¹ Me̱me̱, lo̱ khi ovie̱n si O̱lo̱mo̱e̱nma, i o̱i li vba ya shoshan lo̱ evbi u echemi lae chie vba. ² Me̱me̱ yo̱i li vba ya ui agbo̱n si idegbere, li oho'o bi ozie̱n, vba ri ihume̱ke̱n kpa egbe vba we e. ³ Vba ui emi li vba lo̱ meti u, la lo̱ re̱ mo̱in o̱kugbe si Etin vbi o̱fure. ⁴ Etin o̱kpa bi egbe o̱kpa lo̱ ri vbo̱, ela bi ai eche vba o̱vbi awue̱o da okpa la echie vba ni. ⁵ Bi O̱lo̱mo̱e̱n o̱kpa, amieho̱n o̱kpa bi isame̱n o̱kpa lo̱ri vbo̱, ⁶ bi Oise̱le̱bua o̱kpa lo̱ vbi era agbo̱n ere̱me̱n, lo̱ vo main ere̱me̱n, re̱ shian vbi ere̱me̱n bi e̱ke̱n egbe mai ere̱me̱n. ⁷ Ari e̱seo̱he̱n li maimain o̱d'o̱de, elabi Kristi ro̱i na mai se̱. ⁸ Ebi ebe isi Oise̱le̱bua tai kho̱: "E̱ghe̱ lo̱ re̱ he̱n okhumi lo̱ dai, O̱ huai elawuno̱i chie̱n o̱lawun. O̱ za ri ohan lo̱ buin l'eia." ⁹ "O yi okhumi" ema ro̱i ta, ra khi e ro̱ kpao kpo̱n di oto̱i se̱ vbi ebi oto̱i dimi se̱? ¹⁰ Yo̱in lukpo̱kpa lo̱ kpo̱n di oto̱i, yo̱in lo̱ gbo he̱n okhumi di ebo̱ dale̱ gbei gbei, lo̱ re̱ meti chie̱n o̱lo̱vo̱n emi ere̱me̱n. ¹¹ Kristi o̱ re̱ li eso liain re̱ chie̱n apo̱sto, eso vbi elo̱mie̱o, eso vbi elo̱ wewe, eso vbi alufa bi elo̱vbie̱. ¹² O̱ ri elehe na liain re e̱he̱n egbe isi eia so̱i le fuain, le re̱ bi obia si ugami, la re̱ z'oa lo̱ vbi egbe si Kristi. ¹³ I yo̱ o̱ kei zi o̱ l'oa lo̱ vbi egbe so̱i se̱ vbo̱ main di o̱kpa vbi amieho̱n bi oe̱n si ovbi Oise̱le̱bua, bi main gbo ohia se̱ vbo̱ khi main ke ui bi Kristi. ¹⁴ Kristi ze̱ main ohia, li main ke vbi ivbiekha, li ikhuo o̱fi yao, yi uokho, li efio si uvbie̱ emi isi elo̱ mo̱i ike̱le̱ gue isi ate̱ e, lo̱ hua ra le̱. ¹⁵ Vbe he si yo̱, li mai ya ri ihume̱ke̱n kpaye gbe t'eta, main lo̱ ya ohia o̱vbo̱ vbi ukpode̱ ere̱me̱n vbi yoin, lo vbi uhumo̱i, yoin li Kristi. ¹⁶ Kristi lo̱ hu 0a so̱i ere̱me̱n legbo̱i, La kugbe agbo ri ikpian la re̱ wiain mo̱e̱ gba kugbe, ikpemi segbe ode ode kha ke bia, o̱lo̱ ke wuin o̱legbe ohia se̱ vbo̱, ohia o̱vbi ihume̱ke̱n li egbo̱i. ¹⁷ O̱hio̱ si o̱na, ita ai, igbo chie o̱ i, vbi O̱lo̱mo̱e̱n, khi vba kha ke we'e ebi ehain Ije̱ntai o̱i uagbo̱n, vbu kpodi aghoigho si udu siain. ¹⁸ Li emi re̱ wuin ain e̱o kuere o̱suaso̱n dain dain egbo si rere sho̱ vbi agbo̱n li Oise̱le̱bua o̱ li main u, o̱hio̱ si aie̱n sian, o̱hio̱ si a wuin udu ohia li ain mo̱e̱n. ¹⁹ Eimo̱ ile̱kho̱i, egbo z'egbe ain obo̱ li o̱e̱ghe̱n s'egbe, iyo̱ yian ke we awe si iwuan rale̱. ²⁰ Ama, iyo̱ ki vba mama emo̱i Kristi. ²¹ Ikho̱h kho̱i khi vba hin e̱mo̱in, khi agbo vbi e̱vba e̱mo̱n, ebo̱ iu khi jesu lata ri. ²² I vbie̱ vba li vba wun awe vba li gheghe fia, li vba wuin o̱ia li vba iu igheghe fia. O̱li o̱ia ligheghe ain lo̱ ria o̱hio̱ si ate̱e si le buin lo̱ hoo. ²³ Avbie̱ vba li etin re̱ win udu vba chie̱n o̱lo̱gbo̱n. ²⁴ Li vba chie̱n o̱ia lo̱gbo̱n lai main vbi agbhoan isi Oise̱le̱bua, vbi aulo̱se̱n isi ata bi o̱fuan. ²⁵ O̱hio̱ si o̱na, vba si e̱he̱n sho̱ vbe gbe re, vba ya ti ata legbe ho̱n, erimidi o̱kpa mai ke u ye gbe. ²⁶ Vba ebi ohan o vbo̱ kho̱. Vbai zi o̱vo̱n de o win ibiohan vba ye̱n. ²⁷ Vba e re he li esun. ²⁸ O̱lo̱ du oi, o̱i di obo̱ ye̱n vboi udomi, o̱ibia, o̱irobo̱ si ya bi obia lo̱ de o̱vbo̱, lo re mo emi lo̱ lo̱ meti za re̱ ni elo̱i mo̱e̱n. ²⁹ Ezi eta lo̱i deo̱vbo̱ shian vbunu se̱ dianre. We eta le mo̱i ikhe̱ obo̱ yi ukhuaegbe yi eno̱i, elabi ei ho o̱i, li eta se̱ re̱ mo̱i ikpaobo̱ yi elu ti eta ni ho̱n. ³⁰ Eri ohan bi Etilo̱fuan si Oise̱le̱bua, yo̱in la re̱ fie̱ akan se̱ vbi ukpe̱de̱ si ade̱chiere. ³¹ Hua, iria e̱ke̱an, ohuze̱, ibiohan, uroo, ukhue bi emi ere̱me̱n lo̱be, kua. ³² Vba mo̱n ufumi yi egbe, udu li oho, are̱humegbe elabi Oise̱le̱bua vbi Jesu o̱i re̱ hume̱n mai.