¹ Sei ngann Israël gə uri mbisi ooi tà kɨ Njendisənon tam ilə'n tà də si tɨ ā ilə də girkojə gə malang kɨ m'adə undəi loo teei kɛm ɓee kon tɨ kɨ Ejipt. ² M'ɔr sei sə kar si burə dann gir kojə doo gə malang kɨ də nang nɛ̀, gir'n kɨ nɛ̀ á man m'undə'n sei sə ndɛi tədə kaiya ra si gə. ³ Ke doogə joo njiyəi nan tɨ nal kadə umi tà lədə nan tɨ wa? ⁴ ke toboi ujə rɔ kɛm kɔr tɨ nal kuwə dan wa? ke ngonn toboi non kɛm bə̈ too dan gə tɨ nal kadə uwə nyan wa? ⁵ Ke həl oso tà gum tɨ nal kadə njè kuyə'n uyə wa? Ke gum kɨ d'uyə nang kali nal k'uwə nyan wa? ⁶ Ke doo kɔl burunj kɛm ɓeebotɨ nal kadə ɓəl undə kosdoogə ndatɨ ngang də wa? Ke ɓeebo ndi dann kumndō tɨ nal kadə gir'n in ra Njendisənon tɨ wa? ⁹ Adi ndusi ɓar bəng-bəng kɛm kəi ngar tɨ kɨ Asdod ā, kɛm kəi ngar gə kɨ Ejipt ədi nɛ̀: ɔsi njasi nan tɨ də mbalgə kɨ Samari tɨ ā, uni kum si an-in kaw də nan tɨ kutri kɨ too tutɨ ā, sə tɔlnan kɨ tutɨ ā tɔ. ¹⁰ De gər ra nyan kɨ sə dənaj'n le, Njendisənon á tam bè. De d'ur kugu nyan gə kɨ de taa sə tɔg ree'n kɛm kəi ngar gə tɨ lə də. ¹⁵ M'a tujə kəi gə kɨ ta kuli ā kəi gə kɨ ɓara ā tɔ; kəi ngar gə kɨ ra sə nginn kədə ā, kəi gə lə baw gə gea, a gotoi njɛl kare, Njendisənon a tam bè.