¹ Tahanya ijie hula ohigol ongida ijie ohidik naniama ho lahaniamak, cebu ongida obe ohitokwama nakwanitwe hojie. ² Ikie latwani lobo nihojie itokwama haletini hongete la omanya niger hongete ongida itoboloru ngete. ³ Dobu Christo obu fa itokwama nakwan hongete. Nyuo hati, to ho igierehinerete, "Nemorita hehule ohimori ite ohuyarahine niho ne. ⁴ "Toho nasinge nofa igierehini berien igierehini to nahiramahiso hojie ojo ongida ora to nariajan ho cebu to nahisingita ho buk ongida ijie ohibwon ho nagolon. ⁵ Tahanya iko Najyok ho riajan cebu Najyok ho hitotoso ohisiarahi ite ibwanata ho negigilita huja okialare to owak Kristo. ⁶ Hatum ngete ihon anya ojo ongida ite tonohou abito otum imojete to nahutuk abito Najyok cebu Monye ho Hobu hojie Yesu Kristo. ⁷ Inaha, ifwotusu nakwanite hote, to ho ifuotinere Kristo ite, niho nahitokwata ho Najyok. ⁸ Toho ajo ne ojo ihwanahini fa Kristo ahegiamani ho laheruhok nimaji ho tarihe noho Najyok. Ihon fa ngete anya ojo ongida hunofa hitinita isieri niho monye, ⁹ cebu niho paganoji ongida itokwate Najyok to namehino ho ngete. To ho igierehini, "Inaha, esiarahi be ne nahitokwata nihote nihiji ho paganoji hona hiruho nahitokwata nifure hoji." ¹⁰ Hari ojo, "Tokwamati, ite paganoji,ho lati ho ngete." ¹¹ Cebu hari, "Itokwatati Najyok, ite fad paganoji; ikie lati fad tokwate ngete." ¹² Hari, ojo Isaya, "Obwon hadi namoriti ho Yesse, cebu lobo la olotu ilanyiniso paganoji. Obwoni hadi paganoji ho nagolon niho ngete." ¹³ Ikie Najyok ho golon itufutahi nihote nakwama cebu nayomo ho hiruk, ojo ongida ite ibwanata ho nagolon,to nagolon ho Lohailong Na-Onyila. ¹⁴ Ne to nakwan hone eruk ne to te, hilasira hone. Eruk ne ojo ite cebu to nakwanite hote ibuanatate ho nangidari, ifwotata ho najianan. Eruk ne ojo itumata cebu te itongoto nakwanite hote. ¹⁵ Nyuo hati egiero ne to nahingereji bebe nihote tebwo nasinge nitihuyahinere ite hari, to neyalita nofa isiarahi Najyok niho ne. ¹⁶ Anya neyalita na ojo ongida ne ara ahegiamani ho Yesu Kristo la osulari niho paganogi, nihisiarahinere apadiri noho Efanjelio ho Najyok. Ongida ne igiama anyani nihisiarahinere Najyok iruk paganoji, isieri niho Najyok to Nolohailong Na onyila. ¹⁷ Nakwama ho ne niho Yesu Kristo ho nareji ho Najyok. ¹⁸ Habu ne atum atianya ibwo nasinge mayak nareji huja atuhohi Christo niho ne no ho nabayangi ho paganogi.Sing hunya nareji huja igiemi to natianya ho nahigiama, ¹⁹ to nagolon ho hiramahiso cebu nadwaran, cebu to nagolon ho Lohailong Na-Onyila. Ongida anya fa to Yerusalemu, cebu ilur many Illirikum, ongida ne egiama niho Efanjelio ho Yesu. ²⁰ Ora nawahan ho ne nihitokwatari na Efanjelio, nyuo hati obu nimaji na ojieniterete Kristo to nafure, ongida ne ebe efahahi nemaji ho lobo latuani. ²¹ To ho igierehinerete: "Niho ehule obe ihoni na orohoho oteli hadi ngete, cebu niho hula obu itiyiri ofwoni hadi jianan." ²² Inaha, ahitihi fa cebu ne noholongi huja oluaji nilotinere nihote. ²³ Nyuo hati tahanya abe ne abwon hebwo namaji nihanya hang, cebu alama nahitilasito ho ne nelotinere to hoda hote. ²⁴ Nomo na lo ne to ho Spania, egigilo ne nilojiere harinya hote, cebu ojo ongida ohisulari ne harinya hote, nomo natuhohini nahilahita ho ne hote. ²⁵ Nyuo hati tahanya adaha ne to ho Yerusalem nihigiamari niho laheruhok. ²⁶ Ongida fa nakwama niho Makedonia ho niho Achaia nihitutufahinere hinehe neluahita to nahaparitak nihiji heruk ho Yerusalamu. ²⁷ Ee, ora fa angidari hosing, cebu ora hising amongijok. Nahori paganoji nareji holohailong hosing, otum cebu sing igiemi niho nareji huja oleyeji. ²⁸ Inaha, nomo natuhohi ne anya cebu eramahi nihosing, alotu hadi ne da hote Spania. ²⁹ Ajien ne ojo lobo nalotu ne nihote, alotu hadi ne la efut ho nejohite ho Kristo. ³⁰ Tahanya, elelia ne nihote hilasire, to Hobu hojie Yesu Kristo, cebu to nakwama ho Lohjailong, ojo ongida ite ibuanata ho ne harabito nimojita hote niho Najyok to ne. ³¹ Tomojete ojo ongida ohiluahini ne niho ehulew obu obayangi hula obwoni Yudea, cebu ongida iruhi nahigiama ho ne to Yerusalem niho laheruhok. ³² Tomojete ojo ongida ne alotu nihote to nakwama to nawahan ho Najyok, cebu ojo ongida ne hote harabitoohihorihi nawiri. ³³ Ikie Najyok ho yomo obwon nihote fad. Amen.