngyi" Lakwtu Siman Bitrus kəma Məgəngyi tunu se da kajumi kachum gəri da vəda (gaɗa a ci gasiltak) da yi'u təka gəri i kunu anku gu. ⁸ Gagizhin pakuraucin gu dan nakshi kunu daragai gu (gaɗa akshi pədəm bai na miya jigam ka ki takad zəgər danamak shirin) akshi a təka yuwa ragayau ganiyak na vanakau. ⁹ Lakwtu wara akshi vire nakshi viɗa akshi da ki avun aka a riwu na vonakau da perrta a aɗau, na borodi. ¹⁰ Yeso da ramikshi, "An nana vonakau gu jəgab wara kwa jəbu." ¹¹ Saminu Bitrus se dayi dau yiwe na ragayau i jigam ganiyak na vonakau 153; Gawa tlapar amman ragayau tlimpiyi bai. ¹² Yeso da ramikshi ma, "An na kwa kitli kimolo" Getak da kunu pakuraucin gu dəma jaya gəri bai, "Ci tai" Akshi zəgadu Məgəngyi. ¹³ Yeso da mi borodu da barikshi na vonakau gu da barikshi. ¹⁴ Su tuku zəgər ma kwan mi Yeso tatiki aɗa gəri i pakuraucin gəri aku tliyi gəri da mutu. ¹⁵ Aku akshi kitli kimolokshi, Yeso da rami Siman Bitrus, "Siman wən Yahai, ntu ga i ri ci dəka na sau bi? Bitrus da rami ci ma awwo Məgənyi cin gum kasgadu nan cu ci." ¹⁶ Da rami ci wam ki ma shirin, "Siman wən Yahai ka ntu ga?" Bitrus da rami ci ma, "Awwo Məgəngyi; kasgadu Iyu ba ci ntu ci" Yeso da rami ci ma, "Ankalta tumamin ga?" ¹⁷ Da rami ci wam ki zəgər ma kwan, "Siman, wən Yahai, kan cu Iyu?" Bitrus da shitin gəri gaɗa Yeso jaya ci ki ma kwan, "Kan cu Iyu?" A ci da rami ma, "Məgənyi kasgana be tawanke, kasgadu nan cu ci." Yeso da rami ci ma, "A bari ta i tumamin ga. ¹⁸ Jirewa, jirewa na rame ci lakwtu wara ci mapəndi ka dawa kachum ci na aɗa ci kayi i ri wara mak kan cu Iyu; amman ka garu nacin ka sukta ami ci kare da mi ci dayi na ci i ri wara kan cu nya bai." ¹⁹ Su Yeso dlam ram tuku gaɗa da tatiki dəvo mutu Bitrus mi wara a bar kərmai i Səku. Aku a ci ram ram na sau tunu se da rami Bitrus ma, "Aɗiga Iyu" ²⁰ Bitrus da pimai da ki pakura wara Yeso ntutu a dəga yakshi nən wara dəgina təka Yeso wam da baka gəri lakwtu wara akshi ata masana dəvid mi wara rama, Məgəngyi tai wara aya barna ci? ²¹ Bitrus i ka ci se da rami Yeso, Məgənyi, Na nan gu a dlama gəmo?" ²² Yeso da rami ci ma, "In na cu ci dan mbashi har se lakwtu na kalalten sen tam i ci? Aɗigen Iyu" ²³ Se rama tuku da tliba binyi i gadava yaganaucu, ma pakurau a mutu bai. Amman Yeso ram kasən bai i Bitrus, ma pakurau amtubai, amman "in nan cu da dlapi har lakwtu katayi ga, sungu tam i ci?" ²⁴ Su tuku ne pakura wara ram be i aɗak jandau kuru ba ci taran jandau wasgadu daya rama mi a ci ramau jirewa. ²⁵ Na be gawa mi Yeso dlamu. In da nda tarnu na gəd i ɗa nin, na kakkadu wara a dəmu mau bai i kunu duniya tuku na aɗa gara.