¹ Ikeyi o̱hume̱me̱n li Ijiu mo̱e̱n?, bi iyi idafan isi o̱rue̱? ² O̱ bun vbi ukpode̱ ere̱me̱n. Ikpao, ekhe̱n Ijiu la nwin arevbie̱ isi Oise̱le̱bua o̱ iain vbi obo̱. ³ Si ekhe̱n Ijiu eso ike mo̱n amieho̱n? Amieho̱n siain o̱lo̱ ke ri adiuduan isi Oise̱le̱bua chie̱n emi lo̱i de o̱vbo̱? ⁴ Lo̱i o̱de o̱vbiyo̱, vbi ehe sa an, lai mio̱in khi Oise̱le̱bua oli ata o̱, o̱ia o̱de o̱de khare̱ chie̱n elo̱ mo̱ e̱he̱n. Elabi a vio̱n, "Khi a lo̱ re̱e̱ vbie khi eta lo̱se̱n li khi eta se̱e̱, bi ighae̱zo̱n se̱ lo̱ kpi okhumi." ⁵ Ama, aiwata samain kha ke nwin ata isi Oise̱le̱bua vbie, emi main lo̱ ke ta? Oise̱le̱bua o̱i ke u ata, so̱ ri ibiohan so̱i wee, iyo lo̱ri? Ya tai elabi a oo isi maimain li eia. ⁶ O̱kha degbe de iyo! Ebi Oise̱le̱bua lo̱ kei ui ighae̱zo̱n isi o̱li agbo̱n na? ⁷ Ama, akhai khata isi Oise̱le̱bua za vbi ehe̱in lia mo̱e̱n ri ire lokhua yo̱i, eba kpe̱e̱i gha e̱zo̱n le̱ me̱n bi olo̱ kho̱o̱? ⁸ Ai ke o̱i, eba mo̱ e̱he̱n khi main ita, li eia eso taba, khi mai o̱i, "Vba zuan ui emi lo̱be li ōle̱se̱n re̱ vare?" E̱zo̱n lo ghae li ain o̱diai. ⁹ Emo̱n ke u? Mai zi egbe main vbo̱ re? Gbei gbei. Main ke sui ekhe̱n Ijiu bi ekhe̱n Igrik e̱zo̱n lee khi yain ere̱me̱n eri vbi e̱ke̱n o̱kho̱o̱. ¹⁰ O̱nai ebai vio̱n o̱n. "Oto̱kpai lo̱ ui ata o̱i evbo̱ o̱gho̱ o, ai mi oto̱kpa." ¹¹ Oto̱kpa le mi nwuoin eokuere o̱i evbo̱. Ai mi oto̱kpa lo̱ hoo Oise̱le̱bua. ¹² Ere̱me̱n deluokho, Yain ere̱me̱n chie̱n emi lo̱i hume̱n. Amio̱ lo̱ ui emi lo̱se̱n, o̱gho̱ o, aidegbe min oto̱kpa. ¹³ Uru isiain, idi la i voo o̱. Oe̱mi siain isi ate̱ e. Obi se̱ye̱n ri vbo kpoto̱ ukpe̱tunu siain. ¹⁴ Unu siain vo̱n yi eo̱ uko̱mi bi iria e̱ke̱ia. ¹⁵ Oe̱ siain, o̱mo̱ o̱ke̱a̱me̱n la re̱ gbi e̱re̱ kua. ¹⁶ Ikhueo bi ioya ri vbi ukpode̱ siain. ¹⁷ Eleia na ie̱n ukpode̱ isi o̱fure. ¹⁸ Ilofe̱n isi Oise̱le̱bua o̱i e vbi isao siain. ¹⁹ E̱yan, mai ke e̱n emi li uhi tai, o̱tai yi elo̱ ri vbi e̱ge̱n obo̱ si uhi. O̱deo̱ vbi yo̱ li unu si agbo̱n re̱ kugbe, bi li agbo̱n ere̱me̱n re̱ chie̱n eli Oise̱le̱bua lo̱ mie̱ iain eta. ²⁰ Emo̱ ze̱i, li khi ai mi oto̱kpa lo̱ khai mo̱i ibohi le bi obia isi are̱khan uhi, vbe̱ o so̱i. Vbi e̱ke̱n uhi, lare̱ e̱n khi o̱kho̱o̱ o̱ rivbo̱. ²¹ Ama, eyan lai nwin uhi yo̱ dan, aeulo̱se̱n isi Oise̱le̱bua, ake ro̱i vbie̱. uhi bi ekhe̱in imie̱o, ero̱se̱ io̱ vbo̱, ²² Li kho̱, ue̱n lo̱se̱n isi Oise̱le̱bua vba amieho̱n si Jesu Kristi isi elo̱ mieho̱n iyodan o̱i evbo̱. ²³ Agbo̱n ere̱me̱n le ke ui o̱kho̱, bi eke sho̱ vbi o̱khae si Oise̱le̱bua re. ²⁴ E chie̱n ela mie̱fan re̱shan vbi e̱seo̱he̱n vbi adechiere lo̱ ri vbi Jesu Kristi. ²⁵ Oise̱le̱bua ri Jesu Kristi re, lo̱ chie̱n are̱hoo vbi amieho̱n si ere so̱i. O̱ri ue̱n lo̱se̱n so̱i vbie vbi Kristi lo̱ re̱ re la re̱ mi iuata so̱i, o̱hio̱ si agbe̱o rare so̱i re̱ yi o̱kho̱o̱ la kpa o u. ²⁶ Vbi a mo̱n ozie̱n so̱i. Ena ruain lai re̱ ri ue̱n lo̱se̱n so̱i vbie vbi o̱le̱ghe̱na. O̱ ri na lai re̱ ri iwata so̱i vbie̱, la gbo mie̱n khi yo̱in lo̱ lo̱ meti ta khi o̱ia u lo̱se̱n o̱hio̱ si aduiduan vbi Jesu. ²⁷ Ebi uruo̱mi ke za vare, a yio̱ vbo̱re. I yi uhi lo̱ ke ze? O̱hio̱ isi obia o̱? O̱gho̱, ama, o̱hio̱ isi umuzami vbi amieho̱n. ²⁸ Mai kuo̱ igbe khi aduiduan lo̱ re̱ vbie̱ khi o̱ia obia si uhi. ²⁹ Da Oise̱le̱bua si ekhe̱in Ijiu uo̱kpa o̱? O̱i gbo vbi Oise̱le̱bua si eloimieho̱n? E̱ e̱ isi elo̱i mieho̱n gbo o̱. ³⁰ Akhai khata li Oise̱le̱bua re̱ vbo̱ kpa o̱lo̱ ri ase̱ li orue si aduiduan bi airue̱ re̱ shian vbi aduiduan.