¹ O̱hio̱ si o̱na, me̱me̱n Ipo̱lu i chie̱n oghumi si Jesu Kristi re̱ yi ehe̱in Ije̱ntais. ² I o khi vba ho̱n emo̱ obia si e̱seo̱he̱n isi Oise̱le̱bua lo̱ re̱ ne̱ me̱n yi vba. ³ I ya vin o̱ li ebe na o̱hio̱ si ize̱o li a re̱ vbie̱ me̱n. O̱na ikhi ata lo̱ he'egbe li za vin ebe kue̱i yi vba. ⁴ Vba kha ko̱ o̱na, o̱lo̱ meti wun vba e̱o kuere vbi emo̱ dimi li mo̱e̱n vbi uhegbe si ata vbi emo̱ Kristi. ⁵ Re yi uami lo̱ rare, o̱ li ata na, airo̱i vbie̱ ivbi agbo̱n, ama, e̱yan Etin ke ro̱i vbie̱ ehain apo̱sto bi eliain mie̱o la ze̱ o̱vboto̱i o̱hio̱ isi o̱ li obia na. ⁶ O̱ li eta lo̱ hi egbe na, li khi ehain Ijentais e ke debai e le uku, bi e lo̱ debai egbe, bi e lo̱ gbo ke̱n vbi uruo̱mi vbi e̱ke̱in Jesu Kristi re̱ shan owewe si eta lo̱se̱n. ⁷ I ke chie̱n ayo̱uhumi si eta lose̱n isi o̱he̱n si e̱seo̱he̱n isi Oise̱le̱bua lo̱ re̱ ne̱ me̱n o̱hio̱ si obia si utotomi so̱i. ⁸ Oise̱le̱bua ri o̱li ohan na ne̱me̱n, i re̱ chio̱n o̱lo̱ kpoto̱i vbi use̱ si eia ere̱me̱n le fuain si Oise̱le̱bua. O̱li ohan na ikhi li re wewi eta lo̱se̱n la kha meti hoto̱i efe si Kristi yi ekhe̱n Ijentais. ⁹ Ohan li Oise̱le̱bua wuin ne̱me̱n li khi, li re̱ wuin idianre gboo lagbo̱n ere̱me̱n re̱ e̱n emi li amama si Oise̱le̱bua u. Oise̱le̱bua lo̱ mi emi ere̱me̱n ri o̱lamama he re za vbi orele̱ide̱ re̱ re. ¹¹ Ari o̱li amama vbie̱ vbi egbe si iwowo, li elian ragbon shan bi utotomi vbi ukhumiemi re̱ e̱n ukpode̱ ere̱me̱n isi ewain isi Oise̱le̱bua i zegbe. ¹⁰ O̱na o̱ o̱ de o̱vbo̱ vbi amama so̱i re̱ za vbi e̱ghe̱ lo̱i mo̱in ire̱so re̱ re lo̱ u shain vbi Jesu Kristi, O̱lo̱mo̱e̱nmain. ¹² Vbi e̱ke̱in Jesu main mo̱in o̱kan, aso̱i egbe bi aduiduan o̱hio̱ si idiegbean vbi o̱in. ¹³ Ebo̱kere̱ ri na, i lo̱ e̱vba li vba i o̱ mo̱in o̱e̱me̱n , vb'o̱hio̱ isi ioya vb'o̱hio̱ vba, lo̱ chie̱n o̱khai vba. ¹⁴ O̱hio̱ si o̱na ire̱ de igua me̱n re̱ yi Oise̱le̱bua, ¹⁵ ebi uanmi ere̱me̱n vbi Okhumieimi bi agbo̱n za wuin eni. ¹⁶ I li ero̱mo̱n lo̱i re̱ yi vba ebi e̱fe si o̱khai so̱i iri, li vba re̱ mo̱in uzezemi bi utotomi lo̱ za vbi Etin so̱i lo̱ ri vba e̱ke̱n egbe. ¹⁹ I li ero̱mo̱n khi Kristi lo̱ ovbudu vba dia re̱ shan vbi aduidu an, li vba re̱ fi ii wuoto̱i bi afije̱n vbi ihume̱ke̱n so̱i. ¹⁸ Vba mo̱in uzezemi li vba re̱ meti mo̱in a wun e̱o kuere, de ba eno̱i ere̱me̱n le mieho̱n, emi lo̱ chie̱n uvbe̱mi, urere mi udami biu ude gbuu. ¹⁷ Bi, li vba re̱ e̱n ihume̱ke̱n si Kristi, lo̱ le̱ emilameti e̱n bi li vba mo̱in uvo̱nmi si emi ere̱me̱n lo̱ vbi isi Oise̱le̱bua. ²¹ Eyan, re̱ yi o̱lo̱ lo̱ meti u rai emi ere̱me̱n li mai mian da mai o'o, ze̱in elabi utotomi so̱ lo̱bia vbi egbe main, ²⁰ okhai o̱ re̱ yo̱i vbi ijo̱ so̱i, bi Jesu Kristi re̱ yi uami ere̱me̱n re̱le̱ re̱le̱. Ise̱