² Vbi si o̱kposo lo̱ mo̱n o̱do̱n, uhi gba nwin o̱do̱in si o̱do̱in ghe ri vbi agbo̱n, o̱li o̱do̱in kha u, a ti yio̱in sho̱ vbi uhi si ose̱n re. ³ O̱kha ke ri yo̱, ebi o̱do̱in o̱se̱ i ri vbi agbo̱n, o̱kha dia kpe̱n o̱mo̱he o̱vbe, a lo̱ ya echo̱i o̱gboghe̱e̱. Ama o̱do̱in kha u, o̱ mo̱n uan egbe sho̱ vbi uhi re, a kha ke echo̱i o̱lo̱gboghe̱ so̱ ke nwun o̱se̱n o̱vbe. ⁴ O̱hio̱ si o̱na imio̱n me̱n, a re̱ vba chie̱n elo̱ u re̱yi uhi vbi egbe si Kristi. Ina o̱ li mai re̱ meti kuba o̱ o̱vbee, o̱ ain khi o̱la khuae sho̱vbi use si elo̱ u re, li main re̱ mi ikperan li Oise̱le̱bua. ⁵ E̱ghe̱ li main re̱ vbi isegbe, emi li egbe o̱za to lo̱ yiegbe dainre vb'egbe main vbi e̱ke̱n uhi lo̱ mi ikperan isi eu. ⁷ Emi main lo̱ ke ta? Uhi legbo̱i, o̱kho̱ o̱? O̱kha de iyo̱. O̱re̱ ri iyo̱, I kha e̱n o̱kho̱o̱ akhai khi uhi o̱i evbo̱. I kha e̱n are̱o o̱vbi emi, akhai khi uhi tai khi, "U kha gbudu ri e̱o o̱vbi emi". ⁸ Ama o̱kho̱ mi ehe, ebai kpase̱, o̱ za zi me̱ ya li izeze isi iho o̱na ho o̱na. Si uhi ievbo̱ o̱khoo̱̱ u. ⁹ Vbi e̱ghe̱ o̱kpa i rivbo̱ bi khi uhi evbo̱, ama a ke gbudu re, o̱kho̱o̱ sho̱re, i za u. ¹⁰ Ase̱ la gbe lo̱ nwin arivbo̱ re, o̱ o̱ chie̱n eu yi me̱n. ¹¹ O̱kho̱o̱ o̱ mi ehe vbi o̱li ase̱, o̱ o̱te̱e̱ me̱ e. O̱za ri utotomi so̱i gbe me̱. ¹² O̱li uhi fuain, ase gbo fuain, evbi o̱lo̱se̱n egbo hume̱n. ¹³ Iyo̱ emi lo̱ hume̱ i chie̱n eu yi me̱n? O̱kha de iyo̱, ama o̱kho̱o̱, la re̱ mio̱in khi o̱kho̱o̱ o̱ vbi emi lo̱se̱n, o nwin eu yi me̱. Ona i khi lo̱i re̱ u khi ebai ro̱i shan vbi utotomi isi ase, o̱kho̱o̱ lo̱ chie̱n o̱kho̱o̱ lo̱ gbai. ¹⁴ Main e̱in khi uhi, emi isi Etin yo̱in o̱n, ama, I si egbe li u, a shie̱n me̱n vbi oghumi li o̱kho̱o̱. ¹⁵ Emi li a u, o̱i zukpe̱ nwun me̱n e̱o kuere. Emi li o̱ khi lo̱ u, I ya uoi, emi li kho̱ e̱ke̱n so̱i li ya u. ¹⁶ Ama I kha uemi li hoo, I mie̱n ama ba uhi kho̱ eri uhi hume̱n. ¹⁷ Ama e̱yan me̱me̱n ki ya ke uo̱i, lo̱i vbi o̱kho̱o̱ lo̱ dia me̱n vbi e̱ke̱n egbe. ¹⁸ I e̱n vbi re̱ yi me̱n, o̱ ain khi, vbi isi egbe, me̱ emi lo̱ rivbo̱ lo̱se̱n o̱i evbo̱. I mo̱n aoo li re̱ uemi lo̱se̱n vbi e̱ke̱in me̱n, ama I ke meti uo̱i. ¹⁹ O̱lo̱se̱n li ya hoo, I meti uo̱i, o̱lo̱be li hoo, li ya u. ²⁰ I kha ke uemi li ho li uo̱i, o̱li e̱ghe̱ me̱me̱n ki a ke uo̱ li emi, o̱kho̱o̱ lo̱ ri me̱ vbi egbe lo̱ uo̱i. ²¹ I mio̱n vbi o̱le̱ghe̱, khi ebi ai ri emi shan li mo̱e̱n li re̱ o̱i khi ilo̱ uo̱lo̱se̱n, khi etin lo̱be lo̱ ri vbi e̱ke̱in me. ²² I gho̱gho̱n, o̱ vbi uhi si Oise̱le̱bua vbi e̱ke̱n me̱n. ²³ Ama, ya za gho emi o̱dan vbi egbe me̱n vbi ebo̱ do̱ndan. O̱kpayi uhi lo̱gbo̱n lo̱ ri vbi udu me̱n gbegbe. O̱ nwun me̱n oghumi vbi are̱u si o̱kho̱o̱ lo̱ ri vbi ebi o̱dondan vbi egbe me̱n. ²⁴ O̱ia si iriae̱ke̱ia a li u. O̱ o̱ lo̱ ke fan me̱n vbi egbe si eu? ²⁵ Ama I khue̱mi o̱n re̱ yi Oise̱le̱bua vbi Jesu Kristi O̱lo̱mo̱e̱mai! O̱ ke de iyo̱, me̱n li egbe me̱n ya gi uhi si Oise̱le̱bua vbi udu me̱n. O̱ re̱ de iyo̱, ya ri egbe gi uhi si o̱kho̱o̱.