¹ Emi main lo̱ ke ta na, li main ya vbu o̱kho̱ shian li e̱seo̱he̱n re̱ gba o̱vbo̱? ² O̱kha degbe de iyo̱. Mamain li mai ke u o̱vbo̱ o̱kho̱, ebi mai lo̱ ke chie chie̱n elo̱ rivbo̱ Vbi e̱ke̱in o̱n. ³ Vbai e̱n khi ebi eia ibun, le same̱n o̱ vbi Kristi Jesu, e same̱n o vbi eu so̱i? ⁴ A re̱ main to̱n bai, ebi are̱ same̱n o̱vbi e̱ke̱n eu. O̱na ruain lo̱i re̱ u kho̱, ebai ri utotomi isi okhae isi Erah khuai Kristi sho̱ vbi use isi ele u re, iyo̱ mai lo̱ gbo i shi oshan lo̱gbo̱ vbi e̱ke̱n arivbo̱. ⁵ Main kha chie̱n ela kugbe ba a i vbi are̱ o o isi eu so̱i, iyo̱ main lo̱ gbo i debaa ivbi achie sho̱re so̱i. ⁶ Main e̱n o̱na, khi akhan mamain li gheghe ye̱n vbi oran bai, lai re̱ ria egbe isi o̱kho̱ a. Iyo̱ lo̱ inian li main kha ke re̱ chie̱n oghumi isi o̱kho̱. ⁷ O̱lo̱ ke u, ai kho̱ ke chie̱n o̱lo̱ ni o̱kho̱ faan. ⁸ Ama main kha u ba Kristi, main mieho̱n khi main lo̱ deba o̱vbo̱. ⁹ Main e̱n khi Kristi ke chie̱n o̱la khuae sho̱ vbi use si elo̱ u re, bi o̱i ke chie̱n o̱lo̱ u. Eu ke mo̱n utotomi vbi uhumi so̱i. ¹⁰ O̱hio̱ khi eu lo̱ u o̱vbi o̱kho̱, iso̱kpa lo re u o̱vbo̱ li agbo̱n ere̱me̱n. O̱re̱ ri iyo̱, agbo̱n lo̱ re lo̱ u, o̱ uo̱ li Oise̱le̱bua. ¹¹ Iyo̱ mamain lo̱ ke i mo̱n a o o khi main ke chie̱n elo̱ u yi o̱kho̱, ama arivbo̱ yi Oise̱le̱bua vbi e̱ke̱n Kristi Jesu. ¹² O̱hio̱ si o̱na mai ke zi o̱kho̱ chie̱n oje o̱vbi egbe si eu main na, li ya re̱ re̱ ovbi iho o̱na ho o̱na so̱i. ¹³ E nwin ebo̱ so vbi egbe se̱ ni o̱kho̱, lei chie̱n emi la re̱ ui emi lo̱be. Ama, nwin egbe se̱ li Oise̱le̱bua, elabi ele ulo le chie̱n elo̱ rivbo̱. Vba nwin egbe vba li Oise̱le̱bua lo̱i we o̱vbi ue̱n le̱se̱n. ¹⁴ Ezi o̱kho̱ chien oje o̱vbi uhumi se̱. Vbai e vbi elo̱ ri uhi wee, ama, elo̱ ri e̱seo̱he̱n wee. ¹⁵ Emo̱n ke u? Main lo̱ ya ui o̱kho̱o̱ erimidi khi uhi ki mai o̱ rekhae̱n, khi e̱seo̱he̱n ma re̱khae̱n? Okha de gbe de o̱ vbi yo̱! ¹⁶ Ue̱n khi, o̱ia lu nwin egbe o̱ vboto̱ ni, lua ga, yo̱in li khi o̱lua re̱ o̱vbi so̱i, o̱ ain ulo̱ ya hin eta so̱i? Ona ikhi ata, si e̱ke̱n ata ma re̱ gi o̱kho̱o̱ la shan di eu, da elo̱ re̱ o̱vbi eta la re̱ chie̱n elo̱ u lo̱se̱n. ¹⁷ Ama a khue̱mi Oise̱le̱bua! Vba kpao chie̱n ighumi isi o̱kho̱o̱, ama vba ke re̱ o̱ vbi eta re̱ za vbi udu vba dianre, elabi aze̱o si emi la nwun o̱ vba vbi obo̱. ¹⁸ Are̱ main chie̱n elo̱ mo̱n uan egbe sho̱ vbi o̱kho̱o̱ re, main chie̱n ivie̱n isi ue̱n lo̱se̱n. ¹⁹ Ya teta bi o̱ia erimidi khi vbai se̱ mo̱n uohiami isi egbe. Ebi vbai nwun egbe vba o̱vie̱n li ue̱n si iwuan bi edoboo, vba gbo iyo̱ nwun eghe vba ere̱me̱n chie̱n evie̱n si aulo̱se̱n la lo̱ re̱ van vba vbi o̱fuan. ²⁰ Egbe li vba re̱ vbi o̱vie̱n si o̱kho̱o̱, vba mo̱n uan egbe isi auilo̱se̱n. ²¹ Vbo̱ le̱ghe̱ ike yi ikperan li vba mo̱e̱n isi emi lo̱ ke re̱ kho̱ ovba na? Emi lo̱ za vbi eli emi ain dianre li khi eu. ²² E̱yan eba ke re̱ ze̱ mo̱ uan egbe sho̱ vbi o̱kho̱o̱ re, li vba re chie̱n o̱vie̱n si Oise̱le̱bua, vba mo̱n ikperan si avan o̱ vbi o̱fuan. Ean ye̱n so̱i li khi agbo̱n lo̱i mo̱n ire̱so. ²³ Ihaosa si o̱kho̱o̱ li khi eu, ama o̱han si o̱he̱n isi Oise̱le̱bua li khi agbo̱n lo̱i mo̱n ire̱so vbi Kristi Jesu O̱lo̱mo̱e̱mai.