¹ Ibohi ike evbo̱ e̱yan re̱ ye elo̱ rivbi Kristi Jesu. ² Uhi si Etin si arivbo̱ lo̱ ri vbi Kristi Jesu o̱ zi me̱n mo̱n uanegbe sho̱ vbi uhi si o̱kho̱o̱ bi eu re. ³ Emi li uhi imeti u erimidi kho̱i toto vbi o̱hio̱ si egbe, Oise̱le̱bua uo̱i. O̱ yi ovbio̱ li o̱mo̱he re, lo̱ u bi egbe si o̱kho̱o̱ lo̱i vbi aze̱ si o̱kho̱o̱, bi lo̱i gbo ri ibohi li o̱kho̱o̱ lo̱ ri vbi egbe. ⁴ O̱vbo̱ o̱na lo̱ re̱ de o̱vbo̱ khi emi li uhi hoo o̱ ghai vbi main, mamain li main ri isi egbe shan, amali eui isi Etin. ⁵ Elo̱ ui agbo̱n isi egbe, yan de li e̱o kpin emi isi egbe. Ama elo̱ ui agbo̱n isi Etin , yan de li e̱o kpin emi isi Etin. ⁶ Ee Isi egbe li khi eu, ama e e isi Etin li khi arivbo̱ bi o̱fure. ⁷ Emo̱ ze̱i lo̱ re̱ de ina, li khi aoo isi egbe o̱be o̱ yi isi Oise̱le̱bua; o̱ imo̱n ideuhumire re̱ yi uhi isi Oise̱le̱bua, o̱ kha meti re̱ o̱vbo̱. ⁸ Elo̱ ri vbi isi egbe kha meti ui emi lo̱ e̱nghi Oise̱le̱bua. ⁹ Ama, vba vbai vbi isi egbe, isi Etin li vba u, sai khata li Etin isi Oise̱le̱bua re̱ ri vbi e̱ke̱n egbe vba. Si o̱ia mo̱n Etin isi Kristi, o̱li o̱ia, o̱i vbi so̱i. ¹⁰ Kristi kha ri we vbi e̱ke̱n egbe, egbe chie̱n emi lo̱ u yi o̱kho̱o̱, ama, o̱li Etin o̱ rivbo̱ o̱hio̱ si emi lo̱se̱n. ¹² O̱hio̱ si o̱na, imio̱n me̱n, iosa mai u, oi vbi re̱yi egbe li mai lo̱ ya za ri isi egbe wee. ¹³ Ukha ui agbo̱n isi egbe, u lo̱ o̱ u, ukha ui isi Etin, lu gbi awee isi egbe u, ulo̱ evbo̱. ¹⁵ Eia gbei gbei li Etin isi Oise̱le̱bua o̱ re̱ shan ivbi Oise̱le̱bua li yain u. ¹⁴ Ai ke chie ri etin si oghumi na lu ya lofe̱n, u mie̱n etin si are̱ chie̱n omo, ni main lo̱ ke re̱ khue echi "Abba, Era!" ¹⁶ O̱li Etin tobo̱i o̱ri o̱se̱e̱ o̱vbi etin main khi ivbi Oise̱le̱bua li mai u. ¹⁷ Main kha vbi ivbio̱i, ele lo̱ uku ni main u, ele lo̱ uku isi Oise̱le̱bua, bi ele lo̱ deba Jesu Kristi uku, sai khi e̱ke̱n ata main re̱ gba oya, lai re gbo debai vbi okhai so̱i. ¹⁸ I o o̱i khi ioya isi o̱le̱ghe̱ na, o̱i hume̱n se̱ vbi emi la lo̱ re̱ o o̱khai la lo̱ re̱vbie̱ main. ¹⁹ Iri e̱o o̱vbi ukpode̱ khe khe ni emi lamain mo̱e̱n ebi yain o̱i khe̱ are̱vbie̱ isi ivbi Oise̱le̱bua. ²⁰ Ami emi la mai fio̱ vbi ahoi, o̱i vbi emi lo̱ hoo le gbo̱i emi li adiudu muzan kpe̱n o̱. ²¹ Khi emi la mai li egbe iain a lo̱ mie̱n iain fan vbi obo̱ isi oghumi isi emi o̱ ria, bi lai re̱ roi di uanegbe si o̱khai si ivbi Oise̱le̱bua. ²² Main e̱n khi emi la mai ere̱me̱n o̱siruan ba obia lo̱ to vbi egbe, le re̱ kugbe re̱ se̱ vbi e̱yan. ²³ O̱i vbi o̱ain uo̱kpa, khi mamain achie̱ ni mai mo̱i ikperan si kpao lo̱ vbi isi Etin re khi mamain li magbo siruan o̱vbi e̱ke̱n, khi alo̱ re̱ main chie̱n omo, lo̱ vbi adechiere si egbe mai. ²⁴ O̱li adiudu an na li khi amiefan main. Emi main mo̱ adiudu an kho̱ lo̱ ruan, aise̱ mio̱n, o̱ o̱ ke khe̱ emi lo̱ duidu an vbi emi lo̱ mie̱n le? ²⁵ Ama, mai kha mo̱n adiudu an vbi emi lai se̱ mie̱n, eri main ri ozie̱n muzan khe̱ o̱. ²⁶ Iyo̱ li Etin o̱ gbo i kpa ye̱ obo̱ vbi e̱ke̱n o̱ e̱ me̱n. Main e̱n ebi mai kha li ero̱mo̱n, ama o̱li Etin tobo̱i, o̱ kpa mai obo̱ vbi ero̱mo̱n, vbi e̱ke̱n azuyo̱n li ze̱ dianre. ²⁷ O̱lo̱ guali udu lo̱ e̱n emi lo̱ ri vbi udu isi o̱li Etin erimidi yio̱n lo̱ doabo li elo̱mieho̱n, ze̱n elabi ihume̱ke̱n isi Oise̱le̱bua. ²⁸ Main e̱n khi re̱ yi elo̱hume̱ke̱n Oise̱le̱bua, o̱ui emi e̱re̱me̱n kugbe lo̱ire̱ hume̱n, eli eia la echie ebi o̱i oo o̱ vbi udu so̱i. ²⁹ Erimidi elo̱ e̱n kpoto̱i, lo̱ gbo ze̱, le lo̱ re̱ vbi agho̱an isi ovbio, lo̱ re chie̱n o̱mo̱kpan vbuse si imio̱n lebuin. ³⁰ Elo̱ ze̱ o̱vboto̱i, lo̱ echie, ena lo̱ echie yain lalo̱ gbo ri o̱khai ni. ³¹ Emi main lo̱ ke ta vbi o̱hio̱ isi elemi? Oise̱le̱bua kha deba main, o̱ i ke khi o̱lo̱ o̱ia lo̱ lo̱ chie̱n oghian main? ³² Yo̱in lo̱i sumi ovbio̱i, lo̱ zo̱i obo̱ li mamain ere̱me̱n, ebo̱ kha kei meti li yain bi o̱i re̱ ri emi ere̱me̱n na main o̱he̱n? ³³ O̱ lo̱ ke sui elo Oise̱le̱bua ze̱i e̱zo̱n? Oise̱le̱bua li kho̱ lo̱ mo̱n asee. ³⁴ O̱i khi o̱lo̱ o̱i ki azi ibohi? Kristi li khi o̱lo̱ u na main, re̱ le̱ iyo̱, a chie khuai sho̱re vbi use isi elo̱ u. O̱ri vbi obo̱ o̱dio̱n isi Oise̱le̱bua, yo̱in li khi o̱lo̱ doabo̱ na main. ³⁵ O̱lo̱ ke vaan main sho̱ re vbi ihume̱ke̱n isi Kristi? Iriae̱ke̱nan o̱, da okpokpo, akhushan o̱ da ohanmi, da ubaan, da okhena da ogada sokho̱in? ³⁶ Elabi a ghei vio̱in, "Re yi ohume̱n sa vba lare gbe main ulo vbi ukpode ere̱me̱n. Main u bi ighogho la lo gbooa." ³⁷ Vbi ena ere̱me̱n main le̱ elo̱ khu okho̱in vbi o̱hio̱ isi o̱lo̱hume̱nke̱n mai. ³⁸ Oke nwume̱n e̱o kuere khi eu, da arivbo̱, da ange̱li, da elo̱ragbo̱n shan, da emi la mie̱n, da ela lo̱ mie̱n lo̱ vade da utotomi, ³⁹ Da udami, da ughuumi, da emi evbe la main, khe lo̱ meti van main sho̱ vbi ihume̱ke̱n isi Oise̱le̱bua re, lo̱ ri vbi Kristi Jesu O̱lo̱mo̱e̱nmain.