1 Inaha tahanya abe nangoto niho lati hula iruhi niho Yesu Kristo. 2 Nehoiha ho Holohailong ho hisu niho Yesu Kristo ahisiarahi ne esabita te hoiha ho hepalita ho noho yeyi. 3 Nasinge nofa obu nichihita igiemi to nanyalan niho nakwan, ehon Najyok. Irasulu ngete Iha langete nikialare hon hepal ojo ongida ngete ora aheyalita hepalita, cebu ngete ho nahidayarus nepalita nikwan. 4 Ihon ngete anya ojo ongida nareji hechihita obwoni niho jie, nyuo hati to nawahan ho Lohailong. 5 Lati hula omanya to nakwan ihwanahini natajio hosing niho nareji ho Kwan, ati lati hula omanya to Nolohailong ihwanahini natajio hosing niho nareji ho Lohailong. 6 Nahigigilita hokwan ngete nayeyi, nyuo hati nahigigilita ho Lohailong ngete nahisu ho nayomo. 7 To nanyuo nahigigilita ho nakwan obu owak Najyok, obu ijifito nechihita ho kwan, kuya otum. 8 Lati hula obwoni nikwan obu otum itokwame Najyok. 9 Nyuo hati,abu te ibwanata nikwan, ati niho no Lohailong, nabwon natarihe ojo itwongo no Lohailong ho Najyok nihote. Lobo labwon lobo latwani la obe ho no Lohailong ho Kristo, obu ngete ora loho Yesu. 10 Nabwon Kristo nihoji, oye nakwan to nepal nyuo hati no Lohailong isu to nangidari. 11 Nabwan no Lohailong ho la itubuhu Yesu to yeyi, ngete la itubuhu Kristo to yeyi isiarahi hadi nahisu nakwanite hote huja omudangi to NoLohailong hongete, na omanya nihote. 12 Hilasira, ijie lamongijiok, nyuo hati obu to nakwan nimanyari to nakwan. 13 Nemanya iji to nakwan, inyiha iji nayeyi, nyuo hati nara to no Nolohailong ihwanahi ji negiemata ho kwan niyeyi, iji ho nahisu. 14 To ho olwaji hula oduhe to no Lohailong ho Najyok, sing hula lemusak ho Najyok. 15 Obu te ihorihis nolohailong ho twara hari ojo ongida ite ibayangata. Nyuo hati ihorihisite nolohailong ho rahan emusak, to na yo hojie ojo,"Baba,Monye!" 16 Ora no Lohailong ahabiahani niho nolohailongi hojie ojo ohira ijie emusak ho Najyok . 17 Nahira jie ahemusak ho Najyok, ahira ijie ahalunyok, nahalunyok ho Najyok. Ohitilahini ijie ahalunyok ho Kristo, nahitegiemi ije tarahe ho ngete ojo ongida ohitokwati jie hongete. 18 Ihwanahi ne ojo nahitegiama noho tahanya obu ongida nihitekialarahinere ho nakwatan naba iramahise niho jie. 19 Nasinge na itilasi nibia,itilasu nahitelehiso no ho lemusak ho Najyok. 20 Hihwanahino fa nabia na obu ongida, obu lora to nawahan hongete nyo hati to nawaha ho twani la obeu ngete. 21 Ora to nahiruk no tarihe ojo nabia to nakwan ho ngete italahini hadi to lomudanganyere, cebu iyeno nahisabita niho nakwatan ho lemusak ho Najyok. 22 Ohijien ijie ojo nabia fad obwon namiajan ho tahanya. 23 Obu lora nahama, nyuo hati ije to nakwanite hojie, hula ohichak bwanan ho No lohailong-otianye to namiajan nikwanite hosing, itilase nahiyaru, nahitalahino ho kwanite hojie. 24 Tanya hiruk, ahitalahini ijie.Nasinge na ohiruk ijie ojo olotu hadi hobu oteli, latwani la itilasu to nahiruk itilasu nasinge na otel ngete. 25 Ati nahiruk ijie nareji huja obu jie ohitel, ongida ohitilasu to nariajan. 26 Olwak nolohailong ne niama hojie.Obu jie ohijien tatali ijie ohimojo, nyuo hati No lohailong omojo tojie bebe. 27 Ngete la otahito nataji ojien nahigigilo ho Lohailong, to nanyuo omojo ngete tojie laheruhok to nawahan ho Najyok. 28 Ohijien ijie ojo lati hula okwame Najyok, igiame nareji fad to nangidari, lati hula ongeleni to nahigiama. 29 Lati hula otel ngete, isiarahi cebu ngete ihwanahini sing nikialare Heha langete, ojo ongida ngete ora alokang nihiji ho hilasira hula oluaji. 30 Lati hula isiarahi ngete, ongeleu cebu ngete. Lati hula ongeleu ngete, lati hula ongeleu ngete, olahahi ngete. Lati hula olahahi ngete, itokwat cebu ngete sing. 31 Nanyuo hati bejie ohitenyu to hunya reji?Nara Najyok to jie, ngai hati hatum oswa nihojie? 32 Latwani la obu isisio lonyi nyuo hati isiarahi ngete tojie fad, tatali ba ngete ho ngete harabito ohisiarahi ijie nareji fad naharus? 33 Ngai hadi litwob lati hula onyumuni?Najyok ngete longoto. 34 Ngai ngete la ongoto? Kristo ngete loye tojie, cebu na obolo ilany naja,itubuhuni fa cebu ngete. Ilanyu ngete ho Najyok harabito nimaji na obayangi, cebu ngete lomojo tojie. 35 Ngai hatum ohibek ijie tokwama ho Kristo?Nahitegemita, kuya nagigigilita, nahifadarita, nahure, kuya nadaha longature, kuya narohoji kuya nanyaliru? 36 To ho igierehini ojo, "To nangidari hojie ohifadariijie. Ohitarahi fa ijie ehoriangi huja ofue ngoto." 37 Niho hunya reji fad ohira ijie ahelanyak la haramok to ngte la ohikwama ijie. 38 Eruk ne ojo kuya nayeyi, kuya nahisu, kuya anjeloji, kuya gala, kuya nareji huja obwoni, kuya nareji huja ofwonise, kuya nagolon, 39 kuya nahadori kuya newudori, kuya nasinge ibwo na obieni otum ohipek ijie niho nakwama ho Najyok na obwon niho Yesu Kristo Hobu hojie.